ເຊັດນ້ຳຕາອັດຕະປື

256 01 ສ.ຫ. 2018 ນານາສາລະ

   ພຸດ​ທະ​ສາ­ສະ­ໜາ​ສອນ​ໄວ້​ວ່າ ເວ­ລາ​ຄົນ​ເຮົາ​ຖືກ​ຍິງ​ດ້ວຍ​ລູກ​ສອນ ເຮົາ​ຕ້ອງ​ພະ­ຍາ­ຍາມ​ປົວ​ເອົາ​ຄົນ ໃຫ້​ພົ້ນ​ຈາກ​ຄວາມ​ຕາຍ​ກ່ອນ ດີ​ກວ່າ​ຈະ​ໄປ​ຖາມ​ຫາ​ວ່າ​ໃຜ​ເປັນ​ຜູ້­ຍິງ ວິ­ທີ​ການ​ແກ້​ບັນ­ຫາ​ແບບ​ນີ້ ຄົງ​ສາ­ມາດ​ຊ່ວຍ​ໃຫ້​ສັງ­ຄົມ​ໄດ້​ເກີດ​ຄວາມ​ຄິດ​ໃຊ້​ສະ­ຕິ​ປັນ­ຍາ​ຫຼາຍ​ກວ່າ​ອາ­ລົມ​ຄວາມ​ຮູ້­ສຶກ ເພາະ​ຜູ້​ຂຽນ​ສັງ­ເກດ​ເຫັນ​ວ່າ ກໍ­ລະ­ນີ​ຄູ​ກັ້ນ​ນ້ຳ­ຂອງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ​ແຕກ​ນັ້ນ ໄດ້​ມີ​ບາງ​ຄົນ​ສະ­ແດງ​ອາ­ລົມ​ຫຼາຍ​ກວ່າ​ສະ­ຕິ​ປັນ­ຍາ ເຊິ່ງ​ເຫດ­ການ​ແບບ​ນີ້​ກໍ່​ຖື​ວ່າ​ເປັນ​ທຳ​ມະ​ຊາດ​ຂອງ​ມະ­ນຸດ​ທີ່​ສູນ​ເສຍ​ຍາດ​ພີ່­ນ້ອງ​ຮ່ວມ​ຊາດ.

   ປະ­ເດັນ​ຕໍ່​ມາ​ຢາກ​ເວົ້າ​ໄວ້​ເພື່ອ​ກັນ​ລືມ​ໃນ​ບ່ອນ​ນີ້ ຄື: ເລື່ອງ​ການ​ເສບ​ຂ່າວ ແລະ ການ​ຕີ​ແຜ່​ຂ່າວ​ທາງ​ເຟດ​ບຸກ​ຂອງ​ບຸກ­ຄົນ​ໃດ​ໜຶ່ງ​ທີ່​ຂາດ​ຄວາມ​ເໝາະ​ສົມ ຍົກ​ຕົວ­ຢ່າງ​ເທົ່າ​ທີ່​ສັງ­ເກດ​ໄດ້​ວ່າ ມີ​ບາງ​ຄົນ​ສ້າງ​ເຟດ​ບຸກ​ຂຶ້ນ​ມາ​ເພື່ອ​ສ້າງ​ຄວາມ​ນິ­ຍົມ​ຊົມ​ຊອບ​ອອກ​ສັງ­ຄົມ​ຢາກ​ໄດ້​ໜ້າ​ໄດ້​ຕາ (ຈັດ​ໃນ​ປະ­ເພດ​ໂລກ​ຈິດ​ຊະ­ນິດ​ໜຶ່ງ) ໄດ້​ນຳ​ເອົາ​ຂ່າວ​ຈາກ​ພວກ​ທ້ອງ­ຖິ່ນ​ຢູ່​ໃນ​ເຫດ­ການ​ຕົວ​ຈິງ​ໂພດ​ທາງ​ເຟດ​ບຸກ ແລ້ວ​ຕັດ​ຕໍ່​ນຳ​ມາ​ສະ­ເໜີ​ໂພດ​ຕໍ່​ຢູ່​ໜ້າ​ເຟດ​ບຸກ​ຂອງ​ຕົນ​ເອງ ໂດຍ​ສ້າງ​ວິ­ທີ​ຂຽນ​ແບບ​ດຶງ​ດູດ​ໃຫ້​ຜູ້​ຕິດ­ຕາມ​ເກີດ​ຈິດ​ສຳ­ນຶກ​ວ່າ​ຕົນ​ເອງ​ຮູ້​ດີ-ຮູ້​ຫຼາຍ ແລະ ເປັນ​ຜູ້​ເກ່ງ ໃນ​ທີ່​ສຸດ​ຕົວ­ຢ່າງ​ແບບ​ເວົ້າ​ມາ​ນີ້​ເຫັນ​ວ່າ​ບໍ່​ຖືກ­ຕ້ອງ​ເໝາະ​ສົມ ຖ້າ­ວ່າ​ມີ​ຄະ­ນະ​ສະ­ເພາະ​ກິດ​ຕິດ­ຕາມ​ຄວນ​ສັ່ງ​ປິດ​ເຟດ​ພວກ​ໂລກ​ຢາກ​ໄດ້​ໜ້າ​ເຫຼົ່າ​ນີ້ ເພາະ​ມັນ​ສາ­ມາດ​ສ້າງ​ຄວາມ​ສັບ­ສົນ​ໃຫ້​ສັງ­ຄົມ.

