ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 09/08/2018

218 09 ສ.ຫ. 2018 ຫົວຂໍ້ຂ່າວອື່ນໆ

    ເລື່ອງ​ເກົ່າ​ເອົາ​ມາ​ເລົ່າຄືນ​ປະຈຳ​ວັນ​ນີ້​ ຂຶ້ນ​ຕົ້ນ​ດ້ວຍ​ເລື່ອງ​ກ່ຽວກັບ​ເນື້ອ​ໃນ​ກົດໝາຍ​ເກັບ​ພາສີນັກບວດ​ຢູ່ ສ ເກົາຫຼີ ບັນຫາການ​ຕອບ​ຂໍ້​ຂ້ອງ​ໃຈ​ຂອງ​ປະຊາຊົນ​ໃນ​ຫວຽດນາມ ແລະ ເລື່ອງ​ທາງ​ການສີ​ລັງກາ ແກ້​ໄຂ​ບັນຫາ​ໝິ່ນປະໝາດ​ສາສະໜາ.

    ທີ່ ສ ເກົາຫຼີ: ແນວ​ຄວາມຄິດ​ທີ່​ນຳໄປ​ສູ່​ການ​ເກັບ​ພາສີ​ນັກບວດ​ຢູ່ ສ ເກົາຫຼີ ນັ້ນ ມີ​ມາ​ແຕ່ປີ 1968 ພຸ້ນ ແລະ ໄດ້​ກາຍເປັນຄວາມ​ຈິງ ເລີ່ມ​ແຕ່ປີ 2018 ເປັນຕົ້ນ​ມາ ໃນ​ວັນ​ທີ 3 ເດືອນ​ທັນວາ ປີ 2015 ສະພາແຫ່ງ​ຊາດ ສ ເກົາຫຼີ ໄດ້​ພິຈາລະນາ​ຜ່ານ​ກົດໝາຍ​ເກັບ​ພາສີ​ຈາກ​ນັກບວດ​ໃນ​ທຸກໆ​ສາສະໜາ ບໍ່​ວ່າ​ຈະ​ເປັນ​ພະສົງ​ໃນ​ສາສະໜາ​ພຸດ ນັກບວດ-ຄຸນ​ພໍ່ ໃນສາສະໜາ​ອື່ນໆ ເນື່ອງ​ຈາ​ກວ່າເປັນ​ການ​ປ່ຽນແປງ​ລັກສະນະບາດ​ລ້ຽງ​ໃໝ່ ແລະ ເປັນ​ບັນຫາລະອຽດ​ອ່ອນ ກົດໝາຍ​ຈຶ່ງ​ເລີ່ມມີ​ຜົນ​ສັກສິດ​ໃນ​ທາງ​ປະຕິບັດ​ ນັບແຕ່​ປີ 2018 ເປັນຕົ້ນ​ມາ ຢູ່ ສ ເກົາຫຼີ ມີ​ນັກບວດ​ໃນ​ທຸກໆ​ສາສະໜາ​ຈຳນວນ 360.000 ຄົນ (ຕົວ​ເລກປີ 2015) ດັ່ງນັ້ນ ເຈົ້າໜ້າທີ່​ລັດ​ທີ່​ກ່ຽວຂ້ອງ ​ຈຶ່ງ​ຕ້ອງ​ໄດ້ໃຊ້​ເວລາ ​ເພື່ອ​ເຈລະ​ນາ​ກັບ​ບັນດາຜູ້ນຳ​ທາງ​ສາສະໜາ​ທັງ​ໝົດ ​ກ່ອນຈະ​ເລີ່ມ​ປະຕິບັດ​ກົດໝາຍສະບັບນີ້​ ເພື່ອ​ສະດວກ ແລະ ເປັນ​ທີ່​ຍອມຮັບ​ພາສາ​ທີ່​ໃຊ້​ໃນ​ກົດໝາຍ​ຮ່າງກົດໝາຍ​ໄດ້​ກຳນົດ​ປ່ຽນ​ຈາກ​ຄຳວ່າ: (ເງິນ​ກິນ​ທານ) ຫຼື ເງິນ “ບໍລິຈາກ’’ ທີ່​ນັກບວດ​ໄດ້​ຮັບ​ມາເປັນ (ລາຍ​ໄດ້​ທາງ​ສາສະໜາ) (Religious in Come) ໂດຍ​ນັກບວດ​ຜູ້​ມີ​ລາຍ​ໄດ້​ບໍ່​ເກີນ 40 ລ້ານວອນ (ປະມານ 34.500 ໂດ​ລາສະຫະລັດ) ຕໍ່​ປີ ຫຼື ໜ້ອຍ​ກວ່ານັ້ນ ຈະ​ຕ້ອງ​ໄດ້​ເສຍ​ພາສີ​ໃນ​ອັດຕາ​ດອກ​ເບ້ຍ​ຮ້ອຍ​ລະ 20 ສ່ວນນັກບວດ​ທີ່​ມີ​ລາຍ​ໄດ້​ຫຼາຍ​ກວ່າ 150 ລ້ານ​ວອນ​ຕໍ່​ປີ ຕ້ອງ​ເສຍ​ພາສີ​ຮ້ອຍ​ລະ 80 ການເກັບ​ພາສີນັກບວດ​ໃນ ສ ເກົາຫຼີ ນັ້ນ​ ເປັນໄປ​ຕາມ​ຫຼັກການ​ທີ່​ວ່າ ຊາວ​ເກົາຫຼີ​ທຸກ​ຄົນ​ທີ່​ມີ​ວຽກ​ເຮັດ​ງານ​ທຳ ຕ້ອງ​ເສຍ​ພາສີ ລວມ​ທັງ​ຢູ່​ໃນ​ຂົງເຂດ​ສາສະໜາ ຂໍ້​ສະເໜີ​ເກັບ​ພາສີ​ນັກບວດ ໄດ້​ຖືກ​ຍົກ​ຂຶ້ນ​ມາ​ພິ​ຈາລະ​ນາ​ຢ່າງ​ຈິງ​ຈັງ ໃນ​ປີ 2013 ໃນ​ຍຸກ​ຂອງ​ປະທານາທິບໍດີ ທ່ານນາງ ປາ​ກຶນ-ເຮ ທ່າມກາງ​ສຽງຄັດຄ້ານ​ຈາກ​ບັນດາ​ຜູ້ນຳ​ກຸ່ມ​ສາສະໜາ​ທີ່​ມີ​ອິດ​ທິ​ພົນ.

