ຂ່າວຫຼ້າສຸດ

ຍຸດທະສາດ ອິນໂດ-ປາຊີຟິກ

204 10 ກ.ຍ. 2018 ນານາສາລະ

    ແນວ​ຄິດ ອິນ​ໂດ-ປາ​ຊີ​ຟິກ​ພວມ​ຖືກ​ກ່າວ​ເຖິງ ຫຼື​ວ່າ​ທວນ­ຄືນ​ຖື​ເປັນ​ຍຸດ​ທະ​ສາດ​ຂອງ​ບັນ­ດາ​ປະ­ເທດ​ໃນ​ພາກ​ພື້ນ​ອິນ​ໂດ-ປາ​ຊີ​ຟິກ (ຈາກ​ມະ­ຫາ​ສະ­ໝຸດ​ອິນ​ເດຍ​ຫາ​ມະ­ຫາ​ສະ­ໝຸດ​ປາ​ຊີ​ຟິກ ເຊິ່ງ​ເຊື່ອມ​ຕໍ່​ອາ­ຊີ​ຕາ­ເວັນ​ອອກ­ສຽງ​ໃຕ້ ອິນ​ເດຍ ອາ­ຊີ​ເໜືອ ແລະ ສະ­ຫະ­ລັດ​ອາ​ເມ​ຣິ​ກາ) ແນວ​ຄິດ​ນີ້​ມີ​ທີ່​ມາ​ຈາກ​ປະ­ເທດ​ຍີ່­ປຸ່ນ​ເປັນ​ລັກ­ສະ­ນະ Grand Strategy ຊຶ່ງ​ຕໍ່​ຍອດ​ຈາກ​ສູນ​ທອນ​ບົດ​ເລື່ອງ: “..Confluence of the Twoseas..” ຂອງ​ນາ­ຍົກ ຊິນ​ໂຊ​ອາ​ເບະ ຍີ່­ປຸ່ນ ຖະ­ແຫຼງ​ຕໍ່​ລັດ​ຖະ​ສະ­ພາ​ອິນ​ເດຍ ເມື່ອ​ປີ 1999 ຕໍ່​ມາ​ໃນ​ປີ 2004 ນາ­ຍົກ ອາ​ເບະ ກໍ່​ປະ­ກາດ​ແນວ​ຄິດ​ນີ້​ຢ່າງ​ເປັນ​ທາງ​ການ​ໃນ​ກອງ​ປະ­ຊຸມ Tokyo International Conference on Africa Development “TICAD” ໃນ​ເດືອນ​ສິງ­ຫາ ຢູ່​ກຸງ​ໄນ​ໂລ​ບີ ປະ­ເທດ​ເຄນ​ຢາ.