ຜູ້ນຳ ​ສປປ ເກົາຫຼີ ແລະ ສ ອາ​ເມ​ຣິ​ກາ ສຳເລັດ​ການ ເຈລະຈາ​ເປີດ​ກວ້າງ

120 13 ມິ.ນ. 2018 ຂ່າວຕ່າງປະເທດ
ຜູ້ນຳ ​ສປປ ເກົາຫຼີ ແລະ ສ ອາ​ເມ​ຣິ​ກາ ສຳເລັດ​ການ ເຈລະຈາ​ເປີດ​ກວ້າງ

   ທ່ານ ກິມ​ເຈິງ​ອູນ ຜູ້ນຳ ​ສປປ ເກົາຫຼີ ແລະ ປະທານາທິບໍດີ ໂດ​ນາ​​ລ ທຣຳ ຜູ້ນຳ ສ ອາ​ເມ​ຣິ​ກາ ໄດ້​ປະຊຸມ​ປິດ​ລັບ​ນຳ​ກັນ​ເປັນ​ເວລາ​ປະມານ 45 ນາທີ ຢູ່​ທີ່​ໂຮງແຮມ Capella ຢູ່​ເທິງ​ເກາະ ເຊນ​ໂຕ​ຊາ ຂອງ​ສິງກະໂປ ໃນ​ຕອນ​ເຊົ້າ​ວັນ​ທີ 12 ມິຖຸນາ​ນີ້ ແລະ ຫຼັງ​ຈາກ​ນັ້ນ ຜູ້ນຳ​ທັງ​ສອງ​ກໍ​ຍ້າຍ​ໄປ​ຍັງ ຫ້ອງ​ປະຊຸມ​ເປີດ​ກວ້າງ.

    ຂ່າວສານ Yonhap ແລະ CNN ຕ່າງ​ກໍ​ລາຍ​ງານ​ວ່າ ຜູ້ນຳ​ທັງ​ສອງ​ໄດ້​ສຳເລັດ​ການ ເຈລະຈາ​ເປີດ​ກວ້າງ​ແກ່ຍາວ​ເປັນ​ເວລາ​ກວ່າ 1 ຊົ່ວໂມງ ແລະ ຕໍ່​ມາ​ກໍ​ເຂົ້າ​ຮ່ວມ​ການ​ຮັບ​ປະທານ ອາຫານ​ທ່ຽງ​ຮ່ວມ​ກັນ ພ້ອມ​ທັງ​ເຮັດ​ວຽກ​ໄປ​ພ້ອມ ໂດຍ​ມີ​ນາງ ຊາ​ຣາ ຊັນ​ເດີ ເລຂາທິການ​ຝ່າຍ​ຂ່າວ ຂອງ​ທຳ​ນຽບ​ຂາວ ແລະ ນາງ ກິມ​ໂຢ ຈອງ ຜູ້​ເປັນ​ນ້ອງ​ສາວ​ຂອງ​ຜູ້ນຳ ​ສປປ ເກົາຫຼີ ເຂົ້າ​ຮ່ວມ​ຮັບ​ປະທານ​ອາຫານ​ນຳ.

    ຫຼັງ​ຈາກ​ສິ້ນ​ສຸດ​ການ​ເຈລະຈາ​ແລ້ວ ປະທານາທິບໍດີ ທຣຳ ຈະ​ໄດ້​ຈັດ​ກອງ​ປະຊຸມ​ຖະແຫຼງ​ຂ່າວ ໃນ​ຕອນ​ບ່າຍ​ວັນ​ທີ 12 ມິຖຸນາ​ນີ້ ແລະ ຈະ​ເດີນທາງ​ກັບ​ຄືນ​ປະເທດ​ໃນ​ຕອນ​ຄ່ຳ​ຂອງ​ວັນ​ດຽວ​ກັນ.

 

ຂ່າວທີ່ກ່ຽວຂ້ອງ