ຂ່າວຫຼ້າສຸດ

ເພີ່ມທະວີການຈັດຕັ້ງປະຕິບັດຄຳສັ່ງເລກທີ 15

162 09 ສ.ຫ. 2018 ຂ່າວໜ້າ​ໜຶ່ງ

    ເພື່ອ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຄຳ​ສັ່ງ​ເລກ​ທີ 15/ນຍ ກໍ່​ຄື​ເພີ່ມ​ທະ­ວີ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຄຸ້ມ​ຄອງ​ປ່າ­ໄມ້ ທຸ­ລະ​ກິດ​ໄມ້ ການ​ຂຸດ​ຄົ້ນ ການ​ປຸງ​ແຕ່ງ ແລະ ການ​ຊື້​ຂາຍ​ໄມ້​ໃຫ້​ມີ​ຄວາມ​ເຂັ້ມ​ງວດ​ຕາມ​ລະ­ບຽບ​ກົດ­ໝາຍ ພ້ອມ​ນີ້​ຍັງ​ເປັນ​ການ​ສະ­ກັດ​ກັ້ນ ຕ້ານ ແກ້​ໄຂ​ປາ­ກົດ­ການ​ຫຍໍ້­ທໍ້​ຕ່າງໆ ​ໃນ​ຂົງ­ເຂດ​ວຽກ​ງານ​ປ່າ­ໄມ້​ໃຫ້​ຫຼຸດ​ລົງ ​ເຮັດ​ໃຫ້​ໂຮງ­ງານ​ປຸງ​ແຕ່ງ​ໄມ້ ແລະ ເຟີ​ນີ​ເຈີ​ເປັນ​ເອ­ກະ​ພາບ​ລະ­ຫວ່າງ​ສູນ​ກາງ ແລະ ທ້ອງ­ຖິ່ນ.

    ວັນ​ທີ 7 ສິງ­ຫາ 2018 ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ນະ­ຄອນ­ຫຼວງ​ວຽງ​ຈັນ ຈັດ​ກອງ​ປະ­ຊຸມ​ແຈ້ງ​ຜົນ​ດັດ­ສົມ​ໂຮງ­ງານ​ປຸງ​ແຕ່ງ​ໄມ້ ແລະ ເຟີ​ນີ​ເຈີ ພ້ອມ​ປຶກ­ສາ​ຫາ­ລື​ແຜນ​ການ­ຈັດ­ຕັ້ງ​ປະ­ຕິ­ບັດ​ໃນ­ຕໍ່­ໜ້າ ຂຶ້ນ​ທີ່​ພະ​ແນກ​ຕົນ ໂດຍ​ເປັນ​ປະ­ທານ​ຂອງ​ທ່ານ ເບີ​ລິນ ເພັດ​ຈັນ­ທະ​ຣາດ ຫົວ­ໜ້າ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ນະ­ຄອນ­ຫຼວງ​ວຽງ​ຈັນ ມີ​ບັນ­ດາ​ຮອງ​ເຈົ້າ­ເມືອງ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ການ​ດັດ­ສົມ​ໂຮງ­ງານ​ປຸງ​ແຕ່ງ​ໄມ້ ແລະ ເຟີ​ນີ​ເຈີ​ ໄດ້​ເລີ່ມ​ຈັດ​ຕັ້ງ​ມາ​ແຕ່​ທ້າຍ​ປີ 2017 ມາ​ຮອດ​ຕົ້ນ​ປີ 2018 ມີ​ໂຮງ­ງານ​ທັງ​ໝົດ 162 ແຫ່ງ ໂດຍ​ໄດ້​ລົງ​ກວດ­ກາ​ບັນ­ດາ​ໂຮງ­ງານ​ດັ່ງ­ກ່າວ​ ສາ­ມາດ​ພົບ​ເຫັນ​ໂຮງ­ງານ​ຈຳ­ນວນ​ໜຶ່ງ ​ຍັງ​ຕ້ອງ​ໄດ້​ສືບ­ຕໍ່​ປັບ­ປຸງ​ເມື່ອ​ທຽບ­ໃສ່​ຂໍ້​ຕົກ­ລົງ ​ວ່າ​ດ້ວຍ​ການ​ຄຸ້ມ​ຄອງ​ໂຮງ­ງານ​ອຸດ­ສາ­ຫະ­ກຳ ມາດ­ຕະ­ຖານ​ຂອງ​ໂຮງ­ງານ​ອຸດ­ສາ­ຫະ­ກຳ​ປຸງ​ແຕ່ງ​ໄມ້ ໂດຍ​ສະ­ເພາະ​ແມ່ນ ​ມາດ­ຕະ­ຖານ​ດ້ານ​ສະ­ຖານ­ທີ່​ຕັ້ງ​ອາ­ຄານ​ໂຮງ­ງານ ບໍ­ລິ­ເວນ​ໂຮງ­ງານ ມາດ­ຕະ­ຖານ​ຜະ­ລິດ​ຕະ​ພັນ ບັນ­ດາ​ລະ­ບຽບ​ການ​ຕ່າງໆ​ທີ່​ກ່ຽວ­ຂ້ອງ ແລະ ໂຮງ­ງານ​ຈຳ­ນວນ​ໜຶ່ງ ​ຕ້ອງ​ໄດ້​ຢຸດ​ເຊົາ​ດຳ­ເນີນ​ກິດ­ຈະ­ການ​ຖາ­ວອນ ໃນ​ນີ້​ມີ 32 ໂຮງ­ງານ​ສາ­ມາດ​ສືບ­ຕໍ່​ດຳ­ເນີນ​ກິດ­ຈະ­ການ​ໄດ້​ມີ 83 ໂຮງ­ງານ​ໃຫ້​ປັບ­ປຸງ​ຄືນ ແລະ 32 ໂຮງ­ງານ​ໃຫ້​ຢຸດ​ເຊົາ.

ຂ່າວທີ່ກ່ຽວຂ້ອງ