ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 08/08/2018

183 08 ສ.ຫ. 2018 ຫົວຂໍ້ຂ່າວອື່ນໆ

   ສຳ­ລັບ​ມື້­ນີ້ ຄໍ​ລຳ​ເກົ່າ​ເຈົ້າ​ເດີມ​ຂໍ​ສະ­ເໜີ​ລະ­ບຽບການ​ໃໝ່​ຂອງ​ທະ­ນາ­ຄານ​ໂລກ (WB) ສຳ­ລັບ​ອະ­ນຸ­ມັດ​ເງິນ​ກູ້​ໃຫ້​ປະ­ເທດ​ຕ່າງໆ ເລື່ອງ​ການ​ທຳລາຍ​ຕົ້ນ­ໄມ້​ດ້ວຍ​ຢາ​ພິດ ຢູ່​ຫວຽດ­ນາມ ແລະ ສຸດ​ທ້າຍແມ່ນ​ກ່ຽວ​ກັບ​ພະ­ນັກ­ງານ​ຂັ້ນ​ນຳ​ຄົນ​ໜຶ່ງຂອງ​ອິນ​ເດຍ ຖືກ​ເຢາະ​ເຢີ້ຍ​ຖາກ​ຖາງ​ຈາກ​ສັງ­ຄົມ ຍ້ອນ​ການ​ປະ­ພຶດ​ທີ່​ບໍ່​ສົມ​ມາ​ພາ​ຄວນ.

   ທະ­ນາ­ຄານ​ໂລກ (WB) ໃນ​ຕົ້ນ​ເດືອນ​ສິງ­ຫາ (ໜັງ­ສື­ພິມ​ເສດ­ຖະ­ກິດ 6/8/2015) ທະ­ນາ­ຄານໂລກ ໄດ້​ເປີດເຜີຍ​ນະ­ໂຍ­ບາຍ​ໃໝ່​ຂອງ​ຕົນ​ ໃນ​ການອະ­ນຸ­ມັດ​ເງິນ​ກູ້​ໃຫ້​ປະ­ເທດ​ຕ່າງໆ ທະ­ນາ­ຄານໂລກ​ມີ​ສະ­ມາ­ຊິກ 188 ປະ­ເທດ (ສະ­ຖິ­ຕິ​ປີ 2015) ໃນ​ນັ້ນ ສ່ວນ​ໃຫຍ່​ແມ່ນ​ບັນ­ດາ​ປະ­ເທດ​ກຳ­ລັງ​ພັດທະ​ນາ​ທີ່​ອາ­ໄສ​ການ​ກູ້​ຢືມ​ເງິນ​ຈາກ WB ເພື່ອເອົາ​ໄປ​ລົງ­ທຶນ​ພັດ­ທະ­ນາ​ລະ­ບົບ​ພື້ນ­ຖານ​ໂຄງລ່າງ ແລະ ພັດ­ທະ­ນາ​ຄຸ­ນະ­ພາບ​ຊີ­ວິດ​ຂອງ​ປະ­ຊາຊົນ​ໃຫ້​ດີ​ຂຶ້ນ ແຕ່​ການ​ລົງ­ທຶນ​ດັ່ງ­ກ່າວ ​ຜັດ​ມີ​ສ່ວນສ້າງ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ວິ­ຖີ​ດຳ­ລົງຊີ­ວິດ​ຂອງ​ຄົນ​ພື້ນ­ເມືອງ ຍ້ອນ​ແນວ​ນີ້​ເອງ ທາງ WB ຈຶ່ງ​ໄດ້​ປັບ­ປຸງ​ລະ­ບຽບ​ການກ່ຽວ​ກັບ​ເງື່ອນໄຂ​ອະ­ນຸ­ມັດ​ການ​ກູ້​ຢືມ​ເງິນ ແນ­ໃສ່​ຊຸກ­ຍູ້​ບັນ­ດາ​ປະເທດ​ລູກ​ໜີ້ ໃຫ້​ເຫັນ​ຄວາມ​ສຳ­ຄັນ​ບັນ­ຫາ​ສິ່ງ​ແວດລ້ອມ ແລະ ຊີ­ວິດ​ການ​ເປັນ​ຢູ່​ຂອງ​ຊົນ­ເຜົ່າພື້ນເມືອງ​ທີ່​ຍັງ​ອາ­ໄສ​ທຳ​ມະ​ຊາດ​ເປັນ­ຕົ້ນ​ຕໍ ກົດ​ລະບຽບ​ໃໝ່​ນີ້ ທາງ WB ໄດ້​ສ້າງ​ຂຶ້ນ​ພາຍ­ຫຼັງ​ໄດ້​ມີການ​ປຶກ­ສາ​ຫາ­ລື ແລະ ທາບ​ທາມ​ຄຳ​ຄິດ​ເຫັນຈາກ​ບັນ­ດາ​ປະ­ເທດ​ສະ­ມາ­ຊິກ ມາ​ເປັນ​ເວ­ລາ​ດົນນານ​ແລ້ວ ນະ­ໂຍ­ບາຍ​ອະ­ນຸ­ມັດ​ເງິນ​ກູ້​ຢືມ​ໃນເງື່ອນ­ໄຂ​ໃໝ່​ຂອງ WB ໄດ້​ກຳ­ນົດ​ຫຼັກ­ການ​ໃຫຍ່​ໄວ້​ດັ່ງ­ນີ້:

