ນາໂຕ ກັບການສູ້ຢັນງົບປະມານ

114 10 ສ.ຫ. 2018 ນານາສາລະ

   ສິ້ນ​ສຸດ​ໄປ​ແລ້ວ​ກອງ​ປະ­ຊຸມ​ຂັ້ນ​ສູງ ຜູ້­ນຳ​ກຸ່ມພັນ­ທະ​ມິດ​ນາ​ໂຕ (The North Atlantic Treaty Organization = NATO) ຊຶ່ງ​ຈັດ​ຂຶ້ນ​ສອງ​ວັນທີ 11 12 ກໍ­ລະ­ກົດ 2018 ທີ່​ກຸງ​ບຣຸກ​ແຊນ ປະ­ເທດ​ແບນຊິກ ນີ້​ແມ່ນ​ກອງ​ປະ­ຊຸມ​ຄັ້ງ​ທີ 29 ໂດຍ​ມີ​ຄະ­ນະ​ຜູ້ແທນ​ທາງ​ການ​ເຂົ້າ​ຮ່ວມ 54 ຄະ­ນະ ລວມ​ມີ 29 ປະ­ເທດ​ສະ­ມາ­ຊິກ 20 ປະ­ເທດ​ຄູ່​ຮ່ວມ​ມື ແລະ ອົງການ­ຈັດ­ຕັ້ງ​ສາ­ກົນ ຄື: ສປຊ EU WB ແລະ ສະພາ​ລັດ​ຖະ​ສະ­ພາ NATO ອີງ​ຕາມ​ແຫຼ່ງ​ຂ່າວ​ຕ່າງປະ­ເທດ​ໃຫ້​ຮູ້​ວ່າ: ໃນ​ກອງ​ປະ­ຊຸມ​ຄັ້ງ​ນີ້ ​ໄດ້​ມີ​ການ​ສູ້ຢັນ​ກັນ​ເຖິງ​ຂັ້ນ​ແຕກ​ຫັກລະ­ຫວ່າງສະ­ຫະ­ລັດ​ອາ​ເມຣິ​ກາ ແລະ ປະ­ເທດ​ສະ­ມາ­ຊິກ ເລື່ອງ​ງົບ­ປະ­ມານການ​ທະ­ຫານກ່ອນ​ໜ້າ​ນີ້​ຄື ປີ 2014 ໃນ​ກອງ​ປະຊຸມ​ປະ­ຈຳ​ປີ ບັນ­ດາ​ປະ­ເທດ​ສະ­ມາ­ຊິກ NATO ໄດ້ເປັນ​ເອ­ກະ​ພາບ​ກັນ​ວ່າງົບ­ປະ­ມານ​ການ​ທະ­ຫານຂອງ​ແຕ່​ລະ​ປະ­ເທດ ​ຕ້ອງ​ໃຫ້​ໄດ້​ໃນ​ລະ­ດັບ 2% ຂອງ GDP ພາຍ​ໃນ ແຕ່​ຕາມ​ການ​ລາຍ​ງານ​ແລ້ວ ເຫັນ​ວ່າມີ​ພຽງ 8 ປະ­ເທດ​ເທົ່າ​ນັ້ນ ທີ່​ປະ­ຕິ­ບັດ​ໄດ້ ສະ­ນັ້ນ ງົບ­ປະ­ມານ​ຈຶ່ງ​ຕົກ​ມາ​ຢູ່​ທີ່​ສະ­ຫະ­ລັດ​ອາ​ເມຣິ​ກາ​ຜູ້​ດຽວ​ໜັກ​ກວ່າ​ເພິ່ນ ໝາ­ຍວ່າ ອາ​ເມ​ຣິ​ກາ ອອກ​ເງິນ​ຫຼາຍ​ກວ່າ​ໝູ່ ແຕ່​ຜູ້​ໄດ້​ຮັບ​ຜົນ​ປະ­ໂຫຍດ​ຜັດ ແມ່ນ​ກຸ່ມ EU ນັ້ນ​ຄື​ເຫດ­ຜົນ​ທີ່​ປະ­ທາ­ນາ­ທິ­ບໍ­ດີ ທຣຳ ຮຽກ­ຮ້ອງ​ຕ້ອງ​ອອກ​ເງິນ 2% ໃຫ້​ສຳ­ເລັດ​ໃນ​ປີ 2019 ບໍ່​ຊັ້ນ​ອາ​ເມ​ຣິ​ກາ ຈະ​ອອກ​ໄປ​ຝ່າຍ​ດຽວ.

   ຕາມ​ຄຳ​ໝັ້ນ​ສັນ­ຍາ​ນັ້ນ ບັນ­ດາ​ປະ­ເທດ​ສະ​ມາຊິກ​ຕ້ອງ​ຈ່າຍ​ງົບ­ປະ­ມານ​ການ​ທະ­ຫານ 2% ຂອງ GDP ພາຍ​ໃນ​ປະ­ເທດ ພາຍ​ໃນ​ປີ 2024 ແລະ ມີ​ການ​ໂຍະ­ຍານ​ເຖິງ​ປີ 2030.

   ໜັງ­ສື­ພິມ “ກວນ​ໂດ້ຍ​ເຢິນ​ເຢິນ ຫວຽດ­ນາມ” ສະ­ບັບ​ອອນ​ລາຍ ລົງ​ວັນ​ທີ 11 ກໍ­ລະ­ກົດ 2018 ໃນ ຫົວ­ຂໍ້: “..ໄຂ​ກອງ​ປະ­ຊຸມ​ສຸດ​ຍອດນາ​ໂຕ” ມີ​ບາງຈຸດ​ຂຽນ​ວ່າ:

   ອີງ​ຕາມ​ການ​ລາຍ​ງານ​ຂອງ​ນາ​ໂຕ ອາ​ເມ​ຣິ​ກາ ເປັນ​ຜູ້​ຮັບ­ຜິດ­ຊອບ 70% ຂອງ​ງົບ­ປະ­ມານ​ການ​ທະຫານ ໃນ​ປີ 2018 ຄື​ປະ­ມານ 706 ຕື້​ໂດ​ລາ ໃນ​ຈຳນວນ 1 ພັນ​ຕື້​ໂດ​ລາຂອງ​ງົບ­ປະ­ມານ​ທັງ​ໝົດ ອັງກິດ 62 ຕື້​ໂດ​ລາ ຝຣັ່ງ 52 ຕື້​ໂດ​ລາ ແລະ ເຢຍລະ​ມັນ 51 ຕື້​ໂດ​ລາ ການ​ສູ້​ຢັນ​ທີ່​ເຄັ່ງ­ຮ້ອນ​ຢູ່​ກອງປະ­ຊຸມ​ຄັ້ງ​ນີ້ ໄດ້​ເຮັດ​ໃຫ້­ການ​ພົວ­ພັນ​ລະ­ຫວ່າງອາເມ​ຣິ​ກາ ແລະ EU ແຕກ​ຫັກ​ພາຍ​ໃນ ທັງ​ໝົດ​ນັ້ນແມ່ນ​ຍ້ອນ​ນະ­ໂຍ­ບາຍ AMERICA First ຂອງ​ປະທາ​ນາ​ທິ​ບໍ­ດີ ທຣຳ ເຊິ່ງ​ຕ້ອງ­ການ​ໃຫ້​ປະ­ເທດ​ຕົນ ຫຼຸດ​ພາ­ລະ​ການ​ໃຊ້​ຈ່າຍ​ລົງ ແລ້ວ​ໃຫ້​ປະ­ເທດ​ສະ​ມາຊິກ​ແບກ​ຫາບ​ຊ່ວຍ​ກັນ​ ແຕ່​ໃນ​ພຶດ­ຕິ​ກຳ​ຕົວ​ຈິງ ປະຊາ​ຊົນ​ຂອງ​ປະ­ເທດ EU ຜັດ​ຄັດ­ຄ້ານ​ການ​ໃຊ້​ຈ່າຍທາງ​ທະ­ຫານ ເພາະ​ໃນ​ຄວາມ​ເປັນ​ຈິງ​ຄວນ​ໃຊ້ຈ່າຍ​ເຂົ້າ​ໃນ​ການ​ແກ້​ໄຂ​ຄວາມ­ທຸກ​ຍາກ ການ​ປ້ອງກັນ​ການ​ປ່ຽນ­ແປງ​ດິນ​ຟ້າ​ອາ­ກາດ​ຂອງ​ໂລກ ບັນຫາ​ຊາວ​ອົບ​ພະ​ຍົກ...

   ຫຼັງ​ກອງ​ປະ­ຊຸມ​ທ່ານ ທຣຳ ໄດ້​ປະ­ກາດ​ໄຊ­ຊະ­ນະວ່າ ປະ­ເທດ​ພັນ­ທະ​ມິດ​ຍອມ​ເພີ່ມ​ງົບ­ປະ­ມານ​ການທະ­ຫານ ຕາມ​ຄຳ​ຮຽກ­ຮ້ອງ​ຂອງ​ອາ​ເມ​ຣິ​ກາ ອີງຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ໃນ​ວັນທີ 13 ກໍ­ລະ­ກົດ 2018 ສຳ­ນັກ​ຂ່າວ​ຂອງ Mint Press News ໄດ້​ເຜີຍ­ແຜ່​ບົດ​ຂຽນ​ຂອງ Whitney Webb ຄໍ​ລຳ​ນິດ​ຊື່​ດັງ ເວົ້າ​ໄວ້​ວ່າ: “After Trump Push NATO Member to spend More; Lockheed Double Production as Orders Explode ໝາ­ຍວ່າ: ທ່ານ ທຣຳ ໄດ້​ຂົ່ມ­ຂູ່​ໃຫ້​ບັນ­ດາປະ­ເທດ​ສະ­ມາ­ຊິກ​ນາ​ໂຕ ຕ້ອງ​ເພີ່ມ​ງົບ­ປະ­ມານການ​ທະ­ຫານ​ເປັນ​ຜົນ­ສຳ­ເລັດ​ຮຽບ​ຮ້ອຍ​ແລ້ວ ບໍ­ລິ­ສັດ​ຜະ­ລິດ​ອາ­ວຸດ​ອາ​ເມ​ຣິ​ກາ (Lockheed Martin) ກໍ່​ເລີຍ​ໄດ້​ຈັງ­ຫວະ​ຜະ­ລິດ​ຈະ​ຫຼວດ​ຂາຍ​ໃຫ້​ປະ­ເທດ​ນາ​ໂຕ​ຫຼາຍ​ຂຶ້ນ​ເປັນ​ລ້ຳ​ເປັນ​ສັນ Whitney Webb ໄດ້​ອ້າງ​ຄຳ​ໃຫ້​ສຳ­ພາດ​ຂອງ Bob Delgado ຜູ້­ອຳ­ນວຍ­ການ​ຂອງ​ບໍ­ລິ­ສັດ Lockheed Martin ຕໍ່​ວາ­ລະ­ສານ “...Defense News...” ວ່າ: ບໍ­ລິ­ສັດ​ຂອງ​ເຂົາ​ມີ​ແຜນ​ຜະ­ລິດ​ຈະ​ຫຼວດ Patriot Missile ເພີ່ມ​ຂຶ້ນ​ເປັນ​ເທົ່າ​ຕົວ ເພາະ​ມີ​ການສັ່ງ​ຊື້​ຈາກ​ສະ­ມາ­ຊິກ NATO ແລະ ອາ​ເມ​ຣິ​ກາ​ເອງ ເຊິ່ງ​ແຕ່​ລະ​ລູກ​ມີ​ມູນ​ຄ່າ​ປະ­ມານ 3,4 ລ້ານ​ໂດ​ລາ ຄິດ​ວ່າ​ຈະ​ມີ​ປະ­ມານ 800 ກວ່າ​ລູກ.

   ນາ​ໂຕ ເກີດ​ຂຶ້ນ​ແຕ່​ປີ 1949 ເຊິ່ງ​ອອກ​ມາ​ຕໍ່­ກອນກັບ​ກຸ່ມ​ປະ­ເທດ​ສົນ­ທິ­ສັນ­ຍາ The Treaty of Friendship Cooperation and Mutual Assistant ຈາກ​ປະ­ເທດ​ສັງ­ຄົມ​ນິ­ຍົມ​ໃນ​ສົງ­ຄາມ​ເຢັນ.

   ສົງ­ຄາມ​ເຢັນຢຸດ­ຕິ​ລົງ​ແລ້ວ ແຕ່ NATO ຍັງ​ສືບຕໍ່​ຂະ­ຫຍາຍ​ອິດ​ທິ​ພົນ​ຢູ່ ສະ­ນັ້ນ ນັກ​ສັງ­ເກດ​ການຈຶ່ງ​ເບິ່ງ​ວ່າ ການ​ຕັ້ງ​ບັນ­ຫາ​ງົບ­ປະ­ມານ​ການ​ທະຫານ​ນັ້ນ​ສົມ­ຄວນ ຫຼື ບໍ່ ?.

ຂ່າວທີ່ກ່ຽວຂ້ອງ