ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 13/09/2018

81 13 ກ.ຍ. 2018 ຫົວຂໍ້ຂ່າວອື່ນໆ

    ຄໍ​ລຳ​ເກົ່າ​ເຈົ້າ​ເດີມ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ຄະ­ດີ​ໂຫດ​ຜົວ​ຂ້າ​ເມຍ ຢູ່​ຈີນ ຕໍ່​ໃສ່​ຂ່າວ​ກ່ຽວ​ກັບ​ມາດ​ຕະ­ການ​ກຳ­ຈັດ​ຂີ້​ເຫຍື້ອ​ປາ​ລາ​ສະ​ຕິກ​ຢູ່ ອິນ​ໂດ​ເນ​ເຊຍ ສຸດ​ທ້າຍ​ແມ່ນ​ຂ່າວ​ຄະ­ດີ​ທຳ­ລາຍ​ຄວາມ​ສະ­ຫງົບ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ທີ່ ຫວຽດ­ນາມ.

    ທີ່ ສປ ຈີນ: ມີ​ຂ່າວ​ເລື່ອງ​ຜົວ​ຄາດ​ຕະ​ກຳ​ໂຫດ​ເມຍ​ຄູ່​ຄຽງ​ຮຽງ​ໝອນ ຢູ່​ນະ­ຄອນ​ຊຽງ​ໄຮ ສປ ຈີນ ແຕ່​ຜົວ​ໃຈ​ອຳ­ມະ­ຫິດ​ກໍ່​ໜີ​ບໍ່​ມົ້ມ​ມື​ກົດ­ໝາຍ ເມື່ອ​ທຳ­ຮ້າຍ​ຜູ້​ອື່ນ​ແບບ​ໂຫດ​ຫ້ຽມ ກໍ່​ຕ້ອງ​ໄດ້​ຮັບ​ກຳ​ແບບ​ຫ້ຽມ​ໂຫດ ເປັນ​ຂອງ​ຄູ່​ກັນ​ເຫດ​ຮ້າຍ​ທີ່​ວ່າ​ນີ້ ເກີດ​ຂຶ້ນ​ໃນ​ປີ 2016 ແຕ່​ການ​ຕັດ­ສິນ​ໂທດ​ຂັ້ນ​ເດັດ­ຂາດ ແລະ ໃຊ້​ໄດ້​ມີ​ຂຶ້ນ​ໃນ​ເດືອນ​ສິງ­ຫາ​ປີ​ນີ້​ເອງ​ຜູ້​ກໍ່​ເຫດ​ຊື່​ທ້າວ ຈູ ສຽງ ຕົງ (Zhu Xiaodong) ອາ­ຍຸ 31 ປີ ໄດ້​ລົງ­ມື​ຂ້າ​ນາງ ຢາງ ລີ​ຜິ້ງ (Yang Liping) ແລ້ວ​ເອົາ​ຜ້າ​ປູ​ບ່ອນ​ຫໍ່​ສົບ​ນາງ ຍັດ​ເຂົ້າ​ຕູ້​ຟຣີ​ເຊີ ແຊ່​ເຢັນ​ໄວ້​ເປັນ​ເວ­ລາ 3 ເດືອນ ໃນ​ໄລ­ຍະ 3 ເດືອນ​ດັ່ງ­ກ່າວ ທ້າວ​ຜົວ​ໃຈ​ໂຫດ​ກໍ່​ຍູ­ທ່າງ​ຈັບ​ຈ່າຍ​ເງິນ​ຂອງ​ເມຍ​ຢ່າງ​ຟຸມ​ເຟືອຍ​ກັບ​ການ­ທ່ອງ­ທ່ຽວ ກັບ​ການ​ສະ­ແຫວງ​ສຸກ​ຮ່ວມ​ຫຼັບ​ນອນ​ກັບ​ແມ່­ຍິງ​ຕາມ​ໂຮງ­ແຮມ​ຕ່າງໆ ໂດຍ​ບໍ່​ອາ­ໄລ​ໄຍ​ດີ ຫຼື ເສຍ​ອົກ​ເສຍ​ໃຈ​ກັບ​ການ​ກະ­ທຳ​ຂອງ​ຕົນ​ຕໍ່​ຜູ້​ເປັນ​ເມຍ ຮ້າຍ​ແຮງ​ໄປ​ກວ່າ​ນັ້ນ ທ້າວ ຈູ ຍັງ ໄດ້​ໃຊ້​ໂທລະ­ສັບ​ມື​ຖື​ຜ່ານ​ເຄືອ​ຂ່າຍ ວີ​ແຈ໋ດ (WeChat) ເພື່ອ​ຫຼອກ​ເພື່ອນ​ຝູງ ກໍ່​ຄື ພີ່­ນ້ອງ​ຂອງ​ເມຍ​ໃຫ້​ຄິດ​ວ່າ​ນາງ ຢາງ​ລີ​ຜິ້ງ ຍັງ​ເປັນ​ຄົນ​ມີ​ຊີ­ວິດ​ຢູ່​ການ​ກະ­ທຳ​ຜິດ​ອັນ​ໜັກ­ໜ່ວງ​ຂະ­ໜາດ​ນີ້ ໂທດ​ກໍ່​ຄື ປະ­ຫານ​ຊີ­ວິດ​ທາງ​ດຽວ​ເທົ່າ​ນັ້ນ.

    ທີ່ ອິນ​ໂດ​ເນ​ເຊຍ: ອີງ​ຕາມ​ແຫຼ່ງ​ຂ່າວ​ຈາ​ກາ​ຕາ​ຜົດ (Jakarta Post) ພວກ​ເຮົາ​ໄດ້​ຊາບ​ວ່າ: ໃນ​ກາງ​ເດືອນ​ສິງ­ຫາ​ຜ່ານ​ມາ ລັດ­ຖະ­ບານ​ອິນ​ໂດ​ເນ​ເຊຍ ໄດ້​ເລີ່ມ​ຮ່າງ​ກົດ​ລະ­ບຽບ​ການ​ເກັບ​ພາ­ສີ​ຖົງ​ຢາງ (ຖົງ​ປາ​ລາ​ສະ​ຕິກ) ສຳ­ລັບ​ປີ 2019 ແນ­ໃສ່​ຫຼຸດ­ຜ່ອນ​ຂີ້​ເຫຍື້ອ​ຖົງ​ປາ​ລາ​ສະ​ຕິກ ການ​ເກັບ​ພາ­ສີ​ນີ້ ເຮັດ​ສະ­ເພາະ​ເຈາະ​ຈົງ​ກັບ​ຖົງ​ປາ​ລາ​ສະ​ຕິກ ສ່ວນ​ຕຸກ​ປາ​ລາ​ສະ​ຕິກ​ນັ້ນ ບໍ່​ກ່ຽວ ທ່ານ ຮູ​ຣູ ປຳ​ບູ​ດີ (Heru Pambudi) ຫົວ­ໜ້າ​ກົມ​ພາ­ສີ-ອາ­ກອນ ກະ­ຊວງ​ການ​ເງິນ ອິນ​ໂດ​ເນ​ເຊຍ ໄດ້​ເວົ້າ​ກ່ຽວ​ກັບ​ລະ­ບຽບ​ການ​ເກັບ​ພາ­ສີ ຖົງ​ປາ​ລາ​ສະ​ຕິກ​ນີ້​ວ່າ ແມ່ນ​ເພື່ອ​ກະ­ຕຸກ​ຊຸກ­ຍູ້​ບໍ­ລິ­ສັດ​ທີ່​ກ່ຽວ­ຂ້ອງ ໃຫ້​ຫັນ​ໄປ​ຜະ­ລິດ​ຖົງ​ຢາງ​ປາ​ລາ​ສະ​ຕິກ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ (ບໍ່​ແມ່ນ​ປະ­ເພດ​ຖົງ​ຢາງ​ທີ່​ໃຊ້​ເທື່ອ​ດຽວ​ແລ້ວ​ຖິ້ມ​ໂລດ) ຮ່າງ​ກົດ​ລະ­ບຽບ​ນີ້ ໄດ້​ຜ່ານ​ການ​ທາບ​ທາມ​ບັນ­ດາ​ສະ­ມາ­ຊິກ​ສະ­ພາ​ຕ່ຳ (ສະ­ພາ​ຜູ້​ແທນ​ລາ­ສະ­ດອນ) ເປັນ​ທີ່​ຮຽບ​ຮ້ອຍ​ແລ້ວ ພາຍ​ໃຕ້​ກົດ​ລະ­ບຽບ​ນີ້​ບໍ­ລິ­ສັດ​ໃດ​ຜະ­ລິດ​ຖົງ​ປາ​ລາ​ສະ​ຕິກ ທີ່​ເປັນ​ມິດ​ກັບ​ສິ່ງ­ແວ­ດລ້ອມ​ຈະ​ໄດ້​ຮັບ​ນະ­ໂຍ­ບາຍ​ດີໆ​ດ້ານ​ພາ­ສີ ເຊັ່ນ: ຍົກ­ເວັ້ນ ຫຼື ຫຼຸດ ສ່ວນ​ບໍ­ລິ­ສັດ​ທີ່​ບໍ່​ປະ­ຕິ­ບັດ​ຕາມ ຈະ​ຕ້ອງ​ໄດ້​ເສຍ​ພາ­ສີ​ສູງ​ກວ່າ​ໃນ​ປັດ­ຈຸ­ບັນ ທາງ​ສະ­ພາ​ຜູ້​ແທນ​ລາ­ຊະ​ດອນ ອິນ​ໂດ​ເນ​ເຊຍ ໄດ້​ຕັ້ງ​ຄະ­ນະ​ກຳ­ມະ­ການ​ໜຶ່ງ​ຂຶ້ນ ໂດຍ​ການ​ເຂົ້າ​ຮ່ວມ​ຂອງ​ບັນ­ດາ​ຕົວ​ແທນ​ຈາກ​ກະ­ຊວງ​ຕ່າງໆ ເພື່ອ​ປຶກ­ສາ​ຫາ­ລື​ກ່ຽວ​ກັບ​ວິ­ທີ​ການ​ຜັນ​ຂະ­ຫຍາຍ​ກົດ​ລະ­ບຽບ​ນີ້ ເຊິ່ງ​ລັດ­ຖະ­ບານ​ຈະ​ກຳ­ນົດ​ເປັນ​ກົດ​ລະ­ບຽບ​ຂອງ​ລັດ­ຖະ­ບານ ຕາມ​ສະ­ຖິ­ຕິ​ທາງ​ການ​ຂອງ ອິນ​ໂດ​ເນ​ເຊຍ ແຕ່​ລະ​ປີ​ຈຳ­ນວນ​ຂີ້​ເຫຍື້ອ​ປາ​ລາ​ສະ​ຕິກ​ທີ່​ຖອກ​ເທ​ລົງ​ສູ່​ແມ່­ນ້ຳ​ຕ່າງໆ​ນັ້ນ ມີ​ເຖິງ 1,29 ລ້ານ​ໂຕນ... ໂດຍ​ສະ­ເລ່ຍ​ແລ້ວ ມີ​ຂີ້​ເຫຍື້ອ​ປະ­ເພດ​ນີ້ ຈຳ­ນວນ 13.000 ໂຕນ ໃນ​ພື້ນ​ທີ່​ແມ່­ນ້ຳ ຂະ­ໜາດ 1 ກິ​ໂລ​ຕາ­ລາງ​ແມັດ.

