ຂ່າວຫຼ້າສຸດ

ຮອງນາຍົກ ຕິດຕາມແກ້ໄຂສະພາບໄພພິບັດ ຢູ່ແຂວງຫຼວງນ້ຳທາ

253 13 ກ.ຍ. 2018 ຂ່າວໜ້າ​ໜຶ່ງ
ຮອງນາຍົກ ຕິດຕາມແກ້ໄຂສະພາບໄພພິບັດ ຢູ່ແຂວງຫຼວງນ້ຳທາ

    ວັນ​ທີ 11-12 ກັນ­ຍາ 2018 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ຄະ­ນະ ໄດ້​ສືບ­ຕໍ່​ຕິດ­ຕາມ​ແກ້​ໄຂ​ສະ­ພາບ​ໄພ­ພິ­ບັດ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຢູ່​ແຂວງ​ຫຼວງ​ນ້ຳ​ທາ ມີ​ທ່ານ ເພັດ​ຖາ­ວອນ ພິ­ລາ​ວັນ ເຈົ້າ­ແຂວງ ຫຼວງ​ນ້ຳ​ທາ ອຳ­ນາດ​ການ​ປົກ­ຄອງ​ແຂວງ ແລະ ປະ­ຊາ­ຊົນ​ແຂວງ​ຫຼວງ​ນ້ຳ​ທາ​ໃຫ້­ການ​ຕ້ອນ­ຮັບ.

