ມຊ ເປີດຮັບຄຳຮ້ອງ ສະໝັກເຂົ້າຮຽນຫຼັກສູດຕໍ່ເນື່ອງປະລິນຍາຕີ

120 09 ກ.ກ. 2018 ຂ່າວໜ້າ​ໜຶ່ງ

   ຫ້ອງ­ການ​ວິ­ຊາ​ການ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ໄດ້​ເປີດ​ຮັບ​ໃບ​ຄຳ​ຮ້ອງ​ໃຫ້​ພະ­ນັກ­ງານ​ທັງ​ພາກ​ລັດ ແລະ ເອ­ກະ​ຊົນ ທີ່​ຈະ​ສະ­ໝັກ​ເຂົ້າ​ຮຽນ​ຫຼັກ­ສູດ​ຕໍ່​ເນື່ອງ ລະ­ດັບ​ປະ­ລິ​ຍາ​ຕີ ໃນ​ສົກ​ສຶກ​ສາ 2018-2019 ນັບ​ແຕ່​ວັນ​ທີ 02 ກໍ­ລະ­ກົດ ແລະ ຈະ​ປິດ​ຮັບ​ຄຳ​ຮ້ອງ ໃນ​ວັນ​ທີ 10 ສິງ­ຫາ 2018 ສ່ວນ​ການ​ສອບ­ເສັງ​ຄັດ​ເລືອກ​ຂອງ​ແຕ່​ລະ​ຄະ­ນະ​ວິ­ຊາ ແມ່ນ​ຈະ​ດຳ­ເນີນ​ໃນ​ລະ­ຫວ່າງ​ວັນ​ທີ 13-17 ສິງ­ຫາ 2018.

   ທ່ານ ລຽນ​ທອງ ສິດ­ທິ​ວົງ ຮອງ​ຫົວ­ໜ້າ​ຫ້ອງ­ການ​ວິ­ຊາ​ການ  ມຊ ໃຫ້​ຮູ້­ເມື່ອ​ບໍ່​ດົນ​ຜ່ານ​ມາ​ນີ້​ວ່າ:  ການ​ເປີດ​ຂາຍ-ຮັບ​ຄຳ​ຮ້ອງ ໃຫ້​ຜູ້​ສະ­ໝັກ​ເຂົ້າ​ຮຽນ​ຫຼັກ­ສູດ​ຕໍ່​ເນື່ອງ​ປະ­ລິນ­ຍາ​ຕີ ແມ່ນ​ເພື່ອ​ຍົກ​ລະ­ດັບ​ຄວາມ​ຮູ້​ໃຫ້​ພະ­ນັກ­ງານ​ລະ­ດັບ​ຊັ້ນ​ສູງ  ແລະ ອະ­ນຸ​ປະ­ລິນ­ຍາ​ຕີ​ໃຫ້​ມີ​ຄຸ­ນະ­ພາບ ປະ­ຕິ­ບັດ​ວຽກ​ງານ​ໃຫ້​ມີ​ປະ​ສິດ­ທິ​ຜົນ  ເຊິ່ງ​ໃນ​ປີ­ຜ່ານ­ມາ​ສາ­ມາດ​ຂາຍ​ຄຳ​ຮ້ອງ​ໄດ້​ທັງ​ໝົດ  1.500 ສະ­ບັບ ສ່ວນ​ໃນ​ປີ​ນີ້ ຄາດ​ວ່າ​ຈະ​ຂາຍ​ໃຫ້​ໄດ້ 2.000 ກວ່າ​ສະ­ບັບ  ໃນ​ລາ­ຄາ​ເດີມ 5.000 ກີບ​ຕໍ່​ສະ­ບັບ ບວກ​ໃສ່​ຄ່າ​ລົງ­ທະ­ບຽນ 35.000 ກີບ ລວມ​ເປັນ 40.000 ກີບ​ຕໍ່ 1 ສະ­ບັບ.

