ເບີ່ງບ້ານເຂົາເອົາບົດຮຽນ 05/07/2018

83 05 ກ.ກ. 2018 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ໜ້າ​ສົນ­ໃຈ 3 ເລື່ອງ ຄື: ການ​ອະ­ນຸ­ຍາດ​ໃຫ້​ແຮງ​ງານ​ຕ່າງ­ປະ­ເທດ​ເຂົ້າ​ເຖິງ​ອາ­ຊີບ​ໃນ​ໄທ ນະ­ໂຍ­ບາຍ​ຊ່ວຍ­ເຫຼືອ​ພໍ່​ແມ່​ທີ່​ລ້ຽງ​ລູກ​ໂດຍ​ລຳ­ພັງ ການ​ແກ້​ໄຂ​ບັນ­ຫາ​ລວນ​ລາມ​ທາງ​ເພດ​ຢູ່​ອິນ​ໂດ​ເນ​ເຊຍ.

ທີ່ ປະ­ເທດ​ໄທ: ດັ່ງ​ທີ່​ເຄີຍ​ເປັນ​ຂ່າວ​ໄປ​ແລ້ວ​ວ່າ ທາງ​ການ​ໄທ​ໄດ້​ໂຍະ­ຍານ​ເລື່ອງ​ອາ­ຊີບ​ທີ່​ສະຫງວນ​ໄວ້​ສະ­ເພາະ​ໃຫ້​ພົນ­ລະ­ເມືອງ​ໄທ​ເອງ​ເຮັດ ໃນ​ປີ 1979 ທາງ​ການ​ໄທ​ໄດ້​ກຳ­ນົດ 39 ອາ­ຊີບ​ໄວ້​ສະ­ເພາະ​ໃຫ້​ຄົນ​ໄທ ແຕ່​ໃນ​ວັນ​ທີ 21 ເດືອນ​ມິ­ຖຸ­ນາ​ປີ​ນີ້ ທາງ​ກະ­ຊວງ​ແຮງ​ງານ​ໄທ​ໄດ້​ປະ­ກາດ​ໂຍະ­ຍານ​ບັນ­ຊີ​ອາ­ຊີບ​ສະ­ຫງວນ​ດັ່ງ­ກ່າວ ໂດຍ​ອະ­ນຸ­ຍາດ​ໃຫ້​ແຮງ​ງານ​ຕ່າງ­ປະ­ເທດ ​ສາ­ມາດ​ປະ­ກອບ​ອາ­ຊີບ​ໃນ 12 ຂະ­ແໜງ ເຊັ່ນ: ວຽກ​ທີ່​ໃຊ້​ຕີນ-ມື ທີ່​ກົມ​ວຽກ​ເຮັດ​ງານ​ທຳ​ຂອງ​ໄທ​ໄດ້​ກຳ­ນົດ​ໄວ້ ສ່ວນ​ອີກ 11 ຂະ­ແໜງ​ວຽກ​ນັ້ນ ແມ່ນ​ວຽກ​ທີ່​ເຫັນ​ວ່າ “ມີ​ຄວາມ​ຈຳ­ເປັນ” ແຕ່​ຫ້າມ​ຄົນຕ່າງ­ປະ­ເທດ​ເປັນ​ເຈົ້າ​ຂອງ​ກິດ­ຈະ­ການ ຫຼື ປະກອບ​ອາ­ຊີບ​ເຫຼົ່າ​ນີ້​ແບບ​ເປັນ​ເອ­ກະ­ລາດ.

ຂ່າວ​ບອກ​ວ່າ: ນັບ​ແຕ່​ວັນ​ທີ 1 ເດືອນ​ກໍ­ລະ­ກົດ​ປີ​ນີ້​ເປັນ­ຕົ້ນ​ໄປ ທາງ​ການ​ໄທ​ຈະ​ໄດ້​ຈັບ​ກຸມ​ຜູ້​ທີ່​ລະ­ເມີດ​ປະ­ກາດ​ແຈ້ງ​ການ​ດັ່ງ­ກ່າວ ໃນ​ປັດ­ຈຸ­ບັນ ອາ­ຊີບ​ທີ່​ກຳ­ນົດ​ໃຫ້​ສະ­ເພາະ​ຄົນ​ໄທ​ເຮັດ​ໄດ້​ມີ​ທັງ​ໝົດ 28 ຂະ­ແໜງ­ການ ໃນ​ນັ້ນ ລວມ​ທັງ​ທຸ­ລະ​ກິດ “ນວດ​ແຜນ​ບູ­ຮານ​ໄທ”.

