ຂ່າວຫຼ້າສຸດ

ນາຍົກລັດຖະມົນຕີ ແຫ່ງ ສປປ ລາວ ສຳເລັດການເຂົ້າຮ່ວມກອງປະຊຸມສາກົນ ກ່ຽວກັບອະນາຄົດຂອງອາຊີ ຄັ້ງທີ 24

266 13 ມິ.ນ. 2018 ຂ່າວໜ້າ​ໜຶ່ງ
ນາຍົກລັດຖະມົນຕີ ແຫ່ງ ສປປ ລາວ ສຳເລັດການເຂົ້າຮ່ວມກອງປະຊຸມສາກົນ ກ່ຽວກັບອະນາຄົດຂອງອາຊີ ຄັ້ງທີ 24

ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ພ້ອມ​ດ້ວຍ​ຄະນະ ໄດ້​ສຳເລັດ​ການ​ເຂົ້າ​ຮ່ວມ​ກອງປະຊຸມ​ສາກົນ ກ່ຽວ​ກັບ​ອະນາຄົດ​ຂອງ​ອາຊີ ຄັ້ງ​ທີ 24 ພາຍ​ໃຕ້​ຫົວຂໍ້: ສືບຕໍ່​ເປີດ​ກວ້າງ​ອາຊີ-ຈະ​ເຮັດ​ແນວໃດ ເພື່ອ​ໃຫ້​ກ້າວ​ໄປ​ສູ່​ຄວາມ​ວັດທະນາ​ຖາວອນ ແລະ ມີ​ສະຖຽນ​ລະ​ພາບ (Keeping Asia Open How to Achieve Prosperity and Stability) ເຊິ່ງ​ຈັດ​ຂຶ້ນ​ໂດຍ​ສຳນັກງານ​ໜັງສືພິມ​ເສດຖະກິດຍີ່ປຸ່ນ ຫຼື ນິກ​ເກ (NIKKEI) ໃນ​ວັນ​ທີ 11-12 ມິຖຸນາ 2018 ທີ່ໂຕ​ກຽວ ປະເທດຍີ່ປຸ່ນ.

ໃນ​ໂອກາດ​ດັ່ງກ່າວ ທ່ານ​ນາຍົກລັດຖະມົນຕີ ໄດ້​ໃຫ້​ກຽດ​ກ່າວ​ປາ​ໄສ​ທີ່​ປິ່ນ​ອ້ອມ​ຫົວຂໍ້​ຂອງ​ກອງ​ປະຊຸມ​ຄັ້ງ​ນີ້ ເຊິ່ງ​ໄດ້​ສະແດງ​ທັດສະນະ​ກ່ຽວ​ກັບ​ການ​ເປີດ​ກວ້າງ​ການ​ຮ່ວມ​ມື​ຂອງ​ອາຊີ ໃນ​ໄລຍະ​ຜ່ານ​ມາ ແລະ ບັນດາ​ຂໍ້​ລິ​ເລີ່ມໃໝ່ໆ​ທີ່​ໄດ້​ເກີດ​ຂຶ້ນ ແລະ ກຳລັງ​ເກີດ​ຂຶ້ນ​ໃນ​ປັດຈຸບັນ​ຢູ່​ອາຊີ ແລະ ໃນ​ໂລກ ລວມ​ທັງ​ໄດ້​ຊຸກຍູ້​ໃຫ້​ອາຊີ​ສືບຕໍ່​ເປີດ​ກວ້າງ​ການ​ຮ່ວມ​ມື​ໃຫ້​ຫຼາຍ​ຂຶ້ນ​ກວ່າ​ເກົ່າ ແລະ ຊຸກຍູ້​ພາກ​ພື້ນ​ອື່ນ ກໍ່​ຄວນ​ເປີດ​ກວ້າງ​ການ​ຮ່ວມ​ມື​ກັບ​ອາຊີ​ເຊັ່ນ​ກັນ ໃນ​ປັດຈຸບັນ ກໍ່​ຄືອະນາຄົດ ເພື່ອ​ປົກ​ປັກ​ຮັກສາ​ສັນຕິພາບສະຖຽນ​ລະ​ພາບ ແລະ ກ້າວ​ໄປ​ສູ່​ຄວາມ​ວັດທະນາ​ຖາວອນ​ຂອງ​ອາຊີ ກໍ່​ຄືຂອງ​ພາກ​ພື້ນ ແລະ ໂລກ ພ້ອມ​ດຽວ​ກັນ​ນີ້ ທ່ານ​ນາຍົກລັດຖະມົນຕີ ໄດ້​ໃຫ້​ກຽດ​ຕອບ​ຄຳ​ຖາມ​ຢູ່​ໃນ​ກອງ​ປະຊຸມ​ຄັ້ງ​ນີ້ ກ່ຽວ​ກັບ​ການ​ພັດທະນາ​ພື້ນຖານ​ໂຄງ​ລ່າງ​ການ​ເສື່ອມ​ຈອດ​ຢູ່ ​ສປປ ລາວ ເພື່ອ​ຫັນ​ປະເທດ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະເລ ເປັນ​ປະເທດ​ເສື່ອມ​ຈອດ​ກັບ​ພາກ​ພື້ນ ແລະ ຄວາມ​ຄາດ​ຫວັງ​ຂອງ ​ສປປ ລາວ ໃນ​ການ​ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດທະນາ.

