ຕາຍແລ້ວບໍ່ໄດ້ກິນ

176 09 ກ.ກ. 2018 ນານາສາລະ

ຄຳ​ເວົ້າ​ຂ້າງ​ເທິງ​ນີ້ ຖ້າ​ຈັບ​ມາ​ຄິດ​ທົບ​ທວນ​ຈະ​ຮູ້​ວ່າ ​ມັນ​ຕົກ​ຢູ່​ໃນ​ກະ­ແສ​ຖ້ວມ​ລົ້ນ​ຂອງ​ວັດ­ຖຸ​ນິ­ຍົມ ແລະ ບໍ­ລິ­ໂພກ​ນິ­ຍົມ ເຊິ່ງ​ມັນ​ເປັນ​ຄ່າ​ນິ­ຍົມ​ຄູ່​ຂະ­ໜານ​ກັນ​ຂອງ​ໂລ­ກາ​ພິ​ວັດ ເບິ່ງ​ຄື​ວ່າ​ມີ​ໜ້ອຍ​ຄົນ​ ຈະ​ຄິດ​ເປັນ​ຫ່ວງ​ອຳ­ນາດ​ອິດ​ທິ​ພົນ​ຂອງ​ມັນ ​ທີ່​ສາ­ມາດ​ທຳ­ລາຍ​ຄຸນ­ຄ່າ ແລະ ຮາກ​ເຫງົ້າ​ຂອງ​ວັດ­ທະ­ນະ­ທຳ​ສັງ­ຄົມ​ໃດ​ໜຶ່ງ ຖ້າ​ຫາກ​ຍອມ­ຮັບ​ມັນ​ໂດຍ​ບໍ່​ກັ່ນ​ຕອງ​ ກໍ່​ຈະ​ມີ​ແຕ່​ເພ​ກັບ​ເພ​ຢ່າງ​ດຽວ.

   ການ​ພັດ­ທະ­ນາ​ຂອງ​ສັງ­ຄົມ​ໃດ​ກໍ່​ຕາມ ຖ້າ​ຂາດ​ກຸ່ມ​ຖ່ວງ​ດຶງ​ເພື່ອ​ສ້າງ​ຄວາມ​ສົມ​ດຸນ​ໃຫ້​ເກີດ​ມີ​ຂຶ້ນ ສັງ­ຄົມນັ້ນໆ​ກໍ່​ຈະ​ເຫັນ​ແຕ່​ເລື່ອງ​ຂອງ​ວັດ­ຖຸ ແລະ ປາກ​ທ້ອງ​ເປັນ​ໃຫຍ່ ໂດຍ​ຂາດ​ການ​ຄຳ­ນຶງ​ເຖິງ​ການ​ເຊີດ​ຊູ​ຮາກ​ເຫງົ້າ​ເອ­ກະ­ລັກ​ຂອງ​ຕົນ ໂດຍ​ສະ­ເພາະ ຖ້າ​ຕົກ​ຢູ່​ໃນ​ກະ­ແສ​ການ​ຢຽບ​ຄັນ​ເລັ່ງ​ຄວາມ​ລວຍ ​ໂດຍ​ບໍ່​ຄິດ​ຈະ​ຢຽບ​ເບກ​ຈັກ​ເທື່ອ​ນີ້ ຍິ່ງ​ບໍ່​ຕ້ອງ​ເວົ້າ​ເຖິງ ພວກ​ເຮົາ​ຄົງ​ບໍ່​ລືມ​ວ່າ ​ປະ­ຫວັດ­ສາດ​ໂລກ​ໄດ້​ບັນ­ທຶກ​ແລ້ວ​ວ່າ ທ່ານ Karl Marx ຄື​ຜູ້​ສ້າງ​ເບກ​ເຫຼັກ​ກ້າ ເພື່ອ​ມາ​ຕ້ານ­ທານ​ບໍ່​ໃຫ້​ຄວາມ​ຫຼຸດ​ໂຕນ​ລະ­ຫວ່າງ​ນາຍ­ທຶນ​ກັບ​ກຳ­ມະ­ກອນ ເຊິ່ງ​ປັດ​ຊະ​ຍາ​ເສດ­ຖະ­ກິດ​ຂອງ​ເພິ່ນ​ ຖືກ​ວິ­ຈານ​ຈາກ​ເຈົ້າ​ພໍ່​ທຶນ​ແບບ​ບໍ່​ເຜົາ​ຜີ​ກັນ​ພຸ້ນ​ລະ ! ແນ່­ນອນ​ມີ​ມືດ​ກໍ່​ມີ​ແຈ້ງ ມີ​ຜູ້​ໂລບ​ໂລ­ພາ ກໍ່​ມີ​ຜູ້​ແຈ້ງ​ເຕືອນ​ເພື່ອ​ໃຫ້​ເຫັນ­ໃຈ​ຄົນ​ຍາກ­ຈົນ​ເຂັນ​ໃຈ.