   1. ປະ­ເທດ​ລູກ​ໜີ້ ທີ່​ສ້າງ​ຜົນ​ກະ­ທົບ​ຕໍ່​ຄວາມ​ຫຼາກ​ຫຼາຍ​ທາງ​ຊີ­ວະ​ພາບ​ແບບ​ຫຼີກ​ລ່ຽງ​ບໍ່​ໄດ້ ຕ້ອງ​ຮັບ­ຜິດ­ຊອບ​ເລັ່ງ​ຄ່າ​ຊົດ​ເຊີຍ ຫຼື ຟື້ນ​ຟູ​ພື້ນ​ທີ່ ທີ່​ຖືກ­ເສຍ​ຫາຍ.

   2. ກຸ່ມ​ຄົນ​ພື້ນ­ເມືອງ​ທີ່​ສ່ຽງ​ຈະ​ໄດ້​ຮັບ​ຜົກ​ທົບຈາກ​ການ​ລົງ­ທຶນ​ພັດ­ທະ­ນາ​ເສດ­ຖະ­ກິດ ມີ​ສິດ​ທີ່ຈະ​ຮັບ​ຮູ້​ລ່ວງ​ໜ້າກ່ຽວ​ກັບ​ຜົນ​ກະ­ທົບ​ຈາກ​ການ​ລົງ­ທຶນ​ພັດ­ທະ­ນາ.

   3. ເຈົ້າ​ຂອງ​ໂຄງ­ການ​ພັດ­ທະ­ນາ​ຕ້ອງ​ໄດ້​ຮັບຄວາມ​ຍິນ​ຍອມ​ຈາກ​ກຸ່ມ​ຄົນ​ພື້ນ­ເມືອງ​ກ່ອນ ຖ້າບໍ່​ໄດ້​ຮັບ​ການຍິນ​ຍອມ​ດັ່ງ­ກ່າວ​ທາງ WB ກໍ່​ຈະບໍ່​ອະ­ນຸ­ມັດ​ເງິນ​ກູ້​ຢືມ.

