ຂ່າວຫຼ້າສຸດ

ສ ອາ​ເມ​ຣິ​ກາ ສືບຕໍ່​ປະຕິບັດ​ການ​ປິດ​ລ້ອມ​ຕໍ່​ບັນດາ​ບໍລິສັດ ແລະ​ບຸກຄົນ​ຂອງ​ຣັດ​ເຊຍ

131 13 ມິ.ນ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ສືບຕໍ່​ປະຕິບັດ​ການ​ປິດ​ລ້ອມ​ຕໍ່​ບັນດາ​ບໍລິສັດ ແລະ​ບຸກຄົນ​ຂອງ​ຣັດ​ເຊຍ

     ກະຊວງ​ການ​ເງິນ​ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້ເມື່ອ​ວັນ​ທີ 11 ມິຖຸນາ​ນີ້ ເຖິງ​ການ​ປິດ​ລ້ອມ ຕໍ່​ບຸກຄົນ 3 ຄົນ ແລະ 5 ອົງການ​ຂອງ​ຣັດ​ເຊຍ ຍ້ອນ​ພົວພັນ​ເຖິງ​ການເຄື່ອນໄຫວ​ດ້ານ​ເຕັກ​ໂນ​ໂລ​ຊີ ທີ່​ເຮັດ​ໃຫ້​ເກີດ​ຄວາມ​ເສຍ​ຫາຍ​ຕໍ່ ສ ອາ​ເມ​ຣິ​ກາ ອັນ​ປະກອບ​ມີ​ການ​ຊ່ວຍເຫຼືອ​ວັດ​ສະ​ດຸ ແລະ​ເຕັກ​ໂນ​ໂລ​ຊີ ໃຫ້​ແກ່​ອົງການ​ສືບ​ລາຊະການ​ລັບ​ຂອງ​ຣັດ​ເຊຍ.

    ໃນ​ແຈ້ງ​ການ​ໃໝ່​ນັ້ນ ທ່ານ ສະ​ເຕ​ເວນ ມະນູ​ຊິນ ລັດຖະມົນຕີ​ກະຊວງ​ການ​ເງິນ ສ ອາ​ເມ​ຣິ​ກາ ໃຫ້​ຮູ້​ວ່າ ບັນດາ​ອົງການ​ທີ່​ໄດ້​ຮັບ​ຜົນ​ກະທົບ​ຈາກ​ຄຳ​ສັ່ງ​ປິດ​ລ້ອມ​ໃໝ່ ແມ່ນ​ໄດ້​ປະກອບສ່ວນ​ໂດຍ​ກົງ ໃຫ້​ແກ່​ຂະ​ບວນ​ການ​ຍົກ​ລະດັບ​ເຄືອ​ຂ່າຍ​ສາຍ​ໃຍ​ໃຕ້​ດິນ ແລະ ລະບົບ​ເຄື່ອງ​ຄອມ​ພິວ​ເຕີ​ຂອງ​ຣັດ​ເຊຍ ໃນ​ເມື່ອ​ຮ່ວມ​ມື​ກັບ​ອົງການ​ຄວາມ​ໝັ້ນຄົງ​ຂອງ​ສະຫະພັນ​ຣັດ​ເຊຍ (FSB).

    ບັນດາ​ອົງການ​ຂອງ​ຣັດ​ເຊຍ ທີ່​ຖືກ​ປິດ​ລ້ອມ​ຈາກ​ຄຳ​ສັ່ງ​ປິດ​ລ້ອມ​ໃໝ່​ດັ່ງກ່າວ​ຂອງ  ສ ອາ​ເມ​ຣິ​ກາ ປະກອບ​ມີ​ບໍລິສັດ Digital Security ບໍລິສັດ ERPScan ບໍລິສັດ Embedi ສະ​ຖາ​ບັນ​ຄົ້ນຄວ້າ​ວິທະຍາສາດ Kvant ສະ​ຖາ​ບັນ​ຄົ້ນຄວ້າ Divetechnoservices ໃນ​ຂະນະ​ທີ່ ບຸກຄົນ​ທັງ​ສາມ​ຄົນ​ທີ່​ຖືກ​ປິດ​ລ້ອມ​ນັ້ນ ຕ່າງ​ກໍ​ພົວພັນ​ເຖິງ Divetechnoservices.

 

ຂ່າວທີ່ກ່ຽວຂ້ອງ