ຂ່າວຫຼ້າສຸດ

ຂຶ້ນເໜືອ

578 08 ສ.ຫ. 2018 ນານາສາລະ

   ຜູ້​ຂຽນ​ຍອມ­ຮັບ​ວ່າ ການ­ທ່ອງ­ທ່ຽວ​ສັນ­ຈອນໄປ​ມາ​ເຮັດ​ໃຫ້​ຄົນ​ເຮົາ​ໄດ້​ເຫັນ​ສິ່ງ​ໃໝ່ໆທີ່​ປ່ຽນ­ແປງຢູ່​ໃນ​ກະ­ແສ​ໂລກ ເຊິ່ງ​ມີ​ທັງ​ຫຍໍ້­ທໍ້ ແລະ ດີ­ເດັ່ນ ເພາະ​ມັນ​ຂຶ້ນ​ກັບ​ຄົນ​ເຮົາ​ວ່າ​ຈະ​ຮັບ​ເອົາ​ສິ່ງ​ໃໝ່ ແລະ ໝູນ​ໃຊ້​ສິ່ງ​ເກົ່າ​ທີ່​ມີ​ຢູ່​ໄດ້​ຢ່າງ​ສະ­ຫຼາດ​ພຽງ­ພໍພຽງ​ໃດ​ນັ້ນ ຍ່ອມ​ຂຶ້ນ​ຢູ່​ກັບ​ສະ­ຕິ​ປັນ­ຍາ ການ​ຂຶ້ນເໜືອ​ຄັ້ງ​ນີ້​ໄດ້​ພົບ​ເຫັນ​ປາ­ກົດ­ການ​ຫຼາຍ​ຢ່າງ​ບາງອັນ ກໍ່​ເປັນ​ດັ່ງ​ສັງ­ຄົມ​ໂຈດ​ຂານ​ກັນ​ແທ້.

   ຜູ້​ຂຽນ​ຈິ່ງ​ຂໍ​ເລົ່າ​ເຖິງ​ລາ­ຄາ​ສິນ­ຄ້າ ເຊິ່ງ​ຂຶ້ນ​ເໜືອຄັ້ງ​ນີ້​ແມ່ນ​ໄດ້​ພັກ​ເຮັດ​ວຽກ​ທີ່​ແຂວງ​ພາກ​ເໜືອ ທີ່​ມີນັກ​ທ່ອງ​ທ່ຽວ​ຫຼາຍ​ກວ່າ​ໝູ່ ພັກ​ວຽກ​ເວ­ລາ​ຫວ່າງ​ກໍ່ມີ​ເວ­ລາ​ຍ່າງ­ເລາະ​ທ່ຽວ​ຊົມ ຊິມ​ອາ­ຫານ ແລະ ຮ້ານ​ຄ້າ­ຂາຍ​ທັງ​ຂອງ​ເກົ່າ ແລະ ໃໝ່ ຜູ້​ຂຽນ​ໄດ້ແວະ​ເຂົ້າ​ຮ້ານ​ຄ້າ​ແຫ່ງ​ໜຶ່ງ (ຂາຍ­ເຄື່ອງ​ຍ່ອຍ) ເພື່ອ​ຊື້​ສິນ­ຄ້າ​ປະ­ເພດ​ໜຶ່ງ​ທີ່​ໃຊ້​ປະ­ຈຳ (ຢາ­ສູບ) ຂໍຊື້​ຢາ­ສູບ​ແນ່​ຊອງ​ທໍ່​ໃດ? ຊາວ​ຫ້າ​ພັນ​ກີບ ລູກ​ຊິເອົາ​ບໍ່? ຜູ້​ຂຽນ​ຢຸດ​ນິ້ງ​ຄິດ​ບຶດ­ໜຶ່ງ ແລ້ວ​ຕອບ​ວ່າ ບາດ​ຂາ​ກັບ​ກ່ອນ​ລູກ​ຈັ່ງ​ຊິ​ແວະ​ນຳ​ເດີ ! ຢາ­ສູບ​ຍີ່­ຫໍ້ດັ່ງ­ກ່າວ ​ຖ້າ​ຢູ່​ວຽງ​ຈັນ ​ເຂົາ​ຂາຍ​ສິບ​ພັນ​ຫາ​ສິບ​ຫ້າພັນ ແຕ່​ຢູ່​ບ່ອນ​ດັ່ງ­ກ່າວ​ອາດ​ຄິດ​ວ່າ​ຄົນ​ຊື້​ເປັນ​ຕ່າງປະ­ເທດ ແລ້ວ​ສວຍ­ໂອ­ກາດ​ຟັນ​ລາ­ຄາ​ຕາມ­ໃຈ ເລື່ອງ​ນີ້​ບໍ່​ແປກ​ກັບ​ຂ່າວ​ທີ່​ເກີດ​ຂຶ້ນ​ວ່າ​ສະ­ຖານ­ທີ່ທ່ອງ​ທ່ຽວ​ບາງ​ແຫ່ງ​ມີ​ເງື່ອນ­ໄຂ ຄ່າ​ໃຊ້​ຈ່າຍ​ແພງ ເຊິ່ງ​ເຮັດ​ໃຫ້​ນັກ​ທ່ອງ​ທ່ຽວ​ຫຼຸດ​ລົງເຫັນ​ໄດ້​ທັນ­ຕາທັນ­ໃຈ ເວົ້າ​ມາ​ສ່ຳ​ນີ້ ຖ້າ​ສັງ­ຄົມ​ໄດ້​ອ່ານ ຫຼື ຖືກ​ປະ­ສົບເຫດ ການ​ຄ້າຍ​ກັນ​ມາ​ຄົງ​ຊິ​ຝາກ​ຖາມ​ຝ່າຍ​ກ່ຽວຂ້ອງ​ວ່າ ເຮົາ​ມີ​ມາດ​ຕະ­ການ​ອັນ​ໃດ​ຄວບ​ຄຸມ.

