ຂ່າວຫຼ້າສຸດ

RCEP ຢືນຕໍ່ໜ້າສົງຄາມການຄ້າໂລກ

446 25 ກ.ກ. 2018 ນານາສາລະ

   ໃນ​ຂະ­ນະ​ທີ່​ສົງ­ຄາມ​ການ​ຄ້າ​ໂລກ​ລະ­ຫວ່າງ ອາ​ເມ​ຣິ​ກາ ແລະ ຈີນ ພວມ​ດຳ­ເນີນ​ຢ່າງ​ຂ້ຽວ­ຂາດ ເຊິ່ງ​ມີ​ການ​ຄາດ​ຄະ­ເນ​ວ່າ ໃນ​ເດືອນ​ສິງ­ຫາ​ທີ່​ຈະ​ເຖິງ​ນີ້ ຈະ​ເປັນ​ເສັ້ນ​ຕາຍ​ຂອງ​ການ​ຂຶ້ນ​ພາ­ສີ​ຮອບ​ໃໝ່​ຕໍ່​ສິນ­ຄ້າ​ຂອງ​ຈີນ​ທີ່​ມີ​ມູນ​ຄ່າ​ປະ­ມານ 2 ແສນ​ລ້ານ​ໂດ​ລາ ລວມ​ໃສ່​ກັບ​ອັນ​ເກົ່າ ມູນ​ຄ່າ 50 ພັນ​ລ້ານ​ໂດ​ລາ ນັ້ນ​ຍິ່ງ​ຈະ​ເຮັດ​ໃຫ້­ການ​ຕອບ​ໂຕ້​ຂອງ​ຝ່າຍ​ຈີນ​ແບບ​ຕາ​ຕໍ່​ຕາ ໂດຍ​ທີ່​ຫຼາຍ​ຝ່າຍ​ເຊື່ອ​ວ່າ​ຝ່າຍ​ຈີນ​ຈະ​ມີ​ມາດ​ຕະ­ການ​ຢ່າງ​ເຂັ້ມ​ຂຸ້ນ​ເຊັ່ນ​ກັນ ເປັນ­ຕົ້ນ​ແມ່ນ​ສິນ­ຄ້າ​ກະ­ສິ­ກຳ​ຄື: ໝາກ​ຖົ່ວ­ເຫຼືອງ ຊຶ່ງ​ມີ​ຂ່າວ​ວ່າ ອາ​ເມ​ຣິ​ກາ ຈຳ​ຕ້ອງ​ເທ​ປະ­ລິ­ມານ​ຖົ່ວ­ເຫຼືອງ​ເຖິງ 80.000 ໂຕນ​ລົງ​ທະ­ເລ ເພາະ​ຝ່າຍ​ຈີນ​ເຄັ່ງ​ຄັດ​ການ​ນຳ​ເຂົ້າ ແລະ ຂຶ້ນ​ພາ­ສີ.

   ເຊິ່ງ​ເຂດ​ຜະ­ລິດ​ໝາກ​ຖົ່ວ­ເຫຼືອງ​ນີ້ ເປັນ​ຖານ​ຄະ­ແນນ​ຂອງ​ທ່ານ ທຣຳ ບໍ່​ທໍ່​ນັ້ນ ຈີນ​ອາດ​ເທ​ຂາຍ​ການ​ຖື​ຄອງ​ພັນ­ທະ­ບັດ​ລັດ­ຖະ­ບານ​ອາ​ເມ​ຣິ​ກາ ເຂັ້ມ​ງວດ​ຕໍ່​ບໍ­ລິ­ສັດ​ອາ​ເມ​ຣິ​ກາ​ທີ່​ລົງ­ທຶນ​ຢູ່​ຈີນ ທັງ​ເຂັ້ມ​ງວດ​ຕໍ່​ສິນ­ຄ້າ​ອາ​ເມ​ຣິ​ກາ​ທີ່​ນຳ​ເຂົ້າ​ຕະ­ຫຼາດ​ຈີນ ມາດ​ຕະ­ການ​ເຫຼົ່າ​ນີ້​ຂອງ ສປ ຈີນ ອາດ​ກະ­ທົບ​ເຖິງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ອາ​ເມ​ຣິ​ກາ ແລະ ໃນ​ເດືອນ​ກັນ­ຍາ ຈະ​ແມ່ນ​ການ​ເລືອກ​ຕັ້ງ​ສະ­ພາ​ນິ­ຕິ­ບັນ­ຍັດ​ລະ­ດັບ​ລັດ ແລະ ໃນ​ເດືອນ​ພະ­ຈິກ ກໍ່​ຈະ​ມີ​ການ​ເລືອກ​ຕັ້ງ​ປະ­ທາ­ນາ­ທິ­ບໍ­ດີ​ສະ­ຫະ­ລັດ ສະ­ນັ້ນ ຕະ­ຫຼາດ​ໂລກ​ຈຶ່ງ​ຂຶ້ນ​ກັບ​ວ່າ​ປະ­ຊາ­ຊົນ​ອາ​ເມ​ຣິ​ກາ​ຜູ້​ມີ​ສິດ​ເລືອກ​ຕັ້ງ​ຈະ​ເລືອກ​ທ່ານ ທຣຳ ອີກ​ຫຼື​ບໍ່?.

