ຂ່າວຫຼ້າສຸດ

ຫຼາຍໂຄງການທີ່ນະຄອນຫຼວງ ຕ້ອງໄດ້ສູ້ຊົນບັນລຸຄາດໝາຍ

266 21 ສ.ຫ. 2018 ຂ່າວໜ້າ​ໜຶ່ງ
ຫຼາຍໂຄງການທີ່ນະຄອນຫຼວງ ຕ້ອງໄດ້ສູ້ຊົນບັນລຸຄາດໝາຍ

    ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ (ນວ) ຮ່ວມ​ກັບ ຄະ­ນະ​ຈັດ​ຕັ້ງ ແລະ ຄະ­ນະ​ໂຄ­ສະ­ນາ​ອົບ­ຮົມ ນວ ຈັດ​ກອງ​ປະ­ຊຸມ​ເຊື່ອມ​ຊຶມ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ຄັ້ງ​ທີ 6 ສະ­ໄໝ​ທີ X  ແລະ ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ ນວ ຄັ້ງ​ທີ 11 ກາງ​ສະ­ໄໝ​ທີ VI ຂຶ້ນ​ວັນ​ທີ 20-21 ສິງ­ຫາ 2018 ທີ່​ໂຮງ­ຮຽນ​ການ­ເມືອງ ແລະ ການ​ປົກ­ຄອງ ນວ ເປັນ​ປະ­ທານ​ຂອງ​ສະ­ຫາຍ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ​ຄະ­ນະ​ພັກ ເຈົ້າ​ຄອງ ນວ ມີ​ຄະ­ນະ​ບໍ­ລິ­ຫານ​ງານ​ພັກ​ນະ­ຄອນ­ຫຼວງ ເລ­ຂາ ຮອງ​ເລ­ຂາ​ພັກ​ເມືອງ ພະ­ແນກ­ການ ອົງ­ການ​ທຽບ​ເທົ່າ ແລະ ການ​ນຳ​ຫຼັກ​ແຫຼ່ງ ນວ ເຂົ້າ​ຮ່ວມ.

    ກອງ​ປະ­ຊຸມ​ໄດ້​ມີ​ຄວາມ​ເຫັນ​ດີ​ເປັນ​ເອ­ກະ​ພາບ​ຕໍ່​ການ​ຕີ​ລາ­ຄາ ການ​ຜັນ​ຂະ­ຫຍາຍ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ຄັ້ງ​ທີ 5 ສະ­ໄໝ​ທີ X ຂອງ​ພັກ ໂດຍ​ລວມ​ແລ້ວ ປະ­ເທດ​ຊາດ​ສືບ­ຕໍ່​ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ​ຢ່າງ​ໜັກ​ແໜ້ນ ສັງ­ຄົມ​ມີ​ຄວາມ​ສະ­ຫງົບ ແລະ ເປັນ​ລະ­ບຽບ​ຮຽບ​ຮ້ອຍ​ໂດຍ​ພື້ນ­ຖານ ຢູ່​ບາງ​ເຂດ​ຫຼໍ່​ແຫຼມ​ໄດ້​ຮັບ​ການ​ແກ້​ໄຂ​ໃຫ້​ເຂົ້າ​ສູ່​ສະ­ພາບ​ປົກ­ກະ­ຕິ​ໃນ​ໄລ­ຍະ 2 ປີ­ຜ່ານ­ມາ ໂດຍ​ລວມ​ເສດ­ຖະ­ກິດ​ຍັງ​ສືບ­ຕໍ່​ຂະ­ຫຍາຍ­ຕົວ​ຕໍ່​ເນື່ອງ​ດ້ວຍ​ອັດ­ຕາ​ສະ­ເລ່ຍ 6,9% ຕໍ່​ປີ ລວມ​ຍອດ​ຜະ­ລິດ​ຕະ​ພັນ​ພາຍ​ໃນ (GDP) ສະ­ເລ່ຍ​ຕໍ່​ຫົວ​ຄົນ​ບັນ­ລຸ​ໄດ້ 2.472 ໂດ​ລາ​ສະ­ຫະ­ລັດ  ຫຼື ປະ­ມານ 20 ລ້ານ​ກີບ ສີ­ມື​ແຮງ​ງານ ແລະ ການ​ສຶກ​ສາ​ໄດ້​ຮັບ​ການ​ພັດ­ທະ­ນາ​ໃຫ້​ມີ​ຄຸ­ນະ­ພາບ ເສີມ​ຂະ­ຫຍາຍ​ຄຸນ­ຄ່າ​ທາງ​ດ້ານ​ວັດ­ທະ­ນະ­ທຳ​ຂອງ​ຊາດ ໄດ້​ປັບ­ປຸງ​ຄຸ­ນະ­ພາບ​ດ້ານ​ການ​ບໍ­ລິ­ການ​ສາ­ທາ­ລະ­ນະ​ສຸກ ການ​ປ້ອງ​ກັນ​ພະ­ຍາດ​ລະ­ບາດ​ຕາມ​ລະ­ດູ​ການ ໂດຍ​ລວມ​ແລ້ວ ອົງ​ການ­ຈັດ­ຕັ້ງ​ມະ­ຫາ­ຊົນ​ຂອງ​ພັກ​ໄດ້​ເອົາ­ໃຈ­ໃສ່​ເຕົ້າ­ໂຮມ​ຄວາມ​ສາ­ມັກ­ຄີ​ເປັນ​ປຶກ​ແຜ່ນ ສະ­ມາ­ຊິກ​ພັກ ພະ­ນັກ­ງານ ມີ​ຄວາມ​ເປັນ​ແບບ­ຢ່າງ​ນຳ​ໜ້າ​ແກ້​ໄຂ​ແນວ​ຄິດ​ພະ­ຍາດ​ອາດ­ຍາ​ສິດ ຕ້ານ ແລະ ສະ­ກັດ​ກັ້ນ​ການ​ສໍ້​ລາດ​ບັງ​ຫຼວງ.

    ສຳ­ລັບ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ພັກ ນວ ຄັ້ງ​ທີ 11 ກາງ​ສະ­ໄໝ​ທີ VI  ເປັນ​ເອ­ກະ​ພາບ​ຢືນ­ຢັນ​ຈະ​ສືບ­ຕໍ່​ຮັກ­ສາ​ຜັນ​ຂະ­ຫຍາຍ 18 ຄາດ­ໝາຍ​ໃຫຍ່ 6 ໂຄງ­ການ​ບຸກ​ທະ­ລຸ 16 ໂຄງ­ການ​ລະ­ດັບ​ຊາດ ແລະ ຄາດ  ໝາຍ​ຕ່າງໆ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ທີ່​ກອງ​ປະ­ຊຸມ​ໃຫຍ່​ຄັ້ງ​ທີ VI ຂອງ​ອົງ­ຄະ​ນະ​ພັກ ນວ ຮັບ­ຮອງ​ເປັນ​ຄາດ­ໝາຍ​ຈັດ​ຕັ້ງ​ນຳ­ພາ​ຕະ­ຫຼອດ​ທ້າຍ​ສະ­ໄໝ ແລະ ສືບ­ຕໍ່​ນຳ­ພາ​ໃນ 8 ແຜນ​ວຽກ​ຈຸດ​ສຸມ ແລະ  ໜ້າ­ທີ່​ສຳ­ຄັນ ຄື: ບຸກ​ທະ­ລຸ​ຕໍ່​ການ​ພັດ­ທະ­ນາ​ເສດ­ຖະ­ກິດ ເຮັດ​ໃຫ້ ນວ ສືບ­ຕໍ່​ກາຍ­ເປັນ​ໃຈ­ກາງ​ເສດ­ຖະ­ກິດ​ທີ່​ມີ​ຈັງ­ຫວະ​ເຕີບ​ໂຕ​ເຄື່ອນ​ໄຫວ​ຕາມ​ກົນ​ໄກ​ເສດ­ຖະ­ກິດ​ຕະ­ຫຼາດ ແລະ ຫັນ​ເປັນ​ອຸດ­ສາ­ຫະ­ກຳ​ທັນ​ສະ­ໄໝ​ຫັນ​ສູ່​ຄຸ­ນະ­ພາບ ແລະ ຍືນ​ຍົງ ໂດຍ​ສະ­ເພາະ ຍອດ​ຜະ­ລິດ​ຕະ​ພັນ​ພາຍ​ໃນ​ເພີ່ມ​ຂຶ້ນ​ບໍ່​ໃຫ້​ຫຼຸດ 10% ຕໍ່​ປີ ສະ­ເລ່ຍ​ຕໍ່​ຫົວ​ຄົນ​ຮອດ​ປີ   2020   ເທົ່າ​ກັບ 6.500 ໂດ​ລາ ຫຼື ປະ­ມານ 34 ລ້ານ​ກີບ​ຕໍ່​ຄົນ​ຕໍ່​ປີ  ແລະ ເອົາ­ໃຈ­ໃສ່​ບຸກ​ທະ­ລຸ​ພັດ­ທະ­ນາ​ເທ­ສະ​ບານ ສ້າງ ນວ ໃຫ້​ເປັນ​ນະ­ຄອນ​ໜ້າ​ຢູ່ ແລະ ຍືນ​ຍົງ ຫຼຸດ​ພົ້ນ​ອອກ​ຈາກ​ສະ­ຖາ­ນະ​ດ້ອຍ​ພັດ­ທະ­ນາ​ເປັນ​ກ້າວໆ ໂດຍ​ລົງ​ເລິກ ສືບ­ຕໍ່​ບຸກ​ທະ­ລຸ​ຕໍ່​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ  ຍົກ​ລະ­ດັບ​ດັດ​ສະ​ນີ​ໝາຍ​ຄຸ­ນະ­ພາບ​ທາງ​ສັງ­ຄົມ ວັດ­ທະ­ນະ ທຳ ເພີ່ມ​ທະ­ວີ​ການ­ເຄື່ອນ­ໄຫວ​ເຮັດ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ  ບຸກ​ທະ­ລຸ​ກົນ​ໄກ​ການ​ບໍ­ລິ­ຫານ​ຄຸ້ມ​ຄອງ​ລັດ ນັບ​ແຕ່​ຂັ້ນ​ປົກ­ຄອງ ນວ ລົງ​ຫາ​ບ້ານ ລວມ​ທັງ​ພະ­ແນກ­ການ-ອົງ­ການ ໃຫ້​ມີ​ປະ­ສິດ­ທິ­ພາບ ເພີ່ມ​ທະ­ວີ​ຄວາມ​ສາ­ມັກ­ຄີ​ປອງ​ດອງ ໂດຍ​ລົງ​ເລິກ​ຂະ​ບວນ​ການ​ສ້າງ​ສັງ­ຄົມ​ສາ­ມັກ­ຄີ​ປອງ​ດອງ​ຕິດ​ພັນ​ກັບ​ຮັກ​ນະ­ຄອນ­ຫຼວງ ຮ່ວມ​ສ້າງ​ນະ­ຄອນ­ຫຼວງ ພ້ອມ​ທັງ​ສູ້​ຊົນ​ປະ­ຕິ­ບັດ​ຍຸດ​ທະ​ສາດ​ການ​ເຊື່ອມ​ໂຍງ​ຂອງ​ລັດ­ຖະ­ບານ​ກັບ​ບັນ­ດາ​ນະ­ຄອນ­ຫຼວງ​ຂອງ AEC ບັນ­ດາ​ນະ­ຄອນ​ປະ­ເທດ​ເພື່ອນ​ມິດ ແລະ ອົງ​ການ­ຈັດ­ຕັ້ງ​ສາ­ກົນ​ປະ­ຈຳ ນວ  ແລະ ເຊີດ​ຊູ​ຄວາມ​ສາ­ມາດ​ນຳ ພາ​ຂອງ​ອົງ­ຄະ​ນະ​ພັກ ເສີມ​ສ້າງ​ຖາ­ນະ​ເປັນ​ແກນ​ນຳ​ຂອງ​ລະ­ບົບ​ການ­ເມືອງ ປະ­ຊາ­ທິ­ປະ­ໄຕ​ທົ່ວ ນວ ຍົກ​ສູງ​ຄວາມ​ເປັນ​ແບບ​ນຳ​ໜ້າ​ຂອງ​ສະ­ມາ­ຊິກ​ພັກ ໃຫ້​ທຽບ​ທັນ​ກັບ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່.

ຂ່າວທີ່ກ່ຽວຂ້ອງ