   ສຳ­ລັບ​ຫຼັກ­ສູດ​ຕໍ່​ເນື່ອງ​ປະ­ລິນ­ຍາ​ຕີ ປະ­ກອບ​ມີ 09 ຄະ­ນະ​ຄື: ຄະ­ນະ​ວິ­ສະ­ວະ­ກຳ​ສາດ ຄະ­ນະ​ວິ​ທະຍາ​ສາດ​ສັງ­ຄົມ ຄະ­ນະ​ວິ­ທະ­ຍາ­ສາດ​ປ່າ­ໄມ້ ຄະ­ນະ​ສຶກ​ສາ​ສາດ ຄະ­ນະ​ເສດ­ຖະ­ສາດ ແລະ ບໍ­ລິ­ຫານ​ທຸ­ລະ​ກິດ ຄະ­ນະ​ນິ­ຕິ­ສາດ-ລັດ­ຖະ­ສາດ ຄະ­ນະ​ກະ­ເສດ­ສາດ ຄະ­ນະ​ອັກ­ສອນ­ສາດ ແລະ ຄະ­ນະ​ຊັບ​ພະ­ຍາກອນ​ນ້ຳ ສຳ­ລັບ​ຜູ້​ທີ່​ມີ​ສິດ​ເຂົ້າ​ຮຽນ​ຫຼັກ­ສູດ​ຕໍ່​ເນື່ອງ​ປະ­ລິ​ຍາ​ຕີ ຕ້ອງ​ມີ​ເງື່ອນ­ໄຂ​ຄົບ​ຖ້ວນ​ດັ່ງ­ນີ້: ພະ­ນັກ­ງານ​ທີ່​ຮຽນ​ຈົບ​ອະ­ນຸ​ປະ­ລິ​ຍາ​ຕີ ຫຼື ທຽບ​ເທົ່າ ທີ່​ເປັນ​ພະ­ນັກ­ງານ​ຂອງ​ລັດ ຫຼື ເອ­ກະ​ຊົນ ທີ່​ໄດ້​ຜ່ານ​ວຽກ​ງານ​ມາ​ແລ້ວ​ບໍ່​ຕ່ຳ​ກວ່າ 2 ປີ  ແລະ ໄດ້​ຮັບ​ອະ­ນຸ­ຍາດ​ຈາກ​ກົມ​ກອງ​ທີ່​ກ່ຽວ­ຂ້ອງ ສາ­ມາດ​ສະ­ໝັກ​ເຂົ້າ​ຮຽນ​ຕໍ່​ໃນ​ສາຂາ​ວິ­ຊາ​ທີ່​ຕົນ​ຮຽນ​ຈົບ​ມາ​ນັ້ນ​ໄດ້ ແຕ່​ຕ້ອງ​ຜ່ານ​ການ​ສອບ­ເສັງ​ຄັດ​ເລືອກ ສະ­ເພາະ​ນັກ​ສຶກ​ສາ​ທີ່​ຮຽນ​ຈົບ​ອະ­ນຸ​ປະ­ລິ​ຍາ​ຕີ ຫຼື ທຽບ​ເທົ່າ​ຈາກ​ໂຮງ­ຮຽນ​ລັດ ຫຼື ໂຮງ­ຮຽນ​ເອ­ກະ​ຊົນ​ໃນ​ສົກ​ສຶກ​ສາ 2017-2018 ຕ້ອງ​ມີ​ຄະ­ແນນ​ສະ­ເລ່ຍ​ສະ​ສົມ​ທັງ​ໝົດ 3,00 ຂຶ້ນ​ໄປ ຈຶ່ງ​ສາ­ມາດ​ສະ­ໝັກ​ເຂົ້າ​ຮຽນ​ຕໍ່​ໃນ​ສາ­ຂາ​ວິ­ຊາ​ທີ່​ຕົນ​ຮຽນ​ຈົບ​ມາ​ ໄດ້​ແຕ່​ຕ້ອງ​ຜ່ານ​ການ​ສອບ­ເສັງ​ຄັດ​ເລືອກ.

ຂ່າວທີ່ກ່ຽວຂ້ອງ