ຂ່າວຫຼ້າສຸດ

ຮ່ວມມືກັນສ້າງເສັ້ນທາງສາຍໄໝ ເພື່ອສົ່ງເສີມປະຊາຄົມແຫ່ງນະວັດຕະກຳ ຈີນ-ອາຊຽນ

179 13 ກ.ຍ. 2018 ຂ່າວໜ້າ​ໜຶ່ງ
ຮ່ວມມືກັນສ້າງເສັ້ນທາງສາຍໄໝ ເພື່ອສົ່ງເສີມປະຊາຄົມແຫ່ງນະວັດຕະກຳ ຈີນ-ອາຊຽນ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ລັດ­ຖະ­ບານ ສປ ຈີນ ວັນ​ທີ 11 ກັນ­ຍາ 2018 ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ແຫ່ງ ສປປ ລາວ ໄດ້​ນຳ­ພາ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ລາວ ເດີນ­ທາງ​ເຂົ້າ​ຮ່ວມ​ງານ​ວາງ­ສະ­ແດງ​ສິນ­ຄ້າ ຈີນ-ອາ​ຊຽນ ຄັ້ງ​ທີ 15 ແຕ່​ວັນ​ທີ 12-15 ກັນ­ຍາ 2018 ຢູ່​ນະ­ຄອນ​ໜານ​ໜິງ ແຂວງ​ກວາງ­ຊີ ສປ ຈີນ ເຊິ່ງ​ການ​ເຂົ້າ​ຮ່ວມ​ງານ​ດັ່ງ­ກ່າວ ເປັນ​ການ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ​ອັນ​ດີ​ລະ­ຫວ່າງ​ລັດ­ຖະ­ບານ​ສອງ​ປະ­ເທດ ແລະ ປະ­ຊາ­ຊົນ​ສອງ​ຊາດ ລາວ-ຈີນ ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ງານ​ວາງ­ສະ­ແດງ​ສິນ­ຄ້າ​ຄັ້ງ​ນີ້ ຈັດ​ຂຶ້ນ​ພາຍ​ໃຕ້​ຄຳ​ຂວັນ: “ການ​ຮ່ວມ​ມື​ກັນ​ສ້າງ​ເສັ້ນ­ທາງ​ສາຍ­ໄໝ​ແຫ່ງ​ສະ­ຕະ­ວັດ​ທີ 21 ເພື່ອ​ສົ່ງ­ເສີມ​ປະ­ຊາ​ຄົມ​ແຫ່ງ​ນະ​ວັດ­ຕະ​ກຳ ຈີນ ແລະ ອາ​ຊຽນ” ເຊິ່ງ​ງານ​ວາງ­ສະ­ແດງ​ຄັ້ງ​ນີ້ ມີ​ຄວາມ​ໝາຍ​ສຳ­ຄັນ​ເປັນ​ພິ­ເສດ ເນື່ອງ​ຈາກ​ເປັນ​ປີ​ແຫ່ງ​ການ​ສະ­ເຫຼີມ­ສະ­ຫຼອງ​ການ​ເປັນ​ຄູ່​ຮ່ວມ​ຍຸດ​ທະ​ສາດ​ອາ​ຊຽນ ແລະ ສປ ຈີນ ຄົບ­ຮອບ 15 ປີ ແລະ ເປັນ​ປີ​ແຫ່ງ​ການ​ຮ່ວມ​ມື​ດ້ານ​ນະ​ວັດ­ຕະ​ກຳ​ລະ­ຫວ່າງ​ອາ​ຊຽນ ແລະ ສປ ຈີນ ເຊິ່ງ​ອາ​ຊຽນ-ສປ ຈີນ ຈະ​ໄດ້​ແລກ­ປ່ຽນ​ບົດ­ຮຽນ ແລະ ຮ່ວມ​ມື​ກັນ ໂດຍ​ຜ່ານ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ​ຕ່າງໆ ເພື່ອ​ເປັນ​ການ​ເພີ່ມ​ທະ­ວີ​ການ​ຮ່ວມ​ມື​ໃນ​ຂົງ­ເຂດ​ເຕັກ​ໂນ​ໂລ​ຊີ​ທັນ​ສະ­ໄໝ ແລະ ເສດ­ຖະ­ກິດ​ດີ​ຈີ​ຕອນ.

