ຂ່າວຫຼ້າສຸດ

ນະຄອນຫຼວງວຽງຈັນ ເອົາໃຈໃສ່ເຝົ້າລະວັງ-ປ້ອງກັນພະຍາດໄຂ້ຍຸງລາຍ

166 13 ກ.ຍ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ເອົາໃຈໃສ່ເຝົ້າລະວັງ-ປ້ອງກັນພະຍາດໄຂ້ຍຸງລາຍ

    ຄະ­ນະ​ກຳ­ມະ­ການ​ຕ້ານ​ໄຂ້­ຍຸງ​ລາຍ ພະ​ແນກ​ສາ­ທາ­ລະ­ນະ​ສຸກ ນະ­ຄອນ­ຫຼວງ​ວຽງ​ຈັນ ຈັດ​ກອງ​ປະ­ຊຸມ​ຖອດ​ຖອນ​ບົດ­ຮຽນ​ປະ­ຈຳ​ປີ 2018 ຂຶ້ນ​ວັນ​ທີ 11 ກັນ­ຍາ 2018 ຢູ່​ພະ​ແນກ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ດຣ ນາງ ໄຊ​ພອນ ນັນ­ທະ​ພອນ ຮອງ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ມີ​ບັນ­ດາ​ເຈົ້າ­ເມືອງ-ຮອງ​ເຈົ້າ­ເມືອງ ສະ​ຖາ​ບັນ ສູນ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ດຣ ນາງ ໄຊ​ພອນ ນັນ­ທະ​ພອນ ກ່າວ​ວ່າ: ພະ­ຍາດ​ໄຂ້­ເລືອດ­ອອກ ແມ່ນ​ພະ­ຍາດ​ທີ່​ເກີດ​ຂຶ້ນ​ຈາກ​ເຊື້ອ​ໄວ​ຣັດ​ຊະ­ນິດ​ໜຶ່ງ ທີ່​ມີ​ຍຸງ​ລາຍ​ເປັນ​ພາ­ຫະ­ນະ​ນຳ​ເຊື້ອ ແລະ ມີ​ການ​ລະ­ບາດ​ທົ່ວ​ໂລກ ເປັນ​ພະ­ຍາດ​ທີ່​ຖືກ​ຈັດ​ບຸ­ລິ­ມະ­ສິດ​ວ່າ​ເຮັດ​ໃຫ້​ເກີດ​ຜົນ​ກະ­ທົບ​ເສຍ​ຫາຍ​ຫຼາຍ​ຕໍ່​ຊີ­ວິດ ແລະ ຊັບ​ສິນ​ຂອງ​ປະ­ຊາ­ຊົນ ປັດ­ຈຸ­ບັນ ສະ­ຖາ­ນະ​ການ​ໃນ​ທົ່ວ​ໂລກ​ມີ​ການ​ປ່ຽນ­ແປງ​ຫຼາຍ ເຊັ່ນ: ປັດ​ໄຈ​ທາງ​ດ້ານ​ສະ­ພາບ​ອາ­ກາດ​ມີ​ການ​ປ່ຽນ­ແປງ ການ​ເພີ່ມ​ສູງ​ຂຶ້ນ​ຂອງ​ອຸນ­ຫະ­ພູມ ການ​ເຄື່ອນ​ຍ້າຍ​ຂອງ​ປະ­ຊາ­ກອນ ພູມ​ຕ້ານ­ທານ​ຕໍ່​ສານ​ເຄ​ມີ​ຂອງ​ຍຸງ ແລະ ອື່ນໆ ໄດ້​ສົ່ງ​ຜົນ​ກະ­ທົບ​ໃຫ້­ການ​ຄວບ​ຄຸມ­ພະ​ຍາດ​ມີ​ຄວາມ​ລຳ­ບາກ​ຍິ່ງ​ຂຶ້ນ ຄ່າ​ຄວາມ​ສ່ຽງ​ການ​ເກີດ​ການ​ລະ­ບາດ​ກໍ່​ເພີ່ມ​ຂຶ້ນ​ເຊັ່ນ​ດຽວ​ກັນ.

    ອີງ​ຕາມ​ການ​ລາຍ​ງານ​ພະ­ຍາດ​ໄຂ້­ຍຸງ​ລາຍ​ແຕ່​ວັນ​ທີ 1 ມັງ­ກອນ-10 ກັນ­ຍາ 2018 ທົ່ວ ນວ 583 ກໍ­ລະ­ນີ (ບໍ່​ມີ​ກໍ­ລະ­ນີ​ເສຍ​ຊີ­ວິດ) ເຊິ່ງ​ເມືອງ​ທີ່​ມີ​ຜົນ​ກະ­ທົບ​ຮຸນ​ແຮງ​ແມ່ນ​ເມືອງ​ໄຊ​ທາ­ນີ 194 ກໍ­ລະ­ນີ ໄຊ​ເຊດ​ຖາ 110 ກໍ­ລະ­ນີ ສີ​ໂຄດ​ຕະ­ບອງ 68 ກໍ­ລະ­ນີ ຈັນ­ທະ​ບູ​ລີ 53 ກໍ­ລະ­ນີ ສີ​ສັດ­ຕະ​ນາກ 49 ກໍ­ລະ­ນີ ຫາດ​ຊາຍ​ຟອງ 45 ກໍ­ລະ­ນີ ນາ​ຊາຍ​ທອງ 32 ກໍ­ລະ­ນີ ປາກ​ງື່ມ 19 ກໍ­ລະ­ນີ ສັງ​ທອງ 13 ກໍ­ລະ­ນີ ສັງ​ລວມ​ແລ້ວ​ຕົວ​ເລກ​ດັ່ງ­ກ່າວ​ແມ່ນ​ຫຼຸດ​ລົງ 23% ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ 2017 ສາ­ມາດ​ເວົ້າ​ໄດ້​ວ່າ ການ​ເຮັດ​ວຽກ​ແບບ​ມີ​ສ່ວນ​ຮ່ວມ​ຂອງ​ຊຸມ​ຊົນ ຕາມ​ຄຳ​ຂວັນ​ທີ່​ວ່າ ບຸກ­ຄົນ ຄອບ­ຄົວ ຊຸມ​ຊົນ​ເຂັ້ມ­ແຂງ ປ້ອງ​ກັນ​ພະ­ຍາດ​ໄຂ້­ຍຸງ​ລາຍ ແມ່ນ​ເປັນ​ແນວ­ທາງ​ສຳ­ຄັນ​ໃນ​ການ​ເຝົ້າ​ລະ­ວັງ ແລະ ປ້ອງ​ກັນ​ພະ­ຍາດ​ໄຂ້­ຍຸງ​ລາຍ.

ຂ່າວທີ່ກ່ຽວຂ້ອງ