ຂ່າວຫຼ້າສຸດ

ເສັ້ນທາງໃນເມືອງໄຊທານີ ເສຍຫາຍ 23 ເສັ້ນ ລວມມູນຄ່າ 27 ຕື້ກວ່າກີບ

282 14 ກ.ຍ. 2018 ຂ່າວໜ້າ​ໜຶ່ງ
ເສັ້ນທາງໃນເມືອງໄຊທານີ ເສຍຫາຍ 23 ເສັ້ນ ລວມມູນຄ່າ 27 ຕື້ກວ່າກີບ

    ມາ​ຮອດ​ປັດ­ຈຸ­ບັນ ລະ­ດັບ​ນ້ຳ​ງື່ມ​ໄດ້​ຫຼຸດ​ລົງ ແຕ່​ລະ­ດັບ​ນ້ຳ​ຍັງ​ສືບ­ຕໍ່​ຖ້ວມ​ຂັງ​ບາງ​ເສັ້ນ­ທາງ ແລະ ບ້ານ​ເຮືອນ​ປະ­ຊາ­ຊົນ ສົ່ງ​ຜົນ​ໃຫ້­ການ​ສັນ­ຈອນ​ຍັງ​ເກີດ​ຄວາມ​ຫຍຸ້ງ­ຍາກ ແລະ ປະ­ຊາ­ຊົນ​ບາງ​ຈຳ­ນວນ ຍັງ​ບໍ່​ສາ­ມາດ​ຍົກ­ຍ້າຍ​ເຂົ້າ​ຢູ່​ໃນ​ບ້ານ​ເຮືອນ​ຂອງ​ຕົນ​ເອງ​ໄດ້

    ທ່ານ ຄຳ​ຜົງ ແພງ​ສີ​ສົມ​ບຸນ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ ເມືອງ​ໄຊ​ທາ­ນີ ໄດ້​ກ່າວ​ໃຫ້​ສຳ­ພາດ​ໃນ​ວັນ​ທີ 11 ກັນ­ຍາ 2018 ວ່າ: ມາ​ຮອດ​ປັດ­ຈຸ­ບັນ ນ້ຳ​ງື່ມ​ໄດ້​ຫຼຸດ​ລະ­ດັບ​ລົງ ແຕ່​ຫຼາຍ​ບ້ານ​ໃນ​ເມືອງ​ໄຊ​ທາ­ນີ ປະ­ຊາ­ຊົນ​ຍັງ​ບໍ່​ສາ­ມາດ​ຍ້າຍ​ເຂົ້າ​ໄປ​ຢູ່​ເຮືອນ​ຂອງ​ຕົນ​ເອງ​ໄດ້ ເນື່ອງ​ຈາກ​ນ້ຳ​ຍັງ​ສືບ­ຕໍ່​ຖ້ວມ​ຂັງ ແລະ ເສັ້ນ­ທາງ​ໃນ​ເມືອງ​ມາ​ຮອດ​ປັດ­ຈຸ­ບັນ ໄດ້​ຮັບ​ຄວາມ​ເສຍ​ຫາຍ​ທັງ​ໝົດ 23 ເສັ້ນ ລວມ​ມູນ​ຄ່າ​ເສຍ​ຫາຍ​ເບື້ອງ​ຕົ້ນ 27 ຕື້​ກີບ.

    ມາ​ເຖິງ​ປັດ­ຈຸ­ບັນ ເສັ້ນ­ທາງ​ທີ່​ໄດ້​ຮັບ​ຜົນ​ກະ­ທົບ​ໃນ 23 ເສັ້ນ ໃນ​ນັ້ນ ສາ­ມາດ​ເດີນ­ທາງ​ສັນ­ຈອນ​ໄດ້​ປົກ­ກະ­ຕິ​ແມ່ນ​ເສັ້ນ­ທາງ​ດິນ​ແດງ ແຕ່​ທາງ​ເລກ 10 ທົ່ງ​ມັ່ງ-ໂພນ​ແພງ-ຫົວ​ນາ ເສັ້ນ­ທາງ​ປູ­ຢາງ 2 ຊັ້ນ ແຕ່​ທາງ​ເລກ 10 ທ່າ​ສະ­ຫວ່າງ-ໂຮງ­ຮຽນ​ວິ­ທະ­ຍາ­ຄານ​ປ້ອງ​ກັນ​ຄວາມ​ສະ­ຫງົບ​ເວີນ​ຄຳ ເສັ້ນ­ທາງ​ປູ­ຢາງ 2 ຊັ້ນ ແຕ່​ຫຼັກ 19 (13 ໃຕ້)-ນາ­ສາ​ລາ-ທ່າ​ດິນ​ແດງ-ນາ​ພອກ ເສັ້ນ­ທາງ​ເລກ 10 ແລະ ເສັ້ນ­ທາງ​ແຕ່​ຂົວ​ນ້ຳ​ເຄັມ-ບ້ານ​ນາ​ຄູນ​ນ້ອຍ ສ່ວນ​ເສັ້ນ­ທາງ​ອື່ນໆ​ແມ່ນ​ນ້ຳ​ກຳ­ລັງ​ຫຼຸດ​ລະ­ດັບ​ລົງ.

    ສຳ­ລັບ​ທິດ​ທາງ​ແຜນ­ການ​ໃນ­ຕໍ່­ໜ້າ ພາຍ­ຫຼັງ​ນ້ຳ​ໄດ້​ຫຼຸດ​ລະ­ດັບ​ລົງ​ສູ່​ສະ­ພາບ​ປົກ­ກະ­ຕິ ທາງ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ ເມືອງ​ໄຊ​ທາ­ນີ ໄດ້​ສະ­ເໜີ​ຂໍ​ງົບ­ປະ­ມານ​ຈາກ​ນະ­ຄອນ­ຫຼວງ​ວຽງ​ຈັນ ເພື່ອ​ຈະ​ນຳ​ມາ​ຟື້ນ​ຟູ​ສະ­ພາບ​ຫົນ­ທາງ​ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ ເພື່ອ​ອຳ­ນວຍ​ຄວາມ​ສະ­ດວກ​ໃນ​ການ​ສັນ­ຈອນ​ໄປ​ມາ​ຂອງ​ປະ­ຊາ­ຊົນ.

    ນອກ​ນີ້ ລະ­ດັບ​ນ້ຳ​ງື່ມ​ມາ​ຮອດ​ວັນ​ທີ 11/09/2018 ເວ­ລາ 16:00ໂມງ ແທກ​ລະ­ດັບ​ນ້ຳ​ໄດ້ 13,02 ແມັດ ແລະ ຮອດ​ວັນ​ທີ 12/09/2018 ເວ­ລາ 7 ໂມງ ແທກ​ໄດ້ 12,85 ແມັດ.

ຂ່າວທີ່ກ່ຽວຂ້ອງ