ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 01/08/2018

247 01 ສ.ຫ. 2018 ຫົວຂໍ້ຂ່າວອື່ນໆ

ມື້­ນີ້​ຂໍ​ເລີ່ມ​ຄໍ​ລຳ​ກັບ​ເລື່ອງ​ຫວຽດ­ນາມ​ຈຳ­ກັດ​ຂ່າວ​ທີ່​ບໍ່​ເພິ່ງ​ປະ­ສົງ ຕໍ່​ໃສ່​ມາດ​ຕະ­ການ​ຂອງ​ຊູ​ດັງ​ຕັດ​ຈຳ­ນວນ​ສະ­ຖານທູດ​ຂອງ​ຕົນ​ລົງ ເພື່ອ​ປະ­ຢັດ​ລາຍ​ຈ່າຍ ສຸດ​ທ້າຍ​ແມ່ນ​ຂ່າວ​ກ່ຽວ​ກັບ​ການ​ປະ­ຕິ​ຮູບ​ລະ­ບົບ​ໂຮງ­ຮຽນ​ສອນ​ຂັບ​ລົດ ແລະ ການ​ສອບ ເສັງ​ເອົາ​ໃບ​ຂັບ​ຂີ່​ຢູ່ ສປ ຈີນ.

ທີ່ ຫວຽດ­ນາມ: ໃນ​ຄວາມ​ພະ­ຍາ­ຍາມ​ເພື່ອ​ສະ­ກັດ​ກັ້ນ​ເນື້ອ​ໃນ​ທີ່​ບໍ່​ເພິ່ງ​ປະ­ສົງ​ຜ່ານ​ສື່​ເຟດ​ບຸກ ແລະ ຢູ​ທູບ​ນັ້ນ ທາງ​ການ​ຫວຽດ­ນາມ​ໄດ້​ຮຽກ­ຮ້ອງ​ໃຫ້​ບັນ­ດາ​ບໍ­ລິ­ສັດ​ພາຍ​ໃນ​ປະ­ເທດ​ຢຸດ​ການ​ລົງ​ໂຄ­ສະ­ນາ​ຕ່າງໆ​ຜ່ານ​ເຟດ​ບຸກ ແລະ ຢູ​ທູບ ເນື່ອງ​ຈາ​ກວ່າ​ເຄືອ​ຄ່າຍ​ສື່​ທັງ​ສອງ​ນີ້​ຍັງ​ເຜີຍ ແຜ່​ຂໍ້​ມູນ​ຕ້ານ​ລັດ­ຖະ­ບານ​ຫວຽດ­ນາມ (ລາວ​ພັດທະ​ນາ 27/04/2017) ພ້ອມ​ດຽວ​ກັນ​ນັ້ນ ທາງ​ການ​ຫວຽດ­ນາມ​ໄດ້​ຮຽກ­ຮ້ອງ​ໃຫ້ ກູ​ເກິນ ເຊິ່ງ​ເປັນ​ເຈົ້າ​ຂອງ ຢູ​ທູບ ແກ້​ໄຂ​ບັນ­ຫາ​ເນື້ອ​ໃນ​ຕ້ານ​ລັດ­ຖະ­ບານ​ຫວຽດ­ນາມ​ທີ່​ມາ​ຈາກ​ກຸ່ມ​ຄົນ​ບໍ່​ຫວັງ​ດີ​ທີ່​ອາ­ໄສ​ຢູ່​ຕ່າງ­ປະ­ເທດ.

