ປ່າໄມ້​ອາ​ມາ​ຊອນ​ຢູ່​ໃນ​ເປ​ຣູ ຖືກ​ທຳລາຍ​ຫຼາຍ​ພັນ​ເຮັກຕາ

85 08 ສ.ຫ. 2018 ຂ່າວຕ່າງປະເທດ
ປ່າໄມ້​ອາ​ມາ​ຊອນ​ຢູ່​ໃນ​ເປ​ຣູ ຖືກ​ທຳລາຍ​ຫຼາຍ​ພັນ​ເຮັກຕາ

     ກະຊວງ​ສິ່ງແວດລ້ອມ​ເປ​ຣູ ມີ​ຄຳ​ແຈ້ງ​ເຕືອນ​ອອກ​ມາ​ເມື່ອ​ວັນ​ທີ 5 ສິງຫາ​ນີ້​ວ່າ ໃນ 6 ເດືອນ​ຕົ້ນ​ປີ​ນີ້ ເນື້ອທີ່​ປ່າ​ເຂດ​ຮ້ອນ ອາ​ມາ​ຊອນ (Amazon) ຢູ່​ໃນ​ປະເທດ​ນີ້ ໄດ້​ຖືກ​ຈູດ​ທຳລາຍ​ໄປ 23.000 ເຮັກຕາ.

ຕົວ​ເລກ​ຈາກ​ໂຄງການ​ອະນຸລັກ​ປ່າໄມ້ ແລະ​ຫຼຸດຜ່ອນ​ການ​ປ່ຽນແປງ​ສະພາບ​ດິນ​ຟ້າ​ອາກາດ ທີ່​ຂຶ້ນ​ກັບ​ກະຊວງ​ສິ່ງແວດລ້ອມ​ເປ​ຣູ ໃຫ້​ຮູ້​ວ່າ ປະມານ 71% ຂອງ​ຍອດ​ເນື້ອທີ່​ປ່າ​ອາ​ມາ​ຊອນ ທີ່​ຖືກ​ທຳລາຍ​ດັ່ງກ່າວ ນອນ​ຢູ່​ໃນ 4 ລັດ​ຂອງ​ເປ​ຣູ ອັນ​ປະກອບ​ດ້ວຍ​ລັດ ໂລ​ເຣ​ໂຕ ມາ​ເດຣ ເດີ ດີ​​ອອສ ອູ​ຄາ​ຢາ​ລີ ແລະ ຊານ ມາ​ຕິນ.

    ສະຖິຕິ​ຂອງ​ໂຄງການ​ຕິດຕາມ​ກວດກາ​ປ່າ​ອາ​ມາ​ຊອນ ຂອງ​ເຂດ​ອັນ​ເດ​​ສ (MAAP) ໃຫ້​ຮູ້​ວ່າ ສະເພາະ​ແຕ່​ການເຄື່ອນໄຫວ​ຂຸດ​ຄົ້ນ​ຄຳ​ຢ່າງ​ຜິດ​ກົດໝາຍ​ຢູ່​ໃນ​ແມ່ນ້ຳ​ໃນ​ລັດ ມາ​ເດຣ ເດີ ດີ​​ອອສ ໃນ​ເຂດ​ຊາຍ​ແດນ​ຕິດ​ກັບ​ປະເທດ​ໂບ​ລີ​ວີ ແລະ​ບຣາ​ຊີ​​ລ ເທົ່າ​ນັ້ນ ກໍ​ໄດ້​ເຮັດ​ໃຫ້​ປ່າໄມ້​ຢູ່​ໃນ​ທ້ອງຖິ່ນ​ນີ້ ສູນ​ເສຍ​ໄປ 1.700 ເຮັກຕາ ນັບ​ແຕ່​ເດືອນ​ມັງກອນ ຫາ​ເດືອນ​ມິຖຸນາ​ປີ​ນີ້.

    ເຈົ້າ​ໜ້າທີ່​ເປ​ຣູ ໃຫ້​ຮູ້​ວ່າ ສາເຫດ​ທີ່​ພາໃຫ້​ເກີດ​ຄວາມ​ສູນ​ເສຍ​ດັ່ງກ່າວ ແມ່ນ​ເປັນ​ຍ້ອນ​ປະຊາຊົນ ທຳລາຍ​ປ່າໄມ້ ເພື່ອ​ເອົາ​ເນື້ອທີ່​ດິນ​ທຳ​ການ​ປູກ​ພືດ ແລະ ລ້ຽງສັດ ລວມ​ເຖິງ​ສະພາບ​ການ​ຂຸດ​ຄົ້ນ​ໄມ້ ແລະ​ແຮ່​ທາດ​ຢ່າງ​ຜິດ​ກົດໝາຍ.

    ເປ​ຣູ​ເປັນ​ໜຶ່ງ​ໃນ​ບັນດາ​ປະເທດ​ທີ່​ມີ​ເນື້ອທີ່​ທີ່​ປ່າ​ອາ​ມາ​ຊອນ​ລາຍ​ໃຫຍ່ ໂດຍ​ເປັນ​ຮອງ​ພຽງ​ທີ່ ບຣາ​ຊີ​​ລ  ແລະ ກໍ​ເປັນ​ໜຶ່ງ​ໃນ 17 ປະເທດ ທີ່​ຄອບ​ຄອງ “ຊີວະ​ນາໆພັນ​ອັນ​ດັບ​ໃຫຍ່”. ຢູ່​ທາງ​ທິດ ຕາເວັນ​ອອກ​ຂອງ​ເປ​ຣູ  ເຂດ​ຜົ້ງ​ແມ່ນ້ຳ​ອາ​ມາ​ຊອນ ກວມ​ເອົາ 1/3 ຂອງ​ດິນແດນ​ເປ​ຣູ ແລະ ກໍ​ເປັນ ແຫຼ່ງ​ຮັບ​ເອົາ​ແກ​​ັສ​ເຮືອນ​ແກ້ວ​ທີ່​ສຳຄັນ​ຂອງ​ໂລກ.

 

ຂ່າວທີ່ກ່ຽວຂ້ອງ