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ ນັບ​ແຕ່​ປີ 2004 ເປັນ­ຕົ້ນ​ມາ ຖື​ເປັນ​ໄລ­ຍະ​ທີ່​ອາ​ເມ​ຣິ​ກາ​ມີ​ບົດ­ບາດ​ຫຼຸດ​ລົງ​ໃນ​ພູ­ມີ­ພາກ​ນີ້ ສປ ຈີນ ໄດ້​ເພີ່ມ​ບົດ­ບາດ​ຢ່າງ​ວ່ອງ­ໄວ​ໃນ​ຂົງ­ເຂດ​ນີ້ ຈຶ່ງ​ເປັນ​ສາ­ເຫດ​ຍີ່​ປຸນ ປະ­ກາດ​ແນວ​ຄິດ​ອິນ​ໂດ-ປາ​ຊີ​ຟິກ ຢ່າງ​ເປັນ​ທາງ​ການ ໂດຍ​ສະ­ແດງ​ອອກ​ໃນ​ນະ­ໂຍ­ບາຍ​ຕ່າງ­ປະ­ເທດ​ໃນ​ປັດ­ຈຸ­ບັນ​ຄື: 1/ ຕັ້ງ​ຢູ່​ບົນ​ພື້ນ­ຖານ​ພູ­ມີ­ພາກ​ນິ­ຍົມ 2/ ຢຶດ​ຫຼັກ​ນິ­ຕິ​ກຳ ແລະ ການ​ເຄົາ­ລົບ​ກົດ­ໝາຍ​ລະ­ຫວ່າງ​ປະ­ເທດ 3/ ແນ­ໃສ່​ເພີ່ມ​ບົດ­ບາດ​ທາງ​ທະ­ຫານ ອາດ​ເວົ້າ​ໄດ້​ວ່າ​ຍີ່­ປຸ່ນ​ມີ​ແນວ​ຄິດ​ເລື່ອງ​ນີ້​ຢ່າງ​ຊັດ​ເຈນ ເຖິງ​ຂັ້ນ​ນຳ­ໄປ​ປັບ​ໃສ່​ເປັນ​ຍຸດ​ທະ​ສາດ​ການ​ຕ່າງ­ປະ­ເທດ ໂດຍ​ແນວ​ຄິດ​ສະ­ແດງ​ໃຫ້​ເຫັນ​ທ່າ​ທີ​ຂອງ​ຍີ່­ປຸ່ນ​ໃນ​ຫຼາຍ​ມິ​ຕິ ທັງ​ທາງ​ດ້ານ​ເສດ­ຖະ­ກິດ ທີ່​ຕ້ອງ­ການ​ເຊື່ອມ​ໂຍງ​ພູ­ມີ­ພາກ​ອາ­ຊີ​ຕາ­ເວັນ​ອອກ​ເຂົ້າ​ກັບ​ອິນ​ເດຍ ແລະ ອາ​ຟາ​ຣິກ​ກາ ຫຼາຍ​ຂຶ້ນ ແລະ ດ້ານ​ການ­ເມືອງ ໂດຍ​ຍີ່­ປຸ່ນ​ເນັ້ນ​ສົ່ງ­ເສີມ​ການ​ຮ່ວມ​ມື​ກັບ​ມະ­ຫາ​ອຳ­ນາດ​ອາ​ເມ​ຣິ​ກາ.

