ຂ່າວຫຼ້າສຸດ

ລາວ-ຫວຽດນາມ ເສີມຂະຫຍາຍການພົວພັນຮ່ວມມືຫຼາຍດ້ານ

324 20 ມິ.ນ. 2018 ຂ່າວໜ້າ​ໜຶ່ງ
ລາວ-ຫວຽດນາມ ເສີມຂະຫຍາຍການພົວພັນຮ່ວມມືຫຼາຍດ້ານ

ໂດຍ​ຕອບ​ສະໜອງ​ຕາມ​ການ​ເຊື້ອ​ເຊີນ​ຂອງ​ສະຫາຍ ພັນ​ຄຳ​ ວິພາ​ວັນ ກຳມະການ​ກົມ​ການເມືອງ​ສູນ​ກາງ​ພັກ ຜູ້​ປະຈຳການ​ຄະນະ​ເລຂາທິການ​ສູນ​ກາງ​ພັກ ຮອງ​ປະທານ​ປະເທດ ວັນ​ທີ 19 ມິຖຸນາ 2018 ສະຫາຍນາງ ດັ້ງ ຖິ​ຫງ໋ອກ ທິ້ງ ກຳມະການ​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດນາມ ຮອງ​ປະທານ​ປະເທດ ແຫ່ງ ​ສສ ຫວຽດນາມ ພ້ອມ​ດ້ວຍ​ຄະນະ ໄດ້​ເດີນທາງ​ມາ​ຢ້ຽມຢາມ​ລາວ​ໃນ​ວັນ​ທີ 19-22 ມິຖຸນາ​ນີ້.

ພິທີ​ພົບ​ປະ​ສອງ​ຝ່າຍ​ລະຫວ່າງ​ສະຫາຍ ພັນ​ຄຳ ວິພາ​ວັນ ແລະ ສະຫາຍນາງ ດັ້ງ ຖິ​ຫງ໋ອກ ທິ້ງ ໄດ້​ຈັດ​ຂຶ້ນ​ວັນ​ທີ 19 ມິຖຸນາ 2018 ທີ່​ທຳ​ນຽບ​ປະທານ​ປະເທດ (ຫໍຄຳ) ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ສະແດງ​ຄວາມ​ພໍໃຈ​ທີ່​ການ​ພົວພັນ​ມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ​ລະຫວ່າງ ລາວ-ຫວຽດນາມ ສືບຕໍ່​ໄດ້​ຮັບ​ການ​ປັບປຸງ ແລະ ເສີມ​ຂະຫຍາຍ​ຢ່າງ​ບໍ່​ຢຸດ​ຢັ້ງ​ກ້າວ​ໄປ​ສູ່​ລວງ​ເລິກ ແລະ ກວ້າງຂວາງ ໃນ​ທຸກ​ຂົງເຂດ​ວຽກ​ງານ​ເຊັ່ນ: ດ້ານ​ການເມືອງ ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ເສດຖະກິດ ວັດທະນະທຳ ການ​ຕ່າງປະເທດ ແລະ ດ້ານ​ອື່ນໆ ພ້ອມ​ດຽວ​ກັນ​ນີ້ ສອງ​ຝ່າຍ​ຍັງ​ໄດ້​ຕີ​ລາຄາ​ສູງ ​ຕໍ່​ການ​ແລກປ່ຽນ​ການ​ຢ້ຽມຢາມ​ຂອງ​ຄະນະ​ຜູ້​ແທນ​ສອງ​ປະເທດ​ໃນ​ທຸກ​ລະດັບ ​ຢ່າງ​ເປັນ​ປົກກະຕິ ເພື່ອ​ຊຸກຍູ້​ສົ່ງເສີມ​ສາຍ​ພົວພັນ​ຮ່ວມ​ມື​ສອງ​ຝ່າຍ ຮ່ວມ​ກັນ​ປຶກສາ​ຫາລື ແກ້​ໄຂ​ບັນຫາ​ທີ່​ຍັງ​ຄົງ​ຄ້າງ​ຢ່າງ​ທັນ​ການ ເຮັດ​ໃຫ້​ໂຄງການ​ຮ່ວມ​ມື ແລະ ການ​ລົງທຶນ​ທີ່​ຍັງ​ຄ້າງ​ຄາ​ສາມາດ​ຈັດ​ຕັ້ງ​ປະຕິບັດ​ໄດ້​ຕາມ​ແຜນການ ໃນ​ປີຜ່ານມາ ​ສອງ​ປະເທດ​ໄດ້​ຮ່ວມ​ກັນ​ສະເຫຼີມສະຫຼອງ​ປີ​ສາມັກຄີ​ມິດຕະພາບ ​ນັບ​ແຕ່​ສູນ​ກາງ​ລົງ​ຮອດ​ທ້ອງຖິ່ນ ພ້ອມ​ດຽວ​ກັນ​ນີ້​ສອງ​ຝ່າຍ​ກໍ່​ໄດ້​ສືບຕໍ່​ເອົາໃຈໃສ່​ຫາ​ວິທີ​ທີ່​ເໝາະ​ສົມ ​ໃນ​ການ​ສຶກ​ສາ​ອົບຮົມ​ມູນເຊື້ອ ຄວາມ​ສາມັກຄີ ລາວ-ຫວຽດນາມ ໃນ​ຖັນ​ແຖວ​ພະນັກງານ ປະຊາຊົນ ຊາວ​ໜຸ່ມ-ເຍົາວະ​ຊົນ ສືບຕໍ່​ເພີ່ມ​ທະວີ​ການ​ຮ່ວມ​ມື​ກ່ຽວ​ກັບ​ວຽກ​ງານ​ຊາຍ​ແດນ​ສອງ​ປະເທດ ​ໃນ​ການ​ຮັກສາ​ຄວາມ​ສະຫງົບ ສະກັດ​ກັ້ນ​ການ​ຕ້ານ​ອາ​ຊະ​ຍາ​ກຳ​ຂ້າມ​ຊາດ ການ​ຄ້າ​ມະນຸດ ການ​ຂົນສົ່ງ​ຢາ​ເສບ​ຕິດ​ຂ້າມ​ແດນ ຄ້າຂາຍ​ເຖື່ອນ ເອົາໃຈໃສ່​ຮ່ວມ​ກັນ​ແກ້​ໄຂ​ບັນຫາ​ການ​ຍົກຍ້າຍ​ຕັ້ງ​ພູມລຳເນົາ​ຕາມ​ລຳພັງ​ໃຈ​ຂອງ​ປະຊາຊົນ​ລຽບ​ຕາມ​ຊາຍ​ແດນ ແລະ ວຽກ​ງານ​ອື່ນໆ.