   ການ​ຜັນ​ຜວນ​ດັ່ງ­ກ່າວ ໄດ້​ເຮັດ​ໃຫ້​ກຸ່ມ RCEP ຫຼື ມີ​ຊື່​ເຕັມ​ວ່າ: Regional Comprehensive Economic Partnership ຕ້ອງ​ເລັ່ງ​ຂະ​ບວນ​ການ​ເຈລະ­ຈາ​ໃຫ້​ປະ­ສົບ​ຜົນ­ສຳ­ເລັດ​ໃນ​ທ້າຍ​ປີ 2018 ແລະ ມຸ່ງ​ໜ້າ​ໄປ​ສູ່​ຂໍ້​ຕົກ­ລົງ​ການ​ຄ້າ​ທີ່​ມີ​ຄວາມ​ສົມ​ດຸນ ແລະ ມີ​ປະ​ສິດ­ທິ​ຜົນ​ສູງ​ຂຶ້ນ.

   ອີງ​ຕາມ​ແຫຼ່ງ​ຂ່າວ​ຕ່າງ­ປະ­ເທດ​ໃຫ້​ຮູ້​ວ່າ: ໃນ​ວັນ​ທີ 1 ກໍ­ລະ­ກົດ ບັນ­ດາ​ລັດ­ຖະ­ມົນ­ຕີ​ຈາກ 16 ປະ­ເທດ ໃນ​ພາກ​ພື້ນ​ອາ­ຊີ-ປາ​ຊີ​ຟິກ ລວມ​ມີ 10 ປະ­ເທດ​ອາ​ຊຽນ ແລະ ອີກ 6 ປະ­ເທດ​ຄື: ຍີ່­ປຸ່ນ ສປ ຈີນ ອິນ​ເດຍ ສ ເກົາ­ຫຼີ ອົດ​ສະ​ຕຣາ​ລີ ແລະ ນູ​ແວນ​ເຊ​ລັງ ໄດ້​ເຂົ້າ​ຮ່ວມ​ກອງ​ປະ­ຊຸມ​ທີ່​ຈັດ​ຂຶ້ນ​ຢູ່​ນະ­ຄອນ­ຫຼວງ​ໂຕ​ກຽວ ປະ­ເທດ​ຍີ່­ປຸ່ນ ເພື່ອ​ຊຸກ­ຍູ້​ຂະ​ບວນ​ການ​ເຈລະ­ຈາ​ຂໍ້​ຕົກ­ລົງ​ການ​ຄ້າ​ເສລີ​ຮ່ວມ​ພາຍ​ໃນ​ກຸ່ມ ຫຼື ເອີ້ນ​ວ່າ ສັນ­ຍາ​ຄູ່​ຮ່ວມ​ມື​ຢ່າງ­ຮອບ­ດ້ານ​ໃນ​ພາກ​ພື້ນ (RCEP) ທ່າມ­ກາງ​ຄວາມ​ກັງ­ວົນ​ຈາກ​ລັດ­ທິ​ປົກ​ປ້ອງ​ການ​ຄ້າ ທີ່​ນັບ​ມື້​ເພີ່ມ​ຂຶ້ນ​ໃນ​ສົງ­ຄາມ​ການ​ຄ້າ​ໂລກ ລະ­ຫວ່າງ​ສອງ​ປະ­ເທດ​ມະ­ຫາ​ອຳ­ນາດ​ເສດ­ຖະ­ກິດ​ໂລກ​ຄື ອາ​ເມ​ຣິ​ກາ ແລະ ສປ ຈີນ ກອງ​ປະ­ຊຸມ​ຄັ້ງ​ນີ້ ແຕ່​ລະ​ຝ່າຍ​ປາ­ຖະ­ໜາ​ຮັດ​ແຄບ​ຄວາມ​ບໍ່​ເອ­ກະ​ພາບ ແລະ ເສື່ອມ​ຈອດ​ບັນ­ຫາ​ຈຸດ​ແຕກ​ຕ່າງ​ໃນ​ຂົງ­ເຂດ​ຄື: ການ​ຫຼຸດ­ຜ່ອນ​ພາ­ສີ ຊັບ​ສິນ​ທາງ​ປັນ­ຍາ ແລະ ການ​ຄ້າ​ເອ​ເລັກ​ໂຕຣ​ນິກ ເພື່ອ​ແນ­ໃສ່​ບັນ­ລຸ​ຂໍ້​ຕົກ­ລົງ​ກ່ຽວ​ກັບ RCEP ນີ້​ແມ່ນ​ກອງ​ປະ­ຊຸມ​ຄັ້ງ​ທຳ​ອິດ ທີ່​ໄດ້​ຮັບ​ການ­ຈັດ­ຕັ້ງ​ຂຶ້ນ​ນອກ​ປະ­ເທດ​ກຸ່ມ​ອາ​ຊຽນ...

