ຂ່າວຫຼ້າສຸດ

ຈັດກິດຈະກຳສະຫຼອງວັນປູກຕົ້ນໄມ້ ແລະ ວັນສິ່ງແວດລ້ອມໂລກ

83 13 ມິ.ນ. 2018 ຂ່າວໜ້າ​ໜຶ່ງ
ຈັດກິດຈະກຳສະຫຼອງວັນປູກຕົ້ນໄມ້ ແລະ ວັນສິ່ງແວດລ້ອມໂລກ

ວັນ​ທີ 9 ມິຖຸນາ 2018 ທີ່​ພະ​ແນກ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ນະຄອນຫຼວງ​ວຽງ​ຈັນ ມີ​ພິທີ​ສະເຫຼີມສະຫຼອງ​ວັນ​ປູກ​ຕົ້ນໄມ້​ແຫ່ງ​ຊາດ ແລະ ວັນ​ສິ່ງແວດລ້ອມ​ໂລກ ປະຈຳ​ປີ 2018 ພາຍ​ໃຕ້​ຄຳ​ຂວັນ ຫຼຸດຜ່ອນ​ປລາສະຕິກ ແລະ ຫຼຸດຜ່ອນ​ມົນ​ລະ​ພິດ ເປັນ​ປະທານ​ຂອງ​ທ່ານ ບຸນ​ທາມ ພຸດ​ທະ​ວົງສາ ຫົວໜ້າ​ພະ​ແນກ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ນະຄອນຫຼວງ​ວຽງ​ຈັນ ມີ​ທ່ານ ສົມ​ມາດ ​ພົລ​ເສນາ ລັດຖະມົນຕີ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ບັນດາ​ຫົວໜ້າ​ກົມ ເຈົ້າເມືອງ ຫົວໜ້າ​ຫ້ອງການ ແລະ ພະນັກງານ​ເຂົ້າ​ຮ່ວມ.

ໃນ​ພິທີ ທ່ານ ບຸນ​ທາມ ພຸດ​ທະ​ວົງສາ ກ່າວ​ວ່າ: ປະເທດ​ລາວ​ເຮົາ​ມີ​ສະພາບ​ແວດ​ລ້ອມ ແລະ ພູຜາ​ປ່າໄມ້​ອັນ​ສວຍ​ງາມ ແລະ ອຸດົມສົມບູນ ການ​ດຳລົງ​ຊີວິດ​ຂອງ​ປວງ​ຊົນ​ທັງຫຼາຍ​ໄດ້​ຕິດ​ພັນ​ກັບ​ສິ່ງແວດລ້ອມ-ປ່າໄມ້ ເຊິ່ງ​ບໍ່​ສາມາດ​ຕັດ​ແຍກ​ອອກ​ຈາກ​ກັນ​ໄດ້ ໄລຍະ​ຜ່ານ​ມາ​ສິ່ງແວດລ້ອມ ແລະ ປ່າໄມ້​ໄດ້​ຖືກ​ທຳລາຍ​ດ້ວຍ​ຫຼາຍ​ຮູບ​ແບບ ເຮັດ​ໃຫ້​ສະພາບ​ແວດ​ລ້ອມ​ລວມ​ທັງ​ເນື້ອທີ່​ປ່າໄມ້​ຫຼຸດ​ໜ້ອຍ​ຖອຍ​ລົງ ລະບົບ​ນິເວດ​ວິທະຍາ​ປ່າໄມ້​ບໍ່​ສົມ​ດຸນ ລະບົບ​ສິ່ງແວດລ້ອມ​ຄ່ອຍໆ​ເສື່ອມ​ລົງ ​ພາໃຫ້​ເກີດ​ໄພພິບັດ​ຕ່າງໆ​ນາໆຕາມ​ມາ ເຊັ່ນ: ຝົນຕົກ​ບໍ່​ຖືກ​ຕາມ​ລະດູ​ການ ເກີດ​ໄພ​ນ້ຳ​ຖ້ວມ ໄພ​ແຫ້ງແລ້ງ ແລະ ອື່ນໆ ພ້ອມ​ນັ້ນ ຍັງ​ເປັນ​ການ​ເຕືອນ​ໃຫ້​ຮູ້​ເຖິງ​ໄພພິບັດ​ອັນ​ຮຸນ​ແຮງ​ທີ່​ມີ​ລັກສະນະ​ແຜ່​ລາມ​ໄປ​ທົ່ວ​ທຸກ​ມຸມ​ໂລກ ແລະ ເພີ່ມ​ຄວາມ​ຮຸນ​ແຮງ​ຂຶ້ນ​ເລື້ອຍໆ ບໍ່​ສາມາດ​ຄາດ​ຄະເນ​ລ່ວງ​ໜ້າ​ໄດ້ ທັງ​ໝົດ​ນັ້ນ​ໄດ້​ກາຍເປັນ​ບັນຫາ​ສຳຄັນ ແລະ ເຄັ່ງຮ້ອນ​ທີ່​ທຸກ​ຄົນ​ຕ້ອງ​ໄດ້​ຮ່ວມ​ແຮງ​ຮ່ວມ​ໃຈ​ກັນຫາ​ວິທີ​ແກ້​ໄຂ.

