ສ ອາ​ເມ​ຣິ​ກາ ສົ່ງ​ຕົວ​ອະດີດ​ປະທານາທິບໍດີ​ປາ​ນາ​ມາ ກັບ​ຄືນ​ປະເທດ

104 13 ມິ.ນ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ສົ່ງ​ຕົວ​ອະດີດ​ປະທານາທິບໍດີ​ປາ​ນາ​ມາ ກັບ​ຄືນ​ປະເທດ

   ອະດີດ​ປະທານາທິບໍດີ​ປາ​ນາ​ມາ ຣີ​ກາກ​ໂດ ມາຕີ​ເນ​ລີ ໄດ້​ຖືກ​ສົ່ງ​ຕົວ​ຈາກ ສ ອາ​ເມ​ຣິ​ກາ ກັບ​ຄືນ​ໄປ​ຍັງ​ປາ​ນາ​ມາ ເມື່ອ​ວັນ​ທີ 11 ມິຖຸນາ​ນີ້ ເພື່ອ​ປະ​ເຊີນ​ກັບ​ການ​ກ່າວ​ຫາ​ວ່າ​ຕິດຕາມ​ນັກ​ຂ່າວ ແລະ ​ນັກ​ການເມືອງ​ຝ່າຍ​ຄ້ານ​ຫຼາຍ​ຄົນ​ຢ່າງ​ລັບໆ.

    ຂ່າວສານ AFP ຂອງ​ຝຣັ່ງ ລາຍ​ງານ​ວ່າ ຕຳຫຼວດ ສ ອາ​ເມ​ຣິ​ກາ ໄດ້​ຄຸມ​ຕົວ​ທ່ານ ມາຕີ​ເນ​ລີ ຈາກ​ຄຸກ​ແຫ່ງ​ໜຶ່ງ​ໃນ​ນະຄອນ ໄມ​ອາ​ມີ (ລັດ ຟລໍ​ຣີ​ດາ) ໄປ​ຍັງ​ສະໜາມ​ບິນ ໂອ​ປາ ລອກ​ກາ ເອ​ເຊ​ກູ​ຕີບ ແລະ​ຫຼັງ​ຈາກ​ນັ້ນ​ກໍ​ນຳ​ຕົວ​ເຂົາ​ຂຶ້ນ​ເຮືອບິນ​ເຊົ່າ​ສະເພາະ ເພື່ອ​ສົ່ງ​ຕົວ​ໄປ​ຍັງ​ນະຄອນຫຼວງ ປາ​ນາ​ມາ ຊີ​ຕີ.

    ທ່ານ ມາຕີ​ເນ​ລີ (ອາຍຸ 66 ປີ) ດຳລົງ​ຕຳແໜ່ງ​ປະທານາທິບໍດີ​ປາ​ນາ​ມາ ແຕ່​ປີ 2009-2014 ຊຶ່ງ​ໃນ​ເວລາ​ນີ້​ເຂົາ​ປະ​ເຊີນ​ກັບ​ການ​ກ່າວ​ຫາ ດັກ​ຟັງ​ການ​ສົນທະນາ​ທາງ​ໂທລະສັບ​ຂອງ 150 ກວ່າ​ຄົນ ໃນ​ນັ້ນ​ມີ​ນັກ​ຂ່າວ ແລະ​ ນັກ​ການເມືອງ​ລວມ​ຢູ່​ນຳ​ຫຼາຍ​ຄົນ ໃນ​ຂະນະ​ດຽວ​ກັນ ທ່ານ ມາຕີ​ເນ​ລີ ກໍ​ພວມ​ຖືກ​ເຈົ້າ​ໜ້າທີ່​ປາ​ນາ​ມາ​ສືບສວນ ຍ້ອນ​ສົງ​ໃສ​ວ່າ​ຕິດ​ພັນ​ກັບ​ການ​ສໍ້​ລາດ​ບັງ​ຫຼວງ​ອີກ 20 ລາຍການ ແຕ່​ວ່າ​ຄະດີ​ເຫຼົ່າ​ນີ້ ບໍ່​ໄດ້​ເວົ້າ​ຢູ່​ໃນ​ຄຳ​ສັ່ງ​ສົ່ງ​ຕົວ​ນັ້ນ​ແຕ່​ຢ່າງໃດ. ທ່ານ ມາຕີ​ເນ​ລີ ຖືກ​ຈັບ​ເມື່ອ​ເດືອນ​ມິຖຸນາ ປີ 2017 ແລະ ນັບ​ແຕ່​ນັ້ນ​ເປັນຕົ້ນ​ມາ ກໍ​ຖືກ​ຂັງ​ຢູ່​ໃນ​ຄຸກ​ແຫ່ງ​ໜຶ່ງ ໃນ​ນະຄອນ ໄມ​ອາ​ມີ.

    ໃນ​ສະໄໝ​ຢູ່​ພາຍ​ໃຕ້​ການ​ນຳ​ຂອງ​ປະທານາທິບໍດີ ມາຕີ​ເນ​ລີ ນັ້ນ​ມີ​ລັດຖະມົນຕີ​ຫຼາຍ​ຄົນ ກໍ​ໄດ້​ຖືກ​ຈັບ ຫຼື​ຕ້ອງ​ໄດ້​ຈ່າຍ​ເງິນ​ຄ້ຳປະກັນ​ເພື່ອ​ໃຫ້​ໄດ້​ອອກ​ໄປ​ຢູ່​ໃນ​ຕ່າງປະເທດ ຍ້ອນ​ພົວພັນ​ກັບ ການ​ກ່າວ​ຫາ​ສໍ້​ລາດ​ບັງ​ຫຼວງ​ໃນ​ກໍລະນີ​ຫຍຸ້ງ​ເຫຍືອງ “ມືດ” ຂອງ​ກຸ່ມ​ບໍລິສັດ​ກໍ່ສ້າງ Odebrecht ທີ່​ມີ​ຂະໜາດ​ໃຫຍ່​ສຸດ​ໃນ​ອາ​ເມ​ຣິ​ກາ ລາ​ຕິນ ເມື່ອ​ກຸ່ມ​ບໍລິສັດ​ນີ້ ໃຫ້​ເງິນ​ສິນ​ບົນ​ກວ່າ 59 ລ້ານ​ໂດ​ລາ​ສະຫະລັດ ແກ່​ບັນດາ​ເຈົ້າ​ໜ້າທີ່​ປາ​ນາ​ມາ ໃນ​ໄລຍະ​ປີ 2010-2014 ເພື່ອ​ໃຫ້​ຊະນະ​ການ​ປະມູນ​ໂຄງການ​ຕ່າງໆ ເປັນ​ມູນ​ຄ່າ​ກວ່າ 9 ຕື້ ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