   ທີ່ ຫວຽດ­ນາມ: ເລື່ອງ​ທີ່​ຈະ​ເວົ້າ​ໄປ​ນີ້​ຄ້າຍຄຽງ​ກັບ​ເລື່ອງ (ໄມ້​ນອນ​ຂອນ​ຕາຍ) ຢູ່​ບ້ານ​ເຮົາ ໃນ​ເມື່ອ​ກ່ອນ ເຊິ່ງ​ມີ​ກໍ­ລະ­ນີ​ຜູ້​ຈົງ­ໃຈ​ເຮັດ​ໃຫ້​ໄມ້ຕາຍ​ທັງ​ຢືນ ເພື່ອ​ເປັນ​ເງື່ອນ­ໄຂ​ຕັດ​ເອົາ​ໄປ​ຂາຍ ສ່ວນ​ຢູ່​ຫວຽດ­ນາມ​ນັ້ນ (ຂ່າວ​ວຽງ​ຈັນ​ທາມ 11/03/2017) ກໍ່​ມີ​ກໍ­ລະ­ນີ​ໄມ້​ຕາຍ​ຍ້ອນ​ສານ​ເຄ​ມີ​ຢູ່ປ່າ​ປ້ອງ​ກັນ ທີ່ແຂວງ​ໄຕ​ນິນ ເປັນ​ຈຳ­ນວນ​ຫຼາຍຮ້ອຍ​ຕົ້ນ ໃນ​ຕົ້ນ​ເດືອນ​ມີ­ນາ ປີ 2017 ພະ­ນັກງານ​ຄຸ້ມ​ຄອງ​ປ່າ​ປ້ອງ​ກັນ​ແຫ່ງ​ໜຶ່ງ​ຂອງ​ແຂວງ​ ໄດ້​ພົບ​ເຫັນ​ຕົ້ນ­ໄມ້ ຈຳ­ນວນ 129 ຕົ້ນ ທີ່​ມີ​ເສັ້ນຜ່າ​ໃຈ­ກາງ 10-45 ຊັງ​ຕີ​ແມັດ ຖື​ກວາງ​ສານ​ເຄ​ມີ​ທີ່​ເປັນ​ພິດ ຕົ້ນ­ໄມ້​ຖືກ​ເຈາະ​ເປັນ​ຮູ ສຳ­ລັບ​ວາງສານ­ພິດ ເພື່ອ​ໃຫ້ຕົ້ນ­ໄມ້​ຕາຍ­ຢືນ ຂ່າວ​ບອກ​ວ່າ ຕົ້ນ­ໄມ້​ຖື​ກວາງ​ສານ­ພິດ​ຈະ​ຫ່ຽວ­ແຫ້ງ ແລະ ຕາຍລົງ​ພາຍ​ໃນ 15 ວັນ ສານ­ພິດ​ໃຊ້​ວາງ​ນີ້​ແມ່ນປະ­ເພດ​ຢາ​ຂ້າ​ສັດ­ຕູ​ພືດ ນອກ­ຈາກ​ນັ້ນ ເຈົ້າ​ໜ້າ­ທີ່ຄຸ້ມ​ຄອງ​ປ່າ­ໄມ້​ຍັງ​ພົບ​ເຫັນ​ການ​ລັກລອບຕັດ​ໄມ້ ຈຳ­ນວນ 658 ຕົ້ນ ຂະ­ໜາດ​ເສັ້ນຜ່າໃຈ­ກາງ 6-35 ຊັງ​ຕີ​ແມັດ ຢູ່​ເຂດ​ປ່າ​ປ້ອງ​ກັນ​ແຫ່ງ​ດຽວ​ກັນ​ນີ້ ເພື່ອ​ເຂັ້ມ​ວຽກ​ປ້ອງ​ກັນ​ປ່າ ຄະ­ນະ​ຮັບ­ຜິດ­ຊອບ​ໄດ້ເພີ່ມ​ການ​ກວດ­ກາແບບ​ຕິດ​ລຽນ​ໃນ​ເຂດ​ປ່າ​ທີ່​ມີຕົ້ນ­ໄມ້​ໃຫຍ່ ເຂດ​ປ່າ​ປ້ອງ​ກັນ​ແຫ່ງ​ນີ້ຂອງ​ແຂວງໄຕ​ນິນ ກວມ​ເນື້ອ­ທີ່ 18.885 ເຮັກ­ຕາ ໃນ​ນັ້ນ 12.852 ເຮັກ­ຕາ ແມ່ນ​ປ່າ​ທຳ​ມະ​ຊາດ ເຫຼືອນັ້ນແມ່ນ​ຂາດ​ປ່າ​ປູກ ການ​ລັກ­ລອບ​ຕັດ​ໄມ້​ໄດ້ກາຍ­ເປັນ​ບັນ­ຫາ​ຊຳ​ເຮື້ອ​ໃນ​ເຂດ​ນີ້ ຍ້ອນ​ບໍ່​ມີ​ພະນັກ​ງານ​ຮັບ­ຜິດ­ຊອບ​ພຽງ­ພໍ ບວກ​ກັບ​ສະ­ຕິ​ຄວາມ​ຮັບ​ຮູ້​ຂອງ​ປະ­ຊາ­ຊົນ​ທ້ອງ­ຖິ່ນ​ຍັງ​ຕ່ຳ.

