JETRO ຊີ້ແຈງສາເຫດ ການຂົນສົ່ງສິນຄ້າຢູ່ລາວ ມີມູນຄ່າສູງ

219 11 ກ.ກ. 2018 ຂ່າວໜ້າ​ໜຶ່ງ
JETRO ຊີ້ແຈງສາເຫດ ການຂົນສົ່ງສິນຄ້າຢູ່ລາວ ມີມູນຄ່າສູງ

   ລາ­ຄາ​ການ​ຂົນ­ສົ່ງ​ສິນ­ຄ້າ​ພາຍ​ໃນ ແລະ ຕ່າງ­ປະ­ເທດ​ມູນ​ຄ່າ​ສູງ ເປັນ​ອຸ­ປະ­ສັກ​ທີ່​ສຳ­ຄັນ​ກະ­ທົບ​ຕໍ່​ທຸກ​ຂະ­ແໜງ ການ​ທີ່​ດຳ­ເນີນ​ທຸ­ລະ​ກິດ​ໃນ ສປປ ລາວ ພ້ອມ​ທັງ​ເປັນ​ປັດ​ໄຈ​ທີ່​ສຳ­ຄັນ​ໃນ​ການ​ດຶງ​ດູດ​ການ​ລົງ­ທຶນ​ຈາກ​ຕ່າງ­ປະ­ເທດ​ເນື່ອງ​ຈາ​ກວ່າ​ຄ່າ​ຂົນ­ສົ່ງ​ມີ​ຜົນ​ກະ­ທົບ​ໂດຍ​ກົງ​ຕໍ່​ລາ­ຄາ​ສິນ­ຄ້າ ແລະ ຕົ້ນ​ທຶນ​ການ​ຜະ­ລິດ.

