ຂ່າວຫຼ້າສຸດ

ໃຫ້ຄວາມຮູ້ພື້ນຖານ ດ້ານເຕັກນິກວິຊາການທາງລົດໄຟ

189 09 ສ.ຫ. 2018 ຂ່າວໜ້າ​ໜຶ່ງ

    ຊຸດ​ອົບ­ຮົມ “ເຕັກ­ນິກ​ລົດ­ໄຟ​ລາວ​ ປະ­ຈຳ​ປີ 2018 ຈັດ​ຂຶ້ນ​ວັນ​ທີ 8-28 ສິງ­ຫາ 2018 ທີ່​ສູນ​ເຝິກ­ອົບ­ຮົມ​ສູນ​ກາງ​ແນວ​ລາວ​ສ້າງ​ຊາດ ມີ​ທ່ານ ວິ­ຈິດ ຊີນ​ດາ​ວົງ ຮອງ​ປະ­ທານ​ຄະ­ນະ​ກຳ­ມະ­ການ​ຮ່ວມ​ມື​ລາວ-ຈີນ ທ່ານ LI Nengbing ຕາງ­ໜ້າ​ທີ່​ປຶກ­ສາ​ດ້ານ​ເສດ­ຖະ­ກິດ​ການ​ຄ້າ​ສະ­ຖານ­ທູດ​ຈີນ ປະ­ຈຳ​ລາວ ທ່ານ ນາງ WU Xuan ເລ­ຂາ​ໜ່ວຍ​ພັກ ຄະ­ນະ​ສຶກ​ສາ​ທາງ­ໄກ ແລະ ການ​ສຶກ​ສາ​ແບບ​ຕໍ່​ເນື່ອງ ມະ­ຫາ­ວິ­ທະ­ຍາ­ໄລ​ຄົມ­ມະ­ນາ­ຄົມ​ປັກ​ກິ່ງ ທ່ານ XIAO Gan Wen ເລ­ຂາ​ໜ່ວຍ​ພັກ​ບໍ­ລິ­ສັດ ທາງ​ລົດ­ໄຟ​ລາວ-ຈີນ ມີ​ສຳ​ມະ​ນາ​ກອນ​ຈາກ​ສູນ​ກາງ ແລະ ທ້ອງ­ຖິ່ນ 50 ຄົນ​ເຂົ້າ​ຮ່ວມ.

