ຂ່າວ​ສັ້ນ

113 13 ມິ.ນ. 2018 ຂ່າວຕ່າງປະເທດ
ຂ່າວ​ສັ້ນ

     ອິນ​ເດຍ: ສຳນັກ​ຂ່າວສານ Asian News International (ANI) ລາຍ​ງານ​ເມື່ອ​ວັນ​ທີ 11 ມິຖຸນາ​ນີ້​ວ່າ ລົດ​ບັດ​ຄັນ​ໜຶ່ງ​ໄດ້​ແລ່ນ​ໄປ​ຕຳ​ນັກ​ສຶກ​ສາ 9 ຄົນ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ກັບ​ທີ່ 6 ຄົນ. ເຫດການ​ດັ່ງກ່າວ​ເກີດ​ຂຶ້ນ​ເມື່ອ​ຕອນ​ຄ່ຳ​ວັນ​ທີ 10 ມິຖຸນາ ຢູ່​ໃນ​ພື້ນ​ທີ່​ລັດ ອຸດ​ຕຣາ ປຣາ​ເດ​​ສ (ພາກ​ເໜືອ​ອິນ​ເດຍ) ໃນ​ຂະນະ​ທີ່​ນັກ​ສຶກ​ສາ​ເຫຼົ່ານັ້ນ ພວມ​ຢືນ​ຢູ່​ນອກ​ທາງ​ເພື່ອ​ຊື້​ນ້ຳມັນ.

    ຟີ​ລິບ​ປິນ: ຂ່າວສານ​ຊິນ​ຮວາ ລາຍ​ງານ​ວ່າ ທ່ານ ແດລ​ຟິນ ລໍ​ເຣນ​ຊາ​ນາ ລັດຖະມົນຕີ ປ້ອງ​ກັນ​ປະເທດ​ຂອງ​ຟີ​ລິບ​ປິນ ຖະແຫຼງ​ເມື່ອ​ວັນ​ທີ 11 ມິຖຸນາ​ນີ້​ວ່າ ປະທານາທິບໍດີ​ຟີ​ລິບ​ປິນ ໂຣດ​ຣີ​ໂກ ດູ​ເຕີ​ເຕ ໄດ້​ເຫັນ​ພ້ອມ​ກັບ​ແຜນການ ຂອງ​ກອງ​ກຳລັງ​ປະກອບ​ອາວຸດ​ຟີ​ລິບ​ປິນ  (AFP) ໃນ​ການ​ຈັດ​ຊື້​ເພີ່ມ​ເຕີມ​ເຮືອບິນ​ສູ້​ຮົບ ເຮືອບິນ​ລາດຕະເວນ​ຂະໜາດ​ໄກ ເຮືອບິນ​ເອ​ລີ​ກອບ​ແຕ​ສູ້​ຮົບ ປືນ​ເຫຼັກ​ຍາວ ອຸປະກອນ​ການ​ທະຫານ​ທີ່​ທັນ​ສະໄໝ ແລະ ກຳປັ່ນ​ດຳ​ນ້ຳ 1 ລຳ. ທ່ານ ລໍ​ເຣນ​ຊາ​ນາ ຊີ້​ແຈງ​ວ່າ ໃນ​ຂະນະ​ນີ້​ພວມ​ພິຈາລະນາ​ເຖິງ​ຄວາມ​ສາມາດ​ຂອງ​ແຫຼ່ງ​ສະໜອງ​ສິນຄ້າ​ເຫຼົ່ານັ້ນ​ຢູ່.

    ອາ​ຟະ​ກາ​ນິດ​ສະຖານ: ເຫດການ​ລະເບີດ​ແຕກ​ລາຍ​ໜຶ່ງ ໄດ້​ເກີດ​ຂຶ້ນ​ເມື່ອ​ວັນ​ທີ 11 ມິຖຸນາ​ນີ້ ຢູ່​ໃນ​ບໍລິເວນ​ປະຕູໂຂງ​ເຂົ້າ​ກະຊວງ​ຕັ້ງ​ຖິ່ນ​ຖານ ແລະ ພັດທະນາ​ຊົນນະບົດ ຂອງ​ອາ​ຟະ​ກາ​ນິດ​ສະຖານ ຊຶ່ງ​ເກີດ​ຂຶ້ນ​ໃນ​ເວລາ 13ໂມງ00 (ເວລາ​ໃນ​ທ້ອງຖິ່ນ) ໃນ​ຂະນະ​ທີ່ ພະນັກງານ​ຂອງ​ກະຊວງ​ດັ່ງກ່າວ ເລີກ​ວຽກ​ໄວ​ກ່ອນ​ກຳນົດ ໃນ​ໂອກາດ​ເດືອນ​ແຫ່ງ​ເທດສະການ ຣາ​ມາ​ດານ. ໂຄສົກ​ກະຊວງ ສາທາລະນະ​ສຸກ​ອາ​ຟະ​ກາ​ນິດ​ສະຖານ ໃຫ້​ຮູ້​ວ່າ ໃນ​ເຫດການ​ດັ່ງກ່າວ ມີ​ຜູ້​ເສຍ​ຊີວິດ 12 ຄົນ ແລະ​ບາດເຈັບ 31 ຄົນ ໃນ​ນັ້ນ​ມີ​ແມ່ຍິງ ແລະ ເດັກນ້ອຍ​ລວມ​ຢູ່​ນຳ​ຫຼາຍ​ຄົນ.

 

ຂ່າວທີ່ກ່ຽວຂ້ອງ