   ຢ່າ​ລືມ​ວ່າ​ຍຸກ​ແຂ່ງ­ຂັນ​ກັນ​ທຳ​ມາ​ຫາ​ກິນ ​ປະ­ເທດອື່ນ​ເຂົາ​ອາດ​ໃຫ້­ການ​ບໍ­ລິ­ການ​ດີ​ກວ່າ​ເງິນ​ທີ່​ຄວນຈະ​ໄດ້ ອາດ​ໄຫຼ​ໄປ​ເຂົ້າ​ກະ­ເປົາ​ປະ­ເທດ​ອື່ນ​ນໍ!.

   ຜູ້​ຂຽນ​ຄິດ​ວ່າ​ອາດ​ມີ​ຫຼາຍ​ຄົນ​ມີ​ປະ­ສົບ​ການ​ທ່ອງທ່ຽວ​ແຕກ​ຕ່າງ​ກັນ​ເຊັ່ນ ຂຶ້ນ​ເໜືອ​ລົງ​ໃຕ້ ຫຼື ຢູ່​ພາຍໃນ ແລະ ຕ່າງ­ປະ­ເທດ ສຳ­ຄັນ​ກໍ່​ແມ່ນ​ຂອດ​ການ​ຮັບຕ້ອນ​ໃຫ້­ການ​ບໍ­ລິ­ການ ເຊັ່ນ ລົດ​ປະ­ຈຳ​ທາງ​ໄປ​ຕ່າງແຂວງ ​ເຫັນ​ວ່າ​ບາງ​ສາຍ​ບາງ​ຄັນ​ກໍ່​ຄວນ​ກວດ​ເຊັກສະ­ພາບ​ໃຫ້​ພ້ອມ​ໃຊ້​ບໍ­ລິ­ການ ຍົກ​ຕົວ­ຢ່າງ ຫ້ອງ​ນ້ຳໃນ​ລົດ ແລະ ອຸ­ປະ­ກອນ​ໃນ​ຕຽງ​ນອນ ຄວນ​ສະ­ອາດ​ໃຫ້​ສົມ​ກັບ​ລູກ​ຄ້າ​ທີ່​ເສຍ​ເງິນ​ຊື້​ປີ້ ເພື່ອ​ຈະ​ໄດ້ນັ່ງ ຫຼື ນອນ​ແບບ​ສະ­ບາຍ​ໃຈ ທ່ານ​ຜູ້​ອ່ານ​ລອງ​ຄິດເບິ່ງ​ວ່າ ຖ້າ​ຜ້າ­ຫົ່ມ ແລະ ໝອນ​ໝູນ​ເໝັນ​ສາບ ເໝັນ​ເນົ່າ ຄົນ​ໂດຍ­ສານ​ຈະ​ຮູ້­ສຶກ​ແນວ­ໃດ? ຄວນເບິ່ງ​ຄືນ​ບໍ່​ແມ່ນ​ຈະ​ເກັບ​ເອົາ​ຄ່າ​ປີ້​ຢ່າງ​ດຽວ ຫ້ອງ​ນ້ຳທີ່​ມີຄວນ​ເຊັກ​ຮັບ­ປະ­ກັນ​ໃຊ້​ໄດ້ ໝາຍ​ຄວາມ​ວ່າ ຫ້ອງ​ນ້ຳ​ບໍ່​ແມ່ນ​ມີ​ໄວ້​ໂຊ​ນໍ!.

   ຂາ​ກັບ​ຜູ້​ຂຽນ​ຍັງ​ໄດ້​ຍິນ​ຄົນ​ໂດຍ­ສານ​ໂສ​ເຫຼ່​ກັນ ເລື່ອງ​ສົ້ນ​ປີ້​ແຖມ​ອາ­ຫານ ເຊິ່ງ​ສ່ວນ​ໃຫຍ່​ກໍ່​ແມ່ນປະ­ເພດ​ເຂົ້າ­ປຽກ ຫຼື ເຝີ ອັນ​ທີ່​ເປັນ​ປະ­ເດັນ​ຄືມັນ​ບໍ່ເໝາະ​ສົມ​ກັບ​ລາ­ຄາ ຜູ້​ຂຽນ​ໄດ້​ຍິນ​ເຂົາ​ໂສ​ໂຈ​ເຈກັນ​ແນວ​ນັ້ນ ຢ່າງ­ໃດ​ກໍ່​ຕາມ ການ​ຄຸ້ມ​ຄອງ​ລາ­ຄາສິນ­ຄ້າ ແລະ ເຮັດ​ວຽກ​ການ​ບໍ­ລິ­ການ​ ກໍ່​ແມ່ນ​ຂອດສຳ­ຄັນ​ໃຫ້​ທ້າວ​ຕ່າງ​ແດນ​ປະ​ທັບ​ໃຈ​ ບໍ່​ໃຫ້​ຝ່າຍໃດ​ໜຶ່ງ​ເສຍ​ໃຈ ແລະ ບໍ່​ຄວນ​ຖື​ເບົາ​ເລື່ອງ​ນີ້ ຄວນກວດ­ກາ​ຕົວ​ຈິງ​ລອງ​ເບິ່ງ​ເນີ !.

ຂ່າວທີ່ກ່ຽວຂ້ອງ