ຂ່າວຫຼ້າສຸດ

ຖ້າສ້າງແຜນແມ່ບົດຈັດສັນທີ່ດິນບໍ່ລະອຽດ ເປັນຊ່ອງວ່າງໃນການນຳໃຊ້ທີ່ດິນຜິດກົດໝາຍ

215 12 ມິ.ນ. 2018 ຂ່າວໜ້າ​ໜຶ່ງ
ຖ້າສ້າງແຜນແມ່ບົດຈັດສັນທີ່ດິນບໍ່ລະອຽດ ເປັນຊ່ອງວ່າງໃນການນຳໃຊ້ທີ່ດິນຜິດກົດໝາຍ

ກອງ​ປະຊຸມ​ສະໄໝ​ສາມັນ ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 11 ມິຖຸນາ 2018 ເປັນ​ປະທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະທານ​ສະພາ​ແຫ່ງ​ຊາດ ມີ​ທ່ານ ສົມ​ມາດ ​ພົລ​ເສນາ ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດ​ລ້ອມ ພ້ອມ​ດ້ວຍ​ບັນດາ​ສະມາ​ຊິກ​ສະພາ​ແຫ່ງ​ຊາດ (​ສສຊ) ປະຈຳ​ເຂດ​ເລືອກ​ຕັ້ງ​ທົ່ວ​ປະເທດ​ເຂົ້າ​ຮ່ວມ.

ໃນ​ກອງ​ປະຊຸມ ​ສສຊ ໄດ້​ຮັບ​ຟັງ​ບົດ​ລາຍ​ງານ​ຂອງ​ລັດຖະບານ​ກ່ຽວ​ກັບ​ແຜນ​ພັດທະນາ ແຜນ​ແມ່​ບົດ​ຈັດ​ສັນ​ທີ່​ດິນ​ແຫ່ງ​ຊາດ ຈາກ​ທ່ານ​ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ເຊິ່ງ​ທ່ານ​ໄດ້​ກ່າວ​ວ່າ: ພາຍຫຼັງ​ທີ່​ສະຖາປະນາ​ເປັນ ​ສປປ ລາວ ພັກ-ລັດ​ເຮົາ​ໄດ້​ມີ​ທັດສະນະ​ຖືກຕ້ອງ ແລະ ເຫັນ​ໄດ້​ເຖິງ​ຄວາມ​ສຳຄັນ​ກ່ຽວ​ກັບ​ບັນຫາ​ທີ່​ດິນ​ແຕ່​ຫົວທີ ຈຶ່ງ​ໄດ້​ວາງ​ນະໂຍບາຍ ອອກ​ກົດໝາຍ ແລະ ລະບຽບ​ການ​ຕ່າງໆ​ກ່ຽວ​ກັບ​ທີ່​ດິນ​ມາ​ຕະຫຼອດ ປະຊາຊົນ​ບັນດາເຜົ່າ​ມີ​ຄວາມ​ຕື່ນ​ຕົວ​ເປັນ​ເຈົ້າ​ການ​ຕໍ່​ທີ່​ດິນ ປົກ​ປັກ​ຮັກສາ ນຳ​ໃຊ້ ແລະ ມີ​ການ​ພັດທະນາ​ທີ່​ດິນ​ຫຼາຍ​ຂຶ້ນ ເພື່ອ​ນຳ​ເອົາ​ຜົນ​ປະໂຫຍດ​ໃຫ້​ຄອບຄົວ ແລະ ປະເທດ​ຊາດ ລັດ ແລະ ປະຊາຊົນ​ເຮົາ​ໄດ້​ນຳ​ໃຊ້​ທີ່​ດິນ​ເຂົ້າ​ໃນ​ເປົ້າ​ໝາຍ​ຕ່າງໆ ເຊັ່ນ: ທີ່​ດິນ​ສຳລັບ​ກະສິກຳ ສຳລັບ​ເປັນ​ດິນ​ປ່າໄມ້ ອຸດສາຫະກຳ ປຸກ​ສ້າງ ແລະ ອື່ນໆ ເຖິງ​ຢ່າງໃດ​ກໍ່​ດີ ໃນ​ການ​ປະຕິບັດ​ຕົວ​ຈິງ ມາ​ຮອດ​ປັດຈຸບັນ​ເຫັນ​ວ່າການ​ຄຸ້ມ​ຄອງ​ທີ່​ດິນ ກໍ່​ຍັງ​ເກີດ​ຫຼາຍ​ບັນຫາ​ສັບສົນ ເປັນຕົ້ນ ການ​ຫັນປ່ຽນ​ປະເພດ​ທີ່​ດິນ​ຍັງ​ບໍ່​ທັນ​ໄດ້​ປະຕິບັດ​ຕາມ​ກົດໝາຍ​ຢ່າງ​ເຂັ້ມ​ງວດ ໂດຍ​ສະເພາະ ຍ້ອນ​ການ​ສ້າງ​ແຜນ​ແມ່​ບົດ​ຈັດ​ສັນ​ທີ່​ດິນ​ແຫ່ງ​ຊາດ ແລະ ການ​ວາງ​ແຜນ​ນຳ​ໃຊ້​ທີ່​ດິນ​ຂອງ​ຂະແໜງການ​ຍັງ​ບໍ່​ທັນ​ສຳເລັດ ຈຶ່ງ​ເປັນ​ສາເຫດ​ເຮັດ​ໃຫ້​ເກີດ​ມີ​ຊ່ອງ​ວ່າງ​ໃນ​ການ​ນຳ​ໃຊ້​ທີ່​ດິນ ​ທີ່​ມີ​ລັກສະນະ​ຟຸມ​ເຟືອຍ​ມີ​ການ​ຈັບຈອງ​ທີ່​ດິນ​ປ່າ​ສາທາລະນະ​ຢ່າງ​ສະ​ຊາຍ ມີ​ການ​ຫຼົບ​ຫຼີກ​ການ​ເສຍ​ຄ່າ​ທຳນຽມ​ທີ່​ດິນ​ດ້ວຍ​ຮູບ​ການ​ຕ່າງໆ ການ​ຕົກລົງ​ແບ່ງປັນ​ທີ່​ດິນ​ລັດ​ໃຫ້​ບຸກຄົນ​ນຳ​ໃຊ້​ຢ່າງ​ຂາດ​ຕົວ​ທີ່​ບໍ່​ຖືກຕ້ອງ​ຕາມ​ກົດໝາຍ ​ເກີດ​ຂຶ້ນ​ຢ່າງ​ແຜ່​ຫຼາຍ ເຊິ່ງ​ມີ​ຄວາມ​ຈຳເປັນ​ຕ້ອງ​ໄດ້​ແກ້​ໄຂ​ໂດຍ​ໄວ ເພາະ​ຕິດ​ພັນ​ຄວາມ​ເຊື່ອ​ໝັ້ນ​ຕໍ່​ອົງການ​ຄຸ້ມ​ຄອງ​ທີ່​ກ່ຽວຂ້ອງ ກໍ່​ຄືເສື່ອມ​ສັດທາ​ຕໍ່​ການ​ນຳພາ​ລວມ​ຂອງ​ພັກ.

