ລະດົມເຄື່ອງອຸປະໂພກ-ບໍລິໂພກ ຊ່ວຍເຫຼືອຄົນບ້າໄບ້-ເສຍຈິດ ທີ່ຕິດພັນກັບການຂໍທານ

105 10 ກ.ກ. 2018 ຂ່າວໜ້າ​ໜຶ່ງ
ລະດົມເຄື່ອງອຸປະໂພກ-ບໍລິໂພກ ຊ່ວຍເຫຼືອຄົນບ້າໄບ້-ເສຍຈິດ ທີ່ຕິດພັນກັບການຂໍທານ

   ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ (ຮສສ.ນວ) ແລະ ທ່ານ​ນາງ ພາ­ສີ ພິ­ລາ​ວົງ ພັນ​ລະ​ຍາ​ທ່ານ ຄຳ​ປານ ພິ­ລາ​ວົງ ອະ­ດີດ​ເຈົ້າ​ຄອງ ນວ ປຸກ­ລະ­ດົມ​ພະ­ນັກ­ງານ-ລັດ­ຖະ­ກອນ​ພາຍ​ໃນ​ພະ​ແນກ​ດັ່ງ­ກ່າວ ບໍ­ລິ­ຈາກ​ເຄື່ອງ​ອຸ­ປະ­ໂພກ-ບໍ­ລິ­ໂພກ (ອາ­ຫານ ນ້ຳ​ດື່ມ ເຂົ້າ­ໜົມ ໝີ່ ແລະ ເຄື່ອງ­ນຸ່ງ​ຫົ່ມ) ລວມ​ມູນ​ຄ່າ 5 ລ້ານ​ກວ່າ​ກີບ ເພື່ອ​ນຳ­ໄປ​ມອບ​ໃຫ້​ຄົນ​ບ້າ​ໄບ້-ເສຍ​ຈິດ​ທີ່​ຕິດ​ພັນ​ກັບ​ການ​ຂໍ­ທານ ຢູ່​ສູນ​ສັງ­ຄົມ​ສົງ­ເຄາະ ບ້ານ​ສົມ​ສະ­ຫງ່າ ເມືອງ​ໄຊ​ເຊດ​ຖາ ນວ ວັນ​ທີ 6 ກໍ­ລະ­ກົດ 2018 ເພື່ອ​ແບ່ງ­ປັນ​ຄວາມ­ສຸກ ແລະ ນ້ຳ­ໃຈ​ຊ່ວຍ­ເຫຼືອ​ຜູ້​ດ້ອຍ​ໂອ­ກາດ ທັງ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ວັນ​ສ້າງ­ຕັ້ງ​ສະ­ຫະ­ພັນ​ແມ່­ຍິງ​ລາວ ຄົບ­ຮອບ 63 ປີ (20 ກໍ­ລະ­ກົດ 1945-20 ກໍ­ລະ­ກົດ 2018) ທີ່​ຈະ​ມາ​ເຖິງ​ໃຫ້​ມີ​ບັນ­ຍາ­ກາດ​ຟົດ­ຟື້ນ.

