ຂ່າວຫຼ້າສຸດ

ສະພາ​ຄວາມ​ໝັ້ນຄົງ​ຮັບຮອງ​ມະຕິ​ກ່ຽວ​ກັບ​ການ​ປົກ​ປ້ອງ​ເດັກນ້ອຍ​ຢູ່​ໃນ​ເຂດ​ເກີດ​ການ​ພິພາດ

440 11 ກ.ລ. 2018 ຂ່າວຕ່າງປະເທດ
ສະພາ​ຄວາມ​ໝັ້ນຄົງ​ຮັບຮອງ​ມະຕິ​ກ່ຽວ​ກັບ​ການ​ປົກ​ປ້ອງ​ເດັກນ້ອຍ​ຢູ່​ໃນ​ເຂດ​ເກີດ​ການ​ພິພາດ

     ຕາມ​ຂ່າວ​ຈາກ​ນີວ​ຢອກ ວັນ​ທີ 9 ກໍລະກົດ​ນີ້ ສະພາ​ຄວາມ​ໝັ້ນຄົງ ຂອງ​ສະຫະ​ປະຊາ​ຊາດ ໄດ້​ຮັບຮອງ​ມະຕິ​ສະບັບ​ໜຶ່ງ ດ້ວຍ​ເປົ້າ​ໝາຍ​ກໍ​ແມ່ນ​ສ້າງ​ຂອບ​ອອກ​ມາ ເພື່ອ​ຫັນ​ເປັນ​ລະບົບ​ໃນ​ການ ປົກ​ປ້ອງ ຮັບປະກັນ​ສິດທິ ແລະ​ສະຫວັດດີ​ການ​ໃຫ້​ແກ່​ເດັກນ້ອຍ​ຢູ່​ໃນ​ບັນດາ​ເຂດ​ເກີດ​ການ​ພິພາດ ທີ່​ມີ​ການ​ປະກອບ​ອາວຸດ.

    ມະຕິ​ເລກ​ທີ 2427 ດັ່ງກ່າວ ໄດ້​ຮັບຮອງ​ຈາກ​ສະມາຊິກ​ສະພາ​ຄວາມ​ໝັ້ນຄົງ​ທັງ​ໝົດ 15 ປະເທດ ໂດຍ​ໄດ້​ກ່າວ​ປະນາມ​ເຖິງ​ທີ່​ສຸດ ຕໍ່​ການ​ທີ່​ຝ່າຍ​ຕ່າງໆ​ທີ່​ເຂົ້າ​ຮ່ວມ​ການ​ສູ້​ຮົບ ມີ​ການ​ຮັບ​ສະໝັກ ເດັກນ້ອຍ​ໄປ​ເປັນ​ທະຫານ ກໍ​ຄື​ການ​ເຂັ່ນຂ້າ ຂົ່ມຂືນ ແລະ​ ກະທຳ​ຮຸນ​ແຮງ​ທາງ​ເພດ ຕໍ່​ເດັກນ້ອຍ.

ມະຕິ​ດັ່ງກ່າວ​ໄດ້​ກ່າວ​ປະນາມ​ຕໍ່​ການ​ໂຈມ​ຕີ​ທີ່​ມຸ່ງ​ໃສ່​ໂຮງໝໍ ໂຮງຮຽນ ແລະ​ການ​ທີ່​ຝ່າຍ​ຕ່າງໆ ທີ່​ເຂົ້າ​ຮ່ວມ​ໃນ​ການ​ພິພາດ ກີດຂວາງ​ຕໍ່​ການເຄື່ອນໄຫວ​ຊ່ວຍເຫຼືອ​ມະນຸດສະທຳ ໃຫ້​ແກ່​ເດັກນ້ອຍ ຢູ່​ໃນ​ບັນດາ​ເຂດ​ເກີດ​ການ​ພິພາດ.

    ສະຖິຕິ​ຂອງ​ສະຫະ​ປະຊາ​ຊາດ ໃຫ້​ຮູ້​ວ່າ ໃນ​ປີ 2017 ໄດ້​ເກີດ​ການ​ລະເມີດ​ຕໍ່​ສິດທິ ຂອງ​ເດັກນ້ອຍ​ຢ່າງ​ຮ້າຍ​ແຮງ ຈຳນວນ 21.000 ກວ່າ​ກໍລະນີ ຢູ່​ໃນ​ບັນດາ​ເຂດ​ທີ່​ເກີດ​ພິພາດ ນັບ​ວ່າ​ເປັນ​ຕົວ​ເລກ​ທີ່​ເພີ່ມ​ຂຶ້ນ​ເມື່ອ​ທຽບໃສ່ 15.500 ກໍລະນີ ທີ່​ເກີດ​ຂຶ້ນ​ໃນ​ປີ 2016./.

 

ຂ່າວທີ່ກ່ຽວຂ້ອງ