ອະນາໄມຄອງລະບາຍນ້ຳເປື້ອນຢູ່ຕົວເມືອງ ເພື່ອແກ້ໄຂບັນຫານ້ຳຖ້ວມ

127 13 ມິ.ນ. 2018 ຂ່າວໜ້າ​ໜຶ່ງ
ອະນາໄມຄອງລະບາຍນ້ຳເປື້ອນຢູ່ຕົວເມືອງ ເພື່ອແກ້ໄຂບັນຫານ້ຳຖ້ວມ

ເພື່ອ​ແກ້​ໄຂ​ບັນຫາ​ນ້ຳ​ຖ້ວມ ແລະ ນ້ຳ​ອັ່ງ​ຂັງ​ໃນ​ລະດູຝົນ​ຢູ່​ຕົວ​ເມືອງ ນະຄອນຫຼວງ​ວຽງ​ຈັນ ດັ່ງນັ້ນ​ຫ້ອງການ​ຄຸ້ມ​ຄອງ ແລະ ບໍລິການ​ຕົວ​ເມືອງ​ວຽງ​ຈັນ (​ຄບຕ) ໄດ້​ຈັດ​ຕັ້ງ​ປະຕິບັດ​ລວງ​ຄອງ​ລະບາຍ​ນ້ຳ​ເປື້ອນ ເຂດ​ຮ່ອງ​ຂົວ​ຂາວ ເສັ້ນທາງ​ຄູ​ວຽງ ເມືອງ​ສີ​ສັດຕະ​ນາກ ແຕ່​ວົງ​ວຽງ​ວິທະຍາໄລ​ຄອມ​ເຊັນ​ເຕີ​ໄປ​ຫາ​ສາມ​ແຍກ​ຫຼັກ 3 ຖະໜົນ​ທ່າ​ເດື່ອ ມີ​ຄວາມ​ຍາວ 2.100 ແມັດ ແລະ ຮ່ອງນ້ຳ​ແຄມ​ຖະໜົນ​ສຸ​ພານຸ​ວົງ ເມືອງ​ສີ​ໂຄດ​ຕະບອງ ແຕ່​ສາມ​ແຍກ​ເດີ່ນ​ບິນ​ສາກົນ​ວັດ​ໄຕ​ຫາ 4 ແຍກ​ໄຟ​ແດງ​ວັດ​ອິນ​ແປງ ມີ​ຄວາມ​ຍາວ 1.200 ແມັດ ໄດ້​ເລີ່ມ​ຈັດ​ຕັ້ງ​ປະຕິບັດ​ມາ​ແຕ່​ວັນ​ທີ 7 ມິຖຸນາ 2018 ແລະ ຈະ​ໃຫ້​ສຳເລັດ​ພາຍ​ໃນ​ທ້າຍ​ເດືອນ​ມິຖຸນາ​ນີ້.

ທ່ານ​ນາງ ວິໄລ​ວອນ ຈັນທະ​ລາຕີ ຫົວໜ້າ​ຫ້ອງການ ​ຄບຕ ໄດ້​ກ່າວ​ວ່າ: ສຳລັບ​ການ​ລວງ​ຄອງ​ລະບາຍ​ນ້ຳ​ເປື້ອນ​ໃນ​ຕົວ​ເມືອງ​ຄັ້ງ​ນີ້ ພວກ​ເຮົາ​ໄດ້​ນຳ​ໃຊ້​ແຮງ​ງານ​ຄົນ ແລະ ພາຫະນະ​ລົດ​ຈົກ​ ຊ່ວຍ​ໃນ​ການ​ເຮັດອະນາໄມ​ຈົກ​ດິນ​ຕົມ ຖາງ​ຫຍ້າ ເອົາ​ຜັກ​ຕົບ ແລະ ສິ່ງ​ເສດ​ເຫຼືອ​ຕ່າງໆ​ອອກ​ຈາກ​ຄອງ​ລະບາຍ​ນ້ຳ ທັງ​ນີ້​ກໍ່​ເພື່ອ​ເຮັດ​ໃຫ້​ນ້ຳ​ໄຫຼ​ສະດວກ ສະນັ້ນ ຈຶ່ງ​ຂໍ​ອະໄພ​ຕໍ່​ຄວາມ​ບໍ່​ສະດວກ​ໃນ​ການ​ສັນຈອນ​ຂອງ​ປະຊາຊົນ​ທີ່​ນຳ​ໃຊ້​ແຄມ​ທາງ​ເຂດ​ດັ່ງກ່າວ ແລະ ພາຍຫຼັງ​ສຳເລັດ​ຢູ່​ສອງ​ຈຸດ​ນີ້ ​ຄບຕ ຍັງ​ມີ​ແຜນ​ຈະ​ສືບຕໍ່​ເຮັດອະນາໄມ​ເຂດ​ຮ່ອງ​ລະບາຍ​ນ້ຳ​ໂພນ​ພະ​ເນົາ ແລະ ເຂດ​ຮ່ອງ​ລະບາຍ​ນ້ຳ​ວັດ​ໄຕ 2 ທີ່​ເຫັນ​ວ່າ​ມີ​ຄວາມ​ສ່ຽງ​ຕໍ່​ນ້ຳ​ອຸດ​ຕັນຕື່ມ​ອີກ.

ທ່ານ​ນາງ ວິໄລ​ວອນ ຈັນທະ​ລາຕີ ຍັງ​ກ່າວ​ຕື່ມ​ວ່າ: ໃນ​ເງື່ອນໄຂ​ທີ່​ພາກ​ລັດ​ມີ​ງົບປະມານ​ຈຳກັດ ​ຄບຕ ຂໍ​ເຊີນຊວນ​ປະຊາຊົນ​ນະຄອນຫຼວງ​ວຽງ​ຈັນ ແລະ ການຈັດຕັ້ງ​ທຸກ​ພາກສ່ວນ​ຈົ່ງ​ພ້ອມ​ກັນ​ເຂົ້າ​ຮ່ວມ​ການ​ຮັກສາ​ອະນາໄມ ຖ້າ​ເຮືອນ​ຂອງ​ທ່ານ​ຢູ່​ໃກ້ ຫຼື ຕິດ​ກັບ​ແຄມ​ທາງ​ຮ່ອມ ທາງ​ຊອຍ ແລະ ມີ​ຮ່ອງ​ລະບາຍ​ນ້ຳ​ຢູ່​ໃກ້​ເຮືອນ ກໍ່​ໃຫ້​ພ້ອມ​ກັນ​ຊ່ວຍ​ຂຸດ​ລວງ​ຮ່ອງ​ລະບາຍ​ນ້ຳ ແລະ ຈົກ​ເອົາ​ສິ່ງ​ອຸດ​ຕັນ​ອອກ​ຈາກ​ຄອງ ຫຼື ຮູ​ລະບາຍ​ນ້ຳ ເພື່ອ​ຊ່ວຍ​ໃຫ້​ນ້ຳ​ໄຫຼ​ສະດວກ​ໃນ​ເວລາ​ລະດູຝົນ ແລະ ຍັງ​ເປັນ​ການ​ກຳຈັດ​ບັນຫາ​ກິ່ນ​ເໝັນ​ທີ່​ເກີດ​ຈາກ​ນ້ຳ​ທີ່​ໃຊ້​ແລ້ວ ສິ່ງ​ເສດ​ເຫຼືອ ແລະ ອື່ນໆ​ທີ່​ສະ​ສົມ​ຢູ່​ເປັນ​ເວລາ​ດົນ​ນານ​ອີກ​ດ້ວຍ.

ຂ່າວທີ່ກ່ຽວຂ້ອງ