ມີຜູ້ເສຍຊີວິດຍ້ອນອຸບັດຕິເຫດ ຫຼາຍກວ່າ 400 ຄົນ

171 13 ມິ.ນ. 2018 ຂ່າວໜ້າ​ໜຶ່ງ

ທ່ານ ພົນ​ຕີ ສົມ​ແກ້ວ ສີ​ລາ​ວົງ ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ໄດ້​ລາຍ​ງານ​ກ່ຽວ​ກັບ​ບັນຫາ​ອຸບັດ​ຕິ​ເຫດ​ ທີ່​ເກີດ​ຂຶ້ນ​ຢູ່​ຕາມ​ເສັ້ນທາງ​ໃນ​ທົ່ວ​ປະເທດ ຕໍ່​ກອງ​ປະຊຸມ​ສະໄໝ​ສາມັນ ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ໂດຍ​ຢືນຢັນ​ວ່າ: ໃນ​ໄລຍະ​ຜ່ານ​ມາ ​ໄດ້​ເກີດ​ອຸບັດ​ຕິ​ເຫດ​ຕາມ​ເສັ້ນທາງ​ຢ່າງ​ຕໍ່​ເນື່ອງ ແລະ ຢູ່​ໃນ​ອັດຕາ​ສ່ວນ​ສູງ ສ້າງ​ຜົນ​ເສຍ​ຫາຍ​ຕໍ່​ຊີວິດ ສຸຂະພາບ ຊັບ​ສິນ​ຂອງ​ລັດຂອງ​ປະຊາຊົນ​ຢ່າງ​ຫຼວງຫຼາຍ ເຮັດ​ໃຫ້​ມີ​ຄົນ​ເສຍ​ຊີວິດ ແລະ ເສຍ​ອົງຄະ​ເປັນ​ຈຳນວນ​ບໍ່​ໜ້ອຍ ສົ່ງ​ຜົນ​ສະທ້ອນ​ຕໍ່​ການ​ພັດທະ​ນາ​ເສດຖະກິດ-ສັງຄົມ ໃນ​ຜ່ານ​ມາ ເຖິງ​ວ່າ​ຈະ​ມີ​ກົດໝາຍ ລະບຽບ ດຳລັດ ແລະ ນິຕິ​ກຳ​ທີ່​ກ່ຽວຂ້ອງ​ກັບ​ວຽກ​ງານ​ດັ່ງກ່າວ ໂດຍ​ຜ່ານ​ການ​ໂຄສະນາ-ປະຊາສຳພັນ ແນະນຳ ສຶກ​ສາ​ອົບຮົມ​ດ້ວຍ​ຫຼາຍ​ວິທີ ແລະ ຫຼາຍ​ຮູບ​ການ ແຕ່​ອຸບັດ​ຕິ​ເຫດ​ກໍ່​ຍັງ​ບໍ່​ຫຼຸດ​ລົງ ໃນ​ປີ 2017 ມີ​ອຸບັດ​ຕິ​ເຫດ​ເກີດ​ຂຶ້ນ​ໃນ​ຂອບ​ເຂດ​ທົ່ວ​ປະເທດ​ທັງ​ໝົດ 5.868 ເລື່ອງ ພາຫະນະ​ເປ່​ເພ 10.739 ຄັນ ຄົນ​ຖືກ​ບາດເຈັບ 9.640 ຄົນ ແລະ ເສຍ​ຊີວິດ 1.053 ຄົນ ສະເລ່ຍ​ມື້ໜຶ່ງ​ເສຍ​ຊີວິດ 3,9 ຄົນ ສະເພາະ​ນະຄອນຫຼວງ​ວຽງ​ຈັນ​ເກີດ​ຂຶ້ນ​ທັງ​ໝົດ 1.521 ເລື່ອງ ພາຫະນະ​ເປ່​ເພ 3.129 ຄັນ ບາດເຈັບ 2.385 ຄົນ ແລະ ເສຍ​ຊີວິດ 251 ຄົນ ແຂວງ​ທີ່​ເກີດ​ຫຼາຍ​ກວ່າ​ໝູ່ ຄື: ນະຄອນຫຼວງ​ວຽງ​ຈັນ ສະຫວັນ​ນະ​ເຂດ ຈຳປາ​ສັກ ຫຼວງ​ພະ​ບາງ ແລະ ແຂວງ​ອຸດົມ​ໄຊ ສະເພາະ​ອຸບັດ​ຕິ​ເຫດ​ພາຍ​ໃນ 4 ເດືອນ​ປີ 2018 ມີ​ທັງ​ໝົດ 2.341 ເລື່ອງ ພາຫະນະ​ເປ່​ເພ 4.067 ຄັນ ບາດເຈັບ 3.816 ຄົນ ແລະ ເສຍ​ຊີວິດ 429 ຄົນ ອຸບັດ​ຕິ​ເຫດ​ເກີດ​ຫຼາຍ​ກວ່າ​ໝູ່​ກໍ່​ມີ​ບັນດາ​ຕົວ​ເມືອງ​ໃຫຍ່​ຂອງ​ນະຄອນຫຼວງ​ວຽງ​ຈັນ ສະຫວັນ​ນະ​ເຂດ ແລະ ແຂວງ​ຈຳປາ​ສັກ ພາຫະນະ​ທີ່​ເກີດ​ອຸບັດ​ຕິ​ເຫດ​ຫຼາຍ​ສ່ວນ​ໃຫຍ່​ແມ່ນ​ປະເພດ​ລົດຈັກ ແລະ ວັນ​ເວລາ​ທີ່​ມັກ​ມີ​ອຸບັດ​ຕິ​ເຫດ​ເກີດ​ຂຶ້ນ​ຫຼາຍ​ກວ່າ​ໝູ່ ຄື: ວັນ​ສຸກ ຫາ ວັນ​ອາທິດ ແຕ່​ເວລາ​ປະມານ 17:00 ຫາ 21:30 ໂມງ.