ໂອກາດ​ນີ້ ສະຫາຍ ພັນ​ຄຳ ວິພາ​ວັນ ໄດ້​ສະແດງ​ຄວາມ​ຕ້ອນຮັບ ແລະ ຕີ​ລາຄາ​ສູງ​ຕໍ່​ການ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຂອງ​ຄະນະ​ຜູ້​ແທນ​ຂັ້ນ​ສູງ​ຫວຽດນາມ​ຄັ້ງ​ນີ້ ທີ່​ໄດ້​ນຳ​ເອົາ​ໄມຕີ​ຈິດ ມິດຕະພາບ ຄວາມ​ສາມັກຄີ​ອັນ​ສະໜິດສະໜົມ​ຂອງ​ພັກ-ລັດ ພ້ອມ​ທັງ​ປະກອບສ່ວນ​ມິດຕະພາບ​ອັນ​ຍິ່ງ​ໃຫຍ່ ຄວາມ​ສາມັກຄີ​ພິເສດ ການ​ຮ່ວມ​ມື​ຮອບດ້ານ ລະຫວ່າງສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ໂອກາດ​ນີ້​ ສະຫາຍ​ຍັງ​ໄດ້​ຕາງໜ້າ​ລັດຖະບານ ແລະ ປະຊາຊົນ​ລາວ ​ສະແດງ​ຄວາມ​ຂອບໃຈ​ມາ​ຍັງ​ລັດຖະບານ ແລະ ປະຊາຊົນ​ຫວຽດນາມ ທີ່​ໃຫ້ການ​ຊ່ວຍເຫຼືອ​ລາວ​ດ້ານ​ຕ່າງໆ​ໃນ​ໄລຍະ​ຜ່ານ​ມາ​ຕື່ມ​ອີກ ອັນ​ເປັນ​ການ​ປະກອບ​ເຂົ້າ​ໃນ​ການ​ສ້າງສາ ແລະ ພັດທະນາ​ປະເທດ​ຊາດ​ຂອງ​ລາວ.

