ປັບປຸງລະບົບເກັບເງິນດ້ວຍກະເປົາລົດເມ

156 06 ກ.ກ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ຄະ­ນະ​ກຳ­ມະ­ການ ການ​ປະ­ສານ​ງານ​ຮ່ວມ​ຄັ້ງ​ທີ 4 ຂອງ​ໂຄງ­ການ​ປັບ­ປຸງ​ປະ​ສິດ­ທິພາບ ລັດ​ວິ​ສາ​ຫະ​ກິດ​ລົດ­ເມ ນະ­ຄອນ­ຫຼວງ​ວຽງ​ຈັນ ໄລ­ຍະ 2 ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ອົງ­ການ JICA ຂຶ້ນ​ວັນ​ທີ 4 ກໍ­ລະ­ກົດ 2018 ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ບຸນ​ຕາ ອ່ອນ​ນາ​ວົງ ຫົວ­ໜ້າ​ກົມ​ຂົນ­ສົ່ງ ກະ­ຊວງ ຍທຂ ທ່ານ ຂຸນ​ຊຶ​ເກະ ຊະ​ກຸ​ໂດ່ ຮອງ​ຫົວ­ໜ້າ​ອົງ­ການ JICA ປະ­ຈຳ​ລາວ ຕາງ­ໜ້າ​ສະ­ຖານ­ທູດ​ຍີ່­ປຸ່ນ​ປະ­ຈຳ​ລາວ  ທ່ານ​ຮອງ​ຫົວ­ໜ້າ​ພະ​ແນກ ຍທຂ ນະ­ຄອນ­ຫຼວງ ອຳ­ນວຍ​ການ​ລັດ​ວິ​ສາ​ຫະ​ກິດ​ລົດ­ເມ ຄະ­ນະ​ຊ່ຽວ­ຊານ​ໂຄງ­ການ ແລະ ຄະ­ນະ​ມາ​ຈາກ​ສຳ­ນັກ­ງານ​ໃຫຍ່ JICA ພ້ອມ​ພະ­ນັກ­ງານ​ທີ່​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ທ່ານ ບຸນ​ຕາ ອ່ອນ​ນາ​ວົງ ກ່າວ​ວ່າ: ການ​ປັບ­ປຸງ​ການ​ຂົນ­ສົ່ງ​ສາ­ທາ­ລະ­ນະ​ເປັນ​ປັດ​ໄຈ​ໜຶ່ງ​ທີ່​ສຳ­ຄັນ​ໃນ​ການ​ແກ້​ໄຂ​ບັນ­ຫາ​ການ​ຈະ­ລາ­ຈອນ​ແອ​ອັດ​ໃນ​ຕົວ​ເມືອງ​ດີ​ຂຶ້ນ ໂຄງ­ການ​ໄລ­ຍະ 2 ໄດ້​ຈັດ​ຕັ້ງ​ປະ­ຕິ­ບັດ​ມາ​ເປັນ​ເວ­ລາ 2 ປີ ເປັນ​ໂຄງ­ການ​ໜຶ່ງ​ທີ່​ເຮັດ​ໃຫ້ ການ​ຂົນ­ສົ່ງ​ສາ­ທາ­ລະ­ນະ​ໃນ​ນະ­ຄອນ­ຫຼວງ​ວຽງ​ຈັນ ມີ​ໃບ​ໜ້າ​ອັນ​ໃໝ່ ແລະ ສະ­ດວກ​ສະ­ບາຍ​ຍິ່ງ​ຂຶ້ນ ໃນ​ນັ້ນ ວຽກ​ທີ່​ພົ້ນ​ເດັ່ນ​ຈຳ­ນວນ​ຜູ້­ໂດຍ­ສານ​ຫັນ​ມາ​ໃຊ້​ລົດ­ເມ​ເພີ່ມ​ຂຶ້ນ ມີ​ລະ­ບົບ​ທີ່​ທັນ​ສະ­ໄໝ​ໃນ​ການ​ຕິດ­ຕາມ​ລົດ­ເມ ພ້ອມ​ທັງ​ໄດ້​ສ້າງ­ຕັ້ງ​ໜ່ວຍ​ງານ City 2 ຢູ່​ສູນ​ການ​ຄ້າ​ລາວ-ໄອ​ເຕັກ ເພື່ອ​ທົດ​ລອງ​ການ​ບໍ­ລິ­ຫານ ແລະ ບໍ­ລິ­ການ​ແບບ​ໃໝ່ ເພື່ອ​ປັບ­ປຸງ​ການ​ຂົນ­ສົ່ງ​ສາ­ທາ­ລະ­ນະ​ໃນ​ຕົວ​ເມືອງ​ນະ­ຄອນ­ຫຼວງ​ໃຫ້​ດີ​ຂຶ້ນ​ເທື່ອ​ລະ​ກ້າວ ໜ່ວຍ​ງານ City 2 ໄດ້​ເປີດ​ສາຍ​ທາງ​ລົດ­ເມ​ສາ­ທາ­ລະ­ນະ​ຕະ­ຫຼາດ​ເຊົ້າ-ສະ­ໜາມ​ບິນ​ວັດ​ໄຕ ແລະ ຕະ­ຫຼາດ​ເຊົ້າ-ສູນ​ການ​ຄ້າ​ລາວ​ໄອ​ເຕັກ ທີ່​ໃຊ້​ລະ­ບົບ​ເກັບ​ເງິນ​ດ້ວຍ​ກະ­ເປົາ​ລົດ­ເມ ອອກ​ລົດ​ຕາມ​ເວ­ລາ​ທີ່​ກຳ­ນົດ ແລະ ຈອດ​ຕາມ​ປ້າຍ​ລົດ­ເມ​ເທົ່າ​ນັ້ນ ພ້ອມ​ທັງ​ໄດ້​ຂະ­ຫຍາຍ​ລະ­ບົບ​ການ​ບໍ­ລິ­ການ ແລະ ບໍ­ລິ­ຫານ​ຂອງ​ໜ່ວຍ​ງານ City 2 ເຂົ້າ​ໄປ​ທົດ​ລອງ​ນຳ​ໃຊ້​ຢູ່​ສາຍ​ທາງ​ຕະ­ຫຼາດ​ເຊົ້າ-ຂົວ​ມິດ­ຕະ­ພາບ 1 ເຫັນ​ວ່າ​ສາ­ມາດ​ເຮັດ​ໃຫ້​ລາຍ​ຮັບ​ເພີ່ມ​ຂຶ້ນ​ຢ່າງ​ຊັດ​ເຈນ ແລະ ມີ​ແຜນ​ຈະ​ຂະ­ຫຍາຍ​ໄປ​ທົດ​ລອງ​ນຳ​ໃຊ້​ໃນ​ສາຍ​ທາງ​ອື່ນໆ ນອກ​ນັ້ນ ໂຄງ­ການ​ຍັງ​ວາງ​ແຜນ​ທົດ​ລອງ​ບໍ­ລິ­ການ​ລົດ­ເມ​ດ້ວຍ​ລະ­ບົບ Park & Ride ເພື່ອ​ຮັບ​ໃຊ້​ພະ­ນັກ­ງານ​ໃນ​ການ​ເດີນ­ທາງ​ໄປ​ບ່ອນ​ເຮັດ​ວຽກ ເພື່ອ​ແກ້​ໄຂ​ການ​ຈະ­ລາ ຈອນ​ແອ​ອັດ​ໃນ​ເວ­ລາ​ເລັ່ງ​ດ່ວນ ສິ່ງ​ເຫຼົ່າ​ນີ້ ຈະ​ຊ່ວຍ​ໃຫ້­ການ​ປັບ­ປຸງ​ວຽກ​ງານ​ການ​ຂົນ­ສົ່ງ​ສາ­ທາ­ລະ­ນະ​ໃນ​ນະ­ຄອນ­ຫຼວງ​ໃຫ້​ນັບ​ມື້​ນັບ​ສະ­ດວກ​ສະ­ບາຍ ແລະ ດີ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