ໃນ​ຊຸມ​ປີຜ່ານມາ ພັກ-ລັດຖະບານ ​ໄດ້​ເອົາໃຈໃສ່​ວາງ​ນະໂຍບາຍ​ໃນ​ການ​ປົກ​ປັກ​ຮັກສາ​ສິ່ງແວດລ້ອມ ແລະ ສົ່ງເສີມ​ການ​ປູກ​ໄມ້ ເຊິ່ງ​ເຮັດ​ໃຫ້​ມີ​ຂະ​ບວນ​ການ​ທີ່​ມີ​ລັກສະນະ​ກວ້າງຂວາງ ຂະຫຍາຍຕົວ​ຫຼາຍ​ພໍ​ສົມຄວນ ນັບ​ທັງ​ພາກ​ລັດ ແລະ ເອກະ​ຊົນ ເພື່ອ​ປູກ​ຈິດ​ສຳນຶກ​ໃນ​ການ​ປົກ​ປັກ​ຮັກສາ​ສິ່ງແວດ​ລ້ອມ​ ເຮັດ​ໃຫ້​ຊັບພະຍາກອນ​ທຳ​ມະ​ຊາດ​ມີ​ຄວາມ​ອຸດົມສົມບູນ ໂດຍ​ສະເພາະ ຊັບພະຍາກອນ​ໄມ້ ພ້ອມ​ທັງ​ສືບຕໍ່​ຜັນ​ຂະຫຍາຍ​ນະໂຍບາຍ 6 ສ ຂອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ເປັນຕົ້ນແມ່ນ ສ ສະອາດ ແລະ ສ ສີຂຽວ ທີ່​ນະຄອນຫຼວງ​ວຽງ​ຈັນ​ວາງ​ອອກ​ໃຫ້​ປາກົດ​ຜົນ​ເປັນ​ຈິງ ເຊິ່ງ​ຕິດ​ພັນ​ກັບ​ວັນ​ປູກ​ຕົ້ນໄມ້​ແຫ່ງ​ຊາດ 1 ມິຖຸນາ ແລະ ວັນ​ສິ່ງແວດລ້ອມ​ໂລກ 5 ມິຖຸນາ ພະ​ແນກ​ກະສິກຳ ແລະ ປ່າໄມ້​ ຈຶ່ງ​ຈັດ​ກິດຈະກຳ​ປູກ​ຕົ້ນໄມ້​ອ້ອມ​ບໍລິເວນ​ເດີ່ນ​ຂອງ​ພະ​ແນກ ປະກອບ​ມີ ໄມ້​ດູ່ ແລະ ໄມ້​ແຕ້ 350 ເບ້ຍ ໄມ້​ປະດັບ 70 ເບ້ຍ ແລະ ໄມ້​ກິນ​ໝາກ 30 ເບ້ຍ ແນໃສ່​ປູກ​ຈິດ​ສຳນຶກ​ດ້ານ​ສິ່ງແວດລ້ອມ ແລະ ເຮັດ​ໃຫ້​ເດີ່ນ​ບໍລິເວນ​ອ້ອມ​ຂ້າງ​ພະ​ແນກ ​ມີ​ພື້ນ​ທີ່​ສີຂຽວ ​ໃຫ້​ຮົ່ມ​ເຢັນ​ເປັນຕາ​ໜ້າ​ຢູ່​ຂອງ​ໝົດ​ທຸກ​ຄົນ ເຊິ່ງ​ໃນ​ທຸກ​ປີ​ກໍ່​ໄດ້​ຈັດ​ກິດຈະກຳ​ໃນ​ຫຼາຍ​ຮູບ​ແບບ ໂດຍ​ການ​ມີ​ສ່ວນ​ຮ່ວມ​ຂອງ​ອຳນາດ​ການ​ປົກຄອງ​ທ້ອງຖິ່ນ​ຂັ້ນ​ບ້ານ ປະຊາຊົນ ແລະ ທຸກ​ພາກສ່ວນ​ໃນ​ສັງຄົມ.

ຕອນ​ທ້າຍ​ທ່ານ ບຸນ​ທາມ ພຸດ​ທະ​ວົງສາ ຍັງ​ໄດ້​ສະເໜີ​ປະຫວັດ​ຄວາມ​ເປັນ​ມາ​ຂອງ​ວັນ​ສິ່ງແວດລ້ອມ​ໂລກ​ ແລະ ສານ​ຂອງ​ທ່ານ​ນາຍົກລັດຖະມົນຕີ ເພື່ອ​ໃຫ້​ຜູ້​ເຂົ້າ​ຮ່ວມ​ໄດ້​ຮັບ​ຮູ້​ຄວາມ​ໝາຍ​ຄວາມ​ສຳຄັນ​ຂອງ​ວັນ​ດັ່ງກ່າວ​ຕື່ມ​ອີກ.

ຂ່າວທີ່ກ່ຽວຂ້ອງ