ສະຫາຍນາງ ດັ້ງ ຖິ​ຫງ໋ອກ ທິ້ງ ໄດ້​ສະແດງ​ຄວາມ​ຂອບໃຈ​ຕໍ່​ພັກ-ລັດຖະບານ​ລາວ ທີ່​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ພ້ອມ​ທັງ​ສະແດງ​ຄວາມ​ຍິນ​ດີ​ຈະ​ສືບຕໍ່​ເພີ່ມ​ທະວີ ແລະ ເສີມ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່ ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງສອງ​ພັກ ​ສອງ​ລັດ ແລະ ປະຊາຊົນ​ສອງ​ຊາດ ໃຫ້​ນັບ​ມື້​ຈະເລີນ​ງອກ​ງາມ​ຍິ່ງ​ຂຶ້ນ ນຳ​ເອົາ​ຜົນ​ປະໂຫຍດ​ມາສູ່​ປະຊາຊົນ​ສອງ​ຊາດ.

ພາຍຫຼັງ​ທີ່​ສຳເລັດ​ການ​ພົບ​ປະ​ສອງ​ຝ່າຍ ຄະນະ​ຜູ້​ແທນ​ຂັ້ນ​ສູງ​ຫວຽດນາມ ນຳ​ໂດຍ​ສະຫາຍນາງ ດັ້ງ ຖິ​ຫງ໋ອກ ທິ້ງ ໄດ້​ເຂົ້າ​ຢ້ຽມ​ຄຳນັບ​ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ ປະທານ​ປະເທດ ທີ່​ທຳ​ນຽບ​ປະທານ​ປະເທດ.

ໂອກາດ​ນີ້​ ສະຫາຍ ບຸນ​ຍັງ ວໍລະ​ຈິດ ກໍ່​ໄດ້​ສະແດງ​ຄວາມ​ຍິນ​ດີ​ຕ້ອນຮັບ ຊົມເຊີຍ ແລະ ຕີ​ລາຄາ​ສູງ​ຕໍ່​ການ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຂອງ​ສະຫາຍ​ນາງ ດັ້ງ ຖິ​ຫງ໋ອກ ທິ້ງ ພ້ອມ​ດ້ວຍ​ຄະນະ​ຄັ້ງ​ນີ້ ເຊິ່ງ​ເປັນ​ການ​ສືບຕໍ່​ເພີ່ມ​ພູນ​ຄູນ​ສ້າງ ແລະ ເສີມ​ຂະຫຍາຍ​ສາຍ​ພົວພັນ​ແບບ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງສອງ​ພັກ ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດ​ນາມ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ​ໃຫ້​ແຕກ​ດອກ​ອອກ​ຜົນ ແລະ ແໜ້ນ​ແຟ້ນ​ຍິ່ງ​ຂຶ້ນ ພ້ອມ​ທັງ​ອວຍພອນ​ໃຫ້​ຄະນະ​ຜູ້​ແທນ​ຂັ້ນ​ສູງ​ຫວຽດນາມ ຈົ່ງ​ປະສົບ​ຜົນສຳເລັດ​ໃນ​ການ​ຢ້ຽມຢາມ ແລະ ເຮັດ​ວຽກ​ຢູ່​ລາວ​ຄັ້ງ​ນີ້.

ສະຫາຍນາງ ດັ້ງ ຖິ​ຫງ໋ອກ ທິ້ງ ໄດ້​ສະແດງ​ຄວາມ​ຂອບໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ​ຂອງ​ສະຫາຍ ບຸນ​ຍັງ ວໍລະ​ຈິດ ພ້ອມ​ທັງ​ໄດ້​ແຈ້ງ​ຈຸດປະສົງ​ຂອງ​ການ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່​ລາວ ແລະ ຜົນສຳເລັດ​ຂອງ​ການ​ພົບ​ປະ​ສອງ​ຝ່າຍ​ໃຫ້​ຊາບ​ຕື່ມ​ອີກ.

ໃນ​ວັນ​ດຽວ​ກັນ​ນີ້​ ສະຫາຍນາງ ດັ້ງ ຖິ​ຫງ໋ອກ ທິ້ງ ຍັງ​ໄດ້​ເຂົ້າ​ພົບ​ປະສະຫາຍ ທອງ​ລຸນ ສີ​ສຸ​ລິດ ກຳມະການ​ກົມ​ການເມືອງ​ສູນ​ກາງ​ພັກ ນາຍົກລັດຖະມົນຕີ ຢູ່​ສຳນັກງານ​ນາຍົກລັດຖະມົນຕີ ແລະ ເຂົ້າ​ຮ່ວມ​ງານ​ລ້ຽງ​ອາຫານ​ຄ່ຳ​ຢູ່​ທຳ​ນຽບ​ປະທານ​ປະເທດ ຈັດ​ໂດຍ​ສະຫາຍ ພັນ​ຄຳ ວິພາ​ວັນ.

ຂ່າວທີ່ກ່ຽວຂ້ອງ