ທີ່ ປະ­ເທດ​ຍີ່­ປຸ່ນ: ມີ​ຂ່າວ​ດີ​ໃຫ້​ຜູ້​ເປັນ​ພໍ່ ຫຼື ແມ່ ທີ່​ຮັບ­ຜິດ­ຊອບ​ລ້ຽງ​ລູກ​ຕາມ​ລຳ­ພັງ​ພຽງ​ຄົນ​ດຽວ ເຊັ່ນ: ພໍ່-ແມ່​ທີ່​ມີ​ລູກ​ໂດຍ​ບໍ່​ໄດ້​ແຕ່ງ­ດອງ ຂ່າວ​ດີ​ດັ່ງ­ກ່າວ​ມີ​ຂຶ້ນ​ແຕ່​ເດືອນ​ສິງ­ຫາ​ປີ­ຜ່ານ­ມາ ໂດຍ​ມີ​ເນື້ອ​ໃນ​ວ່າ ຜູ້​ເປັນ​ພໍ່ ຫຼື ແມ່​ທີ່​ມີ​ລູກ​ໂດຍ​ບໍ່​ໄດ້​ແຕ່ງ­ດອງ​ນັ້ນ ​ຈະ​ໄດ້​ຮັບ​ນະ­ໂຍ­ບາຍ​ຫຼຸດ­ຜ່ອນ​ໃນ​ການ​ໃຊ້​ຈ່າຍ​ເພື່ອ​ລ້ຽງ​ລູກ​ເຊັ່ນ​ດຽວ​ກັບ​ພໍ່ ຫຼື ແມ່​ທີ່​ເປັນ​ຮ້າງ ຫຼື ເປັນ​ໝ້າຍ.

ໃນ​ເມື່ອ​ກ່ອນ​ພໍ່-ແມ່​ທີ່​ມີ​ພັນ­ທະ​ລ້ຽງ​ລູກ​ພຽງ​ຝ່າຍ​ດຽວ​ຍ້ອນ​ຢ່າ​ຮ້າງ ຫຼື ໝ້າຍ​ນັ້ນ ໄດ້​ຮັບ​ນະໂຍ​ບາຍ​ຫຼຸດ­ຜ່ອນ​ຄ່າ​ໃຊ້​ຈ່າຍ​ໃນ​ການ​ລ້ຽງ​ລູກ ແລະ ສະ­ຖານ­ທີ່​ລ້ຽງ​ລູກ ກໍ່​ຄື ໃຫ້​ບໍ­ລິ­ການ​ດ້ານ​ຕ່າງໆ​ແກ່​ເດັກ ສ່ວນ​ຜູ້​ມີ​ລູກ​ໂດຍ​ບໍ່​ໄດ້​ແຕ່ງ­ດອງ​ນັ້ນ ​ບໍ່​ມີ​ສິດ​ໄດ້​ຮັບ​ສ່ວນ​ຫຼຸດ​ໃນ​ການ​ໃຊ້​ຈ່າຍ​ດັ່ງກ່າວ.

ອີງ​ຕາມ​ນະ­ໂຍ­ບາຍ​ໃໝ່ ເພື່ອ​ຫຼຸດ­ຜ່ອນ​ການ​ແບກ​ຫາບ​ລ້ຽງ​ລູກ​ຂອງ​ຜູ້​ເປັນ​ພໍ່-ແມ່​ນັ້ນ ພໍ່ ຫຼື ແມ່​ທຸກ​ຄົນ​ບໍ່​ວ່າ​ຈະ​ເປັນ​ຮ້າງ ຫຼື ໝ້າຍ ຫຼື ມີ​ລູກ ແຕ່​ບໍ່​ໄດ້​ແຕ່ງ­ດອງ ກໍ່​ລ້ວນ​ແຕ່​ໄດ້​ຮັບ​ນະ­ໂຍ­ບາຍ​ຫຼຸດ­ຜ່ອນ​ການ​ໃຊ້​ຈ່າຍ​ຢ່າງ​ສະ­ເໝີ­ພາບ​ກັນ ຄາດ​ວ່າ​ຈຳ­ນວນ​ພໍ່​ໂທນ ແມ່​ໂທນ​ທີ່​ໄດ້​ຮັບ​ນະ­ໂຍ­ບາຍຫຼຸດ­ຜ່ອນ​ການ​ໃຊ້​ຈ່າຍ​ຈະ​ເພີ່ມ​ຂຶ້ນ​ປະ­ມານ 2.700 ຄົນ.