ທ່ານ​ລັດຖະມົນຕີ​ຢືນຢັນ​ຕໍ່​ສະພາ​ຕື່ມ​ວ່າ: ຈະ​ສຸມ​ໃສ່​ໂຄສະນາ​ລະບຽບ​ກົດໝາຍ​ກ່ຽວ​ກັບ​ການ​ສັນຈອນ ການ​ຂົນສົ່ງ​ທາງບົກ ແລະ ການ​ປົກ​ປັກ​ຮັກສາ​ທາງ​ຫຼວງ​ ແລະ ເອກະສານ​ທີ່​ກ່ຽວຂ້ອງ​ອື່ນໆ​ທີ່​ປິ່ນ​ອ້ອມ​ວຽກ​ງານ​ໃນ​ການ​ໃຊ້​ລົດ-ໃຊ້​ຖະໜົນ​ດ້ວຍ​ຮູບ​ການ​ຕ່າງໆ​ໃຫ້​ແກ່​ສັງຄົມ​ໃນ​ຂອບ​ເຂດ​ທົ່ວ​ປະເທດ ໄດ້​ມີ​ຄວາມ​ຮັບ​ຮູ້ ແລະ ພ້ອມ​ກັນ​ປະຕິບັດ​ຢ່າງ​ເຂັ້ມ​ງວດ ໂດຍ​ສະເພາະ ນຳ​ເອົາ​ຫຼັກສູດ​ຄວາມ​ປອດ​ໄພ​ເຂົ້າ​ໃນ​ການ​ຮຽນ​ແຕ່​ຊັ້ນ​ປະຖົມ​ຫາ​ມັດທະຍົມ​ຕອນ​ປາຍ ສືບຕໍ່​ລະບາຍ​ການ​ສັນຈອນ​ທີ່​ແອ​ອັດ​ໃນ​ເວລາ​ຮີບ​ດ່ວນ ສຸມ​ໃສ່​ແກ້​ໄຂ​ໂຄງການ​ຫຼຸດຜ່ອນ​ອຸບັດ​ຕິ​ເຫດ​ຢ່າງ​ແຂງແຮງ ສຸມ​ໃສ່​ກວດກາ​ແກ້​ໄຂ​ລົດ​ນຳ​ເຂົ້າ​ບໍ່​ຖືກຕ້ອງ ລົດ​ບໍ່​ມີ​ປ້າຍ ປ້າຍ​ບໍ່​ຖືກຕ້ອງ ທະບຽນ​ບໍ່​ຖືກຕ້ອງ ແລະ ລົດ​ທີ່​ບໍ່​ຮັບປະກັນ​ເຕັກນິກ ສືບຕໍ່​ປັບປຸງ​ກຳລັງ​ຕຳຫຼວດ​ຈະລາຈອນ ແລະ ເຄື່ອງຮັບ​ໃຊ້​ວຽກ​ງານ​ດັ່ງກ່າວ​ໃຫ້​ມີ​ຄວາມ​ເໝາະ​ສົມ​ຕົວ​ຈິງ.

ຂ່າວທີ່ກ່ຽວຂ້ອງ