   ຄູ່​ຮ່ວມ​ມື​ນີ້​ເກີດ​ຂຶ້ນ​ໃນ​ກອງ​ປະ­ຊຸມ​ສຸດ​ຍອດ​ຜູ້­ນຳ​ອາ​ຊຽນ (ASEAN SUMMIT) ທີ່​ປະ­ເທດ​ກຳ­ປູ­ເຈຍ ລະ­ຫວ່າງ​ວັນ​ທີ 18-20 ພະ­ຈິກ 2012 ໂດຍ​ການ​ເຈລະ­ຈາ​ສ້າງ­ຕັ້ງ​ກຸ່ມ ເລີ່ມ​ແຕ່​ຕົ້ນ​ປີ 2014 ເປັນ­ຕົ້ນ​ມາ.

   RCEP ຫຼື ພວກ​ເຮົາ​ມັກ­ໄດ້​ຍິນ ຫຼື ເຫັນ​ຕາມ​ສື່​ມວນ​ຊົນ​ວ່າ (ອາ​ຊຽນ+6) ເຊິ່ງ​ປະ­ກອບ​ດ້ວຍ​ກຸ່ມ​ປະ­ເທດ​ອາ​ຊຽນ 10 ປະ­ເທດ ແລະ 6 ປະ­ເທດ​ຄູ່​ເຈລະ­ຈາ ຄື: ສປ ຈີນ ຍີ່­ປຸ່ນ ເກົາ­ຫຼີ​ໃຕ້ ອິນ​ເດຍ ອົດ​ສະ​ຕຣາ​ລີ ແລະ ນູ​ແວນ​ເຊ​ລັງ.

   RCEP ຈະ​ກາຍ­ເປັນ​ເຂດ​ການ​ຄ້າ​ເສລີ​ທີ່​ໃຫຍ່​ທີ່​ສຸດ​ໃນ​ໂລກ ບົນ​ເວ­ທີ East-Asia Summit ຂະ­ນະ​ດຽວ​ກັນ ລັດ­ຖະ­ມົນ­ຕີ​ການ​ຄ້າ​ຂອງ ສປ ຈີນ ຍີ່­ປຸ່ນ ແລະ ເກົາ­ຫຼີ​ໃຕ້ ກໍ່​ອາ­ໄສ​ເວ­ທີ​ດັ່ງ­ກ່າວ ປະ­ກາດ​ການ​ເຈລະ­ຈາ​ການ​ຄ້າ​ເສລີ​ລະ­ດັບ​ໄຕຣ​ພາ­ຄີ ເຊັ່ນ​ດຽວ​ກັນ RCEP ເປັນ​ການ​ຕົກ­ລົງ​ທີ່​ຈະ​ພັດ­ທະ­ນາ​ຕໍ່​ຍອດ​ການ​ຄ້າ​ເສລີ​ອາ​ຊຽນ ມີ​ຢູ່ 5 ສະ­ບັບ​ກັບ​ປະ­ເທດ​ຄູ່​ເຈລະ­ຈາ​ທັງ 6 ປະ­ເທດ ໃຫ້​ເປັນ­ຄວາມ​ຕົກ­ລົງ​ທາງ​ການ​ຄ້າ​ເສລີ​ຮ່ວມ​ສະ­ບັບ​ດຽວ​ກັນ ໂດຍ​ຂະ­ຫຍາຍ​ຄວາມ​ຮ່ວມ​ມື​ຈາກ​ການ​ຄ້າ ເຊັ່ນ: ການ​ລົງ­ທຶນ ໂຄງ​ສ້າງ​ພື້ນ­ຖານ ແລະ ການ​ຖ່າຍ​ໂອນ​ເທັກ​ໂນ​ໂລ​ຢີ ພາຍ​ໃຕ້​ຂໍ້​ຕົກ­ລົງ RCEP ຈະ​ກາຍ­ເປັນ​ຕະ­ຫຼາດ​ການ​ຄ້າ​ທີ່​ໃຫຍ່​ທີ່​ສຸດ​ແຫ່ງ​ໜຶ່ງ​ຂອງ​ໂລກ ດ້ວຍ​ຂະ­ໜາດ​ປະ­ຊາ­ກອນ​ລວມ​ກັນ​ຫຼາຍ​ກວ່າ 3 ພັນ​ລ້ານ​ຄົນ ແລະ ມູນ​ຄ່າ​ເສດ­ຖະ­ກິດ ຫຼາຍ​ກວ່າ 17,1 ພັນ​ລ້ານ​ໂດ​ລາ​ສະ­ຫະ­ລັດ.

   RCEP ຂອງ 16 ປະ­ເທດ​ອາ­ຊີ-ປາ​ຊີ​ຟິກ ເປັນ​ຕະ­ຫຼາດ​ໃຫຍ່ ດ້ວຍ​ຂະ­ໜາດ​ເສດ­ຖະ­ກິດ 30% ຂອງ GDP ໂລກ ແລະ ບາງ​ຝ່າຍ​ຍັງ​ປະ​ເມີນ​ວ່າ RCEP ອາດ​ໃຫ້​ປະ­ໂຫຍດ​ແກ່​ອາ​ຊຽນ​ຫຼາຍ​ກວ່າ AEC ອີກ ພ້ອມ​ນີ້ RCEP ຈະ​ເພີ່ມ​ການ​ດຶງ​ດູດ​ໃຫ້​ອາ​ຊຽນ ແລະ ສາ­ມາດ​ຕໍ່​ລອງ​ຜົນ​ປະ­ໂຫຍດ​ໃນ​ເວ­ທີ​ຂອງ​ອາ​ຊຽນ.

   RCEP ຈະ​ເປັນ​ທາງ​ອອກ​ໃຫ້​ແກ່​ການ​ຄ້າ​ໂລກ ໃນ​ຂະ­ນະ​ທີ່​ມະ­ຫາ​ອຳ­ນາດ​ເສດ­ຖະ­ກິດ​ອັນ​ດັບ​ໜຶ່ງ ແລະ ອັນ​ດັບ​ສອງ​ຂອງ​ໂລກ​ພວມ​ຕໍ່­ສູ້​ກັນ​ຢ່າງ​ຂ້ຽວ­ຂາດ...

+ ແນວ​ລາວ

ຂ່າວທີ່ກ່ຽວຂ້ອງ