    ທີ່ ຫວຽດ­ນາມ: ອີງ​ຕາມ​ຂ່າວ­ສານ​ຫວຽດ­ນາມ (Vietnam News) ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 1 ເດືອນ​ສິງ­ຫາ​ຜ່ານ​ມາ ໄດ້​ລາຍ​ງານ​ກ່ຽວ​ກັບ​ທາງ​ການ​ຫວຽດ­ນາມ​ຈັບ​ກຸມ​ຜູ້​ກໍ່­ກວນ ແລະ ທຳ­ລາຍ​ຄວາມ​ສະ­ຫງົບ​ຂອງ​ສັງ­ຄົມ ໂດຍ​ໄດ້​ຕັດ­ສິນ​ຈຳ​ຄຸກ​ຜູ້​ກະ­ທຳ​ຜິດ 15 ຄົນ ໃນ​ວັນ​ທີ 30 ເດືອນ​ກໍ­ລະ­ກົດ​ປີ​ນີ້ ຢູ່​ເມືອງ​ບຽນ​ຮົວ ແຂວງ​ດົງ​ນາຍ​ເປັນ​ເວ­ລາ​ແຕ່ 8-12 ເດືອນ ພວກ​ທີ່​ຕິດ​ຄະ­ດີ​ນີ້ ມີ​ຄວາມ​ຜິດ​ຖານ​ໄດ້​ເຮັດ​ໜ້າ­ທີ່​ເປັນ​ຫົວ​ໂປ່​ນຳ­ພາ​ຂະ​ບວນ​ຍົກ​ປ້າຍ​ປະ​ທ້ວງ ຄັດ­ຄ້ານ ຮ່າງ​ກົດ­ໝາຍ​ກ່ຽວ​ກັບ​ໜ່ວຍ​ປົກ­ຄອງ ແລະ ເສດ­ຖະ­ກິດ​ພິ­ເສດ ຂະ​ບວນ​ທີ່​ວ່າ​ນີ້ ໄດ້​ໃຊ້​ເສັ້ນ­ທາງ​ຫຼວງ​ເລກ​ທີ 1A ສູ່​ເສັ້ນ­ທາງ​ວັນ​ທວນ​ຂອງ​ຕົວ​ເມືອງ​ບຽນ​ຮົວ ເຊິ່ງ​ໄດ້​ທຳ­ລາຍ​ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ສັງ­ຄົມ.

ຂ່າວທີ່ກ່ຽວຂ້ອງ