ສະພາຮັບຮອງເອົາກົດໝາຍວ່າດ້ວຍທະນາຄານແຫ່ງ ສປປ ລາວ

180 20 ມິ.ນ. 2018 ຂ່າວໜ້າ​ໜຶ່ງ
ສະພາຮັບຮອງເອົາກົດໝາຍວ່າດ້ວຍທະນາຄານແຫ່ງ ສປປ ລາວ

ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ສະພາ​ແຫ່ງ​ຊາດ ຊຸດ​ທີ VIII ໄດ້​ມີ​ການ​ຮ່າງ​ກົດໝາຍ​ວ່າ​ດ້ວຍ​ທະນາຄານ​ແຫ່ງ ​ສປປ ລາວ (ສະບັບ​ປັບປຸງ) ນຳ​ສະເໜີ​ໂດຍ​ທ່ານ ສົມ​ພາວ ໄຟ​ສິດ ຜູ້​ວ່າການ​ທະນາຄານ​ແຫ່ງ ​ສປປ ລາວ ໃນ​ວັນ​ທີ 19 ມິຖຸນາ 2018 ໂດຍ​ການ​ປັບປຸງ​ກົດໝາຍ​ຄັ້ງ​ນີ້ ເພື່ອ​ຮັບປະກັນ​ການ​ປະຕິບັດ​ພາລະ​ບົດບາດ ສິດ ແລະ ໜ້າທີ່​ຂອງ​ຕົນ​ໃຫ້​ມີ​ປະສິດທິພາບ ແລະ ປະ​ສິດທິ​ຜົນ ແນໃສ່​ຮັບປະກັນ​ສະຖຽນ​ລະ​ພາບ​ທາງ​ດ້ານ​ເງິນຕາ ຄວາມ​ໝັ້ນຄົງ​ຂອງ​ສະ​ຖາ​ບັນ​ການ​ເງິນ ແລະ ລະບົບ​ການ​ຊຳລະ​ໃຫ້​ມີ​ຄວາມ​ຄ່ອງ​ຕົວ ສາມາດ​ເຊື່ອມ​ໂຍງ​ເຂົ້າ​ກັບ​ພາກ​ພື້ນ ແລະ ສາກົນ ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ຊາດ.

ຮ່າງ​ກົດໝາຍ​ສະບັບ​ນີ້ ໄດ້​ຮັບ​ການ​ປັບປຸງ​ທາງ​ດ້ານ​ໂຄງ​ສ້າງ​ໃໝ່​ທັງ​ໝົດ ເພື່ອ​ໃຫ້​ສອດຄ່ອງ​ກັບ​ໂຄງ​ສ້າງ​ຂອງ​ຮ່າງ​ກົດໝາຍ​ໃນ​ໄລຍະ​ໃໝ່ ປະກອບ​ມີ 10 ພາກ​ຄື: ບົດ​ບັນຍັດ​ທົ່ວ​ໄປ ທີ່​ຕັ້ງ​ພາລະ​ບົດບາດ ແລະ  ໂຄງ​ປະກອບ​ການຈັດຕັ້ງ ການເຄື່ອນໄຫວ​ວຽກ​ງານ​ການ​ເງິນ ແລະ ການ​ບັນຊີ ຂໍ້​ຫ້າມ ການ​ກວດກາ ວັນ​ສ້າງຕັ້ງ ເຄື່ອງໝາຍ ແລະ ຕາ​ປະ​ທັບ​ນະໂຍບາຍ​ຕໍ່​ຜູ້​ມີ​ຜົນງານ ແລະ ມາດ​ຕະການ​ຕໍ່​ຜູ້​ລະເມີດ ແລະ ບົດ​ບັນຍັດ​ສຸດ​ທ້າຍ ນອກ​ນີ້ ກໍ່​ມີ 7 ໝວດ ແລະ 78 ມາດຕາ ທຽບ​ກັບ​ກົດໝາຍ​ສະບັບ​ເກົ່າ ມີ​ພຽງ​ແຕ່ 13 ໝວດ ແລະ 62 ມາດຕາ ສຳລັບ​ເນື້ອ​ໃນ​ໄດ້​ປັບປຸງ​ຄືນໃໝ່ ໂດຍ​ສະເພາະ ໂຄງ​ປະກອບ​ການຈັດຕັ້ງ ແລະ ການເຄື່ອນໄຫວ​ວິຊາ​ສະເພາະ ເຊິ່ງ​ໃນ​ພາກ​ທີ​ໜຶ່ງ ຕົ້ນຕໍ​ແມ່ນ​ປັບປຸງ​ຕາມ​ໂຄງ​ສ້າງ​ຂອງ​ການ​ຂຽນ​ນິຕິ​ກຳ​ໃນ​ປັດຈຸບັນ ໃນ​ນັ້ນ ມາດຕາ 2 ໄດ້​ກຳນົດ​ນິ​ຍາມ​ໃຫ້​ທະນາຄານ​ແຫ່ງ ​ສປປ ລາວ ເປັນ​ທະນາຄານ​ກາງຂອງ​ປະເທດ ແລະ ມາດຕາ 5 ໄດ້​ກຳນົດ​ຫຼັກ​ການເຄື່ອນໄຫວ​ຂອງ​ທະນາຄານ​ແຫ່ງ ​ສປປ ລາວ.

ໃນ​ຂະນະ​ດຽວ​ກັນ​ນັ້ນ ​ສສຊ ໄດ້​ມີ​ການ​ຊັກ​ຖາມ ເຈາະ​ຈີ້ມ ແລະ ປະກອບ​ຄຳ​ຄິດ​ຄຳ​ເຫັນ​ຢ່າງ​ຫຼວງຫຼາຍ​ຕໍ່​ຮ່າງ​ກົດໝາຍ​ສະບັບ​ນີ້ ແນໃສ່​ເພື່ອ​ເຮັດ​ໃຫ້​ກົດໝາຍ​ມີ​ຄວາມ​ອຸດົມສົມບູນ​ດີ​ຂຶ້ນ​ກວ່າ​ເກົ່າ ທ່ານ​ນາງ ວັດທະນາ ດາລາ​ລອຍ ຮອງ​ຜູ້​ວ່າການ​ທະນາຄານ ແຫ່ງ ​ສປປ ລາວ ໄດ້​ຕອບ​ຄຳ​ຊັກ​ຖາມ ​ສສຊ ໄດ້​ເປັນ​ຢ່າງ​ດີ ແລະ ໃນ​ຕອນ​ແລງ​ຂອງ​ວັນ​ດຽວ​ກັນ​ທີ່​ປະຊຸມ ​ກໍ່​ໄດ້​ມີ​ການ​ຮັບຮອງ​ເອົາ​ຮ່າງ​ກົດໝາຍ​ສະບັບ​ນີ້​ ດ້ວຍ​ຄະແນນ​ສຽງ​ສ່ວນ​ຫຼາຍ​ເປັນ​ເອກະສັນ​ຮັບຮອງ​ເອົາ​ຮ່າງ​ກົດໝາຍ​ສະບັບ​ນີ້.

ຂ່າວທີ່ກ່ຽວຂ້ອງ