ໂດຍ​ອີງໃສ່​ມະຕິ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ວ່າ​ດ້ວຍ​ການ​ເພີ່ມ​ທະວີ​ວຽກ​ງານ​ຄຸ້ມ​ຄອງ ແລະ ພັດທະນາ​ທີ່​ດິນ​ໃນ​ໄລຍະ​ໃໝ່ ເຊິ່ງ​ໃຫ້​ສ້າງ​ແຜນ​ຍຸດ​ທະ​ສາດ ແລະ ແຜນ​ນຳ​ໃຊ້​ທີ່​ດິນ​ແຕ່​ລະ​ປະເພດ​ໃຫ້​ສົມ​ເຫດ​ສົມ​ຜົນ ໂດຍ​ຮັກສາ​ເນື້ອທີ່​ດິນ​ທີ່​ມີ​ປ່າໄມ້​ປົກ​ຫຸ້ມ​ກວມ 70% ໃນ​ປັດຈຸບັນ ເນື້ອທີ່ຄວາມ​ປົກ​ຫຸ້ມ​ຂອງ​ປ່າໄມ້​ມີ​ປະມານ 59% ໃນ​ນີ້ ລວມ​ທັງ​ຢູ່​ໃນ ແລະ ນອກ​ສາມ​ປະເພດ​ປ່າ ສະນັ້ນ ​ເພື່ອ​ບັນລຸ​ເປົ້າໝາຍ​ທີ່​ກຳນົດ​ໄວ້​ໃນ​ມະຕິ X ຂອງ​ພັກ ຈຶ່ງ​ຈຳເປັນ​ຕ້ອງ​ໄດ້​ມີ​ມາດ​ຕະການ​ຢ່າງ​ຈະແຈ້ງ​ໃນ​ການ​ຄຸ້ມ​ຄອງ ແລະ ປົກ​ປັກ​ຮັກສາ​ປ່າໄມ້​ເຊັ່ນ: ຕ້ອງ​ໄດ້​ເຂັ້ມ​ງວດ​ປົກ​ປັກ​ຮັກສາ​ປ່າໄມ້​ທີ່​ມີ​ຢູ່​ບໍ່​ໃຫ້​ຖືກ​ທຳລາຍ​ຕໍ່​ໄປ​ອີກ ທັງ​ຢູ່​ໃນ ແລະ ນອກ​ເຂດ​ສາມ​ປະເພດ​ປ່າ ຕ້ອງ​ຮີບ​ຮ້ອນ​ກຳນົດ​ເຂດ​ປ່າໄມ້​ທີ່ຢູ່​ນອກ​ສາມ​ປະເພດ​ປ່າ​ໃຫ້​ສຳເລັດ​ໂດຍ​ໄວ ເພື່ອ​ຮັກສາ​ປ່າໄມ້​ດັ່ງກ່າວ​ບໍ່​ໃຫ້​ຖືກ​ທຳລາຍ ຫຼື ຫັນປ່ຽນ​ເປັນ​ທີ່​ດິນ​ປະເພດ​ອື່ນ ຕ້ອງ​ໄດ້​ເພີ່ມ​ທະວີ​ເອົາໃຈໃສ່​ຟື້ນ​ຟູ​ບູລະນະ​ປ່າໄມ້​ທີ່​ຊຸດໂຊມ ຫຼື ເຂດ​ຂາດ​ປ່າ​ຊົ່ວຄາວ​ໃນ​ສາມ​ປະເພດ​ປ່າ​ໃຫ້​ອຸດົມສົມບູນ​ຄືນ ຈັດ​ສັນ​ຄືນໃໝ່​ເນື້ອທີ່​ປຸກ​ສ້າງ ແລະ ເນື້ອທີ່​ທຳ​ການ​ຜະລິດ​ທີ່​ນອນ​ໃນ​ສາມ​ປະເພດ​ປ່າ ເພື່ອ​ບໍ່​ໃຫ້​ມີ​ການ​ຂະຫຍາຍ​ພື້ນ​ທີ່​ນຳ​ໃຊ້​ໃນ​ເຂດ​ດັ່ງກ່າວ​ອອກ​ຕື່ມ ພ້ອມ​ທັງ​ສົ່ງເສີມ​ການ​ປູກ​ໄມ້​ອຸດສາຫະກຳ ເພື່ອ​ທົດ​ແທນ​ການ​ຂຸດ​ຄົ້ນ​ໄມ້​ຈາກ​ປ່າ​ທຳ​ມະ​ຊາດ ສົ່ງເສີມ​ການ​ປູກ​ໄມ້​ຢູ່​ໃນ​ເຂດ​ຕົວ​ເມືອງ​ໃຫ້​ຫຼາຍ​ຂຶ້ນ​ຕາມ​ທິດ​ພັດທະນາ​ຍືນ​ຍົງ ແລະ ສີຂຽວ.

ພາຍຫຼັງ​ທີ່​ໄດ້​ຮັບ​ຟັງ​ກ່ຽວ​ກັບ​ແຜນ​ແມ່​ບົດ​ຈັດ​ສັນ​ທີ່​ດິນ​ແຫ່ງ​ຊາດ ​ສຊຊ ໄດ້​ຜັດປ່ຽນ​ກັນ​ຂຶ້ນ​ປະກອບ​ຄຳ​ຄິດ​ເຫັນ​ໃສ່​ແຜນ​ແມ່​ບົດ​ສະບັບ​ດັ່ງກ່າວ​ຢ່າງ​ກົງ​ໄປ​ກົງ​ມາ ພ້ອມ​ທັງ​ໃຫ້​ທ່ານ​ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ໃຫ້​ຄວາມ​ກະຈ່າງ​ແຈ້ງ​ຕໍ່​ຂໍ້​ຊັກ​ຖາມ​ຕ່າງໆ​ຂອງ ​ສສຊ ໃນ​ແຜນ​ແມ່​ບົດ​ສະບັບ​ນີ້.

ຂ່າວທີ່ກ່ຽວຂ້ອງ