ທີ່ ອິນ​ໂດ​ເນ​ເຊຍ: ມີ​ຂ່າວ​ດີ ນີ້​ແມ່ນ​ເພື່ອ​ແກ້​ໄຂ​ບັນ­ຫາ​ການ​ລວນ​ລາມ​ທາງ​ເພດ​ສຳ­ລັບ​ເພດ​ຍິງ ​ທີ່​ໃຊ້​ລົດ​ໂດຍ­ສານ​ສາ­ທາ­ລະ­ນະ ໂດຍ​ສະ­ເພາະແມ່ນ​ລົດ­ໄຟ ໜັງ­ສື­ພິມ The Nation ສະ­ບັບ​ວັນ​ທີ 23 ເດືອນ​ເມ­ສາ​ປີ​ນີ້ ບອກ​ວ່າ: ບໍ­ລິ­ສັດ​ຂົນ­ສົ່ງ ເກ​ເຣ​ຕາ (Kereta) ໄດ້​ຮຽກ­ຮ້ອງ​ໃຫ້​ຜູ້­ໂດຍ­ສານ​ທີ່​ຕົກ​ເປັນ​ເຫຍື່ອ​ການ​ລວນ​ລາມ​ທາງ​ເພດ (ດ້ວຍ​ການ​ຈັບ­ບາຍ​ແຕະ­ຕ້ອງ​ຮ່າງ­ກາຍ) ຈາກ​ພວກມື​ໄວ​ໃຈ​ກ້າ​ໜ້າ­ດ້ານ​ເວ­ລາ​ໂດຍ­ສານ ຮີບ​ຮ້ອນລາຍ​ງານ​ໃຫ້​ທາງ​ບໍ­ລິ­ສັດ​ຊາບ​ທັນ­ທີ.

ເມື່ອ​ມີ​ເຫດ­ການ​ລວນ​ລາມ​ເກີດ​ຂຶ້ນ ຜູ້​ທີ່​ຕົກເປັນ​ເຫຍື່ອ ຫຼື ຜູ້​ທີ່​ເຫັນ​ເຫດ­ການ​ຕ້ອງ​ເປັນ​ເຈົ້າ​ການ ​ລາຍ​ງານ​ເຈົ້າ​ໜ້າ­ທີ່​ຕຳ­ຫຼວດ​ທ້ອງ­ຖິ່ນ ພ້ອມ​ທັງ​ມີ​ວິ­ທີ​ສະ­ກັດ​ກັ້ນ​ເຫດ­ການ​ດັ່ງ­ກ່າວ ທາງ​ບໍ­ລິ­ສັດ​ໃຫ້​ຊາບ​ຕື່ມ​ວ່າ: ດ້ວຍ​ເຫດ­ຜົນ​ສ່ວນ​ຕົວ ຜູ້​ທີ່​ຕົກ​ເປັນ​ເຫຍື່ອ​ມັກ​ຈະ​ມິດ​ເສີຍ ເຊິ່ງ​ແຮ່ງ​ເຮັດ​ໃຫ້​ພວກ​ມື​ໄວ​ໄດ້​ໃຈ ໃນ​ປີ 2011 ມີ​ລາຍ​ງານ​ການ​ລວນ​ລາມ​ທາງ​ເພດ​ໃນ​ໂດຍ­ສານ​ລົດ­ໄຟ 11 ເລື່ອງ ສ່ວນ​ໃນ​ຕົ້ນ​ປີ 2018 ນີ້​ມີ 3 ເລື່ອງ.

ຂ່າວທີ່ກ່ຽວຂ້ອງ