    ສ່ວນ​ສະ­ຫະ­ລັດ​ອາ​ເມ​ຣິ​ກາ​ນັ້ນ ກໍ່​ເລີ່ມ​ຖື​ສຳ­ຄັນ​ຍຸດ​ທະ​ສາດ ອິນ​ໂດ-ປາ​ຊີ​ຟິກ ສະ­ແດງ​ອອກ​ໃນ​ສູນ​ທອນ​ພົດ​ຂອງ​ປະ­ທາ­ນາ­ທິ­ບໍ­ດີ ທຣຳ ກ່າວ​ໃນ​ກອງ​ປະ­ຊຸມ APEC ທີ່​ນະ­ຄອນ​ດາ​ນັງ ສສ ຫວຽດ­ນາມ ໃນ​ເດືອນ​ພະ­ຈິກ 2017 ທີ່​ກ່າວ​ເຖິງ​ການ​ຮ່ວມ​ມື​ຢ່າງ​ຈິງ​ຈັງ​ໃນ​ດ້ານ​ເສດ­ຖະ­ກິດ-ການ​ຄ້າ​ກັບ​ປະ­ເທດ​ໃນ​ອິນ​ໂດ-ປາ​ຊີ​ຟິກ.

    ສ່ວນ​ອິນ​ເດຍ ອາດ​ຈະ​ເປັນ​ຕົວ​ເຊື່ອມ​ທີ່​ສຳ­ຄັນ​ຊຸກ­ຍູ້​ຍຸດ​ທະ​ສາດ ອິນ​ໂດ-ປາ​ຊີ​ຟິກ ຍ້ອນ​ວ່າ​ມີ​ທີ່​ຕັ້ງ​ຢູ່​ລະ­ຫວ່າງ​ກາງ​ພູ­ມີ­ພາກ ມີ​ຂະ­ໜາດ​ເສດ­ຖະ­ກິດ​ຂະ­ຫຍາຍ­ຕົວ​ຕໍ່​ເນື່ອງ ແລະ ວ່ອງ­ໄວ ອິນ​ເດຍ​ມີ​ຄວາມ​ກັງ­ວົນ​ການ​ຂະ­ຫຍາຍ​ບົດ­ບາດ​ຂອງ​ຈີນ ພາຍ​ໃຕ້​ເສັ້ນ­ທາງ​ສາຍ­ໄໝ Belt and Road Initiative (BRI) ແລະ ຂໍ້​ກັງ­ວົນ​ການ​ຫຼຸດ​ບົດ­ບາດ​ຂອງ​ອາ​ເມ​ຣິ​ກາ​ຈາກ​ສາ­ເຫດ​ດັ່ງ­ກ່າວ​ນັ້ນ ນາ­ຍົກ­ລັດ­ຖະ­ມົນ­ຕີ ໂມ​ດີ ແຫ່ງ​ອິນ​ເດຍ ຈຶ່ງ​ໄປ​ກ່າວ​ຄຳ​ປາ​ໄສ​ເລື່ອງ ອິນ​ໂດ-ປາ​ຊີ​ຟິກ ຢູ່​ກອງ​ປະ­ຊຸມ​ສຸດ​ຍອດ​ດ້ານ​ຄວາມ​ໝັ້ນ­ຄົງ​ອາ­ຊີ​ປະ­ຈຳ​ປີ ຄັ້ງ​ທີ 17 (17th Shangri-La Dialogue)ເຊິ່ງ​ຈັດ​ຂຶ້ນ​ຢູ່​ປະ­ເທດ​ສິງ­ກະ­ໂປ ໃນ​ລະ­ຫວ່າງ​ວັນ​ທີ 1-3 ມິ­ຖຸ­ນາ 2018 ອີກ​ປະ­ເທດ​ໜຶ່ງ​ຄື ອົດ​ສະ​ຕຣາ​ລີ ກໍ່​ໄດ້​ສົນ­ໃຈ​ຍຸດ​ທະ​ສາດ ອິນ​ໂດ-ປາ​ຊີ​ຟິກ ໂດຍ​ໄດ້​ເຜີຍ­ແຜ່ Foreign Policy White Paper 2017 ເມື່ອ​ເດືອນ​ພະ­ຈິກ 2017 ເປັນ​ເທື່ອ​ທຳ​ອິດ​ໃນ​ຮອບ 14 ປີ ເຊິ່ງ​ເປັນ​ເອ­ກະ­ສານ​ກຳ­ນົດ​ທິດ​ທາງ​ການ​ດຳ­ເນີນ​ນະ­ໂຍ­ບາຍ​ການ​ຕ່າງ­ປະ­ເທດ ໃນ 10 ປີ​ຂ້າງ​ໜ້າ ທີ່​ເນັ້ນ​ໃຫ້​ຄວາມ​ສຳ­ຄັນ​ກັບ​ພູ­ມີ­ພາກ ອິນ​ໂດ-ປາ​ຊີ​ຟິກ ຫວ່າງ​ມໍ່ໆ​ນີ້ ອົດ​ສະ​ຕຣາ​ລີ ກໍ່​ເວົ້າ​ເຖິງ​ຍຸດ​ທະ​ສາດ​ນີ້ ເວ­ລາ​ເຜີຍ­ແຜ່​ນະ­ໂຍ­ບາຍ​ຕ່າງ­ປະ­ເທດ​ຂອງ​ຕົນ ໂດຍ​ເອກ​ອັກ​ຄະ​ລັດ​ຖະ​ທູດ​ປະ­ຈຳ ສປປ ລາວ.

