ຣັດ​ເຊຍ​ຈະ​ປະຕິບັດ​ພາສີ​ໃໝ່​ຕໍ່​ຜະລິດ​ຕະ​ພັນ​ຈຳນວນ​ໜຶ່ງ​ທີ່​ນຳ​ເຂົ້າ​ມາ​ຈາກ ສ ອາ​ເມ​ຣິ​ກາ

452 21 ມິ.ຖ. 2018 ຂ່າວຕ່າງປະເທດ
ຣັດ​ເຊຍ​ຈະ​ປະຕິບັດ​ພາສີ​ໃໝ່​ຕໍ່​ຜະລິດ​ຕະ​ພັນ​ຈຳນວນ​ໜຶ່ງ​ທີ່​ນຳ​ເຂົ້າ​ມາ​ຈາກ ສ ອາ​ເມ​ຣິ​ກາ

     ທ່ານ ມາກ​ຊິມ ໂອ​ເຣ​​ສ​ກິນ ລັດຖະມົນຕີ​ກະຊວງ​ເສດຖະກິດ​ຂອງ​ຣັດ​ເຊຍ ກ່າວ​ຢູ່​ທີ່​ນະຄອນຫຼວງ​ມິນ​​ສກ໌ ຂອງ​ເບ​ລາ​ຣຸ​​ສ ເມື່ອ​ວັນ​ທີ 19 ມິຖຸນາ​ນີ້​ວ່າ ຣັດ​ເຊຍ​ຈະ​ປະຕິບັດ​ພາສີ​ໃໝ່​ຕໍ່​ຜະລິດ​ຕະ​ພັນ​ຈຳນວນ​ໜຶ່ງ ທີ່​ນຳ​ເຂົ້າ​ມາ​ຈາກ ສ ອາ​ເມ​ຣິ​ກາ ເພື່ອ​ເປັນ​ການ​ຕອບ​ໂຕ້​ຕໍ່​ການ​ດຳເນີນ​ການ​ທີ່​ຄ້າຍຄື​ກັນ​ນັ້ນ​ຂອງ ສ ອາ​ເມ​ຣິ​ກາ ທີ່​ມຸ່ງ​ໃສ່​ຜະລິດ​ຕະ​ພັນ​ອາ​ລູ​ມີ​ນຽມ ແລະ​ເຫຼັກ​ກ້າ​ນຳ​ເຂົ້າ​ຈາກ​ຣັດ​ເຊຍ.

    ທ່ານ ມາກ​ຊິມ ໂອ​ເຣ​​ສ​ກິນ ເວົ້າ​ວ່າ ການ​ປະຕິບັດ​ລະດັບ​ພາສີ​ດັ່ງກ່າວ​ຈະ​ແນໃສ່ ບັນດາ​ສິນຄ້າ​ນຳ​ເຂົ້າ ຊຶ່ງ​ຣັດ​ເຊຍ​ມີ​ຜະລິດ​ຕະ​ພັນ​ທີ່​ຄ້າຍຄື​ກັນ ແລະ ບໍ່​ເປັນ​ຜົນ​ກະທົບ​ຕໍ່ ພື້ນຖານ ເສດຖະກິດ​ມະຫາ​ພາກ​ຂອງ​ຣັດ​ເຊຍ. ເຫດຜົນ​ທີ່​ຣັດ​ເຊຍ​ກະທຳ​ຄື​ແນວ​ນັ້ນ ກໍ​ຍ້ອນ​ວ່າ ສ ອາ​ເມ​ຣິ​ກາ ສືບຕໍ່​ນຳ​ໃຊ້​ມາດ​ຕະການ​ປົກ​ປ້ອງ​ການ​ຄ້າ ຕາມ​ຮູບ​ການ​ປະຕິບັດ​ພາສີ​ເພີ່ມ​ເຕີມ​ຕໍ່ ຜະລິດ​ຕະ​ພັນ ອາ​ລູ​ມີ​ນຽມ ແລະ​ເຫຼັກ​ກ້າ​ນຳ​ເຂົ້າ ພ້ອມ​ທັງ​ບໍ່​ທົດ​ແທນ​ຄວາມ​ເສຍ​ຫາຍ​ຂອງ​ຣັດ​ເຊຍ.

    ທ່ານ ມາກ​ຊິມ ໂອ​ເຣ​​ສ​ກິນ ກ່າວ​ເນັ້ນ​ວ່າ ຣັດ​ເຊຍ​ຈະ​ໃຊ້​ສິດທິ​ຂອງ​ຕົນ ຢູ່​ໃນ​ຂອບ​ຂອງ ອົງການ​ການ​ຄ້າ​ໂລກ (WTO) ແລະ ດຳເນີນ​ມາດ​ຕະການ​ຕອບ​ໂຕ້​ທີ່​ສົມ​ຄູ່ ຕໍ່​ສິນຄ້າ​ນຳ​ເຂົ້າ​ຈາກ ສ ອາ​ເມ​ຣິ​ກາ.

    ກ່ອນ​ໜ້າ​ນັ້ນ ເມື່ອ​ເດືອນ​ພຶດສະພາ​ທີ່​ຜ່ານ​ມາ  ຣັດ​ເຊຍ​ໄດ້​ແຈ້ງ​ໄປ​ຍັງ WTO ກ່ຽວ​ກັບ​ຄວາມ ເປັນ​ໄປ​ໄດ້ ໃນ​ການ​ປະຕິບັດ​ພາສີ​ກັບ​ສິນຄ້າ​ຂອງ ສ ອາ​ເມ​ຣິ​ກາ ໃນ​ມູນ​ຄ່າ  537,6 ລ້ານ​ໂດ​ລາ ສະຫະລັດ/ປີ ເພື່ອ​ຕອບ​ໂຕ້ ສ ອາ​ເມ​ຣິ​ກາ ທີ່​ປະຕິບັດ​ພາສີ​ນຳ​ເຂົ້າ​ເຫຼັກ​ກ້າ​ທີ່  25% ແລະ ​ກັບ ອາ​ລູ​ມີ​ນຽມ​ທີ່ 10%.

 

ຂ່າວທີ່ກ່ຽວຂ້ອງ