   ຜູ້​ຂຽນ​ຈຶ່ງ​ຂໍ​ຍົກ​ເອົາ​ບາງ​ປະ­ເດັນ​ແນວ​ຄິດ​ຂອງ​ທ່ານ Karl Marx ທີ່​ອາ­ຈານ ສັກ​ບໍ­ວອນ ນັກ­ວິ­ຊາ­ການ​ໄທ ໄດ້​ພິມ​ປີ 2017 ເລື່ອງ​ປັດ​ຊະ​ຍາ​ຂອງ ກາກ​ມາກ ເຊັ່ນ: ເລື່ອງ​ກ່ຽວ​ກັບ​ແຮງ​ງານ ເຊິ່ງ​ມີ​ຜູ້​ສະ­ແຫວງຫາ​ປະ­ໂຫຍດ​ມະ­ຫາ­ສານ ​ທີ່​ຂາດ​ການ​ແບ່ງ­ປັນ​ຢ່າງ​ຍຸ­ຕິ​ທຳ ເພາະ​ນາຍ­ທຶນ​ເປັນ​ເຈົ້າ​ຂອງ​ການ​ຜະ­ລິດ ​ຈຶ່ງ​ຖື​ໂອ­ກາດ​ເອົາ​ກຳ­ໄລ​ຢ່າງ​ປາ­ສະ­ຈາກ​ຄວາມ​ເປັນ​ທຳ ຍົກ​ຕົວ­ຢ່າງ: ເມື່ອ​ຝ້າຍ​ເຂົ້າ​ສູ່​ໂຮງ­ງານ​ແລ້ວ ​ອອກ​ມາ​ເປັນ​ສິນ­ຄ້າ​ລາ­ຄາ​ງາມ ໂດຍ​ຜ່ານ​ສີ­ມື​ກຳ­ມະ­ກອນ​ເປັນ​ຜູ້​ສ້າງ​ຄຸນ­ຄ່າ ແຕ່​ເວ­ລາ​ຈ່າຍ​ຄ່າ​ແຮງ​ງານ ​ຜັດ​ປາ­ສະ­ຈາກ​ຄວາມ​ຍຸ­ຕິ​ທຳ...? ນອກ­ຈາກ​ຄ່າ​ແຮງ​ງານ​ບໍ່​ສູງ​ເທົ່າ​ທີ່​ຄວນ​ແລ້ວ ​ຍັງ​ມີ​ຫຼາຍ​ກໍ­ລະ­ນີ​ຕ່ຳ​ກວ່າ​ຄວາມ​ເປັນ​ຈິງ...! ການ​ຂາດ​ລະ­ບົບ​ຖ່ວງ​ດຶງ​ທີ່​ພຽງ­ພໍ​ ໃຫ້​ແກ່​ຂະ​ບວນ​ການ​ພັດ­ທະ­ນາ​ ຍ່ອມ​ບໍ່​ຕ່າງ​ຫຍັງ​ກັບ​ການ​ຢຽບ​ຄັນ​ເລັ່ງ​ ໂດຍ​ບໍ່​ເຄີຍ​ເຕາະ​ເບກ​ຈັກ​ເທື່ອ ?.

   ຕາຍ​ແລ້ວບໍ່​ໄດ້​ກິນ ຫຼື ຍາມ​ມີ​ໂອ­ກາດ​ໃຫ້​ຂ້ຽວ​ກິນ​ຂ້ຽວ​ເສບ ​ຈຶ່ງ​ບໍ່​ແມ່ນ​ສິ່ງ​ອື່ນ​ໄກ ແຕ່​ມັນ​ແມ່ນ​ເງົາ​ມືດ​ຂອງ​ຜູ້​ເດີນ​ຕາມ​ລະ­ບົບ​ທຶນ ຫຼາຍ​ຄັ້ງ​ຜູ້​ຂຽນ​ກໍ່​ຈະ​ໄດ້​ຍິນ​ສຽງ​ເຂົ້າ​ຫູ​ຈາກ​ສະ­ພາ​ກາ­ເຟ​ວ່າ: ໂອຍ​ອັນ​ນັ້ນ ອັນ​ນີ້ ກະ​ວ່າ​ຍາກ​ອະ­ທິ­ບາຍ​ຍາກ ສົງ­ໄສ​ມີ​ອັນ​ໃດ​ໜຶ່ງ​ຄາ​ຄຸງ​ໃຈ ​ຈຶ່ງ​ເຮັດ​ໃຫ້​ຜູ້­ກ່ຽວ​ເວົ້າ​ອອກ​ຍາກ ຢ່າງ­ໃດ​ກໍ່​ຕາມ Karl Marx ກໍ່​ແມ່ນ​ຄົນ​ຂອງ​ໂລກ​ຜູ້​ໜຶ່ງ​ທີ່​ສະ­ເໜີ​ຄວາມ​ຄິດ​ສ້າງ​ຄວາມ​ຍຸ­ຕິ​ທຳ​ໃຫ້​ແກ່​ສັງ­ຄົມ !.

+ ດັ້ນ​ກີບ​ເມກ

ຂ່າວທີ່ກ່ຽວຂ້ອງ