ຂ່າວຫຼ້າສຸດ

ເຮັດບຸນຫໍ່ເຂົ້າປະດັບດິນ ເພື່ອຫຍັງ ?

353 03 ກ.ຍ. 2018 ນານາສາລະ

    ວັນ​ທີ 9/9/2018 ກໍ່​ແມ່ນ​ມື້­ບຸນ​ຫໍ່​ເຂົ້າ­ປະ­ດັບ­ດິນ ເຊິ່ງ​ກົງ​ກັບ​ແຮມ 14 ຄ່ຳ ເດືອນ​ເກົ້າ ຖືກ​ວັນ​ອາ­ທິດ ພໍ­ດີ ຄົນ​ລາວ ຫຼື ຄົນ​ຕ່າງ­ປະ­ເທດ ທີ່​ນັບ­ຖື​ພຸດ​ທະ​ສາ­ສະ­ໜາ ກໍ່​ຈະ​ກະ­ກຽມ​ເຄື່ອງ​ຖວາຍ​ທານ​ແກ່​ພະ­ສົງ ແລະ ເຄື່ອງ​ອຸ­ທິດ​ແກ່​ຍາດ​ພີ່­ນ້ອງ​ຜູ້​ລ່ວງ​ລັບ​ໄປ​ແລ້ວ ເຊິ່ງ​ປະ­ກອບ​ມີ​ອາ­ຫານ​ຫວານ​ຄາວ ໝາກ​ໄມ້ ແລະ ຫົວ​ມັນ ການ​ຕື່ນ​ເດິກ​ລຸກ​ເຊົ້າ ເພື່ອ​ໄປ​ຢາຍ​ຫໍ່​ເຂົ້າ​ຕາມ​ທີ່​ຕ່າງໆ​ນັ້ນ​ກໍ່​ແມ່ນ​ຄວາມ​ເຊື່ອ​ຂອງ​ຄົນ​ລາວ ວ່າ​ຍາດ​ພີ່­ນ້ອງ​ທີ່​ຕາຍ​ຈາກ​ໄປ​ຈະ​ມາ​ຮັບ​ເອົາ​ອາ­ຫານ​ທີ່​ຢາຍ​ໄວ້ ບັນ­ຫາ​ຂໍ້​ນີ້​ຈຶ່ງ​ແມ່ນ​ການ­ສະ­ແດງ​ອອກ​ເຊິ່ງ​ຄວາມ​ກະ­ຕັນ­ຍູ ຮູ້​ຄຸນ​ຂອງ​ລູກ​ຫຼານ​ທີ່​ຍັງ​ມີ​ຊີ­ວິດ.

    ບຸນ​ຫໍ່​ເຂົ້າ­ປະ­ດັບ­ດິນ ພວກ​ເຮົາ​ຕ້ອງ​ຕີ​ປະ­ເດັນ​ໃຫ້​ແຕກ ເຂົ້າ​ໃຫ້​ເຖິງ​ແກ່ນ ບໍ່​ຫຼົງ​ຕິດ​ແຕ່​ໃນ​ພຽງ​ພິ­ທີ­ກຳ ຄື​ດັ່ງ​ກັບ​ຄົນ​ບາງ​ພວກ​ທີ່​ຕິດ​ຄວາມ​ເຊື່ອ​ພຽງ​ແຕ່​ພິ­ທີ­ກຳ ເຊິ່ງ​ບໍ່​ຕ່າງ​ຫຍັງ​ກັບ​ການ​ຫຼົງ​ຊື່ນ​ຊົມ​ແຕ່​ເປືອກ​ໄມ້ ຫຼື ດອກ​ໄມ້ ໂດຍ​ບໍ່​ສາ­ມາດ​ເຂົ້າ​ເຖິງ​ແກ່ນ​ໄມ້​ໄດ້​ຈັກ​ເທື່ອ ວິ­ທີ​ເຮັດ­ບຸນ​ຫໍ່​ເຂົ້າ­ປະ­ດັບ­ດິນ ຄົນ​ລາວ​ມັກ​ຈະ​ແບ່ງ​ເຄື່ອງ­ທານ ຫຼື ອາ­ຫານ​ໄວ້​ເປັນ 4 ສ່ວນ ຄື: ເອົາ​ໄປ​ຕັກ­ບາດ​ຖວາຍ​ທານ​ສ່ວນ​ໜຶ່ງ​ແບ່ງ​ໄວ້​ກິນ​ໃນ​ຄອບ­ຄົວ ແຈກ​ຢາຍ​ຍາດ​ພີ່­ນ້ອງ ແລະ ແບ່ງ​ເຮັດ​ຫໍ່​ເຂົ້າ­ປະ­ດັບ­ດິນ ເພື່ອ​ເອົາ​ໄປ​ຢາຍ ອຸ­ທິດ​ໃຫ້​ວິນ​ຍານ​ຂອງ​ຍາດ​ພີ່­ນ້ອງ​ທີ່​ລ່ວງ​ລັບ ເຊິ່ງ​ກໍ່​ເປັນ​ເຫດ​ໃຫ້​ພວກ​ເຮົາ​ຄິດ​ໄດ້​ວ່າ ອາ­ຫານ​ດັ່ງ­ກ່າວ​ມີ​ຫຍັງ​ແນ່ ? ເຂົ້າ­ຕົ້ມ ເຂົ້າ­ໜົມ ໝາກ​ໄມ້ ແລະ ຫົວ​ມັນ ປະ­ກອບ​ປຸງ​ແຕ່ງ​ເປັນ​ອາ­ຫານ​ຫວານ​ຄາວ ເຊິ່ງ​ໄດ້​ມາ​ຈາກ​ຜົນ​ຜະ­ລິດ​ຈາກ​ການ​ກະ­ເສດ ເຮັດ​ນາ ເຮັດ​ສວນ ເມື່ອ​ຜົນ​ຜະ­ລິດ​ດັ່ງ­ກ່າວ​ເກີດ​ດອກ​ອອກ​ຜົນ ຄົນ​ລາວ​ຈຶ່ງ​ນຳ​ມາ​ບໍ­ລິ­ໂພກ​ແບບ​ວິ­ທີ​ສະ­ຫຼາດ​ທີ່​ສຸດ ຄື: ບໍ່​ພຽງ​ແຕ່​ກິນ​ໃສ່​ປາກ​ທ້ອງ​ຂອງ​ຕົນ ແຕ່​ຍັງ​ຕ້ອງ​ເອົາ​ໄປ​ຖວາຍ​ພະ­ສົງ (ໃຫ້​ທານ) ແບ່ງ​ຍາດ​ພີ່­ນ້ອງ ແລະ ເຮັດ​ຫໍ່​ເຂົ້າ­ປະ­ດັບ­ດິນ ອຸ­ທິດ​ແກ່​ຄົນ​ຕາຍ.

