ຂ່າວຫຼ້າສຸດ

ສອງບໍລິສັດຮ່ວມລົງທຶນ ສ້າງຕັ້ງໂຮງງານຜະລິດສາຍໄຟຟ້າ

291 20 ມິ.ນ. 2018 ຂ່າວໜ້າ​ໜຶ່ງ
ສອງບໍລິສັດຮ່ວມລົງທຶນ ສ້າງຕັ້ງໂຮງງານຜະລິດສາຍໄຟຟ້າ

ພິທີ​ເປີດ​ໂຮງງານ​ໃໝ່​ທີ​ເອສ​ບີວຽງ​ຈັນ ຈັດ​ຂຶ້ນ​ວັນ​ທີ 18 ມິຖຸນາ 2018 ທີ່​ເຂດ​ເສດຖະກິດ​ພິເສດ​ວຽງ​ຈັນ-ໂນນ​ທອງ ນະຄອນຫຼວງ​ວຽງ​ຈັນ ມີ​ທ່ານ ສົມ​ຈິດ ອິນ​ທະ​ມິດ ຮອງ​ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ທ່ານ​ຄຳ​ລຽນ ພົນ​ເສນາ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ທ່ານ KABURAGI ISAMU ປະທານ​ບໍລິຫານ​ກຸ່ມ​ບໍລິສັດ ທີ​ເອສ​ບີ​ວຽງ​ຈັນ ທ່ານ NOBUYUKI SHINOHARA ຜູ້ອຳນວຍການ​ບໍລິສັດ OKI ພ້ອມ​ດ້ວຍ​ທ່ານ​ທູດ​ຍີ່ປຸ່ນ​ປະຈຳ​ລາວ ແຂກ​ຖືກ​ເຊີນ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ຮ່ວມ.

ບໍລິສັດ ທີ​ເອສ​ບີ ເປັນ​ບໍລິສັດ​ທີ່​ຜະລິດ​ສາຍ​ໄຟຟ້າ ເຊິ່ງ​ໄດ້​ເຂົ້າ​ມາ​ລົງທຶນ​ຢູ່​ລາວເປັນ​ເວລາ 10 ປີ ໃນ​ການ​ລົງທຶນ​ຢູ່​ລາວ​ເຫັນ​ວ່າ​ມີ​ປະ​ສິດທິ​ຜົນ​ສູງ ຈຶ່ງ​ເຮັດ​ໃຫ້​ບໍລິສັດ ທີ​ເອສ​ບີ ໄດ້​ຕັດສິນ​ໃຈ​ມາ​ລົງທຶນ​ເພີ່ມ​ເຕີມ​ອີກ​ຢູ່​ລາວ ໂດຍ​ການ​ສ້າງ​ໂຮງງານ​ໃໝ່​ແຫ່ງ​ນີ້​ຂຶ້ນ​ມາ ສ່ວນ​ບໍລິສັດ OKI ໄດ້​ຮ່ວມ​ກັນ​ປຶກສາ​ຫາລື​ກັບ​ບໍລິສັດ ທີ​ເອສ​ບີ ເປັນ​ເວລາ 2 ປີ ຈຶ່ງ​ໄດ້​ຕັດສິນ​ໃຈ​ເຂົ້າ​ມາ​ຮ່ວມ​ລົງທຶນ​ຢູ່​ໃນ​ລາວ​ຄັ້ງ​ນີ້ ແລະ ການ​ຮ່ວມ​ທຶນ​ຂອງ​ສອງ​ບໍລິສັດ​ຄັ້ງ​ນີ້​ ກໍ່​ຍ້ອນ​ເຫັນ​ທ່າແຮງ​ຂອງ​ລາວ​ມີ​ສູງ ແລະ ຍັງ​ບໍ່​ທັນ​ມີ​ບໍລິສັດ​ໃດ​ທີ່​ສາມາດ​ຜະລິດ​ສາຍ​ໄຟຟ້າ​ຢູ່​ລາວ​ໄດ້​ເທື່ອ ເຊິ່ງ​ການ​ຕອບ​ສະໜອງ​ວັດຖຸ​ດິບ​ຢູ່​ພາຍ​ໃນ ເຫັນ​ວ່າ​ມີ​ທ່າແຮງ​ສູງ ສຳລັບ​ຕະຫຼາດ​ພາຍ​ໃນ​ແມ່ນ​ກວມ​ເອົາ​ອັດຕາ​ສ່ວນ 50% ແລະ ອີກ 50% ແມ່ນ​ຈະ​ສົ່ງ​ອອກ​ຂາຍ​ປະເທດ​ໃກ້​ຄຽງ ປັດຈຸບັນ​ເຫັນ​ວ່າຄວາມ​ຮຽກຮ້ອງ​ຕ້ອງການ​ຂອງ​ຕະຫຼາດ​ພາຍ​ໃນ ແລະ ​ຕ່າງປະເທດ​ຍັງ​ມີ​ຄວາມ​ຕ້ອງການ​ນັບ​ມື້​ສູງ​ຂຶ້ນ.

ປັດຈຸບັນ​ມີ​ນັກ​ລົງທຶນ​ປະເທດ​ຍີ່ປຸ່ນ​ເຂົ້າ​ມາ​ລົງທຶນ​ຢູ່​ລາວ 143 ບໍລິສັດ ແລະ ບໍລິສັດ ທີ​ເອສ​ບີວຽງ​ຈັນ ເປັນ​ບໍລິສັດ​ທີ 56 ທີ່​ເຂົ້າ​ມາ​ລົງທຶນ​ສ້າງ​ໂຮງງານ​ຢູ່​ເຂດ​ເສດຖະກິດ​ພິເສດ​ວຽງ​ຈັນ-ໂນນ​ທອງ ເຊິ່ງ​ເປັນ​ການ​ຊ່ວຍ​ພັດທະນາ​ເສດຖະກິດ-ສັງຄົມ ແລະ ສ້າງ​ວຽກ​ເຮັດ​ງານ​ທຳ​ໃຫ້​ແກ່​ປະຊາຊົນ​ລາວ ​ຢູ່​ບໍລິເວນ​ເຂດ​ທ້ອງຖິ່ນ​ດັ່ງກ່າວ.

ຂ່າວທີ່ກ່ຽວຂ້ອງ