ຫາລືຮ່າງຂອບນະໂຍບາຍພັດທະນາສະຫະກອນແບບໃໝ່

236 20 ມິ.ນ. 2018 ຂ່າວໜ້າ​ໜຶ່ງ
ຫາລືຮ່າງຂອບນະໂຍບາຍພັດທະນາສະຫະກອນແບບໃໝ່

ສະ​ຖາ​ບັນ​ຄົ້ນຄວ້າ​ເສດຖະກິດ​ແຫ່ງ​ຊາດ ຈັດ​ກອງ​ປະຊຸມ​ປຶກສາ​ຫາລື​ຮ່າງ​ຂອບ​ນະໂຍບາຍ​ກ່ຽວ​ກັບ​ການ​ພັດທະນາ​ວິ​ສາ​ຫະ​ກິດ ແລະ ສະຫະກອນ​ຮູບ​ແບບ​ໃໝ່ ຮ່ວມ​ກັບ​ບັນດາ​ກະຊວງ ອົງການ​ລັດ ແລະ ລັດ​ວິ​ສາ​ຫະ​ກິດ ວັນ​ທີ 19 ມິຖຸນາ 2018 ທີ່​ຫໍ​ປະຊຸມ​ແຫ່ງ​ຊາດ ເປັນ​ປະທານ​ຂອງ​ທ່ານ ບົວ​ສອນ ບຸບຜາ​ວັນ ຫົວໜ້າ​ສະ​ຖາ​ບັນ​ຄົ້ນຄວ້າ​ເສດຖະກິດ​ແຫ່ງ​ຊາດ ມີ​ບັນດາ​ຮອງ​ລັດຖະມົນຕີ ຫົວໜ້າ​ອົງ​ການຈັດຕັ້ງ​ລັດ​ກ່ຽວຂ້ອງ ແລະ ອຳນວຍ​ການ​ລັດ​ວິ​ສາ​ຫະ​ກິດ​ຈຳນວນ​ໜຶ່ງ​ເຂົ້າ​ຮ່ວມ.

ກອງ​ປະຊຸມ​ໄດ້​ປຶກສາ​ຫາລື​ຮ່າງ​ຂອບ​ນະໂຍບາຍ​ພັດທະນາ​ລັດ​ວິ​ສາ​ຫະ​ກິດ ເພື່ອ​ມີ​ກຳລັງ​ແຮງ​ຮ່ວມ​ທຸລະ​ກິດ​ກັບ​ພາກສ່ວນ​ເສດຖະກິດ​ອື່ນໆ ໂດຍ​ຫັນປ່ຽນ​ໄປ​ສູ່​ຮູບ​ການ​ວິ​ສາ​ຫະ​ກິດ​ປະສົມ ແລະ ຮຸ້ນ​ສ່ວນ ພ້ອມ​ທັງ​ສ້າງ​ວິ​ສາ​ຫະ​ກິດ​ລັດ​ຮ່ວມ​ລົງທຶນ​ໃນ​ບາງ​ຂະແໜງການ​ທີ່​ເປັນ​ທ່າແຮງ​ໄດ້​ປຽບ​ຂອງ​ປະເທດ ໃຫ້​ສາມາດ​ສ້າງ​ການ​ສະ​ສົມ​ທຶນ​ພາຍ​ໃນ ເພື່ອ​ພັດທະນາ​ປະເທດ​ຊາດ ແລະ ສ້າງ​ລາຍ​ຮັບ​ງົບປະມານ​ໃຫ້​ແກ່​ລັດ ແນໃສ່​ໃຫ້​ມີ​ການ​ຮ່ວມ​ກຸ່ມ​ຂອງ​ຊາວ​ກະສິກອນ ຜູ້​ຜະລິດ​ຂະໜາດ​ນ້ອຍ ຊາວ​ຫັດຖະກຳ ແລະ ຊາວ​ຄ້າ-ຂາຍ ດ້ວຍ​ຄວາມ​ສະໝັກ​ໃຈ ໂດຍ​ການຈັດຕັ້ງ​ສະຫະກອນ​ຮູບ​ແບບ​ໃໝ່​ໃນ​ຊົນນະບົດ ແລະ ຊຸມ​ຊົນ​ໃນ​ຕົວ​ເມືອງ​ເພື່ອ​ເຕົ້າໂຮມ​ທຶນ ຮຸ້ນ​ສ່ວນ ແລະ ຮ່ວມ​ມື​ກັນ​ດ້ານ​ເຕັກນິກ ນະ​ວັດຕະ​ກຳ​ໃໝ່ ວິທີ​ການ​ຄຸ້ມ​ຄອງ ແລະ ບົດຮຽນ​ໃນ​ການ​ດຳເນີນ​ການ​ຜະລິດ-ທຸລະ​ກິດ ໂດຍ​ສະເໜີ​ໃຫ້​ລັດຖະບານ​ມີ​ນະ​ໂນ​ບາຍ​ສົ່ງເສີມ​ດ້ານ​ການ​ເງິນ ເງິນຕາ ການ​ຄ້າ ແລະ ການ​ລົງທຶນ ແນໃສ່​ໃຫ້​ສະຫະກອນ​ຂະຫຍາຍຕົວ​ໄວ ນອກ​ນັ້ນ ການຈັດຕັ້ງ​ສະຫະກອນ ສະມາຊິກ​ທຸກ​ຄົນ​ຕ້ອງ​ເປັນ​ຜູ້​ຖື​ຮຸ້ນ​ດ້ວຍ​ການ​ປະກອບ​ທຶນ​ເປັນ​ເງິນ ແລະ ຊັບ​ສິນ​ທີ່​ມີ​ການ​ຕີ​ມູນ​ຄ່າ​ເປັນ​ທຶນ ໃນ​ນີ້​ໃຫ້​ສະມາຊິກ​ມີ​ສິດ​ໃນ​ທີ່​ດິນ​ຂອງ​ຕົນ​ເອງ ດ້ວຍ​ການ​ອອກ​ເອກະສານ​ຢັ້ງຢືນ​ທີ່​ດິນ​ຂອງ​ສະມາຊິກ ນອກ​ນັ້ນ ກອງ​ປະຊຸມ​ໄດ້​ເຫັນ​ພ້ອມ​ນຳ​ກັນ​ວ່າ​ກຳໄລ​ສຸດທິ​ປະຈຳ​ປີ ນອກຈາກ​ຈັດ​ສັນ​ໄວ້​ເປັນ​ທຶນ​ຂະຫຍາຍ​ການ​ຜະລິດ​ແລ້ວ ກໍ່​ສາມາດ​ຈ່າຍ​ເງິນ​ປັນ​ຜົນ​ຕາມ​ຮຸ້ນ​ທີ່​ຖອກ​ແລ້ວ​ໃຫ້​ສະມາຊິກຈ່າຍ​ເງິນ​ບຳ​ເນັດ ແລະ ຈ່າຍ​ສະ​ສົມ​ໄວ້​ຕາມ​ລະບຽບ​ການ​ພ້ອມ​ນັ້ນ ເຫັນ​ມີ​ຄວາມ​ຈຳເປັນ​ໃນ​ການຈັດຕັ້ງ​ກອງ​ທຶນ​ພັດທະນາ​ສະຫະກອນ ເພື່ອ​ເປັນ​ທຶນ​ສົ່ງເສີມ​ກິດຈະການ​ຕ່າງໆ​ຂອງ​ສະຫະກອນ​ຕື່ມ​ອີກ.

ຂ່າວທີ່ກ່ຽວຂ້ອງ