ຂ່າວຫຼ້າສຸດ

ບໍ່​ມີ​ຜູ້​ເອົາ​ຊີວິດ​ລອດ​ມາ​ໄດ້​ຈາກ​ອຸບັດເຫດ​ເຮືອບິນ​ຕົກ​ຢູ່​ໃນ ມາດາ​ກາ​​ສ​ກາ

319 20 ມິ.ນ. 2018 ຂ່າວຕ່າງປະເທດ
ບໍ່​ມີ​ຜູ້​ເອົາ​ຊີວິດ​ລອດ​ມາ​ໄດ້​ຈາກ​ອຸບັດເຫດ​ເຮືອບິນ​ຕົກ​ຢູ່​ໃນ ມາດາ​ກາ​​ສ​ກາ

      ອົງການ​ການບິນ​ພົບ​ລະ​ເຮືອນ​ຂອງ​ມາດາ​ກາ​​ສ​ກາ ມີ​ຖະແຫຼງການ​ຢັ້ງຢືນ​ອອກ​ມາ​ວ່າ ເຮືອບິນ Piper PA 31 ຂະໜາດ​ນ້ອຍ​ລຳ​ໜຶ່ງ​ຂອງ​ບໍລິສັດ​ການບິນ Madagascar Trans Air (MTA) ທີ່​ເປັນ​ຂອງ​ເອກະ​ຊົນ ໄດ້​ປະສົບ​ອຸບັດເຫດ​ຕົກ ຢູ່​ໃນ​ເຂດ​ຊານເມືອງ​ນະຄອນຫຼວງ ອັນ​ຕານາ​ນາ​ຣີ​ໂວ ຂອງ​ມາດາ​ກາ​​ສ​ກາ ເມື່ອ​ວັນ​ທີ 18 ມິຖຸນາ​ນີ້ ເປັນ​ເຫດ​ໃຫ້​ຜູ້​ທີ່ຢູ່​ໃນ​ເຮືອບິນ​ນັ້ນ 5 ຄົນ ເສຍ​ຊີວິດ​ທັງ​ໝົດ. ເຮືອບິນ​ດັ່ງກ່າວ​ປະສົບ​ເຫດ ໃນ​ຂະນະ​ທີ່​ພວມ​ເຂົ້າ​ຮ່ວມ​ການບິນ​ຝຶກ​ຊ້ອມ ຢູ່​ໃກ້​ກັບ​ເຂດ​ບິນ ອີ​ວາ​ໂຕ ທີ່​ຂຶ້ນ​ກັບ​ສະໜາມ​ບິນ​ແຫ່ງ​ສຳຄັນ ໃນ​ນະຄອນຫຼວງ​ອັນ​ຕານາ​ນາ​ຣີ​ໂວ.

     ສ່ວນ​ຢູ່​ທີ່​ຣັດ​ເຊຍ ເຮືອບິນ Airbus A319-100 ລຳ​ໜຶ່ງ​ຂອງ​ບໍລິສັດ​ການບິນ Russian Airlines ໄດ້​ເກີດ​ໄຟ​ລຸກ​ໄໝ້​ຂຶ້ນ​ກາງ​ອາກາດ ໃນ​ຂະນະ​ທີ່​ນຳ​ເອົາ​ທິມ​ຊາດ​ບານເຕະ​ຂອງ ອາ​ຣາ​ບີ ຊາ​ອຸ​ດິດ ເດີນທາງ​ໄປ​ຍັງ​ນະຄອນ ​ຣົສ​ຕອບ-ອອນ-ດອນ (Rostov-on-Don) ໃນ​ວັນ​ທີ 19 ມິຖຸນາ​ນີ້ ເພື່ອ​ກຽມ​ໃຫ້​ແກ່​ການ​ແຂ່ງຂັນ​ໃນ​ນັດ​ທີ່​ພົບ​ກັບ​ທິມ​ຊາດ​ອູ​ຣູ​ໄກວ ໃນ​ວັນ​ທີ 20 ມິຖຸນາ.

    ຂ່າວ​ແຈ້ງວ່າ ເຮືອບິນ​ດັ່ງກ່າວ ປະສົບ​ເຫດ​ຂັດຂ້ອງ​ທາງ​ດ້ານ​ເຕັກນິກ​ຢູ່​ໃນ​ສ່ວນ​ຂອງ​ເຄື່ອງ​ຈັກ ແລະ​ໄດ້​ເກີດ​ໄຟ​ລຸກ​ໄໝ້​ຂຶ້ນ ແຕ່​ໂຊກ​ດີ​ທີ່​ສະມາຊິກ​ຂອງ​ທິມ​ຊາດ​ອາ​ຣາ​ບີ ຊາ​ອຸ​ດິດ ທຸກໆ​ຄົນ ໄດ້​ລົງ​ຈາກ​ເຮືອບິນ ຢ່າງ​ປອດ​ໄພ.

 

ຂ່າວທີ່ກ່ຽວຂ້ອງ