ຂ່າວຫຼ້າສຸດ

ຊິມ​ບັບ​ເວ ຫ້າມ​ການ​ຊຸມນຸມ​ຢູ່​ໃນ​ນະຄອນຫຼວງ​ຮາ​ຣາ​ເຣ ເພື່ອ​ຄວບ​ຄຸມພະ​ຍາດ​ອະຫິ​ວາ

58 14 ກ.ຍ. 2018 ຂ່າວຕ່າງປະເທດ
ຊິມ​ບັບ​ເວ ຫ້າມ​ການ​ຊຸມນຸມ​ຢູ່​ໃນ​ນະຄອນຫຼວງ​ຮາ​ຣາ​ເຣ ເພື່ອ​ຄວບ​ຄຸມພະ​ຍາດ​ອະຫິ​ວາ

     ຕຳຫຼວດ​ໃນ​ຊິມ​ບັບ​ເວ ໄດ້​ມີ​ຄຳ​ສັ່ງ​ຫ້າມ​ອອກ​ມາ​ເມື່ອ​ວັນ​ທີ 12 ກັນຍາ​ນີ້ ໂດຍ​ຫ້າມ​ການ​ຊຸມນຸມ​ທຸກໆ​ຮູບ​ການ ຢູ່​ໃນ​ນະຄອນຫຼວງ​ຮາ​ຣາ​ເຣ ທັງ​ນີ້​ກໍ​ເພື່ອ​ເປັນ​ການ​ຄວບ​ຄຸມ ການ​ແພ່​ລາມ​ຂອງ​ພະຍາດ​ອະຫິ​ວາ ຫຼັງ​ຈາກ​ທີ່​ມີ​ຜູ້​ເສຍ​ຊີວິດ​ຍ້ອນ​ພະຍາດ​ນີ້​ແລ້ວ 21 ຄົນ.

    ໃນ​ຖະແຫຼງການ​ສະບັບ​ໜຶ່ງ ໂຄສົກ​ຂອງ​ອົງການ​ຕຳຫຼວດ​ຊິມ​ບັບ​ເວ ໄດ້​ເລັ່ງ​ຊຸກຍູ້​ປະຊາຊົນ ໃຫ້​ປະຕິບັດ​ຕາມ​ຄຳ​ສັ່ງ​ຫ້າມ ເນື່ອງ​ຈາກ​ວ່າການ​ເຮັດ​ຄື​ແນວ​ນີ້ ຈະ​ເປັນ​ການ​ຊ່ວຍ​ສະກັດ​ກັ້ນ ການ​ແພ່​ລາມ​ຂອງ​ພະຍາດ ແຕ່​ບໍ່​ໄດ້​ແຈ້ງ​ໃຫ້​ຮູ້​ວ່າ​ຄຳ​ສັ່ງ​ຫ້າມ​ນີ້ ຈະ​ແກ່ຍາວ​ຮອດ​ເວລາ​ໃດ. ໃນ​ຂະນະ​ດຽວ​ກັນ ລັດຖະມົນຕີ​ສາທາລະນະ​ສຸ​ຂອງ​ຊິມ​ບັບ​ເວ ໃຫ້ການ​ຢັ້ງຢືນ​ວ່າ ຈຳນວນ ຜູ້​ຕິດພະຍາດ​ອະຫິ​ວາ​ໄດ້​ເພີ່ມ​ຂຶ້ນ​ເປັນ 3.000 ກວ່າ​ຄົນ ແລະ​ພະຍາດ​ນີ້​ກໍ​ໄດ້​ແພ່​ລາມ​ອອກ​ໄປ ນອກ​ພື້ນ​ທີ່​ນະຄອນຫຼວງ​ຮາ​ຣາ​ເຣ.

    ກ່ອນ​ໜ້າ​ນັ້ນ​ໜຶ່ງ​ວັນ ຊິມ​ບັບ​ເວ​ກໍ​ໄດ້​ປະກາດ​ພາວະ​ສຸກ​ເສີນ ຍ້ອນ​ເກີດ​ການ​ລະບາດ ຂອງ​ພະຍາດ​ອະຫິ​ວາ ຢູ່​ໃນ​ນະຄອນຫຼວງ ຮາ​ຣາ​ເຣ. ຊິມ​ບັບ​ເວ​ໄດ້​ປະ​ເຊີນ​ກັບ​ການ​ລະບາດ ຂອງ​ພະຍາດ​ອະຫິ​ວາ​ຄັ້ງ​ໃຫຍ່​ສຸດ​ເມື່ອ​ປີ 2008 ຊຶ່ງ​ໃນ​ຄັ້ງ​ນັ້ນ​ມີ​ຂຶ້ນ​ໃນ​ເວລາ​ທີ່​ເກີດ​ວິ​ກິດ​ການ ເສດຖະກິດ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 4.000 ກວ່າ​ຄົນ ແລະ​ອີກ 40.000 ຄົນ​ຕ້ອງ​ໄດ້​ຮັບ​ການ ປິ່ນປົວ.

 

ຂ່າວທີ່ກ່ຽວຂ້ອງ