ນອກຈາກ​ນີ້ ທ່ານ​ນາຍົກລັດຖະມົນຕີ ໄດ້​ໃຫ້​ສຳພາດ​ຂ່າວ​ກ່ຽວ​ກັບ​ການ​ພັດທະນາ​ເສດຖະກິດ-ສັງຄົມ​ຂອງ ​ສປປ ລາວ ໃນ​ປັດຈຸບັນ ເປັນຕົ້ນແມ່ນ​ນະໂຍບາຍ​ດຶງ​ດູດ​ການ​ລົງທຶນ ທັງ​ຈາກ​ພາຍ​ໃນ ແລະ ຕ່າງປະເທດ ການ​ພັດທະນາ​ອຸດສາຫະກຳ​ທີ່​ມີ​ທ່າແຮງ ເຊັ່ນ: ອຸດສາຫະກຳ​ປຸງ​ແຕ່ງ ກະສິກຳ ອຸດສາຫະກຳ ​ພະລັງງານ​ໄຟຟ້າ​ທີ່​ສະອາດ ແລະ ຍືນ​ຍົງ ແລະ ອຸດສາຫະກຳ​ການທ່ອງທ່ຽວ ແລະ ການ​ພັດທະນາ​ພື້ນຖານ​ໂຄງ​ລ່າງ​ຄົມມະນາຄົມຂົນສົ່ງ ລວມ​ທັງ​ການ​ຮ່ວມ​ມື ແລະ ການ​ສະໜັບສະໜູນຈາກຍີ່ປຸ່ນ.

ຄຽງ​ຄູ່​ກັນ​ນີ້ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ໄດ້​ຢ້ຽມຢາມ​ເຮັດ​ວຽກ​ກັບ​ທ່ານ ຊິນ​ໂຊະ ອາ​ເບະ ນາຍົກລັດຖະມົນຕີ​ຂອງຍີ່ປຸ່ນ ເພື່ອ​ສືບຕໍ່​ຮັດ​ແໜ້ນ​ຄູ່​ຮ່ວມ​ຍຸດ​ທະ​ສາດລະຫວ່າງສອງ​ປະເທດ ລາວ-ຍີ່ປຸ່ນ ທັງ​ລວງ​ເລິກ ແລະ ລວງ​ກວ້າງ ໃຫ້​ນັບ​ມື້​ນັບ​ແໜ້ນ​ແຟ້ນ​ຍິ່ງໆ​ຂຶ້ນ ພ້ອມ​ນີ້ ໄດ້​ເຂົ້າ​ຮ່ວມ​ເປັນ​ສັກຂີ​ພິຍານ​ໃນ​ການ​ລົງ​ນາມ​ເອກະສານ​ແລກປ່ຽນ​ໃຫ້​ທຶນ​ການ​ສຶກ​ສາ JDS ມູນ​ຄ່າ 310 ລ້ານ​ເຢັນ ລະຫວ່າງທ່ານ​ເອກອັກ​ຄະ​ລັດ​ຖະ​ທູດ ແຫ່ງ ​ສປປ ລາວ ປະຈຳຍີ່ປຸ່ນ ແລະ ທ່ານ​ເອກ​ອັກຄະລາຊະທູດຍີ່ປຸ່ນ ປະຈຳ ​ສປປ ລາວ.

ນອກຈາກ​ນີ້ ທ່ານ​ນາຍົກລັດຖະມົນຕີ ໄດ້​ຮັບ​ການ​ເຂົ້າ​ຢ້ຽມ​ຄຳນັບ​ຂອງ​ທ່ານ ເຈື່ອງ ຮວາ ບິງ ຮອງ​ນາຍົກລັດຖະມົນຕີ ຜູ້​ປະຈຳການ​ລັດຖະບານ ​ສສ ຫວຽດນາມ ບັນດາ​ອົງການ ສະມາຄົມ ແລະ ບໍລິສັດ​ຂອງ​ຍີ່ປຸ່ນ ຈຳນວນ​ໜຶ່ງ.

ຂ່າວທີ່ກ່ຽວຂ້ອງ