ຂ່າວຫຼ້າສຸດ

ອິດ​ສະ​ຣາ​ແອນ​ປະຕິບັດ​ການ​ໂຈມ​ຕີ​ທາງ​ອາກາດ​ໃສ່​ແຫຼມ​ກາ​ຊາ

325 20 ມິ.ນ. 2018 ຂ່າວຕ່າງປະເທດ
ອິດ​ສະ​ຣາ​ແອນ​ປະຕິບັດ​ການ​ໂຈມ​ຕີ​ທາງ​ອາກາດ​ໃສ່​ແຫຼມ​ກາ​ຊາ

    ຂ່າວສານ Reuters ລາຍ​ງານ​ວ່າ ກອງທັບ​ອິດ​ສະ​ຣາ​ແອນ ແຈ້ງ​ໃຫ້​ຮູ້​ວ່າ ເວລາ​ຮຸ່ງ​ເຊົ້າ​ຂອງ ວັນ​ທີ 18 ມິຖຸນາ​ນີ້ ເຮືອບິນ​ຂອງ​ອິດ​ສະ​ຣາ​ແອນ ໄດ້​ປະຕິບັດ​ການ​ໂຈມ​ຕີ​ໃສ່​ເປົ້າ​ໝາຍ 9 ຈຸດ ຂອງ​ຂະ​ບວນ​ການ​ຮາ​ມາ​​ສ ຢູ່​ໃນ​ເຂດ​ພາກ​ເໜືອ​ແຫຼມ​ກາ​ຊາ ທັງ​ນີ້​ກໍ​ເພື່ອ​ເປັນ​ການ​ຕອບ​ໂຕ້​ຕໍ່​ການ​ທີ່ ວ່າວ ແລະ​ໝາກບານ​ໄຟ ທີ່​ປ່ອຍ​ມາ​ຈາກ​ດິນແດນ​ປາ​ແລັດ​ສະ​ຕິນ ເຮັດ​ໃຫ້​ເກີດ​ຄວາມ​ເສຍ​ຫາຍ ຕໍ່​ຊັບ​ສິນ​ຂອງ​ຝ່າຍ​ອິດ​ສະ​ຣາ​ແອນ.

    ສັນຍານ​ເຕືອນ​ໄພ​ໄດ້​ດັງ​ຂຶ້ນ​ໃນ​ເວລາ​ຮຸ່ງ​ເຊົ້າ ຢູ່​ໃນ​ເຂດ​ຂອງ​ອິດ​ສະ​ຣາ​ແອນ ໃກ້​ກັບ​ແຫຼມ​ກາ​ຊາ ໂດຍ​ກອງທັບ​ອິດ​ສະ​ຣາ​ແອນ ແຈ້ງ​ໃຫ້​ຮູ້​ວ່າ ຈະ​ຫຼວດ 3 ນັດ ໄດ້​ຖືກ​ຍິງ​ໄປ​ທາງ​ທິດ​ດິນແດນ ຂອງ​ອິດ​ສະ​ຣາ​ແອນ ແຕ່​ວ່າ​ມີ 1 ນັດ​ຕົກລົງ​ໃນ​ແຫຼມ​ກາ​ຊາ ແຕ່​ຍັງ​ບໍ່​ທັນ​ມີ​ລາຍ​ງານ​ເຖິງ ຄວາມ​ເສຍ​ຫາຍ​ຈາກ​ການ​ຍິງ​ຈະ​ຫຼວດ ຫຼື​ການ​ປະຕິບັດ​ການ​ໂຈມ​ຕີ​ທາງ​ອາກາດ​ນັ້ນ​ແຕ່​ຢ່າງໃດ.

    ໃນ​ຫຼາຍ​ອາທິດ​ມາ​ນີ້ ຝ່າຍ​ປາ​ແລັດ​ສະ​ຕິນ ໄດ້​ໃຊ້​ຍຸດທະວິທີ​ໃໝ່ ດ້ວຍ​ວິທີ​ປ່ອຍ​ວ່າວ ທີ່​ບັນຈຸ​ຜ້າ​ທີ່​ຈຸ່ມ​ນ້ຳມັນ ຫຼື​ຖ່ານ​ໄວ​ໄຟ ຢູ່​ລຽບ​ຕາມ​ຊາຍ​ແດນ​ກາ​ຊາ ເພື່ອ​ວາງ​ເພີງ​ໃສ່​ທີ່​ດິນ​ປູກຝັງ ແລະ​ເຂດ​ປ່າ​ທີ່​ແຫ້ງແລ້ງ ແລະ​ວ່າວ​ອີກ​ຈຳນວນ​ໜຶ່ງ ບັນຈຸ​ອຸປະກອນ​ລະເບີດ​ຂະໜາດ​ນ້ອຍ ເພື່ອ​ກໍ່ໃຫ້ເກີດ​ຄວາມ​ເສຍ​ຫາຍ​ໃນ​ບໍລິເວນ​ກວ້າງ.

 

ຂ່າວທີ່ກ່ຽວຂ້ອງ