ຂ່າວຫຼ້າສຸດ

ຍີ່ປຸ່ນ​ລ້ຳ​ລຶກ​ເຖິງ​ເຫດການ​ທີ່ ສ ອາ​ເມ​ຣິ​ກາ​ຖິ້ມ​ລະເບີດ​ປາ​ລາມາ​ນູ​ໃສ່​ຮີ​ໂຣ​ຊີ​ມາ​ຄົບຮອບ 73 ປີ

277 08 ສ.ຫ. 2018 ຂ່າວຕ່າງປະເທດ
ຍີ່ປຸ່ນ​ລ້ຳ​ລຶກ​ເຖິງ​ເຫດການ​ທີ່ ສ ອາ​ເມ​ຣິ​ກາ​ຖິ້ມ​ລະເບີດ​ປາ​ລາມາ​ນູ​ໃສ່​ຮີ​ໂຣ​ຊີ​ມາ​ຄົບຮອບ 73 ປີ

    ວັນ​ທີ 6 ສິງຫາ​ນີ້ ຍີ່ປຸ່ນ​ໄດ້​ຈັດ​ຕັ້ງ​ການເຄື່ອນໄຫວ​ລ້ຳ​ລຶກ​ຄົບຮອບ 73 ປີ ທີ່ ສ ອາ​ເມ​ຣິ​ກາ ຖິ້ມ​ລະເບີດ​ປາ​ລາມາ​ນູ​ລົງ​ໃສ່​ນະຄອນ ຮີ​ໂຣ​ຊີ​ມາ (ຕັ້ງ​ຢູ່​ຫ່າງ​ຈາກ​ນະຄອນຫຼວງ​ໂຕ​ກຽວ​ປະມານ 700​ກມ ໄປ​ທາງ​ທິດຕາເວັນຕົກ) ທີ່​ໄດ້​ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ປະມານ  140.000 ຄົນ.

    ເຂົ້າ​ຮ່ວມ​ໃນ​ພິທີ​ດັ່ງກ່າວ​ໃນ​ປີ​ນີ້ ມີ​ນາຍົກລັດຖະມົນຕີ​ຍີ່ປຸ່ນ ຊິນ​ໂຊ ອາ​ເບ ຕະຫຼອດ​ຮອດ ຕົວ​ແນ​ຈາກ 85 ປະເທດ​ໃນ​ໂລກ ແລະ​ສະຫະພາບ​ເອີ​ຣົບ (EU).  ເຫດການ​ລ້ຳ​ລຶກ​ໃນ​ປີ​ນີ້ ກໍ​ໄດ້​ເປັນ​ຂີດ​ໝາຍ​ເທື່ອ​ທຳ​ອິດ ໃນ​ຮອບ 3 ປີ​ທີ່​ຜ່ານ​ມາ ທີ່ ສ ອາ​ເມ​ຣິ​ກາ ແຕ່ງຕັ້ງ ເອກ​ອັກ​ຄະ​ລັດ​ຖະ​ທູດ​ຂອງ​ຕົນ​ປະຈຳ​ຍີ່ປຸ່ນ ໄປ​ເຂົ້າ​ຮ່ວມ​ພິທີ​ລ້ຳ​ລຶກ.

    ຜູ້​ທີ່​ເຂົ້າ​ຮ່ວມ​ໃນ​ພິທີ​ລ້ຳ​ລຶກ ຊຶ່ງ​ຈັດ​ຂຶ້ນ​ຢູ່​ທີ່​ສວນ​ສາທາລະນະ​ສັນຕິພາບ ໃນ​ນະຄອນ​ຮີ​ໂຣ​ຊີ​ມາ ໄດ້​ໃຊ້​ເວລາ​ໄວ້ອາໄລ 1 ນາທີ ໃນ​ເວລາ​ປະມານ 8 ໂມງ 15 ນາທີ ຂອງ​ຕອນ​ເຊົ້າ​ວັນ​ທີ 6 ສິງຫາ ຊຶ່ງ​ເປັນ​ຈຸດ​ເວລາ​ທີ່​ເມື່ອ 73 ປີ​ກ່ອນ​ໜ້າ​ນີ້ ລະເບີດ​ປາ​ລາມາ​ນູ  "Little Boy" ທີ່​ກອງທັບ ສ ອາ​ເມ​ຣິ​ກາ ປ່ອຍ​ລົງ ແລະ ​ເກີດ​ລະເບີດ​ຂຶ້ນ​ຢູ່​ໃນ​ທ້ອງຟ້າ​ເໜືອ​ນະຄອນ​ຮີ​ໂຮ​ຊີ​ມາ.

    ທ່ານ​ກາ​ຊູ​ມິ ມັດ​ຊູ​ອິ ເຈົ້າ​ຄອງ​ນະຄອນ​ຮີ​ໂຣ​ຊີ​ມາ ກ່າວ​ຢູ່​ໃນ​ພິທີ​ດັ່ງກ່າວ ໂດຍ​ໄດ້​ຮຽກຮ້ອງ ໃຫ້​ສ້າງ​ໂລກ​ທີ່​ປາສະຈາກ​ອາວຸດ​ນີວ​ເຄລຍ​ໂດຍ​ຜ່ານ​ການ​ເຈລະຈາ ພ້ອມ​ທັງ​ເລັ່ງ​ທວງ​ໃຫ້ ຍີ່ປຸ່ນ​ເຂົ້າ​ຮ່ວມ​ໃນ​ສົນທິສັນຍາ ວ່າ​ດ້ວຍ​ການ​ຫ້າມ​ອາວຸດ​ນີວ​ເຄລຍ​ຢ່າງຮອບດ້ານ ຊຶ່ງ​ສະຫະ​ປະຊາ​ຊາດ ໄດ້​ຮັບຮອງ​ເມື່ອ​ເດືອນ​ກໍລະກົດ ປີ 2017.

 

ຂ່າວທີ່ກ່ຽວຂ້ອງ