ຂ່າວຫຼ້າສຸດ

ການນຳຂັ້ນສູງ ຈະເຂົ້າຮ່ວມງານວາງສະແດງສິນຄ້າ ຈີນ-ອາຊີໃຕ້

222 13 ມິ.ນ. 2018 ຂ່າວໜ້າ​ໜຶ່ງ

ວັນ​ທີ 13 ມິຖຸນາ 2018 ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ພ້ອມ​ດ້ວຍ​ຄະນະ ຈະ​ເດີນທາງ​ເຂົ້າ​ຮ່ວມ​ງານ​ວາງສະແດງ​ສິນຄ້າ ຈີນ-ອາຊີ​ໃຕ້ ຄັ້ງ​ທີ 5 ແລະ ງານ​ວາ​ສະແດງ​ແລກປ່ຽນ​ສິນຄ້າຂາ​ເຂົ້າ-ຂາ​ອອກ ຄັ້ງ​ທີ 25 ພາຍ​ໃຕ້​ຫົວຂໍ້​ການ​ເຊື່ອມ​ໂຍງ​ເຂົ້າ​ສູ່ ໜຶ່ງ​ແລວ ໜຶ່ງ​ເສັ້ນທາງ ສຳລັບ​ການ​ຮ່ວມ​ມື​ທີ່​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ ຕາມ​ການ​ເຊື້ອ​ເຊີນ​ຂອງ​ລັດຖະບານ ​ສປ ຈີນ ທີ່​ຈະ​ຈັດ​ຂຶ້ນ​ໃນ​ວັນ​ທີ 14-20 ມິຖຸນາ 2018 ທີ່​ຄຸນ​ໝິງ ແຂວງ​ຢຸນ​ນານ ​ສປ ຈີນ.

ງານ​ສະແດງ​ຄັ້ງ​ນີ້ ແນໃສ່​ການ​ສົ່ງເສີມ​ດ້ານ​ການ​ຄ້າ ການ​ລົງທຶນ​ລະຫວ່າງ​ຈີນ​ກັບ​ບັນດາ​ປະເທດ ໃນ​ອາຊີ​ໃຕ້-ອາຊີ​ຕາເວັນ​ອອກສຽງ​ໃຕ້ ແລກປ່ຽນ​ຮູບ​ແບບ​ທາງ​ການ​ຄ້າ ການ​ລົງທຶນ​ລະຫວ່າງ​ກັນ ໂດຍ​ຜ່ານ​ເວທີ​ປຶກສາ​ຫາລື​ການ​ຮ່ວມ​ມືພາຍ​ໃຕ້​ຫົວຂໍ້​ຕ່າງໆ ເຊັ່ນ: ການ​ຮ່ວມ​ມື​ຈີນ-ອາ​ຊຽນ ການ​ຮ່ວມ​ມື​ອະນຸ​ພາກ​ພື້ນ​ແມ່ນ້ຳ​ຂອງ ການ​ຮ່ວມ​ມື​ແມ່ນ້ຳ​ຂອງ-ແມ່ນ້ຳ​ລ້ານ​ຊ້າງ ແລະ ອື່ນໆ.

ໃນ​ໂອກາດ​ການ​ໄປ​ຮ່ວມ​ງານ​ຄັ້ງ​ນີ້ ທ່ານ ສອນ​ໄຊ ສີ​ພັນ​ດອນ ຈະ​ໄດ້​ເຂົ້າ​ພົບ​ປະກັບ​ຄູ່​ຮ່ວມ​ຕຳແໜງ ຝ່າຍ​ຈີນ ທ່ານ ຫູ ສຸ່ນ​ຮົວ ຮອງ​ລັດຖະມົນຕີ ຈີນ ແລະ ທ່ານ ຢວນ ເຊິງ​ຟ້າ ປະທານ​ຈັດ​ງານ ເຈົ້າແຂວງ​ຢຸນ​ນານ ເພື່ອ​ເປັນ​ການ​ເພີ່ມ​ທະວີ​ຮັດ​ແໜ້ນ​ສາຍ​ພົວພັນ​ມິດຕະພາບລະຫວ່າງ ລາວ ແລະ ຈີນ ໃນ​ຖານະ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