ນັກທ່ອງທ່ຽວເຂົ້າຊົມສວນຊຽງຄວນເພີ່ມຂຶ້ນ 60%

111 09 ສ.ຫ. 2018 ຂ່າວໜ້າ​ໜຶ່ງ
ນັກທ່ອງທ່ຽວເຂົ້າຊົມສວນຊຽງຄວນເພີ່ມຂຶ້ນ 60%

    ພາຍ­ຫຼັງ​ທີ່​ບໍ­ລິ­ສັດ​ ທ່ອງ​ທ່ຽວ ແລະ ການ​ລົງ­ທຶນ​ສາ­ກົນ​ລາວ ຈຳ­ກັດ ເຂົ້າ​ສຳ​ປະ­ທານ​ສວນ​ຊຽງ​ຄວນ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ໃນ​ໄລ­ຍະ​ໜຶ່ງ​ປີ­ຜ່ານ­ມາ ​ເຫັນ​ວ່າຍອດ​ນັກ​ທ່ອງ​ທ່ຽວ​ເພີ່ມ​ຂຶ້ນ​ເຖິງ 60% ສົ່ງ​ຜົນ​ໃຫ້​ບັນ­ຍາ­ກາດ​ການ­ທ່ອງ­ທ່ຽວ​ພາຍ​ໃນ​ສວນ​ຄຶກ­ຄື້ນ​ກວ່າ​ເກົ່າ ແລະ ມີ​ທ່າ​ອ່ຽງ​ດີ​ຂຶ້ນ​ເລື້ອຍໆ.

    ທ່ານ​ນາງ ສ້ອຍ​ສຸ­ດາ ອິນ​ເມືອງ​ໄຊ ປະ­ທານ​ບໍ­ລິ­ສັດ ທ່ອງ​ທ່ຽວ ແລະ ການ​ລົງ­ທຶນ​ສາ­ກົນ​ລາວ ຈຳ­ກັດ ຜູ້​ສຳ​ປະ­ທານ​ສວນ​ຊຽງ​ຄວນ ໄດ້​ກ່າວ​ວ່າ: ພາຍ­ຫຼັງ​ທີ່​ບໍ­ລິ­ສັດ​ໄດ້​ເຂົ້າ​ມາ​ສຳ​ປະ­ທານ​ສວນ​ຊຽງ​ຄວນ​ໃນ​ໄລ­ຍະ​ໜຶ່ງ​ປີ­ຜ່ານ­ມາ ​ສາ­ມາດ​ພັດ­ທະ­ນາ​ສວນ​ຊຽງ​ຄວນ​ສຳ­ເລັດ 60% ເປັນ­ຕົ້ນ ໄດ້​ສຳ­ເລັດ​ການ​ສ້າງ​ກຳ­ແພງ​ຮົ້ວ ທາງ​ຍ່າງ​ເບ​ຕົງ ປະ­ດັບ​ດ້ວຍ​ດອກ​ໄມ້ ສະ­ຖານ­ທີ່​ຈອດ​ລົດ ຫ້ອງ​ນ້ຳ ເວ­ທີ​ການ­ສະ­ແດງ ແລະ ອື່ນໆ ເຮັດ​ໃຫ້​ສະ­ຖານ­ທີ່​ທ່ອງ​ທ່ຽວ​ແຫ່ງ​ນີ້​ ສາ­ມາດ​ຮອງ​ຮັບ​ນັກ​ທ່ອງ​ທ່ຽວ​ໄດ້​ທຸກ​ລະ­ດູ ເວົ້າ​ລວມ ສວນ​ຊຽງ​ຄວນ​ມີ​ຄວາມ​ພ້ອມ​ຮອງ​ຮັບ​ນັກ​ທ່ອງ​ທ່ຽວ​ໄດ້ 100% ນອກ­ຈາກ​ນັ້ນ ຍັງ​ໄດ້​ສຳ­ເລັດ​ການ​ເຮັດ​ປື້ມ​ປະ­ຫວັດ ແລະ ສາ­ລະ​ຄະ­ດີ ເພື່ອ​ຈຳ­ໜ່າຍ​ໃຫ້​ນັກ​ທ່ອງ​ທ່ຽວ​ທີ່​ສົນ­ໃຈ ແລະ ປັດ­ຈຸ­ບັນ​ນີ້​ແມ່ນ​ກຳ­ລັງ​ກໍ່­ສ້າງ​ປະ­ຕູ­ໂຂງ​ໃຫຍ່ ພ້ອມ​ທັງ​ມີ​ແຜນ​ສ້າງ​ວິວ​ແຄມ​ຂອງ ແລະ ຮ້ານ​ອາ­ຫານ​ໃໝ່ ຄາດ​ວ່າ​ຈະ​ໃຫ້​ສຳ­ເລັດ​ໃນ​ປີ 2020 ແລະ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ນັກ​ທ່ອງ​ທ່ຽວ​ຊາວ​ຕ່າງ­ປະ­ເທດ ກໍ່​ຄື ຄົນ​ລາວ​ທີ່​ສົນ­ໃຈ​ຟັງ​ປະ­ຫວັດ​ຄວາມ​ເປັນ​ມາ​ຂອງ​ສວນ​ຊຽງ​ຄວນ ດັ່ງ­ນັ້ນ ຈຶ່ງ​ໄດ້​ແປ​ເປັນ​ສຽງ​ໃນ 4 ພາ­ສາ ຄື: ພາ­ສາ​ລາວ ອັງ­ກິດ ຈີນ ແລະ ເກົາ­ຫຼີ ເພື່ອ​ໃຫ້​ນັກ​ທ່ອງ​ທ່ຽວ​ໄດ້​ເລືອກ​ຟັງ​ຕາມ​ຄວາມ​ຕ້ອງ­ການ ຄາດ​ວ່າ​ຈະ​ສາ­ມາດ​ນຳ​ໃຊ້​ໃນ​ເດືອນ​ເມ­ສາ​ປີ 2019.

   ເພື່ອ​ສົ່ງ­ເສີມ​ການ­ທ່ອງ­ທ່ຽວ​ພາຍ​ໃນ ກໍ່​ຄື ປີ​ທ່ອງ​ທ່ຽວ​ລາວ ຈຶ່ງ​ຂໍ​ເຊີນ­ຊວນ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ​ເຂົ້າ​ມາ​ທ່ຽວ​ຊົມ​ສວນ​ຊຽງ​ຄວນ ຊົມ​ບູ­ຮານ​ສະ­ຖານ ພະ​ພຸດ​ທະ​ຮູບ ແລະ ຊົມ​ວິວ​ແຄມ​ຂອງ​ທີ່​ສວຍ​ສົດ​ງົດ​ງາມ ສຳ­ລັບ​ຄ່າ​ເຂົ້າ​ຊົມ​ນັ້ນ​ຄົນ​ລາວ 10.000 ກີບ ແລະ ຄົນ​ຕ່າງ­ປະ­ເທດ 15.000 ກີບ ຜູ້​ອາ­ຍຸ​ສູງ 70 ປີ​ຂຶ້ນ​ໄປ ແລະ ເດັກ​ອາ­ຍຸ​ຕ່ຳ​ກວ່າ 10 ປີ​ລົງ​ມາ​ແມ່ນ​ບໍ່​ເສຍ​ຄ່າ.

ຂ່າວທີ່ກ່ຽວຂ້ອງ