    ໂອ­ກາດ​ການ​ເດີນ­ທາງ​ເຂົ້າ​ຮ່ວມ​ງານ​ວາງ­ສະ­ແດງ​ຄັ້ງ​ນີ້ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ໄດ້​ພົບ​ປະ​ສອງ​ຝ່າຍ​ກັບ​ທ່ານ Han Zheng ຮອງ​ນາ­ຍົກ­ລັດ­ຖະ­ມົນ­ຕີ ສປ ຈີນ ເຊິ່ງ​ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ການ​ພົວ­ພັນ​ແບບ​ຄູ່​ຮ່ວມ​ມື​ຍຸດ​ທະ​ສາດ​ຮອບ­ດ້ານ ລະ­ຫວ່າງ ສປປ ລາວ-ສປ ຈີນ ພ້ອມ​ນີ້​ກໍ່​ໄດ້​ປຶກ­ສາ​ຫາ­ລື​ການ​ຮ່ວມ​ມື​ສອງ​ຝ່າຍ​ດ້ານ​ເສດ­ຖະ­ກິດ ການ​ຄ້າ ການ​ລົງ­ທຶນ ວັດ­ທະ­ນະ­ທຳ-ສັງ­ຄົມ ການ­ທ່ອງ­ທ່ຽວ ແລະ ການ​ຊ່ວຍ­ເຫຼືອ​ເພື່ອ​ການ​ພັດ­ທະ­ນາ ນອກ​ນີ້​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ຍັງ​ໄດ້​ໄປ​ຢ້ຽມ­ຢາມ​ຮ້ານ​ວາງ­ສະ­ແດງ​ແຫ່ງ​ຊາດ​ຂອງ​ລາວ ເຊິ່ງ​ປີ​ນີ້​ແມ່ນ​ແຂວງ​ວຽງ​ຈັນ ຖືກ​ຄັດ​ເລືອກ​ເປັນ​ເມືອງ​ແຫ່ງ​ສະ​ເໜ່​ຂອງ ສປປ ລາວ.

    ນອກ­ຈາກ​ຄະ­ນະ​ຜູ້​ແທນ​ທາງ​ການ ຍັງ​ມີ​ພາກ­ສ່ວນ​ທຸ­ລະ​ກິດ​ລາວ​ເຂົ້າ​ຮ່ວມ​ງານ​ວາງ­ສະ­ແດງ​ຄັ້ງ​ນີ້ 82 ຮ້ານ ຈາກ 52 ບໍ­ລິ­ສັດ ເຊິ່ງ​ສິນ­ຄ້າ​ສ່ວນ​ໃຫຍ່​ແມ່ນ​ຜະ­ລິດ​ຕະ​ພັນ​ໄມ້​ແກະ­ສະ­ຫຼັກ ເຄື່ອງ​ເຟີ​ນີ​ເຈີ ຜະ­ລິດ​ຕະ​ພັນ​ເຄື່ອງ​ປະ­ດັບ ເຄື່ອງ​ຫັດ­ຖະ­ກຳ ເຄື່ອງ​ອຸດ­ສາ­ຫະ­ກຳ ແລະ ການ​ໂຄ­ສະ­ນາ​ການ­ທ່ອງ­ທ່ຽວ.

    ງານ​ວາງ­ສະ­ແດງ​ສິນ­ຄ້າ ຈີນ-ອາ​ຊຽນ ໄດ້​ຈັດ​ຂຶ້ນ​ທຸກໆ​ປີ ນັບ​ຕັ້ງ­ແຕ່​ປີ 2004 ເປັນ­ຕົ້ນ​ມາ ເຊິ່ງ​ໄດ້​ປະ­ກອບ­ສ່ວນ​ສຳ­ຄັນ​ໃຫ້​ແກ່​ການ​ຮັດ​ແໜ້ນ​ການ​ຮ່ວມ​ມື​ທາງ​ດ້ານ​ເສດ­ຖະ­ກິດ ແລະ ການ​ຄ້າ ແລະ ການ​ຂະ­ຫຍາຍ­ຕົວ​ດ້ານ​ການ​ລົງ­ທຶນ ປະ­ກອບ­ສ່ວນ​ໃຫ້​ແກ່​ການ​ຮັດ​ແໜ້ນ​ການ​ຮ່ວມ​ມື ແລະ ການ​ເປັນ​ຄູ່​ຮ່ວມ​ຍຸດ​ທະ​ສາດ ລະ­ຫວ່າງ​ອາ​ຊຽນ ແລະ ຈີນ.

ຂ່າວທີ່ກ່ຽວຂ້ອງ