    ທ່ານ ວິ­ຈິດ ຊີນ​ດາ​ວົງ ກ່າວ​ວ່າ: ຊຸດ​ອົບ­ຮົມ​ຄັ້ງ​ນີ້​ມີ​ຄວາມ​ໝາຍ​ຄວາມ​ສຳ­ຄັນ ​ເພາະ​ຈະ​ເປັນ​ການ​ຊ່ວຍ​ລາວ​ເຮົາ​ໃນ​ການ​ສ້າງ ແລະ ກະ­ກຽມ​ບຸ​ຄະ­ລາ​ກອນ ​ເພື່ອ​ຮັບ­ຮອງ​ໂຄງ­ການ​ດັ່ງ­ກ່າວ ເຊິ່ງ​ບົດ­ຮຽນ​ທີ່​ນຳ​ມາ​ສິດ­ສອນ​ຄັ້ງ​ນີ້ ​ລວມ​ມີ​ທັງ​ພາກ​ທິດ​ສະ​ດີ ແລະ ພາກ​ທັດ­ສະ­ນະ​ສຶກ​ສາ​ພາກ​ສະ­ໜາມ​ຕົວ​ຈິງ ເຊິ່ງ​ລັດ­ຖະ­ບານ​ລາວ ແລະ ຈີນ ລ້ວນ​ແຕ່​ຖື​ເອົາ​ການ​ຮ່ວມ​ມື​ດ້ານ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ​ເປັນ​ບຸ­ລິ​ມາ​ສິດ​ອັນ​ດັບ​ຕົ້ນ​ ໃນ​ການ​ຮ່ວມ​ມື​ລະ­ຫວ່າງ​ສອງ​ປະ­ເທດ​ໃນ​ຫຼາຍ​ປີ­ຜ່ານ­ມາ ໂດຍ​ການ​ສະ­ໜັບ­ສະ­ໜູນ​ຊ່ວຍ­ເຫຼືອ​ ຈາກ​ກະ­ຊວງ​ການ​ຄ້າ​ຈີນ ມີ​ພະ­ນັກ­ງານ​ລາວ​ເຂົ້າ​ຮ່ວມ​ຫຼາຍ​ຮ້ອຍ​ຊຸດ ລວມ​ພັນ​ກວ່າ​ຄົນ ໄດ້​ໄປ​ຮ່ວມ​ຝຶກ​ອົບ­ຮົມ​ສຳ​ມະ​ນາ ແລະ ທັດ­ສະ­ນະ​ສຶກ​ສາ​ໃນ​ຫົວ­ຂໍ້​ຕ່າງໆ ທັງ​ແບບ​ສອງ​ຝ່າຍ ແລະ ຫຼາຍ​ຝ່າຍ​ທີ່​ຈັດ​ຢູ່​ ສປ ຈີນ ການ​ສຳ​ມະ​ນາ​ໄດ້​ສະ­ແດງ​ເຖິງ​ປະ­ສົບ​ການ​ໃນ​ການ​ກໍ່­ສ້າງ​ທາງ​ລົດ­ໄຟ​ຂອງ​ຈີນ ໄດ້​ເຜີຍ­ແຜ່​ຄວາມ​ຮູ້​ພື້ນ­ຖານ​ດ້ານ​ເຕັກ­ນິກ​ວິ­ຊາ​ການ ແລະ ເສີມ​ຂະ­ຫຍາຍ​ຄວາມ​ຮູ້​ຄວາມ​ສາ­ມາດ​ໃຫ້​ແກ່​ສຳ​ມະ​ນາ​ກອນ ​ໃນ​ການ​ແກ້​ໄຂ​ບັນ­ຫາ​ການ​ຄຸ້ມ​ຄອງ ແລະ ການ​ຂົນ­ສົ່ງ​ທາງ​ລົດ­ໄຟ ເຊິ່ງ​ການ​ສຳ​ມະ​ນາ​ຄັ້ງ​ນີ້ ​ບັນ­ຍາຍ​ໂດຍ​ສາດ­ສະ­ດາ­ຈານ​ທີ່​ມີ​ປະ­ສົບ​ການ​ດ້ານ​ເຕັກ­ນິກ​ທາງ​ລົດ­ໄຟ ການ​ປົກ​ປັກ​ຮັກ­ສາ​ທາງ​ລົດ­ໄຟ ແລະ ເຕັກ­ນິກ​ການ​ສ້ອມ­ແປງ​ທາງ​ລົດ­ໄຟ​ເປັນ­ຕົ້ນ.

    ໂຄງ­ການ​ທາງ​ລົດ­ໄຟ​ລາວ-ຈີນ ເປັນ​ໂຄງ­ການ​ທີ່​ມີ​ລັກ­ສະ­ນະ​ປະ­ຫວັດ­ສາດ ແລະ ຍຸດ​ທະ​ສາດ​ການ​ຮ່ວມ​ມື​ລະ­ຫວ່າງ​ສອງ​ປະ­ເທດ ເປັນ​ໂຄງ­ການ​ໜຶ່ງ​ທີ່​ນຳ​ໜ້າ​ໃນ​ການ​ຮ່ວມ​ມື​ສ້າງ “ໜຶ່ງ​ແລວ​ໜຶ່ງ​ເສັ້ນ­ທາງ” ທີ່​ການ​ນຳ​ຂອງ​ລາວ ແລະ ຈີນ​ໃຫ້​ຄວາມ​ສຳ­ຄັນ​ສູງ ເຊິ່ງ​ຈະ​ກາຍ­ເປັນ​ສັນ­ຍາ​ລັກ​ອັນ​ໂດດ​ເດັ່ນ​ອີກ​ດ້ານ​ໜຶ່ງ​ຂອງ​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ແບບ​ຄູ່​ຮ່ວມ​ສະ​ຕາ​ກຳ​ຍຸດ​ທະ​ສາດ​ລະ­ຫວ່າງ​ສອງ​ປະ­ເທດ ມາ​ຮອດ​ປັດ­ຈຸ­ບັນ​ ການ​ກໍ່­ສ້າງ​ໂຄງ­ການ​ນີ້​ມີ​ຄວາມ​ຄືບ​ໜ້າ 37% ແລະ ຄາດ​ວ່າ​ຈະ​ໃຫ້​ສຳ­ເລັດ​ຕາມ​ແຜນ­ການ​ທີ່​ວາງ​ໄວ້.

ຂ່າວທີ່ກ່ຽວຂ້ອງ