    ທ່ານ ເພັດ​ຖາ­ວອນ ພິ­ລາ​ວັນ ໄດ້​ລາຍ​ງານ​ໃຫ້​ຊາບ​ວ່າ: ສຳ­ລັບ​ຜົນ​ເສຍ​ຫາຍ​ທີ່​ເກີດ​ຈາກ​ໄພ​ທຳ​ມະ​ຊາດ ນັບ​ແຕ່​ທ້າຍ​ເດືອນ​ກໍ­ລະ­ກົດ​ຈົນ​ເຖິງ​ກາງ​ເດືອນ​ສິງ­ຫາ 2018 ຢູ່​ແຂວງ​ຫຼວງ​ນ້ຳ​ທາ ໄດ້​ເກີດ​ມີ​ຝົນ­ຕົກ​ໜັກ ເຮັດ​ໃຫ້​ເກີດ​ມີ​ນ້ຳ​ປ່າ​ໄຫຼ​ສຸ​ທັ່ງ​ໃສ່​ບ້ານ​ເຮືອນ ເຂດ​ທຳ​ການ​ຜະ­ລິດ​ຂອງ​ປະ­ຊາ­ຊົນ ລວມ​ທັງ​ພື້ນ­ຖານ​ໂຄງ​ລ່າງ ໄດ້​ຮັບ​ຄວາມ​ເສຍ​ຫາຍ​ເປັນ​ຈຳ­ນວນ​ຫຼວງ­ຫຼາຍ ເປັນ­ຕົ້ນ ເສັ້ນ­ທາງ ຂົວ ຊົນ­ລະ­ປະ­ທານ ແລະ ອື່ນໆ ຜ່ານ​ການ​ປະ​ເມີນ​ຄວາມ​ເສຍ​ຫາຍ​ເບື້ອງ​ຕົ້ນ​ເຫັນ​ວ່າ: ທົ່ວ​ແຂວງ​ມີ​ເນື້ອ­ທີ່​ນາ­ປີ​ຖືກ​ຖ້ວມ​ທັງ​ໝົດ 893 ເຮັກ­ຕາ ໃນ​ນີ້ ເສຍ​ຫາຍ​ຈຳ­ນວນ 713 ເຮັກ­ຕາ ເສຍ​ຫາຍ​ຫຼາຍ​ແມ່ນ​ເກີດ​ຂຶ້ນ​ຢູ່​ເມືອງ​ລອງ ຈຳ­ນວນ 302 ເຮັກ­ຕາ 334 ຄອບ­ຄົວ ເມືອງ​ວຽງ​ພູ​ຄາ ປະ­ຊາ­ຊົນ​ຖືກ​ຜົນ​ກະ­ທົບ 34 ບ້ານ ເນື້ອ­ທີ່​ນາ​ເສຍ​ຫາຍ 345,8 ເຮັກ­ຕາ ເນື້ອ­ທີ່​ປູກ​ສາ­ລີ ອ້ອຍ ກ້ວຍ ແລະ ພືດ​ຊະ­ນິດ​ອື່ນໆ ເສຍ​ຫາຍ 161 ເຮັກ­ຕາ ຊົນ­ລະ­ປະ­ທານ​ເສຍ​ຫາຍ 60 ແຫ່ງ ມູນ​ຄ່າ​ເສຍ​ຫາຍ ປະ­ມານ 12,36 ຕື້​ກີບ ເສັ້ນ­ທາງ​ຫຼວງ​ແຫ່ງ​ຊາດ 13N 17A 17B ແລະ R3 ຖືກ​ພູ​ເສາະ​ເຈື່ອນ​ຕັນ​ທາງ ຕ້ອງ­ການ​ງົບ­ປະ­ມານ​ແກ້​ໄຂ​ສຸກ​ເສີນ 5,39 ຕື້​ກີບ ເສັ້ນ­ທາງ​ຫຼວງ​ຂອງ​ແຂວງ ຂອງ​ເມືອງ ແລະ ທາງ​ຊົນ­ນະ­ບົດ​ຖືກ​ນ້ຳ​ເສາະ​ເຈື່ອນ ພູ​ເຈື່ອນ​ຕັນ​ທາງ​ມີ​ຫຼາຍ​ຈຸດ ຕ້ອງ­ການ​ງົບ­ປະ­ມານ​ສ້ອມ­ແປງ​ຄືນ 24,13 ຕື້​ກີບ ຂົວ​ຂ້າມ​ນ້ຳ​ລອງ ເສັ້ນ­ທາງ​ຫຼວງ​ແຫ່ງ​ຊາດ 17B (ເມືອງ​ສິງ-ເມືອງ​ລອງ) ຖືກ​ນ້ຳ​ເສາະ​ໄຫຼ ເຮັດ​ໃຫ້­ການ​ໄປ­ມາ­ຫາ­ສູ່​ພົບ​ຄວາມ​ຫຍຸ້ງ­ຍາກ ພ້ອມ​ນີ້ ເນື້ອ­ທີ່​ໄຮ່​ປູກ​ເຂົ້າ­ຂອງ​ປະ­ຊາ­ຊົນ​ຖືກ​ໜູ​ຂີ​ທຳ­ລາຍ ຈຳ­ນວນ 2.187 ເຮັກ­ຕາ ຮ້າຍ​ແຮງ​ກວ່າ​ໝູ່​ແມ່ນ​ເມືອງ​ລອງ ມີ​ເນື້ອ­ທີ່​ຖືກ​ໜູ​ຂີ​ທຳ­ລາຍ​ໝົດ ຈຳ­ນວນ 1.952 ເຮັກ­ຕາ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ເນັ້ນ​ໜັກ​ໃຫ້​ອຳ­ນາດ​ການ​ປົກ­ຄອງ​ແຂວງ​ຫຼວງ​ນ້ຳ​ທາ ສືບ­ຕໍ່​ເອົາ­ໃຈ­ໃສ່ ເປັນ­ຕົ້ນ ໃຫ້​ຄະ­ນະ​ແກ້​ໄຂ​ໄພ­ພິ­ບັດ​ຂັ້ນ​ແຂວງ ເມືອງ ແລະ ບ້ານ ເອົາ­ໃຈ­ໃສ່​ໃນ​ການ​ໂຄ­ສະ­ນາ​ເຜີຍ­ແຜ່ ເພື່ອ​ເຮັດ​ໃຫ້​ປະ­ຊາ­ຊົນ​ໄດ້​ຮັບ​ຮູ້ ເຂົ້າ­ໃຈ ແລະ ມີ​ສະ­ຕິ​ລະ­ວັງ​ຕົວ ເພື່ອ​ກຽມ­ພ້ອມ​ຮັບ​ມື​ກັບ​ໄພ­ພິ­ບັດ​ທີ່​ອາດ​ຈະ​ເກີດ​ຂຶ້ນ ສ້າງ​ແຜນ​ເພື່ອ​ປ້ອງ​ກັນ​ຮັບ​ມື​ກັບ​ໄພ­ພິ­ບັດ​ໃນ​ໄລ­ຍະ​ສັ້ນ ໄລ­ຍະ​ກາງ ແລະ ໄລ­ຍະ​ຍາວ ຢ່າງ​ເປັນ​ລະ­ບົບ​ຄົບ​ຊຸດ ໂດຍ​ໃຫ້​ສ້າງ​ເປັນ​ແຜນ­ທີ່​ຕິດ​ພັນ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ແຂວງ ໃນ​ແຕ່​ລະ​ປີ ເອົາ­ໃຈ­ໃສ່​ດູ​ແລ​ເບິ່ງ­ແຍງ​ລູກ​ຫຼານ​ໃຫ້​ດີ ເພື່ອ​ບໍ່​ໃຫ້​ຖືກ​ຜົນ​ກະ­ທົບ​ຈາກ​ໄພ­ພິ­ບັດ ພາຍ­ຫຼັງ​ນ້ຳ​ລົງ​ໃຫ້​ເອົາ­ໃຈ­ໃສ່​ໃນ​ການ​ຕິດ­ຕາມ​ພະ­ຍາດ​ລະ­ບາດ ສະ­ໜອງ​ແນວ​ພັນ​ພືດ​ໃຫ້​ປະ­ຊາ­ຊົນ ເພື່ອ​ໃຫ້​ທັນ​ຕາມ​ລະ­ດູ​ການ​ກວດ­ກາ​ຄືນ​ຄວາມ​ເສຍ​ຫາຍ​ທີ່​ເກີດ​ຂຶ້ນ​ທັງ​ໝົດ ຈັດ​ສັນ​ບ່ອນ­ຢູ່​ອາ­ໄສ ແລະ ເຂດ​ທຳ​ມາ​ຫາ​ກິນ​ຂອງ​ປະ­ຊາ­ຊົນ​ຄືນ­ໃໝ່ ບ່ອນ​ທີ່​ມີ​ຄວາມ​ສ່ຽງ​ທີ່​ອາດ​ຈະ​ເກີດ​ມີ​ໄພ­ພິ­ບັດ ເອົາ­ໃຈ­ໃສ່​ແກ້​ໄຂ​ການ​ແຜ່​ລະ­ບາດ​ຂອງ​ສັດ­ຕູ​ພືດ ເອົາ­ໃຈ­ໃສ່​ໃນ​ການ­ຈັດ­ຕັ້ງ​ປະ­ຕິ­ບັດ​ດຳ­ລັດ​ສະ­ບັບ​ເລກ​ທີ 309 ວ່າ​ດ້ວຍ​ການ­ຈັດ­ຕັ້ງ​ປະ​ຕິບ​ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ຄຳ​ສັ່ງ​ສະ­ບັບ​ເລກ​ທີ 12/ນຍ ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ 8 ມາດ​ຕະ­ການ​ກະ​ຕຸ້ນ​ເສດ­ຖະ­ກິດ​ຂອງ​ລັດ­ຖະ­ບານ ເອົາ­ໃຈ­ໃສ່​ວຽກ​ງານ​ການ​ບໍ­ລິ­ການ​ປະ­ຕູ​ດຽວ.

    ພ້ອມ​ດຽວ​ກັນ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ມອບ​ເງິນ​ຈຳ­ນວນ 50 ລ້ານ​ກີບ ໃຫ້​ແຂວງ ມອບ​ເງິນ ຈຳ­ນວນ 10 ລ້ານ​ກີບ ໃຫ້​ອຳ­ນາດ​ການ​ປົກ­ຄອງ​ເມືອງ​ລອງ ເພື່ອ​ນ້ຳ​ໃຊ້​ເຂົ້າ​ໃນ​ການ​ຊ່ວຍ­ເຫຼືອ ແລະ ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ.

ຂ່າວທີ່ກ່ຽວຂ້ອງ