   ທີ່ ອິນ​ເດຍ: ຂ່າວ​ນີ້​ເກີດ​ຂຶ້ນ​ຢູ່​ອິນ​ເດຍ ເມື່ອສອງ​ປີ­ຜ່ານ­ມາ ແຕ່​ຍັງ​ກາຍ­ເປັນ​ຂີ້​ປາກ​ຂອງ​ສັງຄົມ​ເປັນ​ເວ­ລາ​ດົນ​ນານ​ເລື່ອງ​ມີ​ຢູ່​ວ່າທ່ານ ຊິ​ວະລາດ ຊິງ​ຈູ​ຣານ (Shivraj Singh Chouhan) ສະ­ມາ­ຊິກ​ລັດ​ຖະ​ສະ­ພາ​ທັງ​ເປັນ​ລັດ​ຖະ​ມົນຕີ​ປະ­ຈຳ​ລັດ ມັດ​ທິ​ຢາ ປະ­ເທດ​ໄດ້​ລົງ​ໄປ​ສຳ​ຫຼວດຄວາມ​ເສຍ​ຫາຍ​ຈາກ​ໄພ​ນ້ຳ​ຖ້ວມ ເພື່ອ​ຖາມສຸກ-ທຸກຂອງ​ປະ­ຊາ­ຊົນ ແຕ່​ພໍ​ໄປ​ຮອດ​ເຂດ​ທີ່​ມີ​ນ້ຳ-ຕົມ​ສູງ​ຂະ­ໜາດ​ຖ້ວມ​ຫຼັງ​ຕີນ ທ່ານ​ລັດ­ຖະ­ມົນ­ຕີ ຜັດ​ໃຫ້​ເຈົ້າ​ໜ້າ­ທີ່​ຕຳ­ຫຼວດ​ສອງ​ຄົນ​ຊ່ວຍ​ອູ້ມ​ທ່ານ​ໃຫ້​ຕີນ​ຫວິດ​ຂີ້­ຕົມ ທ່ານ​ລັດ­ຖະ­ມົນ­ຕີ​ນຸ່ງ​ໂສ້ງ​ຂາຍາວ​ສີ­ຂາວ ແລະ ເກີບ​ສີ­ຂາວ ພໍ​ສື່​ສັງ­ຄົມອອນ​ລາຍ​ລົງ​ຮູບ​ພາບ​ນີ້ ຄົນ​ໃນ​ສັງ­ຄົມ ກໍ່​ສະ­ແດງຄວາມ​ບໍ່​ພໍ­ໃຈ ແລະ ສົ່ງ​ຂໍ້­ຄວາມ​ເຢາະ​ເຢີ້ຍ ທ່ານລັດ­ຖະ­ມົນ­ຕີ​ວ່າ ໄປ​ຖາມ ສຸກ-ທຸກ ປະຊາ​ຊົນ​ແນວໃດ​ໃນ​ເມື່ອ​ຕົນ​ເອງ​ຍັງ​ຢ້ານ​ຕີນ​ປຽກ​ນ້ຳ ແລະ ເປື້ອນ​ຂີ້­ຕົມ​ຢູ່.

ຂ່າວທີ່ກ່ຽວຂ້ອງ