ຂ່າວຫຼ້າສຸດ

ອະດີດນັກຮຽນ ມອບເຄື່ອງຊ່ວຍເຫຼືອໃຫ້ປະຊາຊົນປະສົບອັກຄີໄພ

150 13 ມິ.ນ. 2018 ຂ່າວໜ້າ​ໜຶ່ງ
ອະດີດນັກຮຽນ ມອບເຄື່ອງຊ່ວຍເຫຼືອໃຫ້ປະຊາຊົນປະສົບອັກຄີໄພ

ວັນ​ທີ 8 ມິຖຸນາ 2018 ທີ່​ຫ້ອງການ​ປົກຄອງ​ເມືອງ​ຄຳ ແຂວງ​ຊຽງ​ຂວາງ ຄະນະ​ອະດີດ​ນັກຮຽນ​ມັດທະຍົມ​ເມືອງ​ແປກ ວິລະ​ຊົນ​ແຂວງ​ຊຽງ​ຂວາງ ໄດ້​ມອບ​ເຄື່ອງ​ບັນເທົາ​ທຸກ​ໃຫ້​ປະຊາຊົນ​ບ້ານ​ສັນ​ແຟນ ເມືອງ​ຄຳ ແຂວງ​ຊຽງ​ຂວາງ ທີ່​ໄດ້​ຮັບ​ເຄາະ​ຮ້າຍ​ຈາກ​ເຫດການ​ໄຟ​ໄໝ້​ເຮືອນ 32 ຫຼັງ ໃນ​ເດືອນ​ພຶດສະພາ 2018 ຜ່ານ​ມາ ກ່າວ​ມອບ​ໂດຍ​ທ່ານ ວັນນາ ດວງ​ພະຈັນ ຮອງ​ປະທານ​ສູນ​ກາງ​ສະຫະພັນ​ກຳມະບານ​ລາວ ແລະ ກ່າວ​ຮັບ​ໂດຍ​ທ່ານ ວຽງ​ໄຊ ສີວິໄລ ເຈົ້າເມືອງ​ຄຳ ມີ​ພະນັກງານ ແລະ ເຈົ້າ​ໜ້າທີ່​ກ່ຽວຂ້ອງ​ເຂົ້າ​ຮ່ວມ.

ສຳລັບ​ເຄື່ອງ​ທີ່​ນຳ​ມາ​ມອບ​ຄັ້ງ​ນີ້ ປະກອບ​ມີ​ຜ້າຫົ່ມມຸ້ງ ແລະ ອຸປະກອນ​ຮັບ​ໃຊ້​ເຮືອນຄົວ​ທີ່​ຈຳເປັນ ລວມ​ມູນ​ຄ່າ​ທັງ​ໝົດ 12 ລ້ານ​ກີບ ເຊິ່ງ​ການ​ຊ່ວຍເຫຼືອ​ຄັ້ງ​ນີ້​ເຖິງ​ວ່າ​ຈະ​ບໍ່​ຫຼວງຫຼາຍ ແຕ່​ກໍ່​ເປັນ​ການ​ຊ່ວຍ​ບັນເທົາ​ທຸກ​ໃນ​ເບື້ອງ​ຕົ້ນ​ໃຫ້​ຜູ້​ເຄາະ​ຮ້າຍ ແລະ ຍັງ​ເປັນ​ການ​ເສີມ​ຂະຫຍາຍ​ນ້ຳໃຈ​ເອື້ອເຟື້ອ​ເພື່ອ​ແຜ່​ຂອງ​ເຫຼົ່າ​ອະດີດ​ນັກຮຽນ ມັດທະຍົມ​ເມືອງ​ແປກ​ວິລະ​ຊົນ​ທີ່​ເຄີຍ​ມີ​ມູນເຊື້ອ​ຊ່ວຍເຫຼືອ​ພໍ່​ແມ່​ປະຊາຊົນ ແລະ ຮັບ​ໃຊ້​ສູ້​ຮົບ​ໃນ​ປາງ​ສົງຄາມ​ອີກ​ດ້ວຍ.

ໂອກາດ​ນີ້ ທ່ານ​ເຈົ້າເມືອງ​ຄຳ ໄດ້​ລາຍ​ງານ​ສະພາບ​ເຫດການ ແລະ ຄວາມ​ເສຍ​ຫາຍ​ຈາກ​ໄຟ​ໄໝ້ເຮືອນ​ຂອງ​ປະຊາຊົນ 32 ຫຼັງ​ຢູ່​ບ້ານ​ສັນ​ແຟນ ພ້ອມ​ທັງ​ກ່າວ​ສະແດງ​ຄວາມ​ຂອບໃຈ​ມາ​ຍັງ​ຄະນະ​ອະດີດ ນັກຮຽນ​ມັດທະຍົມ​ເມືອງ​ແປກ​ວິລະ​ຊົນ ​ທີ່​ໄດ້​ນຳ​ເອົາ​ເຄື່ອງ​ຊ່ວຍເຫຼືອ​ມາ​ມອບ​ໃຫ້​ປະຊາຊົນ​ຜູ້​ເຄາະ​ຮ້າຍ​ຄັ້ງ​ນີ້ ເປັນ​ການ​ປະກອບສ່ວນ​ໃຫ້​ກຳລັງ​ໃຈ​ແກ່​ຜູ້​ເຄາະ​ຮ້າຍ ແລະ ຫວັງ​ວ່າ​ໂອກາດ​ໜ້າ​ຈະ​ໄດ້​ຮັບ​ການ​ຊ່ວຍເຫຼືອ ຈາກ​ອະດີດ​ນັກຮຽນ​ມັດທະຍົມ​ເມືອງ​ແປກ​ວິລະ​ຊົນ​ຕື່ມ​ອີກ.

ຂ່າວທີ່ກ່ຽວຂ້ອງ