ຂ່າວຫຼ້າສຸດ

ຄະນະປະຈຳສະພາແຫ່ງຊາດ ອອກມະຕິໃຫ້ລັດຖະບານຈັດຕັ້ງປະຕິບັດ 14 ສະບັບ

148 13 ມິ.ນ. 2018 ຂ່າວໜ້າ​ໜຶ່ງ
ຄະນະປະຈຳສະພາແຫ່ງຊາດ ອອກມະຕິໃຫ້ລັດຖະບານຈັດຕັ້ງປະຕິບັດ 14 ສະບັບ

ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 12 ມິຖຸນາ 2018 ໂດຍ​ເປັນ​ປະທານ​ຂອງ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ມີ​ບັນດາ​ສະມາຊິກ​ສະພາ​ແຫ່ງ​ຊາດ​ແຕ່​ລະ​ເຂດ​ເລືອກ​ຕັ້ງ (​ສສຊ) ເຂົ້າ​ຮ່ວມ.

ສຳລັບ​ມື້​ທີ 6 ກອງ​ປະຊຸມ​ໄດ້​ຮັບ​ຟັງ​ບົດ​ລາຍ​ງານ​ການເຄື່ອນໄຫວ​ວຽກ​ງານ 6 ເດືອນ​ຕົ້ນ​ປີ ແລະ ທິດ​ທາງ​ແຜນການ 6 ເດືອນ​ທ້າຍ​ປີ 2018 ຂອງ​ຄະນະ​ປະຈຳ​ສະພາ​ແຫ່ງ​ຊາດ ຈາກ​ທ່ານ​ນາງ ສີໃສ ລື​ເດດ​ມູນ​ສອນ ຮອງ​ປະທານ​ສະພາ​ແຫ່ງ​ຊາດ ເຫັນ​ວ່າ: 6 ເດືອນ​ຜ່ານ​ມາ ຄະນະ​ປະຈຳ​ສະພາ​ແຫ່ງ​ຊາດ ໄດ້​ນຳ​ເອົາ​ຄວາມ​ເຫັນຂອງ​ບັນດາ ​ສສຊ ມາ​ພິຈາລະນາ​ຮຽບ​ຮຽງ​ເຂົ້າ​ໃສ່​ໃນ​ການ​ສ້າງ ແລະ ປັບປຸງ​ກົດໝາຍ​ທີ່​ກອງ​ປະຊຸມ​ສະໄໝ​ສາມັນ ເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ຮັບຮອງ ສຳເລັດ 15 ສະບັບ ໄດ້ 100% ອອກ​ນິຕິ​ກຳ​ຂອງ​ຄະນະ​ປະຈຳ ເຊິ່ງ​ປະກອບ​ມີ​ມະຕິ​ຄຳ​ສັ່ງ​ແນະນຳ​ຈຳນວນ​ໜຶ່ງ ເປັນ​ບ່ອນ​ອີງ​ໃຫ້​ກົງຈັກ​ຂອງ​ສະພາ ແລະ ກົງຈັກ​ທີ່​ຄະນະ​ປະຈຳ​ສະພາ ສ້າງຕັ້ງ​ໃນ​ການເຄື່ອນໄຫວ​ວຽກ​ງານ​ໃນ​ໄລຍະ​ຜ່ານ​ມາ ເອົາໃຈໃສ່​ໂຄສະນາ​ເຜີຍແຜ່​ກົດໝາຍ​ດ້ວຍ​ຫຼາຍ​ຮູບ​ການ​ຫຼາຍ​ລະດັບ ເອົາໃຈໃສ່​ຊຸກຍູ້​ກະຊວງ ອົງການ​ກ່ຽວຂ້ອງ​ເປັນ​ເຈົ້າ​ການ​ໃນ​ການ​ໂຄສະນາ​ເຜີຍແຜ່​ກົດໝາຍ​ໃນ​ຂົງເຂດ​ທີ່​ຕົນ​ເອງ​ຮັບຜິດຊອບ ຕິດຕາມ​ຊຸກຍູ້​ບັນດາ​ກະຊວງ ອົງການ​ໃນ​ການຈັດຕັ້ງ​ປະຕິບັດ​ມະຕິ​ຂອງ​ກອງ​ປະຊຸມ ​ສສຊ ວ່າ​ດ້ວຍ​ການ​ອອກ​ນິຕິ​ກຳ​ລຸ່ມ​ກົດໝາຍ ໄດ້​ຈຳນວນ 187 ມາດຕາ ເທົ່າ​ກັບ 67,26% ຂອງ​ແຜນການ.