    ທີ່ ຫວຽດນາມ: ທາງ​ການຫວຽດນາມ​ໃຫ້​ຄວາມສຳຄັນ ເປັນຢ່າງ​ຍິ່ງ​ຕໍ່​ຄຳ​ຄິດ​ເຫັນ​ຂໍ້​ສະເໜີ ກໍ່​ຄື ຄວາມ​ຂັດຂ້ອງ​ໝອງ​ໃຈຂອງ​ປະຊາ​ຊົນ ​ກ່ຽວ​ກັບ​ນະໂຍບາຍ ກໍ່​ຄື ການ​ບໍລິຫານ​ງານ​ປະເທດ ໂດຍສະເພາະແມ່ນ ​ການ​ຮັບ​ໃຊ້​ປະຊາຊົນ​ຂອງ​ເຫຼົ່າ​ພະນັກງານ​ລັດ ເລື່ອງ​ນີ້ພິສູດ​ໄດ້ ​ຈາກ​ຄຳ​ສະເໜີ​ຂອງ​ທ່ານ​ນາຍົກ ຫງວຽນ ຊວນ​ຟຸກ ໃຫ້​ບັນດາ​ລັດຖະມົນຕີ ຫົວໜ້າ​ສຳນັກງານ​ອົງການ ກໍ່​ຄື ປະທານ​ຄະນະ​ກຳມະການປະຊາ​ຊົນ​ແຂວງ ແລະ ເມືອງ ​ຮີບ​ຮ້ອນ​ໃຫ້​ຄວາມ​ກະຈ່າງ​ແຈ້ງ​ຕໍ່​ຂໍ້​ຂ້ອງ​ໃຈຂອງ​ປະຊາຊົນ ​ທີ່​ໄດ້​ຮັບ​ຄຳ​ສະເໜີ​ຂອງ​ທ່ານ​ນາຍົກ​ຫວຽດນາມ ມີ​ຂຶ້ນ​ພາຍຫຼັງ​ໄດ້​ມີລາຍ​ງານ​ກ່ຽວ​ກັບ​ຂັ້ນ​ຕອນ​ການແກ້​ໄຂ​ຂໍ້​ຂ້ອງ​ໃຈ​ຂອງ​ປະຊາຊົນ ປະຈຳ​ໄຕ​ມາດ​ທີ​ສອງຂອງ​ປີ 2017 ໃນ​ການ​ແກ້​ໄຂ​ຂໍ້​ຂ້ອງ​ໃຈຂອງ​ປະຊາຊົນ​ນັ້ນ ທ່ານ​ນາຍົກໄດ້​ສະເໜີ​ໃຫ້​ບັນດາ​ພະນັກງານ​ຫຼັກ​ແຫຼ່ງ ​ປະຕິບັດ​ຢ່າງ​ເຄັ່ງ​ຕາມ​ຂັ້ນ​ຕອນ​ນັບ​ແຕ່​ການ​ຮັບ​ການ​ພິຈາລະ​ນາ ແລະ ຂັ້ນ​ຕອນການຕອບ ເພື່ອ​ໃຫ້​ຄວາມ​ກະຈ່າງ​ແຈ້ງແກ່​ສ່ວນ​ບຸກຄົນ ກໍ່​ຄື ບໍລິສັດ​ ໂດຍໃຫ້​ສອດ​​ຄ່່ອງ​ກັບ​ລະບຽບ​ການທີ່​ລັດຖະບານ​ວາງ​ອອກ ໃນ​ຄັ້ງວັນ​ທີ 25 ເດືອນ​ເມສາ ປີ 2017 ກ່ຽວ​ກັບ​ຄຳ​ຮ້ອງທຸກ​ຈາກ​ສັງຄົມ.