ຂ່າວ​ບອກ​ວ່າ: ວີ​ດີ​ໂອ​ຕ້ານ​ລັດ­ຖະ­ບານ​ຫວຽດ ນາມ​ທີ່​ຜ່ານ ຢູ​ທູບ ນັ້ນ​ມີ​ປະ­ມານ 8.000 ເລື່ອງ ແຕ່ ກູ​ເກິນ ໄດ້​ປິດ​ກັ້ນ​ການ​ເຂົ້າ​ເຖິງ​ໄດ້​ພຽງ 42 ວີ​ດີ​ໂອ​ເທົ່າ​ນັ້ນ ໝາຍ​ຄວາມ​ວ່າ​ທາງ ກູ​ເກິນ ຍັງ​ບໍ່​ໄດ້​ກຳ­ຈັດ​ວີ​ດີ​ໂອ​ເຫຼົ່າ­ນັ້ນ​ອອກ​ຈາກ ຢູ​ທູບ ຢ່າງ​ສິ້ນ​ເຊີງ ໃນ​ເວ­ລາ​ເລື່ອງ​ນີ້​ພວມ​ຕົກ​ເປັນ​ຂ່າວ​ຢູ່​ນັ້ນ ທາງ​ບໍ­ລິ­ສັດ ຢູ​ນິ​ລິ​ເວີ ຟອດ ແລະ ຢາ​ມາ​ຮາ ມໍ​ເຕີ ທີ່​ດຳ­ເນີນ​ກິດ­ຈະ­ການ​ຢູ່​ຫວຽດ­ນາມ ໄດ້​ຕົກ­ລົງ​ເຫັນ​ດີ​ຕາມ​ການ​ສະ­ເໜີ​ຂອງ​ລັດ­ຖະ­ບານ​ຫວຽດ­ນາມ ຄື: ຢຸດ­ຕິ​ການ​ລົງ​ໂຄ­ສະ­ນາ​ຜ່ານ ຢູ​ທູບ ສ່ວນ​ບໍ­ລິ­ສັດ​ທີ່​ເປັນ​ຂອງ​ທາງ​ການ​ຫວຽດ ນາມ​ເອງ ເຊັ່ນ: ບໍ­ລິ­ສັດ ວິ​ນາ​ມິນ ແລະ ສາຍ​ການ­ບິນ​ຫວຽດ­ນາມ​ແອ​ລາຍ​ນັ້ນ​ໄດ້​ຢຸດ­ຕິ​ການ​ລົງ​ໂຄ­ສະ­ນາ​ຜ່ານ​ເຄືອ​ຄ່າຍ​ຢູ​ທູບ ແຕ່​ເດືອນ​ມີ­ນາ ປີ 2017 ເປັນ­ຕົ້ນ ມາ​ແລ້ວ.

ທີ່ ຊູ​ດັງ: ຕໍ່­ໜ້າ​ບັນ­ຫາ​ເສດ­ຖະ­ກິດ​ຕົກ­ຕ່ຳ ອັນ​ກໍ່­ໃຫ້­ເກີດ​ສະ­ພາບ “ເຂົ້າ​ຍາກໝາກ​ແພງ” ນີ້ ທາງ​ການ​ປະ­ເທດ​ຊູ​ດັງ (ອາ​ຟຣິ​ກາ) ໄດ້​ປະກາດ​ປິດ​ສະ­ຖານ­ທູດ​ຂອງ​ຕົນ​ລົງ 13 ແຫ່ງ​ໃນ​ຕ່າງ­ປະ­ເທດ ໂດຍ​ໃຫ້​ເຫດ­ຜົນ​ວ່າ ເພື່ອ​ຫຼຸດ­ຜ່ອນຄ່າ​ໃຊ້​ຈ່າຍ​ຂອງ​ລັດ­ຖະ­ບານ​ໃນ​ສະ­ພາບ​ເສດຖະ​ກິດ​ຂອງ​ປະ­ເທດ​ຊຸດ­ໂຊມ​ໜັກ ນອກ­ຈາກ​ປິດສະ­ຖານ­ທູດ 13 ແຫ່ງ​ແລ້ວ ຊູ​ດັງ​ຍັງ​ໄດ້​ຈຳ­ກັດ ຈຳ­ນວນ​ພະ­ນັກ­ງານ​ສະ­ຖານ­ທູດ​ລົງ​ໃນ 7 ປະເທດ ສ່ວນ​ຫ້ອງ­ການ​ຕາງ­ໜ້າ​ການ​ຄ້າ ແລະ ເສດ­ຖະ­ກິດ​ນັ້ນ​ ຈົ່ງ​ໄວ້​ແຕ່​ແຫ່ງ​ດຽວ​ໃນ​ນະ­ຄອນຫຼວງ ອາ​ບູ​ດາ​ບີ ປະ­ເທດ​ສະ­ຫະ­ລັດ​ອາ​ຣັບ ເອ​ມີເຣດ ນອກ​ນັ້ນ​ແມ່ນ​ປິດ​ໝົດ.