   ທ່ານ Yoshihiro Kinnoshita ຕາງ­ໜ້າ​ສະ­ພາ​ການ​ຄ້າ​ຍີ່­ປຸ່ນ​ປະ­ຈຳ​ລາວ ໄດ້​ມີ​ຄຳ​ເຫັນ​ກ່ຽວ​ກັບ​ບັນ­ຫາ​ການ​ອຳ­ນວຍ​ຄວາມ​ສະ­ດວກ​ດ້ານ​ການ​ຄ້າ ແລະ ການ​ຂົນ­ສົ່ງ​ໃນ ສປປ ລາວ ຕໍ່​ກອງ​ປະ­ຊຸມ​ທຸ­ລະ​ກິດ​ລາວ ຄັ້ງ​ທີ 11 ວ່າ: ປັດ​ໄຈ​ທີ່​ເຮັດ​ໃຫ້​ລາ­ຄາ​ຂົນ­ສົ່ງ​ຂອງ ສປປ ລາວ ມູນ​ຄ່າ​ສູງ​ກວ່າ​ປະ­ເທດ​ເພື່ອນ​ບ້ານ ຍ້ອນ​ຄວາມ​ບໍ່​ດຸ່ນ​ດ່ຽງ​ຂອງ​ການ​ຄ້າ ແລະ ຄ່າ​ໃຊ້​ຈ່າຍ​ທີ່​ຕິດ​ພັນ​ກັບ​ການ​ແຈ້ງ​ເອ­ກະ­ສານ​ທີ່​ສູງ ຕົວ­ຢ່າງ ອີງ​ຕາມ​ຜົນ​ການ​ສຳ​ຫຼວດ​ຂອງ​ອົງ­ການ JETRO ໃນ​ປີ 2016 ຊີ້​ໃຫ້​ເຫັນ​ວ່າ: ຄ່າ​ໃຊ້​ຈ່າຍ​ໃນ​ການ​ແຈ້ງ​ເອ­ກະ­ສານ​ຕ່າງໆ​ໃນ​ດ່ານ ສປປ ລາວ ແລະ ດ່ານ​ປະ­ເທດ​ໄທ ຜ່ານ​ຂົວ​ມິດ­ຕະ­ພາບ 1 ແມ່ນ​ຖືກ​ປະ​ເມີນ​ກວມ​ເອົາ​ເກືອບ 40% ຂອງ​ມູນ​ຄ່າ​ຂົນ­ສົ່ງ​ທັງ​ໝົດ​ຈາກ​ນະ ຄອນ​ຫຼວງ​ວຽງ​ຈັນ​ໄປ​ຫາ​ບາງ­ກອກ ໃນ​ນີ້ ຄ່າ​ໃຊ້​ຈ່າຍ​ໃນ​ການ​ແຈ້ງ​ພາ­ສີ​ຢູ່​ດ່ານ ສປປ ລາວ ແມ່ນ​ສູງ​ກວ່າ​ຢູ່​ດ່ານ​ໄທ​ເຖິງ 1,5 ເທົ່າ ແລະ ຄ່າ​ແຈ້ງ​ຕູ້​ຄອນ​ເທນ​ເນີ້​ຢູ່​ດ່ານ ສປປ ລາວ ແມ່ນ​ສູງ​ກວ່າ​ຢູ່​ດ່ານ​ໄທ ເຖິງ​ສາມ​ເທົ່າ ນອກ​ນີ້ ຜ່ານ​ມາ​ກໍ່​ຍັງ​ມີ​ການ​ຕັ້ງ​ດ່ານ​ກວດ­ກາ​ຕາມ​ເສັ້ນ­ທາງ​ສາຍ​ສຳ­ຄັນ​ພາຍ​ໃນ​ປະ­ເທດ ເຊິ່ງ​ເປັນ​ການ​ສ້າງ​ຄວາມ​ຫຍຸ້ງ­ຍາກ​ໃຫ້​ແກ່​ຜູ້​ປະ­ກອບ​ການ​ໃນ​ການ​ດຳ­ເນີນ​ການ​ຂົນ­ສົ່ງ ພ້ອມ​ນັ້ນ ຂໍ້​ຫຍຸ້ງ­ຍາກ​ຂອງ​ຂັ້ນ​ຕອນ​ການ​ຂໍ­ອະ­ນຸ­ຍາດ​ຂົນ­ສົ່ງ​ສິນ­ຄ້າ​ຜ່ານ​ແດນ​ທີ່​ກຳ­ນົດ​ໂດຍ​ກົມ​ພາ­ສີ ແລະ ການ​ຈຳ­ກັດ​ດ່ານ​ພາ­ສີ​ສາ­ກົນ​ທີ່​ສາ­ມາດ​ຂົນ­ສົ່ງ​ປະ­ຕິ­ບັດ​ໃນ​ປັດ­ຈຸ­ບັນ​ເຫັນ​ວ່າ​ເປັນ​ການ​ຈຳ­ກັດ​ຂີດ​ຄວາມ​ສາ­ມາດ​ຂອງ ສປປ ລາວ ໃນ​ການ​ຍາດ​ແຍ່ງ​ສິນ­ຄ້າ​ຜ່ານ​ແດນ​ຂອງ​ຕົນ ເນື່ອງ​ຈາກ​ຄູ່​ແຂ່ງ​ທີ່­ແທ້​ຈິງ​ໃນ​ການ​ຂົນ­ສົ່ງ​ສິນ­ຄ້າ​ທາງ­ບົກ​ຂອງ ສປປ ລາວ ແມ່ນ​ການ​ຂົນ­ສົ່ງ​ສິນ­ຄ້າ​ຜ່ານ​ແດນ​ທາງ​ເຮືອ ແລະ ທາງ​ອາ­ກາດ ທີ່​ບໍ່​ຜ່ານ ສປປ ລາວ ໝາຍ​ຄວາມ​ວ່າ ການ​ຂົນ­ສົ່ງ​ສິນ­ຄ້າ​ທາງ­ບົກ​ຜ່ານ ສປປ ລາວ ເປັນ​ພຽງ​ໜຶ່ງ​ທາງ​ເລືອກ​ຂອງ​ເຈົ້າ​ຂອງ​ສິນ­ຄ້າ​ເທົ່າ​ນັ້ນ ເຊິ່ງ​ຂໍ້​ຫຍຸ້ງ­ຍາກ​ຂອງ​ຂັ້ນ​ຕອນ​ການ​ຂໍ­ອະ­ນຸ­ຍາດ​ຂົນ­ສົ່ງ​ສິນ­ຄ້າ​ຜ່ານ​ແດນ ແລະ ການ​ຈຳ­ກັດ​ດ່ານ​ພາ­ສີ​ສາ­ກົນ​ທີ່​ສາ­ມາດ​ຂົນ­ສົ່ງ ນອກ­ຈາກ​ຈະ​ເຮັດ​ໃຫ້​ຄ່າ​ບໍ­ລິ­ການ​ຂົນ­ສົ່ງ​ຜ່ານ​ແດນ ສປປ ລາວ ສູງ​ແລ້ວ ຍັງ​ບໍ່​ເປັນ​ການ​ສະ­ໜັບ­ສະ­ໜູນ​ຍຸດ​ທະ​ສາດ​ຂອງ​ລັດ­ຖະ­ບານ​ໃນ​ການ​ຫັນ­ປ່ຽນ ສປປ ລາວ ຈາກ​ປະ­ເທດ​ທີ່​ບໍ່​ມີ​ຊາຍ​ແດນ​ຕິດ​ກັບ​ທະ­ເລ​ມາ​ເປັນ​ປະ­ເທດ​ເຊື່ອມ​ຕໍ່.

   ເພື່ອ​ແກ້​ໄຂ​ສິ່ງ​ທີ່​ກ່າວ​ມາ​ນັ້ນ ຜູ້­ຕາງ­ໜ້າ​ສະ­ພາ​ການ​ຄ້າ​ຍີ່­ປຸ່ນ​ປະ­ຈຳ​ລາວ ໄດ້​ສະ­ເໜີ​ໃຫ້​ກົມ​ພາ­ສີ​ອອກ​ນິ­ຕິ​ກຳ​ກ່ຽວ​ກັບ​ຂັ້ນ​ຕອນ​ການ​ຂົນ­ສົ່ງ​ສິນ­ຄ້າ​ຜ່ານ​ແດນ​ໃຫ້​ເປັນ​ມາດ­ຕະ­ຖານ ແລະ ໃຫ້​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້ ໃນ​ນີ້ ບໍ່​ຄວນ​ກຳ­ນົດ​ໃຫ້​ມີ​ຂອດ​ການ​ຂໍ­ອະ­ນຸ­ຍາດ​ລາຍ­ການ​ຂົນ­ສົ່ງ​ສິນ­ຄ້າ​ຜ່ານ​ແດນ ສຳ­ລັບ​ສິນ­ຄ້າ​ທົ່ວ​ໄປ​ທີ່​ບໍ່​ແມ່ນ​ສິນ­ຄ້າ​ທີ່​ລັດ­ຖະ­ບານ​ຄຸ້ມ​ຄອງ ຫຼື ສິນ­ຄ້າ​ເກືອດ​ຫ້າມ ດັ່ງ​ທີ່​ປະ­ຕິ­ບັດ​ຢູ່​ປັດ­ຈຸ­ບັນ ໃຫ້​ມີ​ການ​ລະ­ບຸ​ລາຍ­ການ​ສິນ­ຄ້າ​ທີ່​ສະ­ຫງວນ ເພື່ອ​ເກັບ​ລາຍ​ຮັບ​ຂອງ​ລັດ­ຖະ­ບານ​ທີ່​ຊັດ​ເຈນ.

ຂ່າວທີ່ກ່ຽວຂ້ອງ