    ທີ່ ສີ​ລັງກາ: ເມື່ອ​ສອງ​ປີຜ່ານ​ມາ ​ມີ​ເຫດການ​ໜຶ່ງ​ທີ່​ສ້າງ​ຄວາມ​ສະເທືອນ​ໃຈ​ແກ່​ຊາວ​ສີລັງກາ ທີ່​ຄົນ​ສ່ວນ​ໃຫຍ່​ນັບຖື​ສາສະໜາ​ພຸດດ້ວຍ​ຄວາມ​ເຫຼື້ອມໃສ​ສັດທາ​ເປັນ​ຢ່າງ​ຍິ່ງ ເຫດເກີດ​ຂຶ້ນ​ຢູ່​ດ່ານ​ສາກົນ​ ບ່ອນ​ທີ່​ພະນັກ​ງານ​ພາສີ​ກວດ​ພົບ​ຕູ້​ຄອນເທນ​ເນີ ບັນຈຸ​ເສື້ອ​ຄຸມ​ກັນ​ເປື້ອນ ສຳລັບ​ຄົວກິນ​ທີ່​ສົ່ງ​ໄປ​ຈາກ​ອິນເດຍ ຜ່ານສີ​ລັງກາ ສູ່​ປະເທດ​ສະໂລເວ​ເນຍ ແຕ່​ບັງເອີນ​ຢູ່​ເສື້ອ​ນຸ່ງກັນ​ເປື້ອນ​ ຜັດ​ມີ​ພາບ​ພະ​ພຸດ​ທະຮູບ​ພິມ​ຕິດ​ເປີ້​ເຈີ້ ທາງ​ການ​ສີ​ລັງກາ ຖື​ວ່າການ​ພິມ​ພາບ​ດັ່ງກ່າວໃສ່​ເສື້ອ​ນຸ່ງ​ຄົວກິນ​ນັ້ນ ເປັນ​ການໝິ່ນປະໝາດ​ສາສະໜາ​ພຸດ ດັ່ງນັ້ນ ຈຶ່ງ​ໄດ້​ຢຶດ​ຕູ້​ສິນຄ້າ​ນັ້ນ​ໄວ້ ແຕ່​ບໍ່​ກ້າ​ທຳລາຍ​ຖິ້ມ ເພາະ​ມີຮູບ​ພະ​ພິມ​ຕິດ​ຢູ່.

ຂ່າວທີ່ກ່ຽວຂ້ອງ