ອາກາດ​ຮ້ອນ​ຜິດ​ປົກກະຕິ​ຍັງ​ສືບຕໍ່​ເກີດ​ຂຶ້ນ​ຢູ່​ໃນ​ເອີ​ຣົບ

103 08 ສ.ຫ. 2018 ຂ່າວຕ່າງປະເທດ
ອາກາດ​ຮ້ອນ​ຜິດ​ປົກກະຕິ​ຍັງ​ສືບຕໍ່​ເກີດ​ຂຶ້ນ​ຢູ່​ໃນ​ເອີ​ຣົບ

    ແດດ​ຮ້ອນ​ເອົ້າ​ສືບຕໍ່​ເກີດ​ຂຶ້ນ​ຢູ່​ໃນ​ທົ່ວ​ທະວີບ​ເອີ​ຣົບ. ອຸ່ນ​ຫະ​ພູມ​ສູງ ໄດ້​ເຮັດ​ໃຫ້​ເກີດ​ໄຟ​ໄໝ້​ປ່າ ເຮັດ​ໃຫ້​ໂຮງງານ​ໄຟ້​​ຟ້າ​ນີວ​ເຄລຍ​ຕ້ອງ​ປິດ​ການເຄື່ອນໄຫວ ພ້ອມ​ກັນ​ນັ້ນ​ກໍ​ເຮັດ​ໃຫ້ການ​ດຳລົງ​ຊີວິດ ຂອງ​ປະຊາຊົນ ຢູ່​ໃນ​ແອດ​ສະ​ປາຍ ປອກ​ຕຸຍ​ການ ຝຣັ່ງ ເຢຍ​ລະ​ມັນ ໂຮນ​ລັງ ແລະ​ອັງກິດ ຖືກ​ພິກ​ປີ້ນ​ໄປ.

    ໃນ​ວັນ​ທີ 5 ສິງຫາ​ນີ້ ອຸ່ນ​ຫະ​ພູມ​ຢູ່​ໃນ​ພາກ​ໃຕ້​ຂອງ​ແອດ​ສະ​ປາຍ ບັນລຸ​ລະດັບ​ສຸດ​ຍອດ​ທີ່ 44 ອົງສາ C ໃນ​ຂະນະ​ທີ່​ອຸ່ນ​ຫະ​ພູມ ຢູ່​ໃນ​ເຂດ​ທິດຕາເວັນຕົກ​ສ່ຽງ​ໃຕ້​ຂອງ​ແອດ​ສະ​ປາຍ ກໍ​ສູງ​ເຖິງ 42 ອົງສາ C. ໄລ່​ມາ​ຮອດ​ເວລາ​ນີ້ ສະພາບ​ອາກາດ​ຮ້ອນ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ໄປ​ແລ້ວ 3 ຄົນ ຢູ່​ໃນ​ແອດ​ສະ​ປາຍ.

    ຢູ່​ທີ່​ປອກ​ຕຸຍ​ການ ອຸ່ນ​ຫະ​ພູມ​ແທກ​ໄດ້​ຢູ່​ທາງ​ທິດເໜືອ​ນະຄອນຫຼວງ ລິ​​ສ​ບອນ ໃນ​ວັນ​ທີ 4 ສິງຫາ ຢູ່​ທີ່ 46,8 ອົງສາ C ເກືອບ​ເທົ່າ​ກັບ​ລະດັບ​ສະຖິຕິ​ຢູ່​ໃນ​ປອກ​ຕຸຍ​ການ ເມື່ອ​ປີ 2003 ຊຶ່ງ​ເວລາ​ນັ້ນ​ແທກ​ໄດ້ 47,3 ອົງສາ C.

    ວັນ​ທີ 4 ສິງຫາ ໄດ້​ກາຍເປັນ​ມື້​ທີ່​ຮ້ອນ​ທີ່​ສຸດ​ຢູ່​ໃນ​ຝຣັ່ງ ນັບ​ແຕ່​ປີ 2003 ເປັນຕົ້ນ​ມາ. ແດດ​ຮ້ອນ​ແກ່ຍາວ ໄດ້​ເຮັດ​ໃຫ້​ເຈົ້າ​ໜ້າທີ່​ຝຣັ່ງ ຕ້ອງ​ໄດ້​ປິດ​ການເຄື່ອນໄຫວ​ເຕົາ​ປະຕິ​ກອນ​ນີວ​ເຄລຍ 4 ເຕົາ ເພື່ອ​ຫຼີກເວັ້ນ​ຄວາມ​ສ່ຽງ​ໂດຍ​ບັງເອີນ​ທີ່​ອາດ​ເກີດ​ຂຶ້ນ.

    ທີ່​ປະເທດ​ເຢຍ​ລະ​ມັນ ຝົນຕົກ​ລົງ​ມາ​ເມື່ອ​ທ້າຍ​ອາທິດ​ທີ່​ຜ່ານ​ມາ ໄດ້​ຊ່ວຍ​ໃຫ້​ອຸ່ນ​ຫະ​ພູມ​ຫຼຸດ​ລົງ ຢູ່​ໃນ​ບາງ​ເຂດ​ຢູ່​ທາງ​ພາກ​ໃຕ້​ຂອງ​ປະເທດ ແຕ່​ວ່າ​ອຸ່ນ​ຫະ​ພູມ​ຢູ່​ໃນ​ເຂດ​ພາກ​ຕາເວັນ​ອອກ ຄາດ​ວ່າ ຈະ​ກັບ​ໄປ​ສູ່​ລະດັບ 39 ອົງ​​ສາ C ໃນ​ວັນ​ທີ 8 ສິງຫາ.

 

ຂ່າວທີ່ກ່ຽວຂ້ອງ