   ເຫດ­ການ​ສູນ​ເສຍ​ຊີ­ວິດ​ຊັບ​ສິນ​ຢູ່​ເມືອງ​ສະ­ໜາມ​ໄຊ ຄັ້ງ​ນີ້ ຄົງ​ສາ­ມາດ​ເປັນ​ບົດ­ຮຽນ​ໃຫ້​ພວກ​ເຮົາ​ໄດ້​ທົບ​ທວນ​ວ່າ ການ​ຄ້າ-ຂາຍ​ລົງ­ທຶນ​ຢູ່​ເທິງ​ຄວາມ​ສ່ຽງ​ສູງ ແລະ ຂາດ​ການ​ຄວບ​ຄຸມ​ດ້ານ​ຄຸ­ນະ­ພາບ​ທີ່­ແທ້​ຈິງ​ນັ້ນ ມັນ​ສາ­ມາດ​ສ້າງ​ຄວາມ​ເສຍ​ຫາຍ​ໃຫ້​ສ່ວນ​ລວມ​ໄດ້ ເຊິ່ງ​ຫຼີກ­ເວັ້ນ​ບໍ່​ໄດ້​ຫາງ​ສຽງ​ສັງ­ຄົມ​ເກີດ​ຂຶ້ນ​ຕາມ​ມາ ທີ່​ທວງ​ຖາມ​ເຖິງ​ນັກ­ວິ­ຊາ­ການ ແລະ ເຈົ້າ​ຂອງ​ໂຄງ­ການ​ຫຼາຍ​ທ່ານ​ຄົງ​ຄິດ​ວ່າ ການ​ອັດ​ຮູ​ລົມ​ຖົມ​ຮູ​ນ້ຳ ຕ້ອງ​ຂຶ້ນ​ກັບ​ພູມ​ປັນ­ຍາ​ທີ່​ພຽງ­ພໍ ແລະ ຮັບ­ປະ­ກັນ​ແທ້​ຈິງ​ຕໍ່​ຄວາມ​ໝັ້ນ­ຄົງ ແລະ ປອດ​ໄພ​ໃຫ້​ຄົນ​ໃນ​ສັງ­ຄົມ ເວົ້າ​ເຖິງນ້ຳ­ໃຈ​ເສຍ­ສະ­ຫຼະ​ດ້ານ​ການ​ຊ່ວຍ­ເຫຼືອ​ຂອງ​ສັງ­ຄົມ ແລະ ຕ່າງ­ປະ­ເທດ ຖື​ໄດ້​ວ່າ​ເຮັດ​ໃຫ້​ເຮົາ​ໄດ້​ເຫັນ​ນ້ຳ­ໃຈ​ກັນ​ໃນ​ຍາມ​ເກີດ​ວິ​ກິດ​ການ​ແບບ​ນີ້ ພະ­ພຸດ­ທະ­ເຈົ້າ​ສອນ​ໄວ້​ວ່າ: ການ​ໃຫ້​ທານ ເອື້ອ­ເຟື້ອ​ເສຍ­ສະ­ຫຼະ​ແບ່ງ­ປັນ ການ​ໃຊ້​ວາ­ຈາ​ອ່ອນ​ຫວານ​ສາ­ມັກ­ຄີ​ໃຫ້​ຈິດ­ໃຈ​ເຂັ້ມ­ແຂງ ການ​ປະ­ພຶດ​ຕົນ​ດ້ວຍ​ການ​ຂົນ­ຂວາຍ​ຊ່ວຍ­ເຫຼືອ ການ​ປະ­ຕິ­ບັດ​ໃຫ້​ເໝາະ​ສົມ​ເຂົ້າ​ກັບ​ສິ່ງ­ແວ­ດລ້ອມ ຫຼັກ​ທຳ 4 ປະ­ການ​ນີ້ ຈະ​ເປັນ​ແນວ­ທາງ​ຢຶດ​ໜ່ຽວ​ຈິດ­ໃຈ​ຍາດ​ພີ່­ນ້ອງ​ໃຫ້​ເກີດ​ຄວາມ­ສຸກ​ຄວາມ​ອົບ​ອຸ່ນ​ຍາມ​ຕົກ­ທຸກ​ໄຮ້​ຍາດ​ຂາດ​ມິດ.

   ຜູ້​ຂຽນ​ຄິດ​ວ່າ: ເຫດ­ການ​ຄັ້ງ​ນີ້ ມັນ​ໄດ້​ສອນ​ບົດ­ຮຽນ​ລາ­ຄາ​ແພງ​ຫຼາຍ​ດ້ານ ຖ້າ­ວ່າ​ເຮົາ​ຫາກ​ຍອມ­ຮັບ​ທົບ​ທວນ​ຄວາມ​ເປັນ​ຈິງ​ຢູ່​ບົນ​ເສັ້ນ­ທາງ​ການ​ພັດ­ທະ­ນາ​ທີ່​ຄ້ຳ­ປະ­ກັນ​ຄວາມ​ປອດ​ໄພ​ແທ້​ຈິງ ແລະ ບໍ່​ຫຼົງ​ກະ­ແສ​ການ​ຍ້ອງ­ຍໍ​ໃດ​ໜຶ່ງ ພຽງ​ເພື່ອ​ບາງ​ຄົນ​ໄດ້­ຜົນ​ປະ­ໂຫຍດ​ຢູ່​ເທິງ​ເສັ້ນ­ທາງ​ການ​ລົງ­ທຶນ ແລະ ເຊື່ອ​ວ່າ ການ­ຈັດ­ຕັ້ງ​ເພິ່ນ​ໄດ້​ເອົາ­ໃຈ­ໃສ່​ສຸດ​ຄວາມ​ສາ­ມາດ​ໃນ​ເຫດ­ການ​ຄັ້ງ​ນີ້.

+ ດັ້ນ​ກີບ​ເມກ

ຂ່າວທີ່ກ່ຽວຂ້ອງ