    ນັກ​ວິ­ເຄາະ​ສະ­ຖາ­ນະ​ການ​ໂລກ ໃຫ້​ທັດ­ສະ­ນະ​ເຖິງ​ຄວາມ​ທ້າ​ທາຍ​ຂອງ​ຍຸດ​ທະ​ສາດ ອິນ​ໂດ-ປາ​ຊີ​ຟິກ ວ່າ: ເຖິງ​ແມ່ນ​ວ່າ​ແນວ​ຄິດ ຫຼື ຍຸດ​ທະ​ສາດ​ນີ້​ຢູ່​ໃນ​ໄລ­ຍະ​ເລີ່ມ​ຕົ້ນ ແລະ ມີ​ທ່າ​ອ່ຽງ​ຈະ​ປ່ຽນ​ຮູບ​ຮ່າງ​ເປັນ​ນະ­ໂຍ­ບາຍ​ຍຸດ​ທະ​ສາດ​ທາງ​ການ­ເມືອງ ລະ­ຫວ່າງ​ປະ­ເທດ​ຂອງ​ຫຼາຍ​ປະ­ເທດ ໂດຍ​ສະ­ເພາະ ຍີ່­ປຸ່ນ ອາ​ເມ​ຣິ​ກາ ອິນ​ເດຍ ແລະ ອົດ​ສະ​ຕຣາ​ລີ ລວມ​ໄປ​ເຖິງ​ປະ­ເທດ​ອື່ນໆ​ໃນ​ພູ­ມີ­ພາກ ແຕ່​ກໍ່​ຍັງ​ມີ​ບັນ­ຫາ​ທ້າ​ທາຍ​ກ່ຽວ​ກັບ​ການ​ດຳ­ເນີນ​ນະ­ໂຍ­ບາຍ​ຕ່າງ­ປະ­ເທດ ພາຍ​ໃຕ້​ແນວ​ຄິດ ອິນ​ໂດ-ປາ​ຊີ​ຟິກ ເຊັ່ນ: ນະ­ໂຍ­ບາຍ America First ຂອງ​ອາ​ເມ​ຣິ​ກາ ອາດ​ເປັນ​ອຸ­ປະ­ສັກ​ໃນ​ການ​ຄ້າ​ເສລີ ຍີ່­ປຸ່ນ​ສົນ​ໃຈ­ຄວາມ​ໝັ້ນ­ຄົງ​ທາງ​ທະ­ເລ ແລະ ການ​ເຊື່ອມ​ໂຍງ​ລະ­ຫວ່າງ​ພູ­ມີ­ພາກ ແຕ່​ຜັດ​ບໍ່​ມີ​ທຶນ​ພຽງ­ພໍ​ໃນ​ການ​ຂັບ​ເຄື່ອນ​ນະ­ໂຍ­ບາຍ ບັນ­ຫາ​ສຳ­ຄັນ​ແມ່ນ​ບັນ­ດາ​ປະ­ເທດ​ທີ່​ສະ­ໜັບ­ສະ­ໜູນ​ແນວ​ຄິດ​ນີ້ ຕ້ອງ​ສະ­ແດງ​ຄວາມ​ຊັດ​ເຈນ ແລະ ເປັນ​ຮູບ​ປະ​ທຳ​ວ່າ​ແນວ​ຄິດ ຫຼື ຍຸດ​ທະ​ສາດ​ນີ້​ບໍ່​ແມ່ນ​ການ​ຄ້ານ​ອຳ­ນາດ ແລະ ບົດ­ບາດ​ຂອງ ສປ ຈີນ ແຕ່​ເປັນ​ຍຸດ​ທະ​ສາດ​ສ້າງ​ຜົນ​ປະ­ໂຫຍດ​ທີ່​ເປັນ​ທຳ​ແກ່​ທຸກ​ຝ່າຍ​ຢ່າງ​ແທ້​ຈິງ ສະ­ເໜີ​ຂໍ້​ມູນ​ຂ້າງ​ເທິງ​ນັ້ນ ເພື່ອ​ເປັນ​ການ​ແລກ­ປ່ຽນ ແລະ ຕິດ­ຕາມ​ເບິ່ງ​ຍຸດ​ທະ​ສາດ​ນີ້​ຈະ​ຜັນ​ແປ​ໄປ​ແນວ­ໃດ?.

ຂ່າວທີ່ກ່ຽວຂ້ອງ