   ທ່ານ​ນາງ ລຳ​ພອຍ ສີ​ອັກ​ຄະ​ຈັນ ກ່າວ​ວ່າ: ສູນ​ສັງ­ຄົມ​ສົງ­ເຄາະ ແມ່ນ​ສູນ​ໜຶ່ງ​ທີ່​ຂຶ້ນ​ກັບ​ພະ​ແນກ ຮສສ.ນວ ເຊິ່ງ​ໄດ້​ເຕົ້າ­ໂຮມ​ເອົາ​ຄົນ​ບ້າ​ໄບ້-ເສຍ​ຈິດ​ທີ່​ຕິດ​ພັນ​ກັບ​ການ​ຂໍ­ທານ ມາ​ດຳ­ລົງ​ຊີ­ວິດ​ຢູ່​ສູນ​ແຫ່ງ​ນີ້ ເພື່ອ​ແນ­ໃສ່​ຫຼຸດ­ຜ່ອນ​ພາ­ລະ​ຂອງ​ຄອບ­ຄົວ ກໍ່​ຄື ສັງ­ຄົມ ປັດ­ຈຸ­ບັນ​ສູນ​ສັງ­ຄົມ​ສົງ­ເຄາະ​ມີ​ຂໍ­ທານ ບ້າ​ໄບ້-ເສຍ​ຈິດ 200 ກວ່າ​ຄົນ ໂດຍ​ມີ​ພະ­ນັກ­ງານ​ຂອງ​ພະ​ແນກ ຮສສ.ນວ ປະ­ຈຳ ທ່ານ­ໝໍ​ຈາກ​ພະ​ແນກ​ສາ­ທາ­ລະ­ນະ​ສຸກ ພະ­ນັກ­ງານ​ຈາກ​ກອງ​ບັນ­ຊາ​ການ ປກສ ນວ ແລະ ອ້າຍ​ລ້ຽງ​ຈຳ­ນວນ​ໜຶ່ງ​ເປັນ​ຜູ້​ດູ​ແລ​ເບິ່ງ­ແຍງ ຮັກ­ສາ​ສຸ­ຂະ­ພາບ ແລະ ຄວາມ​ປອດ​ໄພ ເຊິ່ງ​ໃນ​ໄລ­ຍະ​ຜ່ານ​ມາ​ພວກ​ເຮົາ​ກໍ່​ພົບ​ຄວາມ​ຫຍຸ້ງ­ຍາກ ໂດຍ​ສະ­ເພາະ ງົບ­ປະ­ມານ​ໃນ​ການ​ລ້ຽງ​ດູ​ແມ່ນ​ມີ​ຈຳ­ກັດ ແຕ່​ແນວ­ໃດ​ກໍ່​ດີ ພວກ​ເຮົາ​ກໍ່​ໄດ້​ເອົາ­ໃຈ­ໃສ່​ປຸກ­ລະ­ດົມ​ທົ່ວ​ສັງ­ຄົມ ໂດຍ​ສະ­ເພາະ ນັກ­ທຸ­ລະ­ກິດ ພະ­ນັກ­ງານ​ບຳ­ນານ-ອາ­ວຸ­ໂສ ບັນ­ດາ​ທ່ານ​ຜູ້​ມີ­ໃຈ​ບຸນ ເພື່ອ​ມາ​ລ້ຽງ​ດູ ລະ­ດົມ​ອາ­ຫານ​ແຫ້ງ ວັດ­ຖຸ​ປັດ​ໄຈ ເຄື່ອງ­ນຸ່ງ​ຫົ່ມ​ຈຳ­ນວນ​ໜຶ່ງ​ເພື່ອ​ນຳ​ມາ​ຊ່ວຍ­ເຫຼືອ​ເຂົາ­ເຈົ້າ.

   ຂ້າ­ພະ­ເຈົ້າ​ກໍ່​ຂໍ​ຕາງ­ໜ້າ​ໃຫ້​ພະ​ແນກ ຮສສ.ນວ ແລະ ພະ­ນັກ­ງານ​ທີ່​ຮັບ­ຜິດ­ຊອບ​ສູນ​ສັງ­ຄົມ​ສົງ­ເຄາະ ອີງ­ໃສ່​ສະ­ພາບ​ຄວາມ​ເປັນ​ຈິງ​ຂອງ​ສູນ​ສັງ­ຄົມ​ສົງ­ເຄາະ​ທີ່​ຍັງ​ມີ​ຄວາມ​ຫຍຸ້ງ­ຍາກ ສະ­ນັ້ນ ພວກ​ເຮົາ​ຍັງ​ມີ​ຄວາມ​ຕ້ອງ­ການ​ການ​ຊ່ວຍ­ເຫຼືອ​ຈາກ​ພາກ­ສ່ວນ​ຕ່າງໆ ໂດຍ​ສະ­ເພາະ ຢາ ອາ­ຫານ ເຄື່ອງ​ດື່ມ-ນ້ຳ​ດື່ມ ເຄື່ອງ­ນຸ່ງ​ຫົ່ມ ແລະ ອື່ນໆ ສະ­ນັ້ນ ບັນ­ດາ​ທ່ານ​ທີ່​ມີ​ເຈດ​ຈຳ­ນົງ​ຈະ​ໃຫ້­ການ​ຊ່ວຍ­ເຫຼືອ​ກໍ່​ສາ­ມາດ​ຕິດ­ຕໍ່​ມາ​ຍັງ​ພະ​ແນກ ຮສສ.ນວ ໄດ້.

ຂ່າວທີ່ກ່ຽວຂ້ອງ