ກູ​ບາ ຮັກສາ​ຄາດໝາຍ​ປະລິມານ​ການ​ຜະລິດ​ຊີ​ກາ​ໄວ້​ຄືເກົ່າ

205 20 ມິ.ນ. 2018 ຂ່າວຕ່າງປະເທດ
ກູ​ບາ ຮັກສາ​ຄາດໝາຍ​ປະລິມານ​ການ​ຜະລິດ​ຊີ​ກາ​ໄວ້​ຄືເກົ່າ

     ທ່າມກາງ​ທີ່​ພາຍຸ​ຝົນ​ແກ່ຍາວ​ເປັນ​ເວລາ​ເກືອບ​ໜຶ່ງ​ເດືອນ​ທີ່​ຜ່ານ​ມາ ສ້າງ​ຄວາມ​ເສຍ​ຫາຍ ໃຫ້​ແກ່​ຊີ​ກາ​ປະມານ 320 ໂຕນ ຢູ່​ໃນ​ບັນດາ​ແຂວງ​ພາກ​ຕາເວັນຕົກ ແລະ​ ພາກ​ກາງ​ກູ​ບາ​ນັ້ນ ກຸ່ມ​ບໍລິສັດ​ລັດ​ວິ​ສາ​ຫະ​ກິດ​ຊີ​ກາ  Tabacuba ກໍ​ຢືນຢັນ​ວ່າ​ຍັງ​ຮັກສາ​ຄາດໝາຍ​ດ້ານ​ປະລິ​ລິ​ມານ ການ​ຜະລິດ​ໃນ​ປີ​ນີ້​ໄວ້​ຄືເກົ່າ.

    ທ່ານ ມີ​ແກລ ໂຣດ​ຣີ​ເກ​​ສ ຮອງ​ປະທານ​ຜູ້​ທີ​ໜຶ່ງ​ຂອງ Tabacuba ກ່າວ​ຕໍ່​ຜູ້​ສື່​ຂ່າວ​ວ່າ ສະພາບ​ອາກາດ​ທີ່​ຜັນ​ແປ​ໄປ​ຜິດ​ປົກກະຕິ​ທີ່​ຜ່ານ​ມາ ຍັງ​ເຮັດ​ໃຫ້​ໂຮງງານ​ພັນ ແລະ​ ເກັບ​ຮັກສາ​ຊີ​ກາ 37 ແຫ່ງ​ຂອງ​ກຸ່ມ​ບໍລິສັດ​ດັ່ງກ່າວ​ຖືກ​ເປ່​ເພ​ທັງ​ໝົດ ຫຼື​ເປ່​ເພ​ບາງ​ສ່ວນ ແລະ ​ໃນ​ປັດຈຸບັນ​ນີ້ ກຳມະກອນ​ຂອງ Tabacuba ປະມານ 40.000 ຄົນ ພວມ​ພະຍາຍາມ “ກອບ​ກູ້” ເອົາ​ໃບ​ພັນ​ຊີ​ກາ​ປະມານ 2 ລ້ານ​ໃບ ທີ່​ໄດ້​ຮັບ​ຜົນ​ກະທົບ​ຈາກ​ຄວາມ​ຊຸ່ມ​ສູງ​ເປັນ​ເວລາ​ຍາວ​ນານ.

    ໃນ​ປີ​ນີ້ Tabacuba ໄດ້​ວາງ​ຄາດໝາຍ​ເກັບ​ກູ້ ແລະ​ແກ້​ໄຂ​ໃບ​ຊີ​ກາ 32.000 ໂຕນ ຈາກ​ລະດູ ການ​ຜະລິດ 2017-2018 ຫຼັງ​ຈາກ​ທີ່​ປະລິມານ​ການ​ຜະລິດ​ໃບ​ຊີ​ກາ ບັນລຸ​ເກີນ​ເປົ້າ 30.000 ໂຕນ ໃນ​ລະດູ​ການ​ຜະລິດ​ທີ່​ຜ່ານ​ມາ.

    ປັດຈຸບັນ​ນີ້ ກູ​ບາ​ພວມ​ເລີ່ມ​ຕົ້ນ​ດຳເນີນ​ບາດກ້າວ​ກະກຽມ​ການ​ປູກຝັງ ໃຫ້​ແກ່​ລະດູ​ການ​ຜະລິດ ຊີ​ກາ 2018-2019 ດ້ວຍ​ເນື້ອທີ່​ການ​ຜະລິດ​ຄາດ​ວ່າ​ຢູ່​ທີ່ 30.500 ເຮັກຕາ.

 

ຂ່າວທີ່ກ່ຽວຂ້ອງ