ອອກ​ມະຕິ​ໃຫ້​ລັດຖະບານ​ຈັດ​ຕັ້ງ​ປະຕິບັດ​ວຽກ​ງານ​ຕ່າງໆ ຈຳນວນ 14 ສະບັບ ເຊັ່ນ: ມະຕິ​ວ່າ​ດ້ວຍ​ການ​ອະນຸມັດ​ໃຫ້​ຫັນປ່ຽນ​ປ່າ​ປ້ອງ​ກັນ​ແຫ່ງ​ຊາດ​ນ້ຳ​ມັດ​ລັກສະນະ​ຊົ່ວຄາວ ເພື່ອ​ນຳ​ໃຊ້​ເຂົ້າ​ໃນ​ການ​ພັດທະນາ​ໂຄງການ​ຂຸດ​ຄົ້ນ ແລະ ປຸງ​ແຕ່ງ​ແຮ່​ຄຳ​ຢູ່​ເມືອງ​ຄູນ ແຂວງ​ຊຽງ​ຂວາງ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ຫັນປ່ຽນ​ເນື້ອທີ່​ດິນ​ປ່າ​ປ້ອງ​ກັນ​ແຫ່ງ​ຊາດ ແຫຼ່ງ​ນ້ຳ​ງື່ມ​ລັກສະນະ​ຊົ່ວຄາວ ເພື່ອ​ນຳ​ໃຊ້​ເຂົ້າ​ໃນ​ການ​ຂຸດ​ຄົ້ນ ແລະ ປຸງ​ແຕ່ງ​ແຮ່​ເຫຼັກ ຢູ່​ເຂດ​ບ້ານ​ນາ​ຊານ ເມືອງ​ລ້ອງ​ແຈ້ງ ແຂວງ​ໄຊ​ສົມບູນ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ຫັນປ່ຽນ​ປ່າ​ສະຫງວນ​ແຫ່ງ​ຊາດ​ດົງ​ພູ​ວຽງ ເພື່ອ​ພັດທະນາ​ໂຄງການ​ໄຟຟ້າ​ພະລັງ​ນ້ຳ​ເຊລະ​ນອງ ມະຕິ​ວ່າ​ດ້ວຍ​ການ​ອະນຸມັດ​ອອກ​ໃບຢັ້ງຢືນ​ສິດ​ນຳ​ໃຊ້​ທີ່​ດິນ​ຖາວອນ ໃຫ້​ແກ່​ພົນລະເມືອງ​ລາວ​ທີ່​ຊື້​ເຮືອນ ແລະ ດິນ​ຢູ່​ເຂດ​ເສດຖະກິດ​ສະເພາະ​ວຽງ​ຈັນ-ລ໋ອງ​ແທງ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ນຳ​ເອົາ 4 ໂຄງການ​ບໍ່​ແຮ່​ເພື່ອ​ຄ້ຳປະກັນ​ການ​ຊຳລະ​ເງິນ​ກູ້​ຈາກ​ທະນາຄານ​ຂາ​ເຂົ້າ-ຂາ​ອອກ ​ສປ ຈີນ ສຳລັບ​ໂຄງການ​ກໍ່ສ້າງ​ທາງ​ລົດໄຟ​ລາວ-ຈີນ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ທຶນ​ສົມທົບ​ກໍ່ສ້າງ​ເສັ້ນທາງ​ລົດໄຟ​ລາວ-ຈີນ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ເກັບ​ອາກອນ​ກຳໄລ​ໃນ​ອັດຕາ 1% ຂອງ​ມູນ​ຄ່າ​ຮັບ​ເໝົາ​ກໍ່ສ້າງ​ໂຄງການ​ສາຍ​ສົ່ງ​ສະຖານີ ແລະ ເຂື່ອນ​ໄຟຟ້າ ມະຕິ​ວ່າ​ດ້ວຍ​ການ​ອະນຸມັດ​ກູ້​ຢືມ​ເງິນ​ຈາກ​ທະນາຄານ ​ສປ ຈີນ ເພື່ອ​ພັດທະນາ​ໂຄງການ​ສາຍ​ສົ່ງ​ໄຟຟ້າ​ແຮງ​ດັນ​ສູງ 5 ໂຄງການ ມະຕິ​ວ່າ​ດ້ວຍ​ການ​ຮັບຮອງ ແລະ ຍົກເວັ້ນ​ການ​ປະຕິບັດ​ບາງ​ມາດຕາ​ຂອງ​ກົດໝາຍ​ທີ່​ພົວພັນ​ກັບ​ເຂື່ອນ​ໄຟຟ້າ​ນ້ຳ​ກົງ 2 ມະຕິ​ວ່າ​ດ້ວຍ​ການ​ອະນຸມັດ​ອອກ​ພັນທະບັດ​ຂອງ​ລັດຖະບານ ເພື່ອ​ຊຳລະ​ໜີ້​ສິນ​ໂຄງການ​ລົງທຶນ​ຂອງ​ລັດ​ມະຕິ​ວ່າ​ດ້ວຍ​ການ​ອະນຸມັດ​ການ​ແກ້​ໄຂ​ໜີ້​ສາມ​ແຈ ມະຕິ​ວ່າ​ດ້ວຍ​ການ​ອະນຸມັດ​ການ​ນຳ​ໃຊ້​ງົບປະມານ​ທີ່​ຍັງ​ເຫຼືອ​ໃນ​ປີ 2017 ມາ​ນຳ​ໃຊ້​ໃນ​ປີ 2018 ມະຕິ​ວ່າ​ດ້ວຍ​ການ​ອະນຸມັດ​ການ​ຫັນ​ເປົ້າ​ໝາຍ​ນຳ​ໃຊ້​ງົບປະມານ​ຈາກ​ການ​ລົງທຶນ​ຂອງ​ລັດ​ໄປ​ແກ້​ໄຂ​ໜີ້​ສິນ ມະຕິ​ວ່າ​ດ້ວຍ​ການ​ອະນຸມັດ​ໃຫ້​ເກັບ​ອາກອນ​ກຳໄລ​ຈາກ 4 ບໍລິສັດ​ຂອງ​ຕ່າງປະເທດ ພິຈາລະນາ​ການ​ຢັ້ງຢືນ​ກວດກາ​ຜ່ານ​ເອກະສານ​ແຜນການ​ລົງທຶນ​ຂອງ​ລັດ​ປີ 2017 ບ້ວງ​ຈົດ​ຮັບ-ຈົດ​ຈ່າຍ​ຜ່ານ​ງົບປະມານ​ປີ 2017.

ຂ່າວທີ່ກ່ຽວຂ້ອງ