ທີ່ ສປ ຈີນ: ນີ້​ຄື​ຂ່າວ​ທີ່​ເກີດ​ຂຶ້ນ​ເມື່ອ 2 ປີ ຜ່ານ​ມາ ກ່ຽວ​ກັບ​ຄວາມ​ພະ­ຍາ­ຍາມ​ຂອງ​ທາງ​ການ​ຈີນ​ ໃນ​ບັ້ນ​ຮົບ​ຕ້ານ​ການ​ສໍ້​ລາດ​ບັງ​ຫຼວງ​ຢ່າງ​ເດັດ­ຂາດ ຂ່າວ​ນີ້​ບອກ​ວ່າ: ອົງ­ການ​ຂົນ­ສົ່ງ ແລະ ປ້ອງ​ກັນ​ຄວາມ​ສະ­ຫງົບ​ຈີນ ໄດ້​ປະ­ກາດ​ກ່ຽວ​ກັບ​ການ​ປະ­ຕິ​ຮູບ​ລະ­ບົບ​ໂຮງ­ຮຽນ​ສອນ​ຂັບ​ລົດ ແລະ ການ​ສອບ­ເສັງ​ເອົາ​ໃບ​ຂັບ​ຂີ່ ຍ້ອນ​ເຫັນ​ວ່າ​ລະ­ບົບ​ດັ່ງ­ກ່າວ​ໄດ້​ກາຍ­ເປັນ​ບ່ອນ​ຫາ​ລາຍ​ໄດ້​ຂອງ​ກຸ່ມ​ພະ­ນັກ­ງານ​ສໍ້​ລາດ​ບັງ​ຫຼວງ.

ການ​ປະ­ຕິ​ຮູບ​ມີ​ເປົ້າ​ໝາຍ​ເຮັດ​ໃຫ້​ຂັ້ນ​ຕອນ​ການ​ຮຽນ​ຂັບ​ລົດ ແລະ ການ​ສອບ­ເສັງ​ເອົາ​ໃບ​ຂັບ​ຂີ່​ງ່າຍ­ດາຍ ແລະ ມີ​ຄວາມ​ໂປ່ງ​ໃສ​ຂຶ້ນ ຄື: ຜູ້​ຕ້ອງ­ການ​ສອບ­ເສັງ​ເອົາ​ໃບ​ຂັບ​ຂີ່​ບໍ່​ຈຳ­ເປັນ​ຕ້ອງ​ໄປ​ອາ­ໄສ​ໂຮງ­ຮຽນ​ສອນ​ຂັບ​ລົດ​ອີກ​ຕໍ່​ໄປ ທ່ານ ລິວ​ຊາວ (Liu Zhao) ອຳ­ນວຍ​ການ​ຫ້ອງ­ການ​ຄຸ້ມ​ຄອງ​ການ​ຈະ­ລາ­ຈອນ ໄດ້​ເວົ້າ​ກ່ຽວ​ກັບ​ບັນ­ຫາ​ສໍ້​ລາດ​ບັງ​ຫຼວງ​ໃນ​ລະ­ບົບ​ການ​ສອນ​ຂັບ​ລົດ ແລະ ການ​ສອບ­ເສັງ​ເອົາ​ໃບ​ຂັບ​ຂີ່​ວ່າ ໃນ​ໄລ­ຍະ​ຜ່ານ​ມາ ທາງ​ການ​ໄດ້​ພົບ​ເຫັນ​ບັນ ຫາ​ຫຍໍ້­ທໍ້​ຕ່າງໆ ເຊັ່ນ: ບົດ­ຮຽນ​ການ​ສອນ​ຂັບ​ລົດ​ບໍ່​ໄດ້​ມາດ­ຕະ­ຖານ​ດ້ານ​ຄຸ­ນະ­ພາບ ມີ​ຫຼາຍໆ​ກໍ­ລະ­ນີ​ທີ່​ໂຮງ­ຮຽນ​ສອນ​ຂັບ​ລົດ​ຕີ​ຄໍ​ເຂົ້າ​ກັບ​ໜ່ວຍ​ງານ​ອອກ​ໃບ​ຂັບ​ຂີ່ ເພື່ອ​ຊອກ “ເງິນ​ກ້ອງ​ໂຕະ” (ໝາຍ​ຄວາມ​ວ່າ​ຮ່ວມ​ກັນ​ຂາຍ​ໃບ​ຂັບ​ຂີ່) ອ່ານ​ຂ່າວ​ນີ້​ແລ້ວ​ກໍ່​ຄິດ​ເຫັນ​ບາງ​ປາ­ກົດ­ການ​ທີ່​ຄ້າຍ​ກັບ​ຢູ່​ບ້ານ​ເຮົາ.

ຂ່າວທີ່ກ່ຽວຂ້ອງ