    ບຸນ​ຫໍ່​ເຂົ້າ­ປະ­ດັບ­ດິນ​ນີ້ ບໍ່​ໄດ້​ມີ​ພຽງ​ຄົນ​ລາວ ຄົນ​ຈີນ ແລະ ຄົນ​ຫວຽດ­ນາມ​ກໍ່​ເຮັດ​ຄື​ກັນ ເພື່ອ​ເປັນ​ການ­ສະ­ແດງ​ເຖິງ​ຄວາມ​ກະ­ຕັນ­ຍູ​ຮູ້​ຄຸນ ດັ່ງ­ນັ້ນ ຈຶ່ງ​ສາ­ມາດ​ເວົ້າ​ໄດ້​ວ່າ ຄວາມ​ກະ­ຕັນ­ຍູ​ຮູ້​ຄຸນ​ຄົນ ເປັນ​ເຄື່ອງ­ໝາຍ​ຂອງ​ຄົນ​ດີ ນີ້​ແມ່ນ​ສັດ­ຈະ­ທຳ​ສາ­ກົນ ບຸນ​ຫໍ່​ເຂົ້າ­ປະ­ດັບ­ດິນ​ສຳ­ລັບ​ຄົນ​ລາວ ຍັງ​ສະ­ແດງ​ບອກ​ເຖິງ​ແກ່ນ​ແທ້​ຂອງ​ສັງ­ຄົມ​ກະ­ເສດ ປູກ­ຝັງ ລ້ຽງ­ສັດ ເມື່ອ​ເຫັນ​ວ່າ​ຜົນ​ຜະ­ລິດ​ເກີດ​ດອກ​ອອກ​ຜົນ​ດີ​ແລ້ວ ຈຶ່ງ​ນຳ​ມາ​ເຮັດ­ບຸນ​ໃຫ້​ທານ ແລະ ແຕ່​ລະ​ທ້ອງ­ຖິ່ນ ເມື່ອ​ໄດ້​ເຂົ້າ​ມາ​ວັດ​ຈຶ່ງ​ແລກ­ປ່ຽນ​ຄຳ​ຄິດ​ເຫັນ ປຶກ­ສາ​ຫາ­ລື​ວ່າ​ຜົນ​ຜະ­ລິດ​ປີ​ນີ້​ໄດ້​ລື່ນ​ປີ​ກາຍ ຜ່ານ​ມາ​ແນວ­ໃດ ? ຫາ​ຈຸດ​ອ່ອນ ແລະ ຈຸດ​ແຂງ ເພື່ອ​ແກ້​ໄຂ​ສິ່ງ​ນີ້ ຄື: ຄວາມ​ສະ­ຫຼາດ​ຂອງ​ບັນ­ພະ­ບຸ­ລຸດ​ລາວ​ເຮົາ​ເນີ !.

    ຜູ້​ຂຽນ​ຈຶ່ງ​ຄິດ​ອີກ​ຕື່ມ​ວ່າ: ຕົກ​ມາ​ເຖິງ​ຍຸກ​ພວກ​ເຮົາ​ນີ້ ຕ້ອງ​ໄດ້​ໃຊ້​ສະ­ຕິ​ປັນ­ຍາ​ໃຫ້​ຫຼາຍ ເພື່ອ​ສືບ​ທອດ​ພູມ​ປັນ­ຍາ​ຂອງ​ບັນ­ພະ­ບຸ­ລຸດ​ໃຫ້​ໄດ້ ສຳ­ຄັນ​ກໍ່​ແມ່ນ​ບໍ່​ຄວນ​ເຊື່ອ​ງ່າຍ ບໍ່​ຄວນ​ເຊື່ອ​ແບບ​ຫຼົງ​ຕິດ​ໃນ​ເປືອກ​ອັນ​ເປັນ​ພຽງ​ພິ­ທີ­ກຳ ແຕ່​ຕ້ອງ​ສຶກ​ສາ​ໃຫ້​ເຂົ້າ​ເຖິງ​ແກ່ນ​ແທ້​ຂອງ​ປິດ­ສະ­ໜາ ທີ່​ເຊື່ອງ​ຊ້ອນ​ໄວ້​ໃນ​ພິ­ທີ­ກຳ​ຂອງ​ປາງ​ບຸນ​ຕ່າງໆ ສຳ­ຄັນ​ສຸດ​ທ້າຍ​ກໍ່​ແມ່ນ ຄວນ​ຫຼີກ­ເວັ້ນ​ອະ­ບາຍ​ຍະ​ມຸກ​ຍາມ​ວັນ​ສິນ​ເດີ !!.

ຂ່າວທີ່ກ່ຽວຂ້ອງ