ຂ່າວຫຼ້າສຸດ

ຫາລືດ້ານນະໂຍບາຍກະສິກຳຮ່ວມສຳພັນ ເພື່ອການຜະລິດເປັນສິນຄ້າ

175 05 ກ.ກ. 2018 ຂ່າວໜ້າ​ໜຶ່ງ

    ສະ​ຖາ​ບັນ​ຄົ້ນ­ຄວ້າ​ກະ­ສິ­ກຳ-ປ່າ­ໄມ້ ແລະ ພັດ­ທະ­ນາ​ຊົນ­ນະ­ບົດ (NAFRI) ຮ່ວມ​ກັບ​ອົງ­ການ​ອາ­ຫານ ແລະ ການ​ກະ­ເສດ (FAO) ຈັດ​ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ນະ­ໂຍ­ບາຍ ລະ­ຫວ່າງ ຂະ­ແໜງ­ການ​ກ່ຽວ­ຂ້ອງ ເພື່ອ​ສົ່ງ­ເສີມ​ຕ່ອງ​ໂສ້​ການ​ຜະ­ລິດ​ສຳ­ລັບ​ການ​ຜະ­ລິດ​ເປັນ​ສິນ­ຄ້າ ການ​ຄ້າ ແລະ ການ​ເຂົ້າ​ຫາ​ແຫຼ່ງ​ທຶນ ຂຶ້ນ​ວັນ​ທີ 29 ມິ­ຖຸ­ນາ 2018 ຢູ່​ທ່າ​ລາດ ແຂວງ​ວຽງ​ຈັນ ເປັນ​ປະ­ທານ​ຂອງ​ທ່ານ ສີ​ຕາ​ເຮັ່ງ ທອງ​ສະ­ຫວັນ ຮອງ​ຫົວ­ໜ້າ​ພະ​ແນກ ກະ­ສິ­ກຳ ແລະ ປ່າ­ໄມ້ ແຂວງ​ວຽງ​ຈັນ ທ່ານ ບຸນ​ຖອງ ບົວ​ຫອມ ຫົວ­ໜ້າ NAFRI ແລະ ທ່ານ​ນາງ Karin Nichterlein ຜູ້​ຮັບ­ຜິດ­ຊອບ​ວຽກ​ງານ​ຄົ້ນ­ຄວ້າ​ກະ­ສິ­ກຳ FAO ມີ​ບັນ­ດາ​ກົມ ພະ­ແນກ­ການ ໂຄງ­ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ການ​ສະ­ໜັບ­ສະ­ໜູນ​ທຶນ​ຈາກ​ສະ­ຫະ­ພາບ​ເອີ​ຣົບ (EU) ໂດຍ​ຜ່ານ​ໂຄງ­ການ​ກະ­ສິ­ກຳ​ຮ່ວມ​ສຳ­ພັນ (CDAIS Project) ເພື່ອ​ສະ­ໜັບ­ສະ­ໜູນ​ລາວ​ກ້າວ​ໄປ​ສູ່​ຂະ­ແໜງ​ກະ­ສິ­ກຳ​ທີ່​ມີ​ຜົນ​ຜະ­ລິດ​ທີ່​ດີ ແລະ ມີ​ຄວາມ​ຍືນ​ຍົງ ໃນ​ໄລ­ຍະ 4 ປີ ໃນ​ທົ່ວ​ໂລກ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ການ​ສົ່ງ­ເສີມ​ການ​ພັດ­ທະ­ນາ​ຄວາມ​ສາ­ມາດ​ໃນ​ລະ­ດັບ​ປະ­ເທດ ພາຍ​ໃຕ້​ລະ­ບົບ CDAIS ມາ​ແຕ່​ປີ 2015 ໂດຍ​ມີ​ຈຸດ­ປະ­ສົງ ເພື່ອ​ສ້າງ​ກົນ​ໄກ​ການ​ສົ່ງ­ເສີມ ປະ­ສານ​ງານ ແລະ ປະ​ເມີນ​ການ​ພັດ­ທະ­ນາ​ຄວາມ​ສາ­ມາດ ເຊິ່ງ​ເຫັນ​ວ່າ​ລະ­ບົບ CDAIS ທີ່​ເຂັ້ມ­ແຂງ​ຈະ​ຊ່ວຍ​ຊຸກ­ຍູ້​ການ​ເຕີບ​ໂຕ​ຂອງ​ຂະ­ແໜງ​ກະ­ສິ­ກຳ​ໃຫ້​ມີ​ຄວາມ​ຍືນ​ຍົງ ການ​ລິ​ເລີ່ມ CDAIS ເປັນ​ການ​ຮ່ວມ​ມື​ລະ­ຫວ່າງ NAFRI ອົງ­ການ AGRINATURA-EEIG ແລະ FAO ເຊິ່ງ​ສະ­ໜັບ­ສະ­ໜູນ​ທຶນ​ໂດຍ EU.

    ທ່ານ ບຸນ​ຖອງ ບົວ​ຫອມ ກ່າວ​ວ່າ: ການ​ຜະ­ລິດ​ໝູ ງົວ ແລະ ຜັກ​ອິນ​ຊີ ໄດ້​ຖືກ​ຄັດ​ເລືອກ​ໃຫ້​ເປັນ​ໂຄງ ການ​ທົດ​ລອງ ເຊິ່ງ​ສະ­ແດງ​ໃຫ້​ເຫັນ​ທ່າ­ແຮງ​ທີ່​ພົ້ນ​ເດັ່ນ ເພື່ອ​ປັບ­ປຸງ​ການ​ຜະ­ລິດ​ອາ­ຫານ​ທີ່​ມີ​ໂພ­ຊະ​ນາ​ການ ແລະ ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ຊາວ​ກະ­ສິ­ກອນ ແຕ່​ຕ້ອງ​ມີ​ການ​ເອື້ອ​ອຳ­ນວຍ​ດ້ານ​ນະ­ໂຍ­ບາຍ ເພື່ອ​ໃຫ້​ສາ­ມາດ​ຜັນ​ຂະ ຫຍາຍ ແລະ ນຳ­ໄປ​ສູ່​ການ​ຫັນ­ປ່ຽນ​ຂອງ​ຂະ­ແໜງ​ກະ­ສິ­ກຳ.

    ທ່ານ​ນາງ Karin Nichterlein ໄດ້​ກ່າວ​ວ່າ: ຈຸດ​ມຸ່ງ​ໝາຍ​ຂອງ​ພວກ​ເຮົາ ແມ່ນ​ເພື່ອ​ອຳ­ນວຍ​ຄວາມ​ສະ ດວກ​ໃນ​ການ​ປັບ­ປຸງ​ດ້ານ​ນະ­ໂຍ­ບາຍ ແລະ ກົນ​ໄກ​ການ​ຄຸ້ມ​ຄອງ ເພື່ອ​ເຮັດ​ໃຫ້​ຊາວ​ກະ­ສິ­ກອນ​ມີ​ຫົວ­ຄິດ​ປະ­ດິດ​ສ້າງ ແລະ ນຳ​ເອົາ​ຄວາມ​ຮູ້​ໃໝ່ໆ​ໄປ​ນຳ​ໃຊ້​ເຊັ່ນ: ການ​ວາງ​ລະ­ບົບ​ການ­ຈັດ­ຕັ້ງ​ອົງ​ກອນ​ເພື່ອ​ເຮັດ​ໃຫ້​ລະ­ບົບ​ການ​ຜະ­ລິດ​ທີ່​ດີ ຫຼື ສາ­ມາດ​ເຂົ້າ​ເຖິງ​ຕະ­ຫຼາດ​ໃໝ່ ແລະ ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ຫຼື ການ​ເຮັດ​ກະ­ສິ­ກຳ​ທີ່​ສາ­ມາດ​ຜະ ລິດ​ໄດ້​ຫຼາຍ​ຂຶ້ນ ໂດຍ​ບໍ່​ນຳ​ໃຊ້​ສານ​ເຄ​ມີ ນະ­ໂຍ­ບາຍ​ທີ່​ເອື້ອ​ອຳ­ນວຍ ແລະ ກົນ​ໄກ​ການ­ຈັດ­ຕັ້ງ​ປະ­ຕິ­ບັດ ສຳ­ລັບ​ການ​ຮ່ວມ​ມື ແລະ ການ​ປະ­ສານ​ງານ​ພາຍ​ໃນ​ກົມ​ກອງ ແລະ ການ​ຮ່ວມ​ມື​ກັບ​ບັນ­ດາ​ກົມ​ທີ່​ກ່ຽວ­ຂ້ອງ ເປັນ​ສິ່ງ​ສຳ­ຄັນ​ແກ່​ການ​ສະ­ໜັບ­ສະ­ໜູນ​ດ້ານ​ຜົນ​ປະ­ໂຫຍດ ສະ­ພາບ​ອາ­ກາດ ສັງ­ຄົມ​ໂດຍ​ລວມ ແລະ ສິ່ງ­ແວ­ດລ້ອມ​ທີ່​ດີ​ໃຫ້​ແກ່​ລະ­ບົບ CDAIS ທີ່​ສາ­ມາດ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ຊາວ​ກະ­ສິ­ກອນ ແລະ ຜູ້​ບໍ­ລິ­ໂພກ.

ຂ່